নেস্নেল হেল্থ ওথোরিতী (এন.ঐচ.এ.)না মসিনা আয়ুশমান ভারত দিজিতেল মিসন (এ.বি.দি.এম.) স্কিমগী মখাদা হেল্থকেয়র সর্ভিসশিং পীবদা হেন্না মপুং ফাহন্নবগীদমক্তা দিজিতেল ইন্তর্ভেন্সনশিং য়াহল্লি। অসিগুম্বা ইন্তর্ভেন্সন অমদি অখন্নবা হোস্পিতালশিংগী ও.পি.দি. (আউত-অনাবা দিপার্ত্মেন্ত) ব্লোকশিংদা অনাবাশিংবু খুদক্তা রেজিস্ত্রেসন তৌবা য়াহল্লিবা স্কেন অমসুং সেয়র সর্ভিস অসিনি। সর্ভিস অসি হৌদোকপা থা তরুক্কী মনুংদা অনাবা লাখ ১০ হেনবগী রেজিস্ত্রেসনশিং তৌবদা শিজিন্নখ্রে। পনবা য়াবদি হৌখিবা থা(ফেব্রুৱারী ২৩, ২০২৩)  খক্তদা অনাবা লাখ ৫ রেজিস্তর তৌহনখিবা অসিনি। স্কেন অমসুং সেয়র সর্ভিস অসিগী শাফু অমসুং পাম্নরকপগী চাং অসি মশিং খঙহেন হেনগৎলকপা অসিনা ময়েক শেংনা উৎলে।

স্কেন অমসুং সেয়র সর্ভিস্কী মরমদা ঙাংলদুনা, সি.ই.ও., এন.ঐচ.এ.না হায়খি- “ এ.বি.দি.এম.না দিজিতেল সোল্যুসনশিং শিজিন্নদুনা অপনবা লৈতবা হেল্থকেয়র পীনবগী ইকোসিস্তেম অমা শেমগৎনবা পান্দম থম্লি। স্কেন অমসুং সেয়র ফিচরগা লোয়ননা, হোস্পিতালশিংনা অনাবাশিংবু মখোয়গী এ.বি.ঐচ.এ.গী প্রোফাইল দাইরেক্ত সেয়র তৌদুনা দিজিতেল রেজিস্ত্রেসন সর্ভিসশিং পীরি। মসিনা অনাবাশিংবু ক্যুদা লেপহন্দনা অমসুং অকুপ্পা মরোল কয়া অমা পীনদনা খুদক্তা রেজিস্তর তৌবগী তোকনশিং ফংহনবদা মতেং পাংলি। হৌজিক্কী ওইনা, নোংমগী চাংচৎ অসি ও.পি.দি. তোকন ২৫,০০০গুম্বনি। অথুবা মতমদা নোংমদা তোকন লাখ ১ য়ৌহন্নবা ঐখোয়না খল্লি। মখা তানা, ঐখোয়না অনাবাশিং অমসুং হেল্থকেয়র সর্ভিস পীরিবা মীওইশিংগী মরক্তা অতোপ্পা ইন্তরেক্সনশিংগী ফিচরশিং হাপচিন্নবা থৌরাং তৌরি।“

স্কেন অমসুং সেয়র সর্ভিস অসিনা ক্যু.আর.-কোদতা য়ুম্ফম ওইবা হকথেংননা ই-পাউ লান্থোক্নবগী ইচম চম্বা মোদেলিতী অমা থবক তৌই। শরুক য়ারিবা হোস্পিতালশিংনা মখোয়গী অখন্নবা ক্যু.আর. কোদশিং অদু অনাবা রেজিস্ত্রেসন কাউন্তরশিংদা উৎলি। সর্ভিস অসিবু শিজিন্নবা য়াবা মোবাইল এপ (হৌজিক্কী ওইনা এ.বি.ঐচ.এ. এপ, আরোগ্যা সেতু, দ্রীফকেস, পেতিএম, বজাজ হেল্থ একাউন্ত অমসুং ইকাকেয়রদা ফংলি) শিজিন্নদুনা অনাবশিংনা মখোয়গী স্মার্তফোনশিংদগী ক্যু.আর. কোদশিং স্কেন তৌই। মসিগী মতুংদা অনাবা অদুনা মখোয়গী এ.বি.ঐচ.এ. (আয়ুশমান ভারত হেল্থ একাউন্ত) শেম্মী নৎত্রগা মখোয়কগী লৈজরিবা এ.বি.ঐচ.এ. একাউন্ত অদুদা লোগ ইন তৌগনি। লোগ ইন তৌরবা মতুংদা, মখোয়গী রেজিস্তর মপুং ফানা তৌননবগীদমক অনাবা অদুনা হকথেংননা ফোর্ম অদু মেল্লুদ্রবসু হোস্পিতাল অদুদা মখোয়গী এ.বি.ঐচ.এ. প্রোফাইলদু অদুম থাবা য়ারে। মসিগী চে য়াওদনা রেজিস্তর তৌবা অসিনা ইচম চম্না অনাবশিংগী এ.বি.ঐচ.এ. শিজিন্নদুনা খুদক্তা তোকন পীবিদুনা অনাবশিংবু শাংলবা ক্যুদা লেপহন্দে।

