ইনফোর্মেসন এন্দ ব্রোদকাস্তিং মন্ত্রালয়না ঙসি নই দিল্লীগী বিজ্ঞান ভবনদা ইন্দস্ত্রী, একাদমিয়া অমদি লৈঙাক্কী ওইবা দ্রাফ্ত এ.ভি.জি.সি. পোলিসীশিংগী মতাঙদা অহানবা নেস্নেল ৱর্কসোপ অমদি কন্সলতেসন পাঙথোকখ্রে‍। এ.ভি.জি.সি. সেক্তরগী ইন্দস্ত্রী এসোসিএসনশিং অমদি ইন্দস্ত্রী লুচিংবশিং য়াওনা এ.ভি.জি.সি.গা মরী লৈনবা কেন্দ্র অমদি স্তেতকী থাক অনিমক্তা লৈবা তোঙান তোঙানবা লৈঙাক্কী বোদীশিংনা মপুং ফানা শরুক য়াখি‍।

ৱর্কসোপ অদু আই.বি. মন্ত্রালয়গী সেক্রেতরী অমদি এ.ভি.জি.সি. তাক্সফোর্সকী চেয়রমেন, শ্রী অপুর্ব চন্দ্রনা হৌদোকখি‍। মহাক্না ভারত্তা এ.ভি.জি.সি. (এনিমেসন, ভিজুএল ইফেক্ত, গেমিং অমদি কোমিক্স – এক্সতেন্দেদ রিএলিতী) সেক্তর মপাঙ্গল কনখৎহন্নবা মন্ত্রালয়না হোৎনরিবশিংগী মরমদা ৱা ঙাঙখি অমদি স্তেতশিংগী মফমদসু এ.ভি.জি.সি. সেক্তরনা চাওখৎলকপদা কান্নবা লৌহৌনবগীদমক খ্বায়দগী ফবা থৌরাংশিং পায়খৎনবা ৱাফম থমখি‍।

আই.বি. মন্ত্রালয়গী সেক্রেতরী, শ্রী অপুর্ব চন্দ্রনা মহাক্কী হৌদোকপগী ৱারোলদা এ.ভি.জি.সি. সেক্তরগী মশিং য়াম্লবা ইনেব্লরশিং, মরুওইনা সেক্তর অসিগী কোর পিলরশিংগী মরক্তগী এজুকেসন অমদি স্কিলিংগী মতাঙদা ৱাফম কয়া থমখি‍। এ.ভি.জি.সি. সেক্তর অসি হৌখিবা মতম খরসিদা হান্না পানরুদবা চাংদা চাওখৎলক্লি অমদি লাক্কদৌরিবা দেকেদ অসিদা শরুক কয়া থোক্না চাওখৎলক্কনি হায়না পানরি হায়বা ৱাফম মহাক্না থমখি‍। অঙাংশিংনা মখোয়গী ক্রিএতিব স্কিল হেনগৎহন্দুনা সেক্তর অসিদা মখোয়গী করিয়র শেমগৎচবা য়ানবগীদমক অঙাংশিংদা চহি মতাঙ চানা এক্সপোজর চুম্না পীবগী মথৌ তাই, অমদি মসিগীদমক দ্রাফ্ত পোলিসী অসিনা স্কিলিং অমদি এজুকেসন অনিমক্তা চপ মান্নবা মীৎয়েঙ থম্লি হায়না সেক্রেতরীনা ফোঙদোকখি‍।

তুংদা ওইরক্কদবা ইন্দস্ত্রী অসিগী পাক চাউবগী মতাঙদা পল্লদুনা, শ্রী চন্দ্রনা ঙসি এ.ভি.জি.সি. না লৈরিবা অসি ২০০০গী মতমদা ভারতকী আই.তি. সেক্তরনা লৈরম্বা মফমদুদনি হায়খি‍। আই.তি. সেক্তর অসি মালেম অসিদা মরুওইবা থৌদাং লৌরিবা সেক্তর অমা ওইরে অমদি হায়রিবা মতিং অসিমক এ.ভি.জি.সি. সেক্তরদসু লৈ হায়না মহাক্না হায়রদুনা ঙসি হোলীৱুদকী অচৌবা মুভীশিংদা ভারত্তগী স্কিল অমদি মেনপৱার শীজিন্নরি হায়খি‍। সেক্তর অসিদা মওং চুম্বা স্কিলিং ইনফ্রাস্ত্রকচর শোয়দনা লৈহন্নবগীদমক স্তেকহোল্দরশিং পুন্না থবক তৌমিন্নবগী মথৌ তাবা ৱাফমসু মহাক্না থমখি‍।

লৈবাকসিগী এ.ভি.জি.সি.গী মঙলান মঙফাওনহনবদা স্তেতশিংনা লৌগদবা শক্লোনশিংগী মতাঙদসু মহাক্না চাউরাকপা ৱাফম থমখি‍। পায়খৎলিবা থৌরাংশিং অসি পাকথোক চাউথোকহনবদা অমদি সেক্তর অসিবু য়োকখৎপদা মথৌ তাবা রিসোর্সশিং মোবিলাইজ তৌবদা স্তেতশিংনা লৌরিবা থৌদাং য়াম্না মরুওই হায়নসু মহাক্না শকখঙখি‍। সেক্রেতরীনা রিজনেল সেন্তর ওফ এক্সেলেন্স লিংখৎপগী মথৌ তাবা ৱাফম থমখি অমদি কর্নাতকানা মায়কৈ অসিদা স্তার্তঅপ কয়া অমগা লোয়ননা পায়খৎলিবা খোঙথাঙশিং সেন্তর অসিগী শরুক অমা ওইরবনি হায়নসু ফোঙদোকখি‍।

