প্রধানমন্ত্রীগী লোইশঙ
প্রধান মন্ত্রীনা নই দিল্লীগী বিজ্ঞান ভবন্দা ১৬শুবা সিভিল সর্ভিসেস নুমিত্তা ৱা ঙাঙখ্রে
মীওই ১৬তা প্রাইম মিনিস্তর্স এৱার্দ্স ফোর এক্সেলেন্স ইন পব্লিক এদমিনিস্ত্রেসন লান্থোকখ্রে
ই-বুক 'বিক্সিৎ ভারত – ইম্পৱারিং সিতিজন্স এন্দ রীচিং দি লাস্ত মাইল ভোল্যুম ১ অমদি ২' ফোঙখ্রে
"চাওখৎপা ভারত অমগীদমক, লৈঙাক্কী সিস্তেম্না মীচম মীয়ামগী অপাম্ববু শৌগৎকদবনি"
"মমাঙদা খন্নরম্বদি লৈঙাক্না পুম্নমক তৌগদবনি হায়বসিনি, অদুবু হৌজিক খন্নরিবনা লৈঙাক্না মীপুম খুদিংগীদমক থবক তৌগনি হায়বসিনি"
"লৈঙাক্কী খোল্লাউদি 'নেসন ফর্স্ত-সিতিজন ফর্স্ত' হায়বসিনি, ঙসিগী লৈঙাক্না চাকথুং ফিথুংদ্রবশিংদা মীৎয়েঙ চঙলি"
"ঙসিগী মঙলান চাউবা সিতিজনশিংনা সিস্তেমদা অহোংবা পুরক্নবগীদমক মতম কুইনা ঙাইবা পামদে"
"মালেমসিদা ভারতকী মতম য়ৌরক্লে হায়নরিবসিগা লোয়ননা, লৈবাকসিদা ব্যুরোক্রেসীনা মতম অমত্তা মাঙহল্লোইদবনি"
"অদোমগী ফিরেপ পুম্নমক্কী য়ুম্ফম মতম পুম্বদা লৈবাক্কী ইন্তরেস্ততা ওইগদবনি"
"পোলিতিকেল পার্তী অমনা তেক্সপেয়রশিংগী শেলবু মখোয়গী লূপকী কান্ননবা নৎত্রগা লৈবাক্কী কান্ননবা তৌবদা শীজিন্নরিবরা হায়বা নৈনবা অসি ব্যুরোক্রেসীগী মথৌনি
Posted On:
21 APR 2023 1:26PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি নই দিল্লীগী বিজ্ঞান ভবন্দা পাঙথোকপা ১৬শুবা সিভিল সর্ভিসেস দেগী থৌরমদা সিভিল সর্ভেন্তশিংগী মফমদা ৱা ঙাঙখ্রে। প্রধান মন্ত্রীনা প্রাইম মিনিস্তর্স এৱার্দ্স ফোর এক্সেলেন্স ইন পব্লিক এদমিনিস্ত্রেসনসু লান্থোকখি অমদি ই-বুক ‘বিক্সিৎ ভারত – ইম্পৱারিং দি সিতিজন্স এন্দ রীচিং দি লাস্ত মাইল’ ভোল্যুম ১ অমদি ২সু ফোঙখি।
তিল্লিবা মীয়ামদা ৱা ঙাঙলদুনা, প্রধান মন্ত্রীনা পুম্নমক্কী মফমদা সিভিল সর্ভিসেস নুমিৎনা লাকপদা নুংঙাইবা ফোঙদোকখি। প্রধান মন্ত্রীনা চহি অসিগী সিভিল সর্ভিসেস নুমিৎ অসি লৈবাকসিনা নীংতম্বা চহি ৭৫ মপুং ফারকপা অমদি চাওখৎপা ভারত অমগী পন্থুং অমদি পান্দমশিং ফংনবগী মায়কৈদা খোঙ থাংজিনবা হৌরকপগা লোয়ননা হেন্না তোপ তোপ্পা অমা ওইরি হায়খি। মহাক্না চহি ১৫-২০গী মমাঙদা সর্ভিস জোইন তৌরকখিবা সিভিল সর্ভেন্তশিংগী থৌদাংশিংবু পনখি অমদি অমৃৎ কালগী লাক্কদৌরিবা চহি ২৫সিদা লৈবাক