মীয়াম্না পাম্নরবা গুজরাতকী চীফ মিনিস্তর ভুপেন্দ্র ভাই পতেল, কেন্দ্রগী মন্ত্রীমন্দলগী ঐগী মরুপ অমসুং মহাক্কী পুন্সি চুপ্পা মশামক ওজা অমনি হায়না শক্তাক্লিবা পুরুসোত্তম রুপালা জি, হৌখিবা ভারতকী সাধরন মীখলদা ভোৎ মশিং খ্বাইদগী য়াম্না ফংখিবা সি.আর পতিল জি, গুজরাত সরকারগী মিনিস্তরশিং, ওল ইন্দিয়া প্রাইমারি তিচর্স এসোসিএসনগী মেম্বরশিং, লৈবাক্কী মফম কয়াদগী লাক্লিবা ওজাশিং, ইবুংঙো অমসুং ইবেম্মাশিং!

ওল ইন্দিয়া প্রাইমারি তিচর্স এসোসিএসনগী জাতি থাক্কী মীফমদা শরুক য়ানবা ঐহাক চেবাউ পীরকপা অসিদা ঐ হরাওই। নিংতম্বগী অমৃত কাল অসিদা, চাউখৎলবা ভারত অমা শেমগৎনবা ৱারেপ অসিদা ওজা খুদিংমক্না মরুওইবা থৌদাং অমা লৌগনি। ঐনা গুজরাত্তা লৈরিঙৈদা, রাজ্য অসিদা লাইরিক-লাইশুগী লমদা অওনবা পুরক্নবা প্রাইমারি ওজাশিংগা থবক তৌমিন্নখি। মতম অমদা গুজরাত্তা স্কুল তম্বা তোকপগী চাং চাদা ৪০ ওইরমখি হায়না চীফ মিনিস্তরনা ফোঙদোকখি। হৌজিক মসি চাদা ৩ গী মখাদা লৈরে হায়না চীফ মিনিস্তরনা হায়খি। মসি গুজরাতকী ওজাশিংগী মতেং খক্তনা পাংথোকপা ঙমখিবনি।

গুজরাতকী ওজাশিংগা তিন্নবদগী ফংলকপা লৌশিং অসি থৌশিল অমা শেম্নবা জাতিগী থাক্তসু ঐগী মতেং ওইখি। স্কুলশিংদা তোইলেত লৈতদবদগী নুপীমচাশিং স্কুল কাবা তোকখি হয়না হৌজিক রুপালা জিনা হায়খি। মরম অদুনা স্কুলশিংদা নুপীমচাশিং তোইলেতশিং শানবা অখন্নবা খোঙজং অমা পায়খৎলে। ত্রাইবেলশিংগী লমদমদা সাইন্স অসি তম্লমদে। হৌজিক ওজাশিংনা ত্রাইবেলশিংগী লমদমশিংদা সাইন্স তম্বীবদগী ঐগী ত্রাইবেল ইচাশিং দোক্তরশিং অমসুং ইঞ্জিনিয়ারশিং ওইরক্লে।

ঐনা মপান লৈবাকশিংগী লুচিংবশিংগা উনবা মতমদা, মখোয়গী পুন্সিদা ভারতকী ওজাশিংনা পাংখিবা মতেং অদু য়াম্না চাউনা শিংথাখি। ঐনা প্রধান মন্ত্রী ওইরবা মতুংদা, ঐগী অহানবা মপান লৈবাক্তা চৎপা খোঙচৎ ভুতান্দা ওইখি। ঐনা ভুতানগী নিংথৌগা ফম্মিন্নবা মতমদা, মখোয়গী ইমুং-মনুংগী মীওই অয়াম্বা ভারতকী ওজাশিং লাইরিক তম্বীরকপগী মতাংদা ফোঙদোকখি। মসি মহাক্না চাউথোকচবা অমগা লোয়ন্না হায়খি। ঐনা সাউদি অরাবিয়াদা চৎপা মতমদা, লৈবাক অসিগী নিংথৌনা মহাক্কী অঙাং ওইরিঙৈগী ওজা অদু গুজরাত্তগীনি হায়না তমখি। হন্দক দব্লিউ.ঐচ.ওগী তেদ রোসনা ভারতকী ওজাশিংনা মহাক্কী অঙাং ওইরিঙৈ তাঙ্কক্তা মতেং পাংখিবা অদু পনখি। মালেমগী মফম কয়াদা ভারতকী ওজাশিংগী মুৎপা নাইদ্রবা মগুনশিং লৈহৌরে, মীয়াম্না মীরোল কয়াগী মতুংদা মখোয় নিংশিংলি।

