ঙসি নিউ দিল্লিদা কলচর, তুরিজম অমসুং দোনরগী য়ুনিয়ন মিনিস্তর শ্রী জি.কে রেদ্দিনা পাংথোক্নবা থৌরাং তৌরিবা অহানবা মালেমগী বুদ্ধিস্ত মীফমগী মতাংদা পাউগী মীফম অমা পাংথোকখ্রে।

য়ুনিয়ন মিনিস্তর শ্রী রেদ্দিনা হায়খি নিউ দিল্লিদা এপ্রিল ২০দা প্রধান মন্ত্রী শ্রী নরেন্দ্র মোদীনা অহানবা মালেমগী বুদ্ধিস্ত মীফম হৌদোক্কনি। কলচর মিনিস্ত্রি অমসুং মসিগী গরেন্তি বোদি ইন্তরনেসনেল বুদ্ধিস্ত কনফেদেরেসন(আই বি সি)না য়ুম্বু ওইদুনা এপ্রিল ২০-২১দা অশোক হোতেলদা গ্লোবেল বুদ্বিস্ত সম্মিৎ(জি বি এস) পাংথোক্কনি। অজাদি কা অমৃত মহোৎসবকী মখাদা কেন্দ্র সরকারনা থৌরম কয়া পাংথোক্লি অমসুং অহানবা মালেমগী বুদ্ধিস্ত মীফম ভারত্তা পাংথোক্নবা কেন্দ্র সরকারন ৱারেপ লৌখিবনি।

পাউমীশিংদা ৱা ঙাংবদা মহাক্না হায়খি অহানবা ওইনা লৈবাক কয়াদগী মমি লৈরবা বুদ্ধিস্ত লম্বোইবা কয়া ভারত্তা লাক্কনি অমসুং মীফম শরুক য়াগনি। বুদ্ধিস্ত ৱাঙুলোন অমসুং ৱাখল্লোনগী মতেংনা হৌজিক মায়োক্নরিবা অৱাবশিং কমদৌনা থেংনগনি হায়বা মীফম অদুদা খন্নগনি। ভারত্তা বুদ্বিজম হৌরকখিবা মরম্না, বুদ্ধিজমদা ভারতকী মরুওইবগী মতাংদা মীফম অদুদা খন্নগনি।

জি কিসন রেদ্দিনা হায়খি মালেমগী মীফম অসি অতোপ্পা লৈবাকশিংগী নাৎ অমসুং দিপ্লোমেতকী মরীশিং ফগৎনবা পাম্বৈ অমা ওইরগনি। মীফম অসিদা লৈবাক ৩০গী দেলিগেদশিং শরুক য়াগনি অমসুং মপান লৈবাকশিংগী দেলিগেদ ১৭১ অমসুং ভারতকী বুদ্ধিস্ত লুপশিংগী দেলিগেদ ১৫০ শরুক য়াগনি।

মীফম অদুদা মালেমগী মফম কয়াগী শক্নাইরবা মাইচৌশিং, সংঘ লুচিংবশিং অমসুং ধর্ম্ম প্রাক্তিশন্নরশিং শরুক য়াগনি। সংঘ মেম্বর ৮৪ য়াওবা মালেমগী মীওই ১৭৩ অমসুং সংঘ মেম্বর ৪৬ য়াওবা ভারতকী দেলিগেদ ১৫১, দিল্লিগী ৱাংমদগী লম্বোইবী ৪০ অমসুং লাইতি ৬৫ শরুক য়াগনি। মপান লৈবাকশিংগী এম্বেসিশিংগী এম্বেসেদর ৩০ য়াওনা এন.সি.আর লমদমগী মীওই ২০০ মীফম অদুদা শরুক য়াগনি। দেলিগেদশিংনা ঙসি মালেম্না থেংনরিবা ৱাথোকশিং অমসুং তাইবংপাল অসিগী মগুনশিংদা য়ুম্ফম ওইবা বুদ্ধা ধর্ম্মনা পাম্বৈশিং থিনবা খন্নগনি।