শেমগৎপদা থৌদাং য়াগদৌরিবা নহা ওইরিবা ওফিসরশিংগী শক্লোন্দা ৱাফম কয়া থমখি। প্রধান মন্ত্রীনা নহা ওইরিবা ওফিসরশিং অসি অমৃৎ কালসিদা লৈবাক্কী থৌগল তৌবা ফংগদৌরিবসি য়াম্নমক লাইবক ফবনি হায়না থাজবা ফোঙদোকখি। লৈবাকসিদা মতমদি য়াম্না লৈত্রবসু মতিং অমদি থৌনাদি য়াম্না লৈরি হায়বা ৱাফম থম্লদুনা, “নীংতম লান্মী খুদিংমক্না লৈবাক্কীদমক মঙলম্বা মঙলানশিং মঙফাওনহন্নবগী থৌদাং মখোয়গী লেঙজুমদা খোঙ্গৎলবনি”, হায়না প্রধান মন্ত্রীনা হায়খি।
প্রধান মন্ত্রীনা লৈবাক অসি হৌখিবা চহি ৯দা তৌখিবা থবকশিংনা মরম ওইরগা পাইখৎনবা শেম শারে হায়খি। চপ মান্নবা ব্যুরোক্রেসী অমদি পর্সোনেলশিংদগী তোঙান তোঙানবা মহৈশিং ফংলি হায়না মহাক্না হায়খি। মালেমগী থাক্তা লৈবাকসিগী হেনগৎলক্লিবা প্রোফাইলদা, ‘সুসাসন’দা খ্বায়দগী লায়রবা মীওইশিংনসু থাজবা হেনগৎহনবদা অমদি লৈবাক চাওখৎহনবগী অনৌবা খোঙজেল অমা পুরকপদা করময়োগীশিংনা লৌরিবা শক্লোনবু মহাক্না শকখঙখি। ভারতনা দিজিতেল ত্রাঞ্জেক্সন্দা মকোক ওইবগা লোয়ননা ফিনতেক্তা খোঙকাপ লাউনা থাংদুনা, খ্বায়দগী হোঙবা মোবাইল দেতা লৈবা লৈবাকশিংগী মরক্তা অমা ওইদুনা, অমদি মালেমগী অহুমশুবা খ্বায়দগী চাউবা স্তার্তঅপ ইকোসিস্তেম লৈদুনা ভারতনা মালেমগী ৫শুবা খ্বায়দগী চাউবা শেন্মিৎলোন ওইনা হৌগৎলক্লি হায়না মহাক্না পনখি। মহাক্না খুঙ্গংগী শেন্মিৎলোন, রেলৱেজ, হায়ৱেজ, পোর্ত কেপাসিতী ওগমেন্তেসন অমদি এয়রপোর্ত মশিংদা অওনবা পুরক্কদবা মওংদা পুরক্লিবা অহোংবশিংগী মতাঙদা ফোঙদোকখি। ঙসি লান্থোক্লিবা মনাশিং অসিদা করম্য়োগীশিংগী মফমদা লৈরিবা থৌদাং অমদি থৌগলগী ইহুলগী মমি তারি হায়না মহাক্না হায়খি।
মমাঙ চহিগী ওগস্ত ১৫দা রেদ ফোর্ত মথক্তগী পীখিবা মহাক্কী ৱারোলদা প্রধান মন্ত্রীনা চাওখৎপা ভারত শেমগৎপা, মীনায় নাইথাংগী ৱাখল্লোন থুগাইবা, ভারতকী হেরিতেজতা চাউথোকচবা, লৈবাকসিগী অমত্তা ওইবা অমদি খেন্নবা মশকপু মপাঙ্গল কনখৎহনবা, অমদি ইশাগী থৌদাংবু পুম্নমক্কী মমাঙদা থম্বা হায়রিবা ‘ৱাশক মঙা’ লাউথোকখিববু নীংশিংলদুনা, প্রধান মন্ত্রীনা হায়রিবা ৱাশক মঙা অসিদগী থক্তোরকপা ইনর্জীনা লৈবাক অসিবু মালেমসিদা মশাগী ফংফম থোকপা মফমদা পুখৎকদৌরিবনি হায়খি।