মরুপশিং,

মহাক পুন্সি চুপ্পা ওজা অমনি হায়না রুপালা জিনা চাউথোকচনা হায়রি। ঐ ইশামক ওজা অমা নত্তে। ঐ পুন্সি চু্প্পা তম্লিবা মহৈরোয় অমনি হায়না ঐনা চাউথোকচনা হায়রি। খুন্নাইগী থৌদোক-ৱাথোকশিং কমদৌনা কুপ্না য়েংগনি হায়বা ঐনা অদোমদগী তম্লি। য়াংনা হোংলিবা ২১শুবা চহিচা অসিদা ভারতকী লাইরিক তাকপী-তম্বীবগী থবক হোংলি, ওজাশিং হোংলি, মহৈরোয়শিংসু হোংলি। মমাঙদা মহৈরোয়শিংনা খুদোংচাদবা কয়া পুখৎলক্ত্রবসু দরকার ওইবা মচাকশিং ৱাৎপগী খুদোংচাদবা কয়া মায়োক্নখি। হৌজিক ইনফ্রাস্ত্রকচর অমসুং ওজা ৱাৎপা তপ্ন-তপ্না কোকহল্লে অমসুং মহৈরোয়শিং হরাওরে।

নহা ওইরিবা মহৈরোয়শিংগী থাজবা অমসুং কিদবা অসিনা ওজাশিংদা শিংনবা অমা ওইরে অমসুং অনৌবা থবকশিং পায়খৎনবা খন্ন-নৈনবা চৎথরে। মহৈরোয়শিং খঙবা-হৈবা হেনগৎলকপদগী ওজাশিং নমদুনা লৌশিং হেনগৎহল্লে। ঐখোয়গী লাইরিক-লাইশু তম্বগী তুংলমচৎ অসি কমদৌনা হায়রিবা খুদোংচাদবশিং অসি ওজাশিংনা কোকহনবগে হায়বগী মখা পোল্লে। হায়রিবা অৱাবশিং অসিনা মীওই অমা চাউখৎনবা অমসুং শীনফম অমদা লৈরিবশিং ফগৎনবা খুদোংচাবশিংনি হায়না ওজাশিংনা উগদবনি। মখোয় তম্নবা, তমদনবা অমসুং অমুক হন্না তম্নবা খুদোংচাবা অমা পীগদবনি।

কমদৌনা হিরম অমা মমুৎ তানা খঙগদগে হায়বা তাক্নবা তেক্নোলোজি অমতা মালেম অসিদা লৈতে অমসুং ই-পাউ কা হেন্না ফংবা মতমদা মরুওইবা হিরম অমদা মীৎয়েং চঙবদা মহৈরোয়শিংদা খুদোংচাদবা অমা থোকহল্লি। ২১শুবা চহিচাদা মহৈরোয়শিংগী পুন্সিদা ওজাশিংগী থৌদাং অসি হান্নদগী হেন্না মরুওইরে। মমা-মপা খুদিংমক্না মখোয়গী মচাশিং খ্বাইদগী ফবা ওজাশিংনা তাকপী-তম্বীরি হায়না খল্লি অমসুং মখোয়গী থাজবশিং ওজাশিংগী মফমা থম্লি।

