মে ১০দা প্রধান মন্ত্রী শ্রী নরেন্দ্র মোদী রাজস্থানদা চৎকনি। অয়ুক পুং ১১ রোম তাবদা, প্রধান মন্ত্রী নাথদ্বারাদা লৈবা শ্রীনাথজি লাইশঙদা চৎকনি। অয়ুক পুং ১১:৪৫ রোমদা তাবদা, মহাক্না নাথদ্বারাদা চাউখৎ-থৌরাংগী তোঙান-তোঙানবা প্রোজেকশিং কৎথোক্কনি অমসুং উরেপ-উয়ুং তমগনি। তুংদা, নুংথিল পুং ৩:১৫ রোম তাবদা প্রধান মন্ত্রীনা অবু রোদতা লেবা ব্রাহ্মকুমারিসকী শান্তিবন কমপ্লেক্সতা চৎকনি।

নাথদ্বারাদা প্রধান মন্ত্রী

প্রধান মন্ত্রীনা লুপা করোর ৫৫০০ হেনবগী ইনফ্রাস্ত্রকচর প্রোজেকশিং কৎথোক্কনি অমসুং উরেপ-উয়ুং তমগনি। হায়রিবা প্রোজেকশিং অসিনা লমদম অসিদা ইনফ্রাস্ত্রকচর অমসুং লম্বী-থোং ফগৎহনগনি। লম্বী অমসুং রেল সেক্তরগী প্রোজেকশিংনা চৎথোক-চৎশিন অমসুং ললোন-ইতিক্কী থবকশিং ফগৎহনগনি অমসুং লমদম অসিগী মীয়ামগী শেন-থুম অমসুং খুন্নাইগী ফিবম ফগৎহনগনি। প্রধান মন্ত্রীনা রাজসামান্দ অমসুং উদয়পুরদা লেন অনিদা ওনখৎনবা লম্বী শেম্বগী প্রোজেকশিং উরেপ-ঊয়ুং তমগনি।

উদয়পুর রেলৱে স্তেসন অমুক হন্না শেমগৎনবা প্রধান মন্ত্রীনা উরেপ-উয়ুং তমগনি। মহাক্না গেজ ওনখৎপগী প্রোজেক অমসুং নাথদ্বারাদগী নাথদ্বারাদা তাউন ফাওবা অনৌবা লাইন অমা শেমগৎনবা উরেপ-উয়ুং তমগনি।

মখা তানা প্রধান মন্ত্রীনা, এন.ঐচ-৪৮গী উদয়পুর-সামালাজি সেক্সনগী কিলোমিতর ১১৪ শাংবা লেন তরুক, এন-ঐচ-২৫গী বার-বিলারা-জোধপুরগী কিলোমিতর ১১০ শাংবা শরুক পাকথোকপা অমসুং  লেন ৪দা ওনখৎপগী থবকশিং মীয়ামদা কৎথোক্কনি।  

ব্রাহ্মা কুমারিসকী শান্তিবন কমপ্লেক্সতা প্রধান মন্ত্রী

লৈবাক শীনবা থুংনা স্পিরিচুএলগী থবকশিং ফগৎহন্নবা প্রধান মন্ত্রীনা অখন্নবা মীৎয়েং চঙলে। মসিগী মখা তারকপা ওইনা, প্রধান মন্ত্রীনা অবু রোদতা লেবা ব্রাহ্মকুমারিসকী শান্তিবন কমপ্লেক্সতা চৎকনি অমসুং সুপর স্পিসিএলিতি চেরিতেবল গ্লোবেল হোস্পিতাল শানবা, সিবমনি ওল্দ এজ হোমগী অনিশুবা ফেজ অমসুং নর্সিং কলেজ পাকথোক-চাউথোক্নবা উরেপ-উয়ুং তমগনি। লম একর ৫০ হেনবদা সুপর স্পিসিএলিতি চেরিতেবল গ্লোবেল হোস্পিতাল শাগনি। মসিদা মালেম থাক্কী অনা-লায়য়েংগী খুদোংচাবশিং ফংহনগনি অমসুং মরুওইনা লমদম অসিগী লায়রবা অমসুং ত্রাইবেলশিংদা অখন্নবা খুদোংচাবা পীগনি।

******