চহি অসিগী সিভিল সর্ভিসেস দেগী থৌরম অসি চাওখৎপা ভারত হায়বা ৱাখল্লোনসিদা য়ুম্ফম ওইরিবা অসিগী মতাঙদা ৱা ঙাঙলদুনা, প্রধান মন্ত্রীনা চাওখৎপা ভারতকী ৱাখল্লোন অসি মতমগী ওইবা ইনফ্রাস্ত্রকচরখক্তদা লোইবা নত্তে হায়খি। “ভারতকী লৈঙাক্কী সিস্তেম অসি ভারত মচা খুদিংমক্কী মঙলানবু ঙাক্লৌ পীগদবা ওইহনবা অমদি লৈঙাক্কী সর্ভেন্ত পুম্নমক্না মীপুম খুদিংগী মঙলান মঙফাওনহনবদা মতেং পাংগদবা অমদি হৌখিবা চহিশিংদা সিস্তেম অসিদা লোয়নদুনা লৈরম্বা নেগেতিবিতীবু পোজিতিবিতীদা ওন্থোকপা হায়বসি চাওখৎপা ভারতকীদমক মরুওই”, হায়না প্রধান মন্ত্রীনা মখা তাখি।
ভারতনা নীংতম্লবা মতুং দেকেদ কয়াদা থেংনরকখিবশিং পল্লদুনা, প্রধান মন্ত্রীনা লৈঙাক্কী স্কীমশিং পায়খৎপদা লাস্ত মাইল দেলিভরীগী মরুওইবা ৱাফমশিং থমখি। মহাক্না মমাঙগী লৈঙাকশিংগী খুজিল থৌরাংনা ওইহল্লকপা মহৈশিংগী খুদমশিং পীরদুনা মতমদুদা শাজিন্নবা গ্যাস কন্নেক্সন করোর ৪ হেন্না লৈরম্মী, শাজিন্নবা রাসন কার্দ করোর ৪ হেন্না লৈরম্মী, অমদি নুমী অমদি অঙাংশিংগী য়াফ-থৌরাং মন্ত্রালয়না শাজিন্নবা নুপী অমদি অঙাং করোর ১দা তেংবাংশিং মাইনোরিতী ৱেলফ্যার মন্ত্রালয়না নহা লাখ ৩০ রোমদা শাজিন্নবা স্কোলার্সিপশিং পীরম্মী, অমদি শুক্লৈ লৈতবা মীওইশিংদা শিন্মীশিংগী কান্নবা পীননবগীদমক এম.জি.এন.আর.ই.জি.এ.গী মখাদা শাজিন্নবা একাউন্ত লাখ কয়া শেমজিল্লম্মী হায়বা ৱাফম থমখি। শাজিন্নবা বেনিফিসরীশিংগী মিংদা লৈবাকসিদা শেঞ্জা থুমজাগী ওইবা ইকোসিস্তেম অমা থোরকখি হায়না প্রধান মন্ত্রীনা পনখি। সিস্তেমসিদা অওনবা পুরক্তুনা চাউরাক্না লুপা করোর লাখ ৩ লোম অরানবা মীওইশিংগী খুত্তা তাখিগদবদগী কলহৌদুনা লায়রবশিংগী য়াইফনবগীদমক হৌজিক শীজিন্নরিবা অসিগীদমক মহাক্না সিভিল সর্ভেন্তশিংগী মফমদা ক্রেদিৎ পীখি।
প্রধান মন্ত্রীনা মতম অকক্নবা ওইরক্লবদা, চৎকদবা মায়কৈ অমদি তৌগদবা থৌওং লেপথোকপা য়াম্না মরুওই হায়বা ৱাফম থমখি। “ঙসি থেংনরিবা শিংনবা অসি মতিং ৱাৎপগী নত্তে ৱাৎলিবশিং অসি কমদৌনা থিদোক্কনি অমদি লৌথোক্কনি হায়বসিনি”, হায়না মহাক্না হায়খি। অৱাৎ অপানা লাকশিল্লকপা মতমদা করিসু লৈতবা ৱাফম ফাওবা কন্ত্রোল তৌনবা হোৎনরকখিবা মতমবু মহাক্না নীংশিংখি। ঙসিদি, হায়রিবা অৱাৎপা অদু মতিং লৈবদা ওন্থোক্তুনা সিস্তেমদা লৈরম্বা খুরৌশিং লৌথোক্লে হায়না মহাক্না মখা