মরুপশিং,

মহৈরোয়শিংনা অদোমদগী তম্লি হায়বা অদোম খঙগদবনি, অদোমগী ৱাখল্লোন, অদোমগী নুমিৎ খুদিংগী লমচৎ-শাজৎ, অদোমগী ৱাঙাং, অদোম্না কমদৌনা ফম্বা অমসুং লেপ্পগে হায়বা মহৈরোয়শিংনা তম্লি। মহৈরোয়শিংনা খাংবা কনবা অমসুং অতোপ্পশিং মতেং পাংবগুম্বা গুনশিং অদোমদগী তম্লি। অফবা মী অমা ওইনবা গুনশিং মহৈরোয়শিংনা ওজাদগী তম্লি। মরম অদুনা প্রাইমারি ওজাশিংগী থৌদাং য়াম্না চাউই। ওজা অমা হায়বসি অঙাং অমনা মহাক্কী ইমুংগী মপান্দা মতম শাংনা লৈমিন্নবা অহানবা মীওই অমনি। মসি খঙনা, ভারতকী তুংগী মীরোলশিং মপাঙ্গল কনখৎহন্নবা অদোম্না থৌদাং লৌগদবনি।

মরুপশিং,

হৌজিক অদোম্না থবক তৌরিবা স্কুলশিং অদুদা অনৌবা ইজুকেসন পোলিসি চৎনরে নত্ত্রগা চৎনরগনি। নিউ ইজুকেসন পোলিসি অসি শেম্নবা ওজা লাখ কয়ানা মতেং পাংলকখিবা অসিগীদমক চাউথোকচবা ফাওই। ২১শুবা চহিচাগী দরকার ওইবশিংগী মতুংইন্না ঙসি ভারতনা অনৌবা সিস্তেমশিং শেমগৎলি অমসুং মসি ৱাখলদা থমদুনা অনৌবা নেসনেল ইজুকেসন পোলিসি অমা শেম্লে। মহৈরোয়শিং লাইরক্তগী ফংবা লৌশিং খক্তদা ফাজিল্লগা থম্বা অরিবা মরী লৈনদবা লাইরিক-লাইশু তাকপী-তম্বীগী থবক অদু অনৌবা নেসনেল ইজুকেসন পোলিসিনা মহুৎশীল্লে। অনৌবা পোলিসি অসি থবক ওইনা পাংথোক্তুনা ফংবা লৌশিংদা য়ুম্ফম ওইবনি।

চহি কয়া লাইরিক তম্বগী মিংদা স্কুলশিংদা লাইরিক খক্তদগী ফংবা লৌশিং পীদুনা লাক্লি। নিউ ইজুকেসন পোলিসি অসিনা অরিবা মরী লৈনদবা সিস্তেম অমসি মহুৎশীল্লে। নিউ ইজুকেসন পোলিসি অসি থবক্তা য়ুম্ফম ওইবনি। হৌজিক অদোম য়াম্না তাকপীরে অমসুং য়াম্না তম্লে।

মরুপশিং,

ঐখোয়গী খুঙ্গং অমসুং অপীকপা সহরশিংগী ওজাশিংদা মতেং য়াম্না ওইনবা নিউ ইজুকেসন পোলিসি অসিদা প্রোবিজন অমা য়াওরে। মসিগী প্রোবিজন অসি ইমা লোলদা লাইরিক তম্বনি। বৃতিসনা ভারত অসি চহি ২০০ পানলম্লবসু ইংলিস লোন অমসি মীওই খর খক্তগী ওইরমখি। ইংলিস লোলদা তম্বদা হেন্না মরুওইনা লৌখিবদগী মশাগী লোলশিং তম্লকপা প্রাইমারি ওজাশিং খুদোংচাদবা কয়া মায়োক্নখি। অদুবু হৌজিক পাল্লিবা সরকার অসিনা লম-লমগী লোলশিং লাইরিক তম্বা হৌদোক্তুনা অওনবা পুরক্লে, মসিনা লম-লমগী লোলশিং খঙবা ওজাশিংগী থবক মপুংফাহল্লে। লম লমগী লোলশিংদা লাইরিক তম্নবা অমসুং ওজাশিংগী পুন্সি মহিং ফগৎনবা সরকারনা অকনবা থবক পায়খৎলি। মসিদগী অদোম্না কান্নবা য়াম্না ফংগনি। মসিনা ঐখোয়গী খুঙ্গংশিংগী নহারোলশিং, লায়রবা ইমুংশিং, ওজাশিং কান্নবা পীরগনি অমসুং থবক ফংবগী খুদোংচাবা ফংলগনি।

