প্রধান মন্ত্রী শ্রী নরেন্দ্র মোদীনা অরুনাচল প্রদেশকী চাউখৎ থৌরাং অসিদা মীয়াম্না ফাওরিবা ইথিলগী পাউখুম ওইনা অসুম্না হায়খি, “অরুনাচল প্রদেশকী মীয়াম অসি তোঙানবনি। মখোয়গী মফমদা লৈবাক নিংবগী ইথিলগী অৱাৎপা লৈতে। মসিগুম্বা অথোইবা রাজ্যসিগী থবক তৌবা ফংবা অমসুং মখোয়গী তসেংবা মতিকপু থবক্তা ওন্থোকপা ফংবসি ঐহাক্কী লাইবক ফবনি”। 

ভারত সরকার অমসুং অরুনাচল প্রদেশ সরকারনা পুন্না পায়খৎমিন্নবা থৌওং অমা ওইনা এপ্রিল 22, 2023দা পাংথোকপা কম্ম্যুনিকেসন, রেলৱে অমসুং ইলেক্ত্রোনিক্স অমসুং ITগী কেন্দ্র মন্ত্রী, শ্রী অশ্বিনী বৈস্নো; লো অমসুং জস্তিস্কী কেন্দ্র মন্ত্রী শ্রী কিরেন রিজিজু; অরুনাচল প্রদেশকী মুখ্য মন্ত্রী শ্রী পেমা খন্দু; কম্ম্যুনিকেসনগী কেন্দ্রগী রাজ্য মন্ত্রী শ্রী দেবুসিনহ চৌহান অমসুং অরুনাচল প্রদেশকী উপ মুখ্য মন্ত্রী শ্রী চৌনা মেন অমদি কেন্দ্র অমসুং রাজ্য সরকারগী সেনিয়র ওফিসরশিং য়াওবা থৌরম অমদা লৈবাক্কী মফমদা 4G মোবাইল তাৱর 254 খুৎশিন্নখ্রে।

তাৱরশিং অসিনা অরুনাচল প্রদেশকী খুঙ্গং 336 কোনগনি অমসুং মীওই লিশিং কয়াদা কান্নবা পীগনি। মসিগী বেনিফিশরীশিংনা হাই স্পীদ নেতৱর্ক কন্নেক্তিবিতী ফংবা ঙমহনগনি অমসুং এজুকেসন, হকশেল, ই-কম্মর্স অমসুং লৌউ-শিংউগুম্বা সেক্তর কয়াগী দিজিতেল সর্ভিসশিংগী কান্নবা লৌবা ঙমহন্দুনা লমদম অসিগী মীয়ামগী সোসিও ইকোনোমিক দিভেলপমেন্ত লৈহনগনি।

ভারত নেত স্কিমগী মখাদা গ্রাম পঞ্চায়ত 1,310 হেনববু ওপ্তিকেল ফাইবরনা শম্নহনখ্রবনি অমসুং দিজিতেল ইনক্লুজন লৈহন্নবগীদমক্তা তাৱর 1,156 হেন্না য়ুংবগী থৌরাংসু লৈরে। 5G সর্ভিস অসিসু ইতানগরদা হন্দক্তা হৌদোকখ্রে অমসুং অতোপ্পা মফমশিংদসু অথুবা মতমদা য়ৌহল্লগনি।

লাৱর দিবাং তম্পাক্কী খুঙ্গংদগী ভর্চুএলগী খুত্থাংদা কন্নেক্ত তৌখিবা বেনিফিশরী অমনা তেলিকোম কন্নেক্তিবিতী লৈরক্লিবা অসিদা নুংঙাইবা ফোংদোকখি।

অরুনাচল প্রদেশকী উপ মুখ্য মন্ত্রী, শ্রী চৌনা মেন্না মমাংগী চহি 8তা রাজ্য শিনবা থুংবদা রেলৱে, লম্বী-শোরোক অমসুং তেলিকম্ম্যুনিকেসনগী নিংথীরবা কন্নেক্তিবিতী লৈহনবগীদমক্তা ভারত সরকারনা হোৎনবীরিবশিং খুদিংবু থাগৎপা ফোংদোকখি।