তাখি। মীপুম খুদিংমক্কী থৌগল তৌনবগীদমক মতম অমদি মচাকশিং মতিং লৈনা শীজিন্নবগী মতাঙদা পল্লদুনা “মমাঙদা খন্নরম্বদি লৈঙাক্না পুম্নমক তৌগদবনি হায়বসিনি, অদুবু হৌজিক খন্নরিবনা লৈঙাক্না মীপুম খুদিংগীদমক থবক তৌগনি হায়বসিনি” হায়না প্রধান মন্ত্রীনা হায়খি। লৈঙাকসিনা এস্পিরেস্নেল দিস্ত্রিক্তশিং অমদি এস্পিরেস্নেল ব্লোকশিংগী থাক্তা চঙশিল্লি হায়বা ৱাফম থম্লদুআ, “লৈঙাক্কী খোল্লাউদি 'নেসন ফর্স্ত-সিতিজন ফর্স্ত' হায়বসিনি, ঙসিগী লৈঙাক্না চাকথুং ফিথুংদ্রবশিংদা মীৎয়েঙ চঙলি”, হায়না প্রধান মন্ত্রীনা ফোঙদোকখি। ঙসিগী লৈঙাক অসিনা ঙমখৈগী খুঙ্গংশিংবু অরোইবা পনখৈদা লৈবা খুঙ্গং ওইনা লৌবগী মহুৎ অহানবা খুঙ্গং ওইনা লৌরি হায়না মহাক্না হায়খি। চাদা ১০০ সেচুরেসন পুরক্নবগীদমক ঐখোয়না হেন্না কন্না হোৎনবা অমদি অনৌবা পাম্বৈশিং পুথোকপা মথৌ তাই হায়না মহাক্না হায়খি। দিপার্তমেন্তশিংনা সিস্তেম অসিগী অতোপ্পা মফম অমদা ফংবা এন.ও.সি. অমদি ইনফোর্মেসনশিং পুরক্নবা হায়রিববু মহাক্না খুদম ওইনা পীখি। মহাক্না ইজ ওফ লিভিং অমদি ইজ ওফ দুইং বিজিনেসকীদমক ঐখোয়না পাম্বৈশিং থিবা তাই হায়খি।
পি.এম. গতিশক্তি মাস্তর প্লানগী খুদম পীরদুনা, প্রধান মন্ত্রীনা ইনফ্রাস্ত্রকচর প্রোজেক্ত অমা হেক্তগা মরী লৈনবা দেতা লেয়র পুম্নমক প্লেতফোর্ম অমখক্তদা ফংগনি হায়না শন্দোক্না তাক্লদুনা সোসিএল সেক্তরদা হেন্না ফবা থৌরাং য়াৎনবা অমদি থবক পায়খৎনবগীদমক মসিবু হেক য়ারিবমখৈ শীজিন্নবা মথৌ তাই হায়বা ৱাফম থমখি। মসিনা মীয়ামগী ইসুশিং খঙদোকপদা, তুংদা থোক্লক্কদবা মহৈ মশিংগী মরী লৈনবা ৱাফমশিং থেংনবদা, অমদি তুংগী লাল্লোং য়াত্থোকপগা মতেং পাংবগা লোয়ননা দিপার্তমেন্ত, দিস্ত্রিক্ত অমদি ব্লোকশিংগী মরক্তা ঈ-পাউ ফাওদোক্নবগী হেনগৎহনবদা মসিনা চাউনা কান্নবা পীগনি হায়না মহাক্না মখা তাখি।
প্রধান মন্ত্রীনা অমৃৎ কাল অসিনা অচৌবা খুদোংচাবশিংগা লোয়ননা চাউরবা শিংনবশিংসু পুদুনা লাক্লি হায়বা ৱাফম থমখি। ঙসিগী মঙলান চাওবা মীয়াম্না সিস্তেমদা অহোংবা পুরক্নবগীদমক মতম শাংনা ঙাইবা পামদে অমদি মসিদা ঐখোয়না মপুং ফানা হোৎনবা মথৌ তাগনি হায়না প্রধান মন্ত্রীনা শন্দোক্না তাকখি। ফিরেপ থুনা লৌবা অমদি মদুবু খোঙজেল য়াঙনা থবক পায়খৎপা হায়বসি