ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ତାଙ୍କ ସହକର୍ମୀ ମନ୍ତ୍ରୀ ଥିରୁ ଏଲ ମୁରୁଗାନଙ୍କ ବାସଭବନରେ ତାମିଲ ନୂତନ ବର୍ଷ ଉତ୍ସବରେ ଅଂଶଗ୍ରହଣ କରିଥିଲେ ।

ଏହି ଅବସରରେ ପ୍ରଧାନମନ୍ତ୍ରୀ ପୁଥାଂଡୁ ପାଳନ କରିବା ପାଇଁ ତାମିଲ ଭାଇ ଓ ଭଉଣୀଙ୍କ ମଧ୍ୟରେ ଉପସ୍ଥିତ ରହି ଖୁସି ବ୍ୟକ୍ତ କରିଥିଲେ । ପୁଥାଂଡୁ ପ୍ରାଚୀନ ପରମ୍ପରାରେ ଆଧୁନିକତାର ପର୍ବ । ଏହିପରି ପ୍ରାଚୀନ ତାମିଲ ସଂସ୍କୃତି ପ୍ରତିବର୍ଷ ନୂତନ ଶକ୍ତି ସହିତ ଆଗକୁ ବଢୁଛି । ଏହା ବାସ୍ତବରେ ଉଲ୍ଲେଖନୀୟ ବୋଲି ପ୍ରଧାନମନ୍ତ୍ରୀ କହିଛନ୍ତି । ତାମିଲ ଲୋକ ଏବଂ ସଂସ୍କୃତିର ସ୍ୱତନ୍ତ୍ରତା ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ତାମିଲ ସଂସ୍କୃତି ପ୍ରତି ତାଙ୍କର ଆକର୍ଷଣ ଏବଂ ଭାବପ୍ରବଣତା ବୋଲି କହିଥିଲେ । ଗୁଜରାଟରେ ତାଙ୍କର ବିଧାନସଭା ର୍ନିବାଚନମଣ୍ଡଳୀରେ ତାମିଲ ଜନସଂଖ୍ୟାର ବଡ ଉପସ୍ଥିତି ଏବଂ ମହାନ ଭଲପାଇବାକୁ ମନେ ପକାଇ ପ୍ରଧାନମନ୍ତ୍ରୀ ତାମିଲ ଲୋକଙ୍କ ପ୍ରତି ଥିବା ପ୍ରେମ ପାଇଁ କୃତଜ୍ଞତାକୁ ପ୍ରକାଶ କରିଛନ୍ତି ।

ପ୍ରଧାନମନ୍ତ୍ରୀ ଲାଲ କିଲ୍ଲାର ପ୍ରାଚୀରରୁ କହିଥିବା ପଞ୍ଚ ପ୍ରାଣକୁ ମନେ ପକାଇଥିଲେ - ନିଜର ଐତିହ୍ୟକୁ ନେଇ ଗର୍ବ କର, ଶ୍ରୀ ମୋଦୀ କହିଛନ୍ତି ଯେ ସଂସ୍କୃତି ଯେତେ ପୁରୁଣା, ସେତେ ଲୋକ ଏବଂ ସଂସ୍କୃତି ସମୟ ପରୀକ୍ଷିତ ହୁଏ । ତାମିଲ ସଂସ୍କୃତି ଏବଂ ଲୋକମାନେ ଶାଶ୍ୱତ ଏବଂ ବିଶ୍ୱବ୍ୟାପୀ । ଚେନ୍ନାଇରୁ କାଲିଫର୍ଣ୍ଣିଆ, ମଦୁରାଇରୁ ମେଲବୋର୍ଣ୍ଣ, କୋଏମ୍ବାଟୁରରୁ କେପଟାଉନ୍‌, ସାଲେମରୁ ସିଙ୍ଗାପୁର ପର୍ଯ୍ୟନ୍ତ; ତୁମେ ପାଇବ ତାମିଲ ଲୋକମାନେ ନିଜ ସହିତ ସେମାନଙ୍କ ସଂସ୍କୃତି ଏବଂ ପରମ୍ପରାକୁ ନେଇଛନ୍ତି ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ ବକ୍ତବ୍ୟ ଜାରି ରଖି କହିଛନ୍ତି ଯେ ପୋଙ୍ଗଲ ହେଉ କିମ୍ବା ପୁଥାଂଡୁ ହେଉ, ସେମାନେ ସମଗ୍ର ବିଶ୍ୱରେ ପରିଚିତ କରିଛନ୍ତି । ତାମିଲ ହେଉଛି ବିଶ୍ୱର ସର୍ବ ପୁରାତନ ଭାଷା । ପ୍ରତ୍ୟେକ ଭାରତୀୟ ଏଥିପାଇଁ ଗର୍ବିତ । ତାମିଲ ସାହିତ୍ୟକୁ ମଧ୍ୟ ବହୁ ସମ୍ମାନିତ କରାଯାଏ । ତାମିଲ ଫିଲ୍ମ ଉଦ୍ୟୋଗ ଆମକୁ ଅନେକ ପ୍ରତିଷ୍ଠିତ କାର୍ଯ୍ୟ ଦେଇଛି ।

ସ୍ୱାଧୀନତା ସଂଗ୍ରାମରେ ତାମିଲ ଲୋକଙ୍କ ଅବଦାନକୁ ସ୍ମରଣ କରି ପ୍ରଧାନମନ୍ତ୍ରୀ ସ୍ୱାଧୀନତା ପରେ ଦେଶର ଅଭିବୃଦ୍ଧିରେ ତାମିଲ ଲୋକଙ୍କ ଅବଦାନ ଉପରେ ମଧ୍ୟ ଆଲୋକପାତ କରିଥିଲେ । ସେ ସି ରାଜଗୋପାଳଚାରୀ, କେ କାମରାଜ ଏବଂ ଡକ୍ଟର କଲାମଙ୍କ ପରି ପ୍ରତିଷ୍ଠିତ ବ୍ୟକ୍ତିମାନଙ୍କୁ ମନେ ପକାଇ କହିଥିଲେ ଯେ ଚିକିତ୍ସା, ଆଇନ ଏବଂ ଶିକ୍ଷା କ୍ଷେତ୍ରରେ ତାମିଲୀୟମାନଙ୍କ ଅବଦାନ ତୁଳନାତ୍ମକ ନୁହେଁ ।

ପ୍ରଧାନମନ୍ତ୍ରୀ ଦୋହରାଇଛନ୍ତି ଯେ ଭାରତ ହେଉଛି ବିଶ୍ୱର ସର୍ବ ପୁରାତନ ଗଣତନ୍ତ୍ର ଏବଂ ତାମିଲନାଡୁର କିଛି ଗୁରୁତ୍ୱପୂର୍ଣ୍ଣ ସ୍ଥାନରେ ଏହାର ଅବିସ୍ମରଣୀୟ ପ୍ରମାଣ ଅଛି । ସେ ଉଥିରାମେରୁରରେ ଏକ ୧୧ ରୁ ୧୨ ଶହ ବର୍ଷ ପୁରୁଣା ଶିଳାଲେଖ ବିଷୟରେ କହିଥିଲେ ଯାହା ପ୍ରାଚୀନ କାଳରୁ ଗଣତାନ୍ତ୍ରିକ ନୈତିକତା ଏବଂ ବ୍ୟବସ୍ଥାକୁ ବର୍ଣ୍ଣନା କରିଥିଲା । ପ୍ରଧାନମନ୍ତ୍ରୀ କହିଛନ୍ତି ଯେ, ତାମିଲ ସଂସ୍କୃତିରେ ଅନେକ କିଛି ଅଛି ଯାହା ଭାରତକୁ ଏକ ରାଷ୍ଟ୍ର ଭାବରେ ପରିଣତ କରିଛି । ସେମାନଙ୍କ ଚମତ୍କାର ଆଧୁନିକ ପ୍ରାସଙ୍ଗିକତା ଏବଂ ସେମାନଙ୍କର ସମୃଦ୍ଧ ପ୍ରାଚୀନ ପରମ୍ପରା ପାଇଁ ସେ କାଞ୍ଚିପୁରମରେ ଥିବା ଭେଙ୍କଟେସା ପେରୁମାଲ ମନ୍ଦିର ଏବଂ ଚତୁରଙ୍ଗ ଭାଲାଭାନାଥାର ମନ୍ଦିର ବିଷୟରେ ମଧ୍ୟ ଉଲ୍ଲେଖ କରିଛନ୍ତି ।

