দোনর, কলচর অমদি তুরিজম মন্ত্রী শ্রী জি. কিসন রেদ্দীনা ঙসি সিলোংদা পাঙথোকপা অসাম রাইফল্সকী ১৮৮শুবা রেজিং দে থৌরমদা অথোইবা মীথুং ওইনা ৱা ঙাঙখ্রে‍। অসাম রাইফল্সতা ১৮৩৫তগী হৌনা গেলেন্ত্রীগী অতৈগা মান্নদবা মনাৎ অমগা লোয়ননা লাক্লি অমদি গেলেন্ত্রী মনা খ্বায়দগী মশিং য়াম্না ফংবগী তোপ তোপ্পা থাক অমদা লৈ হায়না শ্রী কিসন রেদ্দীনা হায়খি‍। হায়রিবা তোপ তোপ্পা  থাক অসি লান্মী অসিগী থৌনা ফরবশিংনা মথৌ তৌবদা থৱায় কত্থোকখিবশিংদুনা ওইবা ঙমহনবনি হায়না মহাক্না মখা তাখি‍।

ভারতকী প্রধান মন্ত্রীনা রেদ ফোর্তকী মথক্তগী পীখিবা মহাক্কী ৱারোলদা “অমৃৎ কাল”গী অনৌবা নুমিৎ অমা চীংখৈ হুলহনখি অমদি লৈবাকসিগী চাওখৎপগী লম্বীদা মঙাল পীখি হায়না মন্ত্রীনা হায়খি‍। অমৃৎ কালসিদা অৱাং নোংপোক লমদমবু ভারতকী চাওখৎপগী ইঞ্জিন ওইনা শেমগৎপা হায়বসি প্রধান মন্ত্রীগী মীৎয়েঙনি হায়না মহাক্না মখা তাখি‍। হায়রিবা মীৎয়েঙ অসিগী পরিংদা, অৱং নোংপোক লমদমদা অনৌবা চক অমা হৌরে অমদি ইনফ্রাস্ত্রকচর, কন্নেক্তিবিতী, ইং-তপ্পা অমদি মরা চেৎপদবু ওইরবসু হীরম খুদিংদা খোঙলৈ থুনা খুমাঙ চাওশিল্লক্লি হায়না মহাক্না ফোঙদোকখি‍। খুৎলায় পায়বা কেদর ৮০০০ হেন্না চঙজরক্তুনা মহৌশাগী পুন্সিদা হঞ্জিল্লকখ্রে অমদি প্রধান মন্ত্রীগী লুচিং মখাদা য়াম্লবা পীস একোর্দশিং খুৎয়েক পীনখ্রে হায়না মন্ত্রীনা হায়খি‍।

শ্রী কিসন রেদ্দীনা লমদম অসিদা লৈঙাক্না ফংবা ঙমখ্রবা কয়া পনখি‍। হৌখিবা চহি ৯ অসিদা লমদম অসিদা চাওখৎ থৌরাংগী থবক অপনবা লৈতনা মখা চত্থনবগীদমক লুপা করোর লাখ ৫ হেন্না চাদিং তৌখ্রে অমদি অনৌবা এয়রপোর্ত ১৭, লুপা লাখ ১.০৫গী ওইগদবা হৌজিক পায়খৎলিবা লম্বীগী প্রোজেক্তশিং, অমদি লুপা করোর ৭৭,৯৩০গী ওইদবা হৌজিক পায়খৎলিবা রেল প্রোজেক্তনচিংবা অচৌবা কন্নেক্তিবিতী প্রোজেক্তশিংগা লোয়ননা লমদম অসিগী মীয়ামগীদমক মশিং থীঙমদ্রবা চাওখৎপগী খুদোংচাবশিংগী থোঙ হাংদোক্নবগীদমক সেক্তর খুদিংদা খুমাঙ চাওশিল্লি‍ হায়না মহাক্না হায়খি‍।