স্কিল দিভেলপমেন্ত এন্দ ওন্ত্রপ্রিন্যুরসিপ মন্ত্রালয়গী সেক্রেতরী, শ্রী অতুল কুমার তিৱারীনা ভারতপু এ.ভি.জি.সি. স্পেসগী গো-তু হব অমা ওইহন্নবগীদমক সেক্তর অসিদা ফ্যুচর-রেদী স্কিলিং পীবগী মথৌ তাবা ৱাফমশিংসু মচা খায়না তাকখি‍। মহৈরোয় শেমগৎপদা অমদি মসিগী মরমদা তমবদা মতেং ওইগদবা অচৌবা ফীজিকেল ইনফ্রাস্ত্রকচর লিংখৎপগী মরুওইবা ৱাফমসু মহাক্না থমখি‍। এ.ভি.জি.সি. সেক্তর চাওখৎহনবদা স্কিলিংগী থৌরাংশিং য়াম্না মরুওই হায়বা এম.এস.দি.ই.না খঙই অমদি মথৌ তাবা স্কিলিং ইকোসিস্তেম পীননবগীদমক খ্বায়দগী ফবা থৌওংশিং পায়খৎনবা খোঙফম চেৎনা লেপ্লি‍।

স্তেতকী থাক্কী এ.ভি.জি.সি. পোলিসী শেম্বদা মতেং পাংবা য়াওনা অতোপ্পা স্তেতশিংদা লমজিং লমতাক পীননবা পান্দমদা, এ.ভি.জি.সি.গী লমদা খুমাঙ চাওশিল্লবা স্তেত খরনা ৱর্কসোপ অদুদা মখোয়না খঙবশিং অমদি খ্বায়দগী ফবা থৌওংশিংগী মরমদা পাউদমখি‍। ৱর্কসোপ অদুদা পাঙথোকখিবা সেসনশিং স্তেতশিংদা স্তেত এ.ভি.জি.সি. পোলিসীগী তোঙান তোঙানবা মশক মওংশিংগী মরমদা মমুৎ তানা খঙহনবদা মতেং পাংদুনা মখোয়বু স্তেতকী থাক্কী পোলিসী শেম্বা ঙমহন্নবগীদমক শেম শাখিবনি‍।

এম. এন্দ ই. অমদি এ.ভি.জি.সি.-এক্স.আর. স্পেসতা থবক তৌরিবা তোঙান তোঙানবা মাঙজিল থাবা কম্পেনীশিং অমদি ইন্দস্ত্রী বোদীশিংগী মীহুৎশিংনা ৱর্কসোপ অদুদা শরুক য়াখি অমদি লৈবাকসিদা সেক্তর অসিবু য়োকখৎপগী মতাঙদা মখোয়দা লৈরিবা ৱাখল্লোনশিং পাউদমখি‍।

নেস্নেল ৱর্কসোপ অসি স্তেতশিংদা পোলিসী অসি শেমদোক শাদোক্তুনা চৎনহন্নবগীদমক মোদেল স্তেত পোলিসী শেম্বগীম তাঙদা খঙহন্নবগী পান্দমদা মরুওইবা মীৎয়েঙ থমদুনা পাঙথোকপনি‍। মসিনা দ্রাফ্ত নেস্নেল পোলিসী অসিবু স্তেকহোল্দরশিংগী মথৌ তাবগী মতুং ইন্না চুশিন্নহন্নবগীদমক খন্ন-নৈননবা ফম্বাক অমসু পীরি‍। মখা তানা, ৱর্কসোপ অদুদা অকক্নবা স্তেত খরদা এ.ভি.জি.সি. সেক্তর য়োকখৎনবগীদমক চৎনরিবা খ্বায়দগী ফবা থৌওংশিং উৎপা সেসন অমসু য়াওখি‍। ৱর্কসোপ অদু আই.বি. মন্ত্রালয়গী জোইন্ত সেক্রেতরী (ফিল্ম্স) শ্রী প্রিথুল কুমারনা লোইশিনবগী ৱারোল অমদি থাগৎ ৱাহৈ ফোঙদোক্তুনা ৱর্কসোপ অদু লোইশিনখি‍।

এ.ভি.জি.সি. প্রমোসন তাক্স ফোর্স অদু আই.বি. মন্ত্রালয়গী সেক্রেতরী শ্রী অপুর্ব চন্দ্রনা লুচিংদুনা শেমখিবনি‍। মসিনা মাগী রিপোর্ত দিসেম্বর ২০২২দা থাগত্তুনা রিপোর্ত অদুনা মখা তাবা খোঙথাঙশিং লৌখৎনবগী লমজিং চে চাং ওইনা শীজিন্নরি‍। মসিনা দ্রাফ্ত নেস্নেল পোলিসী অমদি স্তেতশিংগী মোদেল পোলিসীসু শেম্বনি‍।

****