কম্ম্যুনিকেসনগী কেন্দ্রগী রাজ্য মন্ত্রী, শ্রী দেবুসিনহ চৌহান্না শিংনবা কয়া মাইয়োক্নদুনা কন্নেক্তিবিতী পুরক্নবগীদমক্তা হোৎনখিবশিংবু থাগৎপা ফোংদোকপগা লোয়ননা ইতানগরদা নেস্নেল পোস্তেল হব শেম্লিবা অমসুং রাজ্যসিদা পোস্তেল কন্নেক্তিবিতী পুরক্নবগীদমক্তা পায়খৎলিবা খোঙথাং কয়াগী মতাংদসু পাউদমখি।

অরুনাচল প্রদেশকী মুখ্য মন্ত্রী, শ্রী পেমা খন্দুনা ঙসিগী নুমিৎ অসিদি পুৱারী ওইরবা নুমিৎ অমনি হায়খি। অরুনাচল প্রদেশক্তা ইং 2014গী মতুংদগী ইনফ্রাস্ত্রকচরদা অহোংবা কয়া লাক্তুনা রাজ্যসিবু পুমওন ওন্থোক্লে হায়না মহাক্না ফোংদোকখি। দিজিতেল ইনক্লুজন লৈবদগী শেঞ্জা থুমজা মুত্থৎপা অমসুং ই-গবর্নেন্সতা য়াম্না তেংবাংলে। ই-ওফিস অসিসু 100%গী চাংদা শিজিন্নরি অমসুং অরুনাচল প্রদেশ এসেমব্লীনা ই-বিধান প্রোজেক্তসু থবক্তা ওন্থোক্লে হায়না মহাক্না পনখি। ৱাৎহৌরিবা মফমশিং অসিসু তাইমলাইনগী মমাংদা কোনবা ঙম্নবগীদমক্তা অখন্নবা মিৎয়েং চঙলগা তেংবাংনবা অমসুং খ্বাইদগী অঙম্বা থাক্তা থবক শুবগী মথৌ তারি হায়না মহাক্না মখা তাখি। ৱান প্লস ৱান অসিবু অনি হায়না লৌদনা তরামাথোই হায়না লৌবগী মোদেলদা মহাক্না মীয়ামগী পুক্নিং চিংশিনখি। অরুনাচল প্রদেশ অসি নুমিৎ থোকপা মফম হায়না কৌবতা নত্তনা চাউখৎ থৌরাং হৌগৎলক্লিবা লমদম হায়নসু কৌনরে। 

লো অমসুং জস্তিসকী কেন্দ্রগী মন্ত্রী, শ্রী কিরেন রিজিজুনা প্রোজেক্ত কয়া পায়খৎপদা কেন্দ্র অমসুং রাজ্য সরকারগী ওফিসরশিংনা পুন্না হোৎনমিন্নবগী মথৌ তাবা হোল ওফ গবর্নমেন্ত এপ্রোচ অসিদা মিৎয়েং চঙখি। USOFকী মখাদা য়ুংবগী থৌরাং য়াৎলিবা লেমহৌরিবা 4G তাৱর 1,156কী মফম মশক খঙদোকপা লোইরে হায়না মহাক্না হায়খি। অতোপ্পা স্কিম অমা, হায়বদি, 4G সেচ্যুরেসন স্কিমগী শরুক অমা ওইনা কন্নেক্তিবিতী হেন্না ফগৎহন্নবগীদমক্তা 4G সাইত 2,424 শেমগনি, মসিদা OFCগী খুত্থাংদা শেমগদবা মফম 270, মাইক্রোৱেবকী 1,237 অমসুং VSATকী 917 য়াওরি। মখা তারকপা ওইনা, কন্নেক্তিবিতী নিংথীনা পীবা ঙম্নবগীদমক্তা সেতিলাইত কম্ম্যুনিকেসনসু শিজিন্নগনি। ভাইব্রেন্ত ভিলেজ প্রোগ্রাম অমসুং ফ্রন্তিয়র হাইৱেনা চাউখৎ থৌরাং পাক শন্না পুরক্তুনা মীয়ামগী পুন্সিদা অহোংবা পুরক্কনি হায়না মহাক্না মখা তাখি। মহাক্না রাজ্য সরকারনা হোৎনরিবশিংবু থাগৎলদুনা মার্চ 2024 ফাওবদা খুঙ্গং অমত্তা চিত্থহন্দনা কন্নেক্তিবিতী লৈহন্নবগীদমক্তা মিসন মোদতা থবক পায়খৎনবা হায়খি। ইং 2047 ফাওবদা ভারতপু চাউখৎপা লৈবাক অমা ওইহন্নবা থম্লিবা পান্দম অসি ফংবদা ঙমখৈগী লমদমশিংগী অচৌবা থৌদাং য়াওরি হায়না মহাক্না ফোংদোকখি।  