মালেমসিনা ভারতকী মফমদা থম্লিবা থাজবা য়াম্না হেনগৎলকপনা মরম ওইরগা য়াম্নমক মথৌ তারে। মালেমসিনা ভারতকী মতম য়ৌরক্লে হায়নরিবসিগা লোয়ননা, লৈবাকসিদা ব্যুরোক্রেসীনা মাঙহন্নবা মতম লৈত্রে। “লৈবাকসিনা অদোমগী মফমদা থাজবা থম্লি, হায়রিবা থাজবা অদু ঙাক্না থবক তৌ। অদোমগী ফিরেপ পুম্নমক লৈবাক্কী ইন্তরেস্ততা য়ুম্ফম ওইহনবিয়ু”, হায়না প্রধান মন্ত্রীনা হায়খি।
দিমোক্রেসীদা খেন্নবা ৱাখল্লোন চেনবা পোলিতিকেল পার্তীশিংগী মরুওইবা অমদি মথৌ তাবশিং থম্লদুনা, প্রধান মন্ত্রীনা লৈঙাক পায়রিবা পোলিতিকেল পার্তীনা তেক্সপেয়রশিংগী শেলবু লৈবাক্কী কান্ননবগীদমক শীজিন্নরিবরা হায়বসি ব্যুরোক্রেসীশিংনা য়েংশিনবা মথৌ তাই হায়বা ৱাফম থমখি। “পোলিতিকেল পার্তী অমনা তেক্সপেয়রশিংগী শেলবু মখোয়গী লূপকী কান্ননবা নৎত্রগা লৈবাক্কী কান্ননবা তৌবদা শীজিন্নরিবরা হায়বা নৈনবা অসি ব্যুরোক্রেসীগী মথৌনি” হায়রদুনা “করিগুম্বা মখোয়না শেল অদু ভোত বেঙ্ক শেমগৎনবা শীজিন্নরিবরা নৎত্রগা মীয়ামগী পুন্সি নুংঙাইহন্নবা শীজিন্নরিবরা; লৈঙাক্কী লনথুমদগী এদভরতাইজিং খক্তা তৌরিবরা নৎত্রগা মীয়ামদা ৱাখল তাহল্লিবরা; মখোয়না মখোয়গী পার্তীগী ৱর্করশিং তোঙান তোঙানবা ওর্গনাইজেসনশিংদা থবক হাপ্লিবরা নৎত্রগা থবক লৌবগী লৌথুপ লৌকোই লৈতবা থৌওং অমা শেমগৎলিবরা য়েংশিনবা মথৌ তাই”, হায়না প্রধান মন্ত্রীনা মখা তাখি। ব্যুরোক্রেসী অসি ভারতকী স্তীলগী ফ্রেমনি হায়বা সরদার পতেলগী ৱাহৈশিং নীংশিংলদুনা, প্রধান মন্ত্রীনা থাজবশিং ঙাক্না হিংবা অমদি তেক্সপেয়রশিংগী শেল মাঙহনখিবগা লোয়ননা নহাশিংগী মঙলান শিংকুপ শানা নৈখাইবা থিংনবগী মতম ওইরে হায়না ফোঙদোকখি।
প্রধান মন্ত্রীনা লৈঙাক্কী থৌমীশিংগী মফমদা পুন্সিগী লম্বী অনি লৈ, অহানবদা থবক অমবু তৌবা অদুগা অনিশুবদা থবক্তু মথন্তা ওইরকপা ঙাইবনি হায়খি। অহানবা অসিনা এক্তিব এতিত্যুদনি অদুগা অনিশুবা অসিনা পেসিব এতিত্যুদকী মমি তাই। থবক অমা তৌবদা থাজবা থম্বা মীওইশিংনা ইচঙ থৌবা মতৌদা মপু ওইবগী মতৌ উৎলি অমদি মখোয়গী কাঙবুবু থৌদুনা চৎলিবা শাফু ওই। “মীয়ামগী পুন্সিদা অহোংবা পুরক্নিংবগী ওমদুনা লৈরিবা অপাম্বা অসিনা অদোম্না তুং কোইনা নীংশিংহৌগদবা লিগেসী অমা থম্লমগদৌরিবনি। অদোম্না ইশাগী তৌখিবশিংদুগীদমক মীয়াম্না