নমস্কার জী।

মমাংগী নুমিৎ কয়ানিদগী বজেতকী মতুংদা ৱেবিনার পাংথোকপগী চৎনবী অমা লৈরক্লি। বজেৎকী মতুংদা স্তেকহোলদরশিংগা লোয়ননা বজেৎকী মতাংদা ৱারী শাদুনা খন্ন-নৈনবগী চৎনবী অমা ঐখোয়না মমাংগী চহি অহুমদগী হৌদোক্লে। বজেৎ লাক্লবা মতুংদা, মসিবু ঐখোয়না অথুবা মতমদা অমসুং অহেনবা মিৎয়েং চঙদুনা থবক্তা ওন্থোকপগী পাম্বৈ থীনরি। স্তেকহোলদরশিংনা মরী লৈনবা পাউতাক পীরি, মখোয়গী পাউতাকশিং অসিদা সরকারনা মতৌ করম্না থবক তৌগনি হায়বগী মতাংদা মনুং হুৎনা খন্ন-নৈনরি। লৌমী, নুপী নহা, ত্রাইবেল, ঐখোয়গী দলিত ইচিল ইনাও য়াওনা বজেৎকা হকথেংননা মরী লৈনবা এসোসিএসন, কারবার, অমসুং ইন্দস্ত্রীশিংগা লোয়ননা স্তেকহোলদর কয়ানা লিশিং খুজিংদা থোক্লক্তুনা নুমিৎ চুপ্না খন্ন-নৈনদুনা কান্নবা পাউতাক কয়া থোক্লকপা অসিদা ঐহাক্না য়াম্না নুংঙাইবা ফাওই। সরকারনা তসেংনা থবক ওইনা পাংথোকপা য়াবা পাউতাক কয়াসু লাক্লে। বজেত্তা মদু য়াওরম্লবদি, মদু অমা পল্লম্লবদি হায়বা ৱাফম কয়াগী ৱারী শাবগী মহুত্তা বজেত অসিবু খ্বাইদগী কান্নবা অমসুং তেংবাংবা ঙমগদবা বজেত অমা ওইহন্নবগীদমক্তা করি পাম্বৈ লৈবগে হায়না স্তেকহোলদরশিংনা হেন্না ৱারী শাবসিদা ঐহাক য়াম্না নুংঙাইবা ফাওই।

মসিদি ঐখোয়গী গনতন্ত্রগী অনৌবা অমসুং মশক থোকপা অনৌবা তাঙ্কক অমনি। পার্লিয়ামেন্ততা খন্নবা ৱারী, মদুগুম্বা ৱারী অদুমক লৈবাক মীয়াম্না শানরকপা অসিসু য়াম্না কান্নবা থৌওং অমনি। ঙসিগী ৱেবিনার অসিদি ভারতকী মীওই কয়াগী স্কিল অমসুং হৈ-শিংবদা কত্থোক্লবনি। মমাংগী চহি কয়াসিদা ঐখোয়না স্কিল ইন্দিয়া মিসন অমসুং কৌশল রোজগার কেন্দ্রগী খুত্থাংদা নহা করোর কয়াদা স্কিল পীবা অমসুং থবক পীবগী থবক কয়া পাংথোক্তুনা লাক্লি। স্কিলগুম্বা হীরম অসিদা ঐখোয়না অখন্ননা মিৎয়েং চঙলিবমখৈ, পান্দমগা লোয়ননা থবক হেন্না পায়খৎলিবমখৈ, হেন্না ফবা মহৈ ফংবা ঙমগনি।

পি.এম. বিশ্বকর্মা কৌশল সম্মান য়োজনা অসিবু ঐখোয়না অরায়বা ৱাহৈদা হায়রগদি, পি.এম. বিশ্বকর্মা য়োজনা, মসিসু ঐখোয়গী হোৎনজমন অসিগী মহৈ অমনি। হন্দক্কী বজেত্তা পি.এম. বিশ্বকর্মা য়োজনা লাউথোকপদগী মীয়াম্না মসিগী পাক শন্না খন্ন-নৈনবগী মতৌ ঐখোয়না উখি, পাউ-চে অমসুং শেন্মিৎলোনগী হীরমদা নৈনবা মীওই কয়ানসু মসিদা মিৎয়েং চঙনখি। স্কিম অসি করিগীদমক্তা তঙাই ফদ্রিবনো, মসিগী মমিং অসিবু বিশ্বকর্মা হায়না করিগীদমক্তা কৌরিবনো, স্কিম অসিগী মায় পাকপদা অদোম স্তেকহোলদরশিংগী মথৌ কয়া য়াম্না তাবগে হায়বগী মতাংদা ঐহাক শন্দোক্না তাকচগে। অদোমসু খন্ন-নৈনবা অসিদগী অফবা ৱাফম খরা পুথোকপীরকউ।