কম্ম্যুনিকেসন, রেলৱে অমসুং ইলেক্ত্রোনিক্স অমসুং ITগী কেন্দ্র মন্ত্রী, শ্রী অশ্বিনী বৈস্নোনা মহাক্কী ৱারোলদা খুদোংচাদবা মফম অমসুং অরুবা ফিভম কয়াগী মরক্তা তাৱরশিং অসি য়ুংখিবা অসিদি সবকা প্রয়াসকী ময়েক শেংলবা খুদম অমনি হায়না ফোংদোকখি। কম্ম্যুনিকেসন্না হায়বসি য়াম্না মরু ওই, মসিনা মীয়াম খুদিংগী খুদোংচাবগী থোঙ কয়া হাংদোক্লি হায়না মহাক্না হায়খি। কোবিদ মনুংদা বেনিফিশরীশিংগী মফমদা খুদোংচাবা অমসুং তেংবাং য়ৌহনবগী থৌওং অসি অতোপ্পা লৈবাকশিংদা য়াম্না লুনা থোকখি, অদুবু ভারতকী ওইনদি, ইন্দিয়া স্তেক, হায়বদি UPI, আধার, তেলিকোম নেতৱর্ক ইনফ্রাস্ত্রকচরশিংগী কান্নবশিং নিংথীনা লৌদুনা মীয়ামদা সেবা য়ৌহনবা অসি দিজিতেলগী খুত্থাংদা অমসুং বত্তন অমা ক্লিক তৌদুনাপাংথোকখি হায়না ৱাফম মহাক্না পনখি। ফীত 12600 ৱাংবা তৱাংদা তাৱর অমা য়ুংবগী খুদম পীরদুনা খুদোংচাদবা মফমদা থবক তৌবগী শিংনবশিং মায় পাক্না থেংনবগী ৱাফমদা মহাক্না মিৎয়েং চঙখি। থবক অসি মায় পাক্না পাংথোকপগীদমক্তা মহাক্না দিফেন্সকী ফোর্স, জিলাগী লৈঙাক্লোই, সর্ভিস প্রোভাইদর, কেন্দ্র অমসুং  রাজ্য সরকারগী ওফিসিএ অমসুং তোঙান-তোঙানবা এজেন্সীশিংবু থাগত্তুনা মহাক্কী ৱারোল লোইশিনখি।

ভারত সরকারনা অরুনাচল প্রদেশকী খ্বাইদগী মনুং হঞ্জিনবা খুঙ্গং অমসুং মীপুম খুদিংদা মালেমগী থাক্তা লৈবা কন্নেক্তিবিতী ফংহন্নবগীদমক্তা “সবকা সাথ, সবকা বিকাস, সবকা বিশ্বাস, সবকা প্রয়াস’কী মতুং ইন্না লেপ্পা নাইদনা হোৎনরি।

*****