নীংশিংবিরোই, অদোম্না মীয়ামগী পুন্সিদা পুরকখিবা অহোংবদুগীদমক নীংশিংনহৌগদৌরিবনি:, হায়না প্রধান মন্ত্রীনা কর্ময়োগীশিংগী মফমদা হায়খি। মরম অদুনা, “অফবা লৈঙাক হায়বসিনা মরূনি। মীয়ামগীদমক লৈবা লৈঙাক্না পরৈ চেনবা ৱাফমশিংগী পাম্বৈ পুরকই অমদি হেন্না ফবা মহৈ পুরকই”, হায়না মহাক্না হায়খি। অফবা লৈঙাক অমদি মতিং লৈবা নহা ওইরিবা ওফিসরশিংনা হোৎনবনা মরম ওইরগা দিভেলপমেন্ত পেরামিতর কয়াদা অতোপ্পা দিস্ত্রিক্তশিংদগী এস্পিরেস্নেল দিস্ত্রিক্তশিংনা হেন্না থবক তৌথোরক্লিববু মহাক্না খুদম ওইনা পীখি। মীয়াম্না শরুক য়াহনবদা মীৎয়েঙ থম্বনা মীয়াম মরক্তা মপু ওইবগী ইথিল অমা পোকহল্লি অমদি হায়রিবা মীয়াম্না মপু ওইবগী থৌওংসিনা হান্না থাজরুদবা মহৈ ফংহল্লকই হায়না মহাক্না ফোঙদোকখি। স্বচ্ছ ভারত, অমৃৎ সরোবর অমদি জল জীবন মিসনগী খুদমশিং মহাক্না মচা খায়না পীখি।
প্রধান মন্ত্রীনা হৌজিক শেম্লিবা District Visions@100 গী মতাঙদা পল্লদুনা অসিগুম্বা ভিজন অসি পঞ্চায়তকী থাক ফাওবদা শেমগদবনি হায়খি। পঞ্চায়ত, ব্লোক, দিস্ত্রিক্ত অমদি স্তেতকী থাক্তা করি করি সেক্তরদা মীৎয়েঙ থমবা, ইনভেস্তমেন্ত চিংশিন্নবগীদমক করি অহোংবা পুরকপা অমদি মপান্দা থাদোক্নবা পোত্থোকশিং খঙদোকপা হায়রিবা পুম্নমক অসিগীদমক তশেং তশেংবা ভিজন অমা শেমগৎকদবনি হায়না মহাক্না হায়খি। লম লমগী পোত্থোকশিং য়োকখৎনবগীদমক এম.এস.এম.ই. অমদি সেল্ফ-হেল্প গ্রুপশিংগী মরী শমজিন্নহন্নবা ৱাফম থম্লদুনা, “অদোম্না লম লমগী হৈশিংবশিংবু পুক্নিং থৌগৎপিগদবনি, লম লমদুগী ওন্ত্রপ্রিন্যুরশিং অমদি স্তার্ত-অপ কলচর য়োকখৎপিগদবনি”, হায়না মহাক্না ফোঙদোকখি।
হৌজিক ফাওবসিদা মহাক লৈঙাক্কী মকোক ওইনা লৈরকপা চহি ২০ হেল্লে হায়রদুনা, প্রধান মন্ত্রীনা সিভিল সর্ভেন্তশিংগা পুন্না থবক তৌমিন্নবগী খুদোংচাবা ফংবদা নুংঙাইবা ফোঙদোকখি। মহাক্না কেপাসিতী বিল্দিংদা মরুওইবা ৱাফম থম্লদুনাল ‘মিসন কর্ময়োগী’ অসি সিভিল সর্ভেন্তশিংগী মরক্তা অচৌবা কেম্পেন অমা ওইরকপদা নুংঙাইবা ফোঙদোকখি। কেপাসিতী বিল্দিং কম্মিসন্না কেম্পেন অসিবু ইচঙ থৌনা লৈজবা শাফুদা মাঙদা পুখৎলি হায়রদুনা, “মিসন কর্ময়োগীগী পান্দমদি সিভিল সর্ভেন্তশিংগী মতিংবু মপুং ফানা শীজিন্নবনি হায়খি। আইগোৎ প্লেৎফোর্ম