ঙসি নিউ দিল্লিদা ভারতকী রাস্ত্রপতি শ্রীমতি দ্রৌপতি মুর্মুনা নেসনেল পঞ্চায়ত এৱার্দ লান্থোকখ্রে অমসুং পঞ্চায়তশিংদা শেন্থং পীবগী মতাংদা পাংথোকপা জাতি থাক্কী মীফম হৌদোকখ্রে।

থৌরম অদুদা ৱা ঙাংবদা প্রধান মন্ত্রীনা হায়খি হৌখিবা কয়াগী মমাঙদগী খোঙজেল য়াংনা সহর শেমগৎলবসু, অপুনবা মীশিংগী অয়াম্বা শরুক খুঙ্গংশিংদা লৈরি। সহরশিংদা লৈরিবা মীওইশিং অসি খুঙ্গংশিংগা মরী লৈনৈ। খু্ঙ্গংশিং চাউখৎপনা লৈবাক অসি হিরম খুদিংমক্তা চাউখৎকনি।

রাস্ত্রপতিনা হায়খি খুঙ্গং অমা চাউখৎনবগী নমুনা অমসুং মদু কমদৌনা থবক ওইনা পাংথোক্কগে হায়বগী মতাংদা খুঞ্জাশিংনা ৱারেপ লৌবা ঙমগনি। পঞ্চায়তশিং অসি সরকারগী থবক-থৌরমশিং পাংথোক্নবা খক লৈবা নত্তনা অনৌবা লুচিংবশিং, থৌরাং য়াৎলিবশিং, থৌশিল শেম্লিবশিং অমসুং অনৌবা থবক পায়খৎনবা লৈরিবশিং পুক্নিং থৌগৎনবা মফম অমসুনি। পঞ্চায়ত অমগী খ্বাইদগী ফবা থবকশিং পঞ্চায়ত অমনা মতৌ তমদুনা, ঐখোয়না য়াম্না খোঙজেল য়াংনা ঐখোয়গী খুঙ্গংশিং চাউখৎহনবা অমসুং নুংঙাইহনবা ঙমগনি।

রাস্ত্রপতিনা হায়খি খুন্নাইগী কাংলুপ খুদিংমক শরুক য়াবা ঙম্নবা চহি মঙা খুদিংগী পঞ্চায়তকী মীহুৎশিং খন্নবা মীখল পাংথোক্লি। অদুবু করিগুম্বা মতমদা হায়রিবা মীখলশিং অসিনা মীয়াম মরক্তা নুংশিনদবা থোকহল্লি। মীখলনা মরম ওইদুনা, খুঞ্জাশিংগী মরক্তা য়ানদবা লৈহন্দনবা, পঞ্চায়ত মীখলশিং অসি রাজনিতিদগী তোখায়না থম্লে। খু্ন্নাই অমদা মীয়াম মরক্তা অমনা অমবু থাজনবা লৈরবা অমসুং মতেং পাংনরবা মতমদা, হেন্না নুংঙাইরকই। খুঙ্গং অমা হায়বসি ইমুং অমগী মশানি। অসিগুম্বা ফিবম অমা শেমগৎনবা কাংলুপ  খুদিংমক্না অমগা অমগা য়ানবা পুরক্নবা থবক তৌগদবনি।

রাস্ত্রপতিনা হায়খি খুন্নাই অমা মপুংফানা চাউখৎহনবদা নুপীশিং শরুক য়াবা য়াম্না মরুওই। মখোয় মশাগী, মখোয়গী ইমুং-মনুংগী অমসুং খুন্নাইগী য়াইফনবা ৱারেপশিং লৌবদা নুপীশিংগী হক লৈ। ইমুং অমসুং খু্ঙ্গংগী থাক্তা মখোয়দা শক্তি পীরবা মতমদা মসি পাংথোকপা ঙমগনি। ঐখোয়গী খু্‌ঙ্গংগী বোদিশিংগী মীয়ামগী মীহুৎ লাখ ৩১.৫গী চাদা ৪৬ নুপীশিংনা ওইরি। গ্রাম পঞ্চায়তশিংগী থবকশিংদা নুপীশিং থৱায় য়াওনা শরুক য়াগদবনি। হায়রিবা থবকশিং অসিদা মখোয়গী ইমুং-মনুংশিংনা শৌগৎকদবনি।

******