মীয়ামদা অশেংবা ভারত মশক তাকপদা প্রধান মন্ত্রী শ্রী নরেন্দ্র মোদীগী মমিং চৎলবা রেদিওগী থৌরম ‘মন কী বাত’না মরুওইবা থৌদাং অমা লৌরে হায়বা ভারতকী পাউমীশিংগী চাদা ৭৬না থাজৈ হায়না ইন্দিয়ান ইন্সতিতুৎ ওফ মাস কম্মুনিকেসন(আই আই এম সি)না পাংথোকপা অখন্নবা থিজিনবা অমদা খঙলে। থৌরম অসিনা হৌজিক মীয়াম লৈবাক্কী অতোপ্পা মফমশিংগী মতাংদা খঙহল্লে অমসুং মীয়াম্না মখোয়গী থাগৎপা হৌরে। ভারতকী মনুং-হুঞ্জিনবা মফমশিংদা লৈরিবা মীয়ামগী পুন্সিদা অহোংবা অমা পুরক্নবা মশাগী ওইজবা থিদনা হোৎনরিবশিং মশক তাক্নবা মন কী বাত অসি মফম অমা ওইরে হায়না পাউখুম পীরকপশিংগী চাদা ৭৫না খনখি।

ইন্দিয়ান ইন্সতিতুৎ ওফ মাস কম্মুনিকেসন(আই আই এম সি)গী দিরেক্তর জেনেরেল প্রোফেসার সঞ্জয় দ্বিবেদিনা হায়খি থিজিনবা অসি ইন্সিতিতুৎ অসিগী আউতরিচ দিপার্তমেন্তনা এপ্রিল ১২দগী এপ্রিল ২৫,২০২৩ ফাওবা পাংথোকখি। থিজিনবা অসিদা মেদিয়াগা মরী লৈনবা মেদিয়া হাওস ১১৬, মহৈলোয়শঙশিং অমসুং য়ুনিভর্সিতিশিংগী মেদিয়াগী মহৈরোয়শিং য়াওনা পুন্না মীওই ৮৯০ শরুক য়াখি। মখোয়গী মনুংদা নুপী ৩২৬ অমসুং নুপা ৫৬৪ য়াওখি। পাউখুম পীরকখিবশিংগী চাদা ৬৬না চহি ১দগী ২৫ ফাওবগী মনুংদা লৈবা মীওইশিংনি।

পাউখুম পীরকখিবা মীওইশিংনা ফোঙদোরকপগী মতুংইন্না, ‘ লৈবাক্কী মরমদা খঙনিংবা’ অমসুং ‘লৈবাক্কীদমক প্রধান মন্ত্রীগী মঙলান’ হায়রিবা মরম অনি অসিনা থৌরম অসি তানবা মখোয়গী পু্ক্নিং থৌগৎখি হায়রি। করিগুম্বা মখোয়না তাঙ্কক অমা তাহৌদবা মতমদা কমদৌনা মখোয়না থৌরম অসি তাবগে হায়বগী মতাংদা পাউখুম পীরকপশিংদা হংবা মতমদা, অতোপ্পা মেদিয়মশিংদগী মখোয়না য়ু তুবানা চাদা ৬৩ হেন্না পামখি হায়না ফোঙদোকখি। ‘ মন কী বাত্ত’ মখোয়না তোঙান-তোঙানবা ৱাফমশিংদা প্রধান মন্ত্রীগী ৱারোল তাবদগী মখোয় গনতন্ত্রগী থবক-থৌরমশিংদা শরুক য়াবা মীওই অমা ওইনা পুক্নিংদা ফাওহল্লে হায়না পাউখুম পীরকখিবশিংগী চাদা ৭৬না ফোঙদোকখি।

প্রোফেসার দ্বিবেদিনা হায়খি মন কী বাত্তা প্রধান মন্ত্রীনা মীয়ামদা খ্বাইদগী য়াম্না ইথিল পীখিবা ৱাফমশিংগী মতাংদা খঙনবা থিজিনবা অসিনা হোৎনখি। মীওই চাদা ৪০না, থৌরম অসিগী খ্বাইদগী পামজবা থিম ইজুকেসন্না ওইখি অমসুং চাদা ২৬না মীয়ামগা নক্নবা থবক তৌরিবা মীওইশিংগী মতাংদা ফোঙদোকপা মীওইশিংগী ৱারিনা খ্বাইদগী ইথিল পীবা থিম ওইখি।

থৌরম অসিদা নৈনখিবা ৱাফমশিং মখোয়গী ইমুং-মনুংগা লোয়ন্না খন্ন-নৈনখি হায়না পাউখুম পীরকপশিংগী চাদা ২৬না ফোঙদোকখি, অদুগা চাদা ২৯না হিরমশিং মখোয়গী মরুপ-মপাংশিংগা খন্ন-নৈনখি। মন কী বাত তানবা  মীওই চাদা ১২না রেদিও, চাদা ১৫না তি.ভি অমসুং চাদা ৩৭না ইন্তরনেতকী প্লেতফোর্মশিং শীজিন্নখি হায়বা থিজিনবা অসিদগী খঙবা ঙম্লে।  

***********