অসি মফম খুদিংদা ক্বালিতী লৈবা ত্রেনিংগী মচাকশিং ফংহন্নবগীদমক শেমগৎখিবনি হায়রদুনা, প্রধান মন্ত্রীনা ত্রেনিং অমদি লর্নিং হায়বা অসি থা খরখক্কী ফোর্মেলিতী অমা ওইহল্লোইদবনি হায়বা ৱাফম থমখি। “হৌজিক্তি রিক্রুইত পুম্নমক আইগোৎ প্লেৎফোর্মদা ‘কর্ময়োগী প্রারম্ভ’গী ওরিএন্তেসন মোদ্যুলগা লোয়ননা ত্রেন তৌরি”, হায়না শ্রী মোদীনা মখা তাখি।
মথক মখা নাইবগী চৎনবী মুত্থৎনবা লৈঙাক্কী থৌরাংগী মতাঙদা পল্লদুনা, প্রধান মন্ত্রীনা মহাক্না সেক্রেতরীশিং, এসিস্তেন্ত সেক্রেতরীশিং, অমদি ত্রেনী ওফিসরশিং লেপ্পা লৈতনা উনৈ হায়খি। দিপার্তমেন্ত মনুংদা অনৌবা ৱাখল্লোনশিং পুথোক্নবগীদমক পুম্নমক্না শরুক য়াবা হেনগৎহন্নবা পাঙথোকপা ব্রেনস্তোর্মিং কেম্পশিংবু মহাক্না খুদম ওইনা পীখি। স্তেতশিংদা অহানবা চহিদুমখক লৈরম্লগা কেন্দ্র লৈঙাক্তা দিপ্যুতেসন্দা লাকপদা ওফিসরশিংনা থেংনরিবা ৱাফমশিং এসিস্তেন্ত সেক্রেতরী প্রোগ্রামগী খুত্থাঙদা অহোবা মেনশিন্দুনা মেনখৎলে হায়রদুনা, হায়রিবা প্রোগ্রাম অসিদা নহা ওইরিবা আই.এ.এস. ওফিসরশিংনা মখোয়গী করিয়রগী হৌরকপদা কেন্দ্র লৈঙাক্তা থবক তৌনবগী তাঞ্জা ফংলে হায়খি।
প্রধান মন্ত্রীনা অমৃৎ খোঙচৎকী চহি ২৫ অসিবু থৌদাংগী মতম (কর্তব্য কাল) অমনি হায়না লৌই হায়খি। “নীংতম্বগী চহিচা অসি ঐখোয়না ঐখোয়গী থৌদাংশিংদা অহানবা মীৎয়েঙ থম্লবা মতমদা লৈবাকসিগী সনা ফুদোংবা চহিচা ওইগদৌরিবনি। ঐখোয়গীদমক্তা থৌদাং হায়বসি তৌরবসু তৌদ্রবসু য়াবা ওইদে, ফিরেপ অমনি”, হায়বা ৱাফম প্রধান মন্ত্রীনা থমখি। “হৌজিক অসি খোঙলৈ থুনা হোংবা নাইবা তম্নি। অদোমগী শক্লোন অদোমগী ফংফম থোকপা হক্না লেপ্লোই, অদোমগী থৌদাং অমদি তৌথোরকপদুনা লেপকনি। অনৌবা ভারত অসিদা লৈবাক মীয়ামগী মতিক হেনগৎলক্লে, ভারতকী মতিকসু হেনগৎলক্লে। হায়রিবা নৌনা লিৎখৎলক্লিবা অনৌবা ভারত অসিদা অদোম্না মরুওইবা শক্লোন লৌনবগী খুদোংচাবা অমা ফংলবনি”, হায়না মহাক্না মখা তাখি।
মহাক্কী ৱারোল লোইশিল্লকপদা, প্রধান মন্ত্রীনা নহা ওইরিবা সিভিল সর্ভেন্তশিং অসিনা লৈবাকসিনা নীংতম্বগী চহি ১০০ ফারকপদা লৈবাকসিনা ফংবা ঙম্লবশিং নৈনরকপদা পুৱারীদা মশক নাইবা মমি থম্লম্নবগী খুদোংচাবা ফংলবনি হায়খি। “লৈবাকসিগী অনৌবা সিস্তেম অমা শেমগৎপদা অমদি মদুবু হেন্না ফগৎহনবদা ঐনা শক্লোন অমা লৌখি হায়না অদোম্না চাউথোকচবগা লোয়ননা হায়বা ঙমগদৌরিবনি। ময়াম পুম্নমক্না লৈবাক শেমগৎপদা অদোম অদোমগী থৌদাংশিং হেন্না পাকথোক চাউথোকহন্নবা লেপ্তনা হোৎনরক্কনি হায়না ঐনা থাজৈ”, হায়বা ৱাফম থম্লদুনা শ্রী মোদীনা মহাক্কী ৱারোল লোইশিনখি।