মরুপশিং,

ভগ্বান বিশ্বকর্মা অসিবু ঐখোয়না য়ুনিভর্স অসিবু শেম্বীরিবা অমসুং কাঙলোন ঙাক্লিবা ঈশ্বর অমনি হায়না ঐখোয়না থাজনৈ। মহাকপু খ্বাইদগী খুৎ-শা হৈবনি হায়না লৌনৈ অমসুং মহাক্কী শক্তম নিংশিংবদা ঐখোয়না মহাক্কী অকোয়বদা খুৎশু খুৎলায় কয়া লৈবগী মতৌ উই। মশাগী মখুৎনা খুৎলায় কয়া শিজিন্নদুনা পোৎলম কয়া শাবগী চৎনবী অমা ঐখোয়গী খুন্নাইসিদা চৎনদুনা অদুমক লাক্লি। তেক্সতাইল সেক্তরদা থবক তৌবশিংদবুদি ঐখোয়না অদুমক মিৎয়েং চঙলি, অদুবু খুন্নাইগী তঙাই ফদবা কয়াদা মতমগী অহোংবগা লোয়ননা তেংবাংদুনা লাক্লিবা ঐখোয়গী য়োৎ শুবা মীওই, সনা শাবা মীওই, চফু শাবা, মুর্তী শাবা, চেক শুবা, আর্তিসান অমদি মখোয়গুম্বা কয়া অমসু লৈতবা নত্তে।

মখোয়গুম্বা কাঙলুপ অসিনা মতমগী অহোংবগী মতুং ইন্না চুননবা হোৎনদুনা লাক্লি। লোয়না লোয়ননা, মফম মফমগী চৎনবীগী মতুং ইন্না অনৌবা পোৎলম কয়া অমসু পুথোক্তুনা লাক্লি। খুদম ওইনা হায়রবদা, মহারাস্ত্রগী মফম খরদা, পোৎলম কয়া হাপ্নবগীদমক্তা ৱানা শাবা মওং-মতৌ অমদা হৱাই চেংৱাই হাপ্নদুনা লাক্লি। মসিবু কঙ্গী হায়না কৌই, মসিবু মফমদুগী মীওই খক্তনা শানৈ। মতৌ অসুম্না, ঐখোয়না সমুদ্র মপানগী লমদমশিংদা চৎপা মতমদা, লমদমদুগী তঙাইফদবা কয়া ফংহন্নবা মশাগী ওইবা ক্রাফ কয়া শাদুনা শিজিন্নরি। কেরলাগী মতাংদা পল্লবদি, কেরলাগী উরু বোত অসি খুৎনা শাবনি। মফমদুগী উশিবশিংনা মসিগুম্বা ঙা ফাবগী হি অসি শাই। মসি শাবদা অখন্নবা স্কিল অমসুং তোঙানবা হৈ-শিংবগী মথৌ তাই।

মরুপশিং,

লোকেলগী পোত্থোক কয়া শাদুনা মদুনা মীয়ামগী পুক্নিং চিংশিনবদা লোকেল আর্তিসানশিংগী চাউরবা থৌদাং লৈরি। অদুবু লাইবক থীবদি, মখোয়গী থৌদাংশিং অসি মখোয়গী খুন্নাইদগী হেন্দোক্ত্রে, য়াম্না পিকশিল্লে। মখোয়গী থবকশিং অসি নিংথীনা শিংথানবীদ্রে, থোইদোক্না কান্নদ্রে হায়না লৌনরে। অদুবু, মতম অমদদি মখোয়গী থবকশিং অসি মালেম শিনবা থুংবদা মমিং লৈরম্লিবনি। অরিবা মতমগী ভারত্তা হায়রিবা থবকশিং অসিনা ভারতকী এক্সপোর্ত্তা অচৌবা থৌদাং য়ারম্লিবনি। অদুবু, মীখা পোনখিবা মতমশিংদা মসিগুম্বা ব্যুজিনেস মোদেল অসি মরাই চাইথখ্রে, মসিনা অশোকপা কয়া অমা নগখ্রে।

নিংