প্রধানমন্ত্রীগী লোইশঙ

প্রধান মন্ত্রী মার্চ ২৫দা কর্নাতকাদা চৎকনি


প্রধান মন্ত্রীনা চিক্কাবাল্লাপুরদা শ্রী মধুসুদন সাই ইন্সতিতুৎ ওফ মেদিকেল সাইন্সেস এন্দ রিছর্স শঙ্গাগনি

প্রধান মন্ত্রীনা বেঙ্গলোর মেত্রোগী হ্বাইতফিল্দ(কাদুগোদি)দগী কৃষ্ণরাজাপুরা মেত্রো লাইন শঙ্গাগনি

মেত্রো লাইন অসিনা মখা তানা চৎথোক-চৎশিন নুংঙাইবা হেনগৎহনগনি অমসুং সহর অসিদা গারি চিনবা হন্থহনগনি

Posted On: 23 MAR 2023 5:51PM by PIB Imphal

মার্চ ২৫,২০২৩দা প্রধান মন্ত্রী শ্রী নরেন্দ্র মোদী কর্নাতকাদা চৎকনি। অয়ুক্কী পুং ১০:৪৫ রোম তাবদা প্রধান মন্ত্রীনা চিক্কাবাল্লাপুরদা শ্রী মধুসুদন সাই ইন্সতিতুৎ ওফ মেদিকেল সাইন্সেস এন্দ রিছর্স শঙ্গাগনি। নুংথিলগী পুং ১ রোম তাবদা, প্রধান মন্ত্রীনা বেঙ্গলোর মেত্রোগী হ্বাইতফিল্দ(কাদুগোদি)দগী কৃষ্ণরাজাপুরা মেত্রো লাইন শঙ্গাগনি অমসুং মেত্রো তোংগনি।

চিক্কাবাল্লাপুরদা প্রধান মন্ত্রী

লমদম অসিদা অনকপদা অমসুং মমল হোঙনা অনা-লায়য়েংগী খুদোংচাবা ফংহন্নবা অমসুং অনৌবা খুদোংচাবশিং ফংনবা মহৈরোয়শিং মতেং পাংনবা থৌরাং অমা ওইনা, প্রধান মন্ত্রীনা শ্রী মধুসুদন সাই ইন্সতিতুৎ ওফ মেদিকেল সাইন্সেস এন্দ রিছর্স(এস এম এস আই এম এস আর) শঙ্গাগনি। মসি সত্য সাই গ্রামা, মুদেনাহাল্লি, চিক্কাবাল্লাপুরদা লৈবা শ্রী সত্য সাই য়ুনিভর্সিতি ফোর হুমেন এক্সলেন্সনা লিংখৎপনি। সেন্তর অসি খুঙ্গংদা লৈরি অমসুং মেদিকেল ইজুকেসন অমসুং অনা-লায়য়েংদা শেন্দোং তানবা তোক্নবা পান্দমদা লিংখৎপনি অমসুং মসিনা মগুন লৈবা মেদিকেল ইজুকেসন লেম্না পীগনি। মহৈলোয়শঙ অসি ২০২৩দগী তম্বা হৌগনি।

বেঙ্গালুরুদা প্রধান মন্ত্রী

লৈবাক শীনবা থুংনা মালেম থাক্কী সহরগী চৎথোক-চৎশিনগী মচাক-মথুমশিং শেমগৎনবা প্রধান মন্ত্রীগী অখন্নবা পান্দম অমা লৈরি। পান্দম অসিগী মখাদা, বেঙ্গালোর মেত্রো ফেজ-২গী মখাদা রিচ-১ এক্সতেন্সন প্রোজেক্কী কিলোমিতর ১৩.৭১ শাংবা হ্বাইতফিল্দ(কাদুগোদি)দগী কৃষ্ণরাজাপুরা মেত্রো লাইন প্রধান মন্ত্রীনা শঙ্গাগনি। লুপা করোর ৪২৫০ রোম চঙনা পায়খৎপা মেত্রো লাইন অসিনা বেঙ্গালুরুদা মৈখু চেন্দবা, অশোই-অঙাম থোক্তবা, য়াংবা অমসুং নুংঙাইবা মীয়ামদা ফংহনগনি অমসুং মখা তানা চৎথোক-চৎশিন নুংঙাইবা হেনগৎহনগনি অমসুং সহর অসিদা গারি চিনবা হন্থহনগনি।

*****



(Release ID: 1910156) Visitor Counter : 93


Read this release in: Bengali , Odia , Assamese , English , Urdu , Marathi , Hindi , Punjabi , Gujarati , Tamil , Telugu , Kannada , Malayalam