পর্সোনেল, পব্লিক গ্রিভান্সেস অমদি পেন্সন্স মন্ত্রালয়গী কেন্দ্রগী রাজ্য মন্ত্রী, দোক্তর জিতেন্দ্র সিংহ, প্রিন্সিপাল সেক্রেতরী তু প্রাইম মিনিস্তর, শ্রী পি.কে. মিস্রা, কেবিনেৎ সেক্রেতরী, শ্রী রাজিব গৌবা অমদি দিপার্তমেন্ত ওফ এদমিনিস্ত্রেতিব রিফোর্ম্স এন্দ পব্লিক গ্রিভান্সেসকী সেক্রেতরী, শ্রী ভি. স্রিনিভাসসু থৌরমদুদা শরুক য়াখি।
বেকগ্রাউন্দ
প্রধান মন্ত্রীনা লৈবাক শেমগৎপদা সিভিল সর্ভেন্তশিংনা লৌরিবা থৌদাংবু লেপ্পা লৈতনা থাগত্তুনা লাক্লি অমদি মখোয়দা হেন্না কন্না হোৎননবা থৌদুনা লাক্লি। থৌরম অসি প্রধান মন্ত্রীনা লৈবাক পুম্বদগী লৈরিবা সিভিল সর্ভেন্তশিংবু মতম পুম্বদা, মরুওইনা অমৃৎ কালগী মরুওইরবা মতমসিদা ইচঙ থৌনা লেপ্তনা হোৎননবগীদমক পুক্নিং থৌগৎনবা মফম চাবা ফম্পাক অমা ওইরি।
থৌরম অদুদা, প্রধান মন্ত্রীনা প্রাইম মিনিস্তর্স এৱার্দ্স ফোর এক্সেলেন্স ইন পব্লিক এদমিনিস্ত্রেসনসু লান্থোকখি। মনাশিং অসি মীচম মীয়ামগী য়াইফনবগীদমক কেন্দ্র অমদি স্তেত লৈঙাক্কী দিস্ত্রক্ত অমদি লূপশিংনা পাঙথোকখিবা তোপ তোপ্পা অমদি অনৌবা মওংগী ওইবা থবকশিং শকখঙনবা মীৎয়েঙদা লিংখৎখবনি।
মনাশিং অসি – হর ঘর জল য়োজনাগী খুত্থাঙদা স্বচ্ছ জল য়োকখৎপা; হেল্থ এন্দ ৱেলনেস সেন্তরগী খুত্থাঙদা স্বস্থ ভারত য়োকখৎপা; সমগ্র সিক্সাগী খুত্থাঙদা মান্নবা অমদি পুম্নমক য়াওরবা ক্লাসরুম এনভাইরনমেন্তকা লোয়ননা মতিং লৈবা মহৈ মশিংগী থৌওং য়োকখৎপা; এস্পিরেস্নেল দিস্ত্রিক্ত প্রোগ্রামগী খুত্থাঙদা মপুং ফাবা দিভেলপমেন্ত – সেচুরেসন্দা অখন্নবা মীৎয়েঙ থমদুনা মপুং ওইবা খুমাঙ চাওশিনবগী চাং, হায়রিবা মশক খঙদোক্লবা প্রাইওরিতী প্রোগ্রামশিংদা তোপ তোপ্পা থবক তৌরকপদা পীবনি। হায়রিবা মশক খঙদোক্লবা প্রোগ্রাম মরিসিদা মনা নিপান অদুগা ইনোভেসনগী লমদা পীবা মনা তরেৎ লান্থোক্কনি।
*****
(Release ID: 1918591)
Visitor Counter : 140
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam