ঙসি কেবিনেত সেক্রেতরি শ্রী রজিব গৌবানা লুচিংদুনা লাক্লিবা কালেনগী মৈশাদগী ঙাকথোক্নবা থৌরাং তৌরিবশিং হন্না য়েংশিন্নবা মীফম অমা পাংথোকখ্রে। অকনবা নুংশাগী মৈশা মায়োক্নগনবা রাজ্যশিং/য়ু.তিশিংগী চীফ সেক্রেতরিশিং অমসুং মরী লৈনবা কেন্দ্রগী মিনিস্ত্রিশিং/দিপার্তমেন্তশিংগী সেক্রেতরিশিং মীফম অদুদা শরুক য়াখি। 

ইন্দিয়া মেতিওরোলোজিকেল দিপার্তমেন্ত(আই এম দি)না মার্চ-মে,২০২৩ ফাওবগী মালেমগী নোং-চিংগী ফিবম অমসুং অইং-অশাগী ওইরকপা য়াবা ফিবমশিংগী মতাংদা পাউদমখি। মার্চ ২০২৩গী অনিশুবা থাখাইগী নোং-চিংগী ফিবমশু মাংজৌন্না লাউথোকখি।

মার্চ-মে,২০২৩ ফাওবগী অইং-অশাগী ওইরকপা য়াবা ফিবমশিংগী মতাংদা, আই.এম.দিনা হায়খি  অৱাং-নোংপোক্কী অয়াম্বা শরুক, নোংপোক অমসুং ময়াইথংবা ভারত অমসুং অৱাং-নোংচুপ ভারতকী শরুক খরদা অইং-অশা মহৌশাগী চাংদগী হেনগৎকনি। ভারতকী খা থংবা পেনিন্সুলারগী শরুক খক নত্তনা ভারতকী অয়াম্বা শরুক্তা খ্বাইদগী ইংবগী চাং মহৌশাগী চাংগী মথক্তা লৈগনি। 

মার্চ ২০২৩গী লেমহৌরিবা মতমদা থোইদোকপা নুংশাগী মৈশাগী ৱেব লৈরোই হায়না আই.এম.দিনা ফোঙদোক্লি। অদুবু মার্চকী অরোইবা চয়োলদা ইন্দো-গঙ্গেতিক প্লেনগী শরুক খর অমসুং নোংপোক ভারত্তা শাবগী চাং মহৌশাদগী সেলসিয়স দিগ্রি ২-৩ ফাওবগী হেনগনি।

এগ্রিকলচর অমসুং ফার্মরস ৱেলফিয়ার দিপার্তমেন্তগী সেক্রেতরিনা হায়খি হৌজিক ফাওবদা নিংথম লৌরোক্কী মহৈ-মরোংগী ফিবম ফনা লৈরি অমসুং খ্বাইদগী ৱাংবা ওইনা গেহুগী পোৎথোক চাউরাক্না মেত্রিক তন ১১২.১৮ পুথোক্কনি হায়না থাজরি। কা হেনবা মৈশানা গেহুদা পীরিবা চৈথেং য়েংশিন্নবা এগ্রিকলচর কম্মিসন্নরনা লুচিংবা অখঙ-অহৈশিংগী কম্মিতি অমা এগ্রিকলচর অমসুং ফার্মরস ৱেলফিয়ার দিপার্তমেন্তনা শেম্লে। ইন্তর-মিনিস্তরিয়েল কম্মিতি-ক্রোপ ৱেদর ৱাতচ গ্রুপ(সি দব্লি দব্লিউ জি)না চয়োল খুদিংগী মহৈ-মরোংগী ফিবম য়েংশিনগনি।

হেল্থ অমসুং ফেমিলি ৱেলফিয়ার মিনিস্ত্রিগী সেক্রেতরিনা হায়খি নুংশাগী মৈশানা থোকহনবা খুদোংচাদবশিং, মৈশাগা মরী লৈনবা অনাবশিং অমসুং মখোয় লায়য়েংবগী মতাংদা জুলাই ২০২১দা মিনিস্ত্রিনা নেসনেল এক্সন প্লান ওন হিত রিলেতেদ ইলনেস(এন এ পি-ঐচ আর আই) ফোঙখ্রে। তঙাইফদবা হিদাক-লাংথকশিং, ইন্ত্রভেনস ফ্লুইদশিং, আইস পেকশিং, ও.আর.এস অমসুং থক্নবা ঈশিং য়াওনা হকশেলগী মতাংদা রাজ্যশিংনা থৌরাং তৌরিবশিং হন্না য়েংশিন্নবা মহাক্না রাজ্যশিংদা পাউতাক  পীখ্রে। মহাক্না হায়খি মীয়াম ৱাখল তাহনবদা শীজিন্নগদবা আই.ই.সিগী মচাকশিং লম-লমগী লোনশিংদা হন্দোক্কদবনি।

ইনভাইরোনমেন্ত, ফোরেস্ত অমসুং ক্লাইমেত চেঞ্জ মিনিস্ত্রিগী দাইরেক্তর জেনেরেল(ফোরেস্ত)না হায়খি উমং মৈ চাকপা থেংন্নবা এক্সন প্লান অমসুং থৌরাং কয়া পায়খৎলে। পায়খৎলিবা থবকশিংগী মনুংদা মৈরম শেম্বা অমসুং ঈশিং তুংশিন্দুনা থম্নবা মফমশিং শেম্বা, মৈ চাকপা কনবা অমসুং রাজ্যগী ফোরেস্ত দিপার্তমেন্তশিংনা মৈ চাক্কনবা মফমশিংদা ফাইয়ার ৱাতচরশিং শেম্বা য়াওরি। মতম চপ চানা উমং মৈ চাকপগী পাউ পীনবা বন অগ্নি কৌবা ফোরেস্ত ফাইয়ার ফোরকাস্তিং সিস্তেম পোর্তেল অমা ফোরেস্ত সর্ভে ওফ ইন্দিয়ানা পুথোক্লে।

হোম এফেয়ার্স মিনিস্ত্রি অমসুং এন.দি.এম.এনা পায়খৎলিবা থবকশিংগী মতাংদা য়ুনিয়ন হোম সেক্রেতরিনা হায়খি অকনবা নুংশাগী মৈশাদগী ঙাকথোক্নবা থৌরাং তৌনবা অমসুং থবক ওইনা পায়খৎনবগী মতাংদা জাতি থাক্কী চৎন-কাংলোনশিং ২০১৬দা ফোঙখ্রে অমসুং ২০১৭ অমসুং ২০১৯দা রিভাইস তৌখ্রে। হিত এক্সন প্লানশিং থবক ওইনা পাংথোক্নবা রাজ্যশিংদা পাউতাক পীখ্রে। এপ্রিল অমসুং মে, ২০২৩দা দুরদর্সন অমসুং ওল ইন্দিয়া রেদিওদা মীয়াম ৱাখল তাহন্নবা থৌরমশিং শন্দোক্কনি। এন.দি.এম.নশু সোসিএল মেদিয়া প্লেতফোর্মশিংগী খুৎথাংদা মীয়াম ৱাখল তাহন্নবা থবকশিং মাংজিল থাগনি।

পৱার মিনিস্ত্রিগী সেক্রেতরিনা হায়খি মার্চ ২০২৩ ফাওবগী মনুংদা পৱার প্লান্তশিং শেমজিন-শাজিনবগী থবকশিং পাংথোক্নবা পাউতাক পীখ্রে। পঞ্জাব অমসুং রাজস্থান রাজ্যশিংদা কেপতিব পৱার প্লান্তশিংগী কোয়লা পুথোকপা হেনগৎনবা হায়জখ্রে। দ্রিকিং ৱাতর অমসুং সেনিতেসন, ৱাতর রিছোসেস, রিভর দিবলপমেন্ত এন্দ গঙ্গা রিজুবেনেসনঅমসুং এনিমেল হসবেন্দরি অমসুং দাইরিয়িং দিপার্তমেন্তশিংগী সেক্রেতরিশিংনা থক্নবা ঈশিং , লৌউ-শিংউগী ঈশিং অমসুং শা-ষনগী মচিঞ্জাক ফংহন্নবা পায়খৎকদবা থবকশিংগী মতাংদা পাউতাকশিং পীখি।

কেবিনেত সেক্রেতরিনা হায়খি ২০২৩দা মহৌশাদা শাবগী চাং অদুদগী হেন্না শাগনি হায়না পানরি, মৈশাগা মরী লৈনবা খুদোংচাদবশিং থেংন্নবা রাজ্যশিং অমসুং য়ু.তিশিংনা মতিক চানা থৌরাং তৌগদবনি। মতম চানা চেকশিন-থৌরাং লৌখৎনবা অমসুং নিংথিনা থৌরাং তৌনবা রাজ্যশিং/য়ু.তিশিংনা পায়খৎপা থবকশিং কেন্দ্রগী মিনিস্ত্রিশিংনা য়েংশিল্লে। মরী লৈনবা দিপার্তমেন্তশিংগী সেক্রেতরিশিং অমসুং দিস্ত্রিক কল্লেক্তরশিংগা লোয়ন্না মৈশাগী থৌরাং তৌরিবশিং অদু হন্না য়েংশিন্নবা চীফ সেক্রেতরিশিংদা হায়জখ্রে। হেল্থ অমসুং ফেমিলি ৱেলফিয়ার মিনিস্ত্রি অমসুং এন.দি.এম.এনা ফোঙবা চেকশিনৱাশিং লম-লমগী লোনশিংদা হন্দোক্কনি অমসুং পাক-শন্না য়েন্থোক্কনি। হেন্দ পম্পশিং শেমজিন্নবা, ফাইয়ার ওদিৎ অমসুং মোক দ্রিলশিং পাংথোক্নবা কেবিনেত সেক্রেতরিনা তকশিনখ্রে। কেন্দ্রগী এজেন্সিশিংনা মখা তানা রাজ্যশিংদা পাউ ফাউনগনি অমসুং দরকার ওইবশিং মতেং পাংগনি হায়না মহাক্না রাজ্যশিংদা থাজবা পীখি।

****