ସମୃଦ୍ଧ ତାମିଲ ସଂସ୍କୃତିର ସେବା କରିବାର ସୁଯୋଗକୁ ଗର୍ବର ସହିତ ପ୍ରଧାନମନ୍ତ୍ରୀ ମନେ ପକାଇଥିଲେ । ମିଳିତ ଜାତିସଂଘରେ ତାମିଲ ଭାଷାକୁ ଉଦ୍ଧୃତ କରିବା ଏବଂ ଜାଫନାରେ ଗୃହ ପ୍ରବେଶ ସମାରୋହରେ ଯୋଗଦେବା ତାଙ୍କର ମନେ ପଡିଥିଲା । ଶ୍ରୀ ମୋଦୀ ହେଉଛନ୍ତି ପ୍ରଥମ ଭାରତୀୟ ପ୍ରଧାନମନ୍ତ୍ରୀ ଯିଏକି ଜାଫନା ପରିଦର୍ଶନ କରିଛନ୍ତି ଏବଂ ତାଙ୍କ ଗସ୍ତ ସମୟରେ ଏବଂ ପରେ ସେଠାରେ ଅନେକ କଲ୍ୟାଣମୂଳକ ପ୍ରକଳ୍ପ କରାଯାଇଥିଲା । ପ୍ରଧାନମନ୍ତ୍ରୀ କହିଛନ୍ତି, ତାମିଲବାସୀଙ୍କୁ ନିରନ୍ତର ସେବା କରିବାର ଏହି ଅନୁଭବ ମୋତେ ନୂତନ ଶକ୍ତିରେ ପରିପୂର୍ଣ୍ଣ କରିଥାଏ ।

ନିକଟରେ ଅନୁଷ୍ଠିତ କାଶୀ ତାମିଲ ସଙ୍ଗମମର ସଫଳତା ପାଇଁ ପ୍ରଧାନମନ୍ତ୍ରୀ ଗଭୀର ସନ୍ତୋଷ ବ୍ୟକ୍ତ କରିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ଏହି କାର୍ଯ୍ୟକ୍ରମରେ ଆମେ ପ୍ରାଚୀନତା, ନବସୃଜନ ଏବଂ ବିବିଧତାକୁ ଏକାସାଙ୍ଗରେ ପାଳନ କରିଛୁ । ସାଙ୍ଗମମରେ ତାମିଲ ଶିକ୍ଷାର ପୁସ୍ତକଗୁଡ଼ିକ ପାଇଁ ଥିବା ଆଗ୍ରହ ବିଷୟରେ ପ୍ରଧାନମନ୍ତ୍ରୀ କହିଛନ୍ତି ଯେ ହିନ୍ଦୀ ଭାଷାଭାଷୀ ଅଞ୍ଚଳରେ, ଏହି ଡିଜିଟାଲ ଯୁଗରେ ତାମିଲ ପୁସ୍ତକଗୁଡ଼ିକ ଏହିପରି ଭଲ ପାଇବା, ଏହା ଆମର ସାଂସ୍କୃତିକ ସଂଯୋଗକୁ ଦର୍ଶାଏ । ମୋର ବିଶ୍ୱାସ, ତାମିଲ ଲୋକଙ୍କ ବିନା କାଶୀ ବାସିନ୍ଦାଙ୍କ ଜୀବନ ଅସମ୍ପୂର୍ଣ୍ଣ, ମୁଁ କାଶୀ ବାସୀ ହୋଇଗଲି ଏବଂ କାଶୀ ବିନା ତାମିଲ ଲୋକଙ୍କ ଜୀବନ ଅସମ୍ପୂର୍ଣ୍ଣ ଅଟେ ।  ଶ୍ରୀ ମୋଦୀ ସୁବ୍ରମଣ୍ୟମ ଭାରତୀଙ୍କ ନାମରେ ନୂତନ ଚେୟାର ଏବଂ କାଶୀ ବିଶ୍ୱନାଥଙ୍କ ମନ୍ଦିର ଟ୍ରଷ୍ଟରେ ଜଣେ ତାମିଲ ବ୍ୟକ୍ତି ସ୍ଥାନ ପାଇବା ବିଷୟରେ ମଧ୍ୟ ଉଲ୍ଲେଖ କରିଛନ୍ତି ।

ଅତୀତର ଜ୍ଞାନ ସହିତ ଭବିଷ୍ୟତ ଜ୍ଞାନର ଉତ୍ସ ହୋଇଥିବାରୁ ପ୍ରଧାନମନ୍ତ୍ରୀ ତାମିଲ ସାହିତ୍ୟର ଶକ୍ତି ଉପରେ ଆଲୋକପାତ କରିଛନ୍ତି । ପ୍ରାଚୀନ ସଙ୍ଗମ ସାହିତ୍ୟରେ ଶ୍ରୀ ଅନ୍ନ-ମିଲେଟ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ ଆଜି ଭାରତର ଉଦ୍ୟମରେ ସମଗ୍ର ବିଶ୍ୱ ଆମର ସହସ୍ର ବର୍ଷର ମିଲେଟ ପରମ୍ପରା ସହିତ ଯୋଡି ହୋଇ ଯାଇଛି । ଖାଦ୍ୟ ଥାଳିରେ ମିଲେଟକୁ ସ୍ଥାନ ଦେବା ଏବଂ ଅନ୍ୟମାନଙ୍କୁ ମଧ୍ୟ ପ୍ରେରଣା ଦେବା ପାଇଁ ସଙ୍କଳ୍ପ ନେବାକୁ ସେ ଏହି ସମାବେଶକୁ କହିଥିଲେ ।

ଯୁବପୀଢିଙ୍କ ମଧ୍ୟରେ ତାମିଲ କଳାର ଧାରାକୁ ପ୍ରୋତ୍ସାହିତ କରିବା ଏବଂ ସର୍ବଭାରତୀୟ ସ୍ତରରେ ପ୍ରଦର୍ଶନ କରିବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି । ଆଜିର ଯୁବ ପୀଢି ମଧ୍ୟରେ ସେମାନେ ଯେତେ ଲୋକପ୍ରିୟ, ସେମାନେ ପରବର୍ତ୍ତୀ ପୀଢିକୁ ସେତେ ଅଧିକ ଦେବେ । ତେଣୁ ଯୁବକମାନଙ୍କୁ ଏହି କଳା ବିଷୟରେ ଶିକ୍ଷା ଦେବା ଆମର ସାମୂହିକ ଦାୟିତ୍ୱ ବୋଲି ସେ କହିଛନ୍ତି । ସ୍ୱାଧୀନତାର ଅମୃତ କାଳରେ ଆମର ତାମିଲ ଐତିହ୍ୟ ବିଷୟରେ ଜାଣିବା, ଏହାକୁ ଦେଶ ତଥା ବିଶ୍ୱକୁ ଜଣାଇବା ଆମର ଦାୟିତ୍ୱ ଅଟେ । ଏହି ଐତିହ୍ୟ ଆମର ଏକତାର ପ୍ରତୀକ ଏବଂ “ଦେଶ ପ୍ରଥମ” ର ଆବେଗ । ଆମକୁ ନିରନ୍ତର ତାମିଲ ସଂସ୍କୃତି, ସାହିତ୍ୟ, ଭାଷା ଏବଂ ତାମିଲ ପରମ୍ପରାକୁ ଆଗକୁ ବଢାଇବାକୁ ପଡିବ ବୋଲି ପ୍ରଧାନମନ୍ତ୍ରୀ କହିବା ସହିତ ତାଙ୍କର ବକ୍ତବ୍ୟ ଶେଷ କରିଛନ୍ତି ।

HS