অৱাং নোংপোক লমদমদা লাক্লিবা অনৌবা মাইওন অসিদা ফংলিবা মায় পাকপশিং অসি ফংহনবদা অসাম রাইফল্সকী অচৌবা থৌদাং লৈ হায়না মহাক্না হায়খি‍। ইং-তপ্পগী চক অসিনা অৱাং নোংপোক লমদমগী অশেংবা মতিং ঐখোয়দা খঙহল্লে হায়না মখা তারদুনা হৌজিক্তি ঐখোয়না তোঙান তোঙানবা লমশিংদা লৈরিবা ঐখোয়গী পাঙ্গল থৌনা অৱাং নোংপোক স্তেতশিংদা পাঙথোক্কদৌরিবা তোঙান তোঙানবা জি২০ মীফমশিংসিগী মনুংদা মালেমগী মফমদা উত্থোকপা ঙম্লগনি হায়না মহাক্না মখা তাখি‍। লমদম অসিদা পাঙথোক্লিবা জি২০ মীফমশিং অসিনা অস্থলক্সমী স্তেতশিং অসিবু ভারতকী চাওখৎপগী মকোন ওইহনবদা মতেং ওইগনি হায়বা ৱাফমসু মহাক্না থমখি‍।

মন্ত্রীনা লান্মী শঙলুপ অদুনা দিজাস্তর মেনেজমেন্ত ওপরেসনশিংদা পায়খৎখিবা থবক থৌওংশিংগীদমক থাগৎখি অমদি লান্মী শঙলুপ অসিবু মখোয়গী অতাঙবা থৌনা অমদি অপুনবগী থবক থৌওংনা মরম ওইরগা এন.দি.আর.এফ.কী য়ুনিৎ অমা ওইনা মথৌ হাপলকপবুসু থাগৎখি‍। শ্রী জি কিসন রেদ্দীনা অসাম রাইফল্সপু লমদম অসিদা দ্রগ অমদি অতৈ অথিংবা পোৎলমশিং লোন্না পুথোক পুশিন তৌবা থেংনবদা লৌরিবা থৌদাংগীদমকসু থাগৎখি‍।

শ্রী জি কিসন রেদ্দীনা লান্মী শঙলুপ অসিগী রাইফল ৱুমেনশিংবু পুক্নিং থৌগৎখি অমদি ভারতখক্তদা নত্তনা মালেম পুম্বদা পীসকীপিং ফোর্স ওইনা থবক তৌবদা লৌরিবা থৌদাং অমদি ভারতকী নুপীগী থৌনাগী খুদম ওইবগীদমকসু থাগৎখি‍। তাঙ্কক কয়াদা অসাম রাইফল্সনা থৌদাংগী খোল্লাউদগী হেন্দোক্তুনা মেদিকেল কেম্প, ৱুমেন এমপৱারমেন্ত স্কীমশিং, নেস্নেল ইন্তিগ্রেসন তুরনচিংবা তোঙান তোঙানবা সিভিক এক্সন প্রোজেক্তশিংদসু ইচঙ থৌনা শরুক য়ারি হায়না মহাক্না মখা তাখি‍। অসিগুম্বা থৌওংশিং অসিনা লমদম অসিগী মীয়ামদা চাউনা মতেং ওইরি, হায়না মহাক্না মখা তানা ফোঙদোকখি‍।

লান্মী শঙলুপ অসিবু লমদম অসিদা ঙাকশেল অমদি মরা চেৎপা ফীভম পুরক্নবগীদমক মখোয়গী পুক্নিং লুপ্পা, খোয়দাজবা অমদি কত্থোকপগীদমক ‘সেন্তিনেলক ওফ নোর্থ ইস্ত’ অমদি ‘ফ্রেন্দ্স ওফ দি হিল পীপল’ হায়না কৌনরিবা অসিমক মরম চাবনি হায়না মন্ত্রীনা ফোঙদোকখি‍।

******