সর্ভিস অসি ২০২২গী ওক্তোবর ৬তা দিল্লীদা লৈবা লেদী হার্দিং মেদিকেল কোলেজ (এল.ঐচ.এম.সি.) অমসুং শ্রীমতী সুচেতা কৃপ্লানি হোস্পিতাল (এস.এস.কে.ঐচ.) হোস্পিতালদা এন.ঐচ.এ.না হৌদোকখিবনি। মতম অদুদগী, জিলা ১৪৭ হেনবদা লৈবা হোস্পিতাল ৪৪৩ হেনবনা সর্ভিস অসিবু শিজিন্নরক্লি অমসুং নুমিৎ খুদিংগী অনাবশিংবু ও.পি.দি. রেজিস্ত্রেসনগী ক্যুদা লেপগী মতম অদু কনবদা মতেং পাংলি। এ.আই.আই.এম.এস.- রাইপুর, এন.দি.এম.সি. চরক পালিকা হোস্পিতাল- ন্যু দিল্লী, এল.ঐচ.এম.সি. এন্দ এস.এস.কে.ঐচ.- ন্যু দিল্লী, সর সি.  ভি. রামন জেনেরেল হোস্পিতাল- বেঙ্গলুরু অমসুং এল.  বি. আর. এন. জোইন্ত হোস্পিতাল, কানপুর রোদ-লখনউ অসিনা এ.বি.ঐচ.এ.দা য়ুম্ফম ওইবা স্কেন অমসুং সেয়র ফংস্নেলিতী শিজিন্নদুনা নুমিৎ খুদিংগী অনাবা ২৫,০০০ হেনবদা মতেং পাংলি। স্কেন অমসুং সেয়র সর্ভিস শিজিন্নবগা মরি লৈনবা অহেনবা স্তেতিস্তিক্স এ.বি.দি.এম. পব্লিক দেসবোর্দ- https://dashboard.abdm.gov.in/abdm/ তা ফংই।

হোস্পিতাল অমসুং দিজিতেল সোল্যুসন কম্পেনীশিং (দি.এসস.সি.শিং)না হকশেলগী খুদোংচাবশিংদা মখোয়গী তেক্নোলোজী পীদুনা স্কেন অমসুং সেয়র সর্ভিসপু মখা তানা শিজিন্নরক্নবা , এ.বি.দি.এম.না দিজিতেল হেল্থ ইন্সেন্তিব স্কিম (দি.ঐচ.আই.এস.)কী মখাদা স্কেন অমসুং সেয়র ত্রাঞ্জেক্সনশিং হাপচিনখ্রে। এ.বি.ঐচ.এ.দা য়ুম্ফম ওইবা স্কেন অমসুং সেয়র সর্ভিস পীরিবা হকশেলগী খুদোংচাবশিং অসিসু মখোয়না ফংবা এ.বি.ঐচ.এ.দা য়ুম্ফম ওইবা দিজিতেল হেল্থ ত্রাঞ্জেক্সন মশিংদা য়ুম্ফম ওইদুনা দি.ঐচ.আই.এস.কী মখাদা লুপা কোতি ৪ ফাওবা ফংনবগী খুদোংচাবা অমসু পীরি। দি.ঐচ.আই.এস.কী ওইবা অহেনবা অকুপ্পা মরোলশিং মফম অসিদা ফংবীগনিঃ https://abdm.gov.in/DHIS

*****