মরুপশিং,

মীওই কয়া ওজা ওইনিংনবা ফিবম অমা শেমগৎনবগী তঙাইফদবা লৈরে। ওজাগী শীনফম অসি য়াম্না পাম্নবা শীনফম অমা ওইহনগদবনি। ওজা খুদিংমক মহাক্কী থম্মোয় মনুংদগী ওজা অমা ওইগদবনি।

ঐনা চীফ মিনিস্তর ওইরকপা মতমদা লনাই ওইনা পাংথোক্কে খনবা থবক অনি লৈখি। অহানবদা, ঐগী স্কুলগী মরুপ-মপাংশিং চীফ মিনিস্তরগী লৈফমদা কৌবা অমসুং অনিশুবদা ঐগী ওজা পুম্নমক ইকায়খুম্নবা উৎপা অসিনি। ঙসি ফাওবা ঐনা ঐগী ওজাশিংগা পাউ ফাওনরি। ওজাশিং অমসুং মহৈরোয়শিংগী মরক্তা লৈনবা মরী শোকচিল্লক্লিবা অসি অফবা নত্তে। শান্ন-খোৎনবগী লমদা ওজা অমসুং মহৈরোয়শিংগা অফবা মরী লৈনরি। লাইরিক তম্বা লোইখ্রবা মতুংদা মহৈরোয়শিংগা স্কুলগী মরক্তা মরী লৈনদ্রে অমসুং মহৈরোয়শিংনা স্কুল কাউরে। মহৈরোয়শিং অমসুং ওজাশিং ফাওবা স্কুল অমা লিংখৎখিবগী তারিখ খঙদ্রে। স্কুলগী মপোক নুমিৎ পাংথোকপা অসিনা স্কুলশিং অমসুং মহৈরোয়শিংগী মরক্তা শম্নদ্রিবা অসি ফহনগনি।

স্কুলশিংদা চাক পীজবগী অসিনা খুন্নাই অমা অমতা ওইনা পুনশিন্দুনা অঙাং অমতা স্কুলদা চাক লামহন্দ্রে। অঙাংশিং চৎনবীশিং তম্নবা অমসুং চাক-ইন্সাং হাপ্পগী মতাংদা তম্নবা খুঙ্গংশিংদগী অহল-লমনশিং মহৈরোয়শিংগী সেবা তৌনবা কৌগদবনি।

অঙাংশিংদা লু-নানবগী হৈনবী লৈহনবা অসি য়াম্না মরুওই। ঐনা গুজরাতকী চীফ মিনিস্তর ওইরিঙৈ মতমদা ত্রাইবেলগী মফম অমদা চৎপদা ত্রাইবেলগী লমদমগী ওজা অমনা মহাক্কী অমনবা সারি অদুগী মচেৎ অমা শেগাইরগা অঙাংশিংগী মমাই অমসুং নাতোন তৈথোক্নবা রুমাল অমা শেমখি। ত্রাইবেলগী স্কুল অমদা ওজা অমনা মহৈরোয়শিংনা মশাগী শক্তমশিং য়েংনবা মিংশেল অমা থমখি। মসিগী অপীকপা অহোংবা অসিনা মহৈরোয়শিংগী থাজবা য়াম্না চাউনা হেনগৎহল্লি।

মরুপশিং,

ওজাশিংনা অহোংবা মচা অমা পুরকপদা নহা ওইরিবা মহৈরোয়শিংগী পুন্সিদা অচৌবা অহোংবা পুরক্কনি। ওজাশিং থাক ৱাংনা থম্বা ভারতকী চৎনবীশিং ওজা খুদিংমক্না মাঙলোমদা পুখৎকদবনি অমসুং চাউখৎলবা ভারত অমগী মঙলান থবক ওইনা ওন্থোক্কদবনি। ঐখোয়গী চৎনবীশিংনা ওজাশিংদা থম্লিবা থাজবা অসিদা ঐ থাজবা থম্লি। অদোমগী মসিগী চৎনবী অসি, চিংলেম্বা অসি মাঙলোমদা পুখৎতুনা অনৌবা ভারত অমগী মঙলান মঙফাওনহনগনি। মসিগী থাজবা অসিগা লোয়ন্না, ময়াম পুম্নমক ঐনা থাগৎচরি অমসুং অদোমগী মফমদা য়াইফ-পাউজেল পীজরি।

খুরুমজরি!

*****