মখাগী থিম মরি অসিদা খন্ন-নৈনবশিং পাংথোক্কনি:

১. বুদ্ধ ধম্ম অমসুং শান্তি

২. বুদ্ধ ধম্ম: অকোয়বগী ফিবম কায়রকপা, হকশেল অমসুং তুংগী ফিবম

৩. নালান্দা বুদ্ধিস্তগী চৎন-লোনচৎ কনবা

৪. বুদ্ধা ধম্মগী লাইফমশিং খুরুম্বা, হৌজিক লৈরিবা নাৎকী পুক্কৈ অমসুং বুদ্ধগী লেমহৌখাকশিং: খা, খা-নোংপোক অমসুং নোংপোক এসিয়াগী লৈবাকশিংগা শম্নবা চহিচা কয়া কুইরবা ভারতকী অরিবা নাৎকী মরীশিংগী য়ুম্ফম অমা

মীফম হৌদোকপদা থৌরমদা ভিয়েতনাম বুদ্ধিস্ত সংঘগী লুচিংবা থিচ ত্রাই কোয়াংনা মরুওইবা ৱারোল ফোঙদোক্কনি অমসুং প্রোফেসার রোবার্দ থুরমেন্না একাদেমিক সেসন্দা ৱা ঙাংগনি।

অরিবা মতমগী ভারত্তা বুদ্ধ ধম্মনা মীওইবা সভেত্য চাউখৎলকপদা য়াম্না চাউনবা মতেং পাংখি। লাইনিং অসি মালেম শীনবা থুংনা শন্দোক্তুনা লৌশিং অমসুং নাৎকী হৌরকফম ওইখি অমসুং মালেম শীনবা থুংনা মখল কয়াগী স্পিরিচুএল অমসুং ফিলোসোফিগী চৎন-লোনচৎশিং শেমখি।

মীফম অসিগী মরুওইবা পান্দমদি বুদ্ধ ধম্ম লৌদুনা চহিচা কয়া লেপ্তনা শেমগৎলকখিবা সাক্যমুনি বুদ্ধগী পাউতাকশিং নৈনবনি। মসিনা বুদ্ধিস্ত মাইচৌশিং অমসুং ধর্ম্ম মাস্তরশিংগী মফম অমা শেমগৎনবা পান্দম থম্লি। শান্তি, মীনুংশি খঙবা অমসুং নুংশিন্না হিংমিন্নবা হায়রিবা বুদ্ধাগী পাউজেলশিং অসিনা মালেম থাক্তা মালেমগী লৈবাকশিংগী মরী অমা শেমগৎনবা খুৎলায় অমা ওইনা শীজিন্ননবা থিজিনগনি।

কলচর মিনিস্ত্রি অমসুং আই.বি.সিনা হন্দক সংহাই কোওপরেসন ওর্গনাইজেসন লৈবাকশিংগী অখঙ-অহৈশিং শরুক য়াবা মালেমগী মীফম অমা মাইপাক্না পাংথোকখ্রে অমসুং এস.সি.ও লৈবাকশিংদা লৈরিবা অরিবা পোৎলমশিং, আর্কিওলোজিগী মফমশিং, কলাগী নমুনাশিং মশক খঙদোক্তুনা কলচরগী মরী অমা অমুক হন্না শেমগৎনবা খন্নখি।

মালেমগী বুদ্ধিস্ত ধম্মগী লুচিংবশিং অমসুং মাইচৌশিং পু্ন্দুনা বুদ্ধিস্ত অমসুং তাইবংপালগী ওইবা ৱাফমশিং খন্ননবা অমসুং মালেমগী অৱাবশিং কোকহন্নবা থৌশিলশিং পুথোক্নবা খন্ননবা জি.বি.এস-২০২৩না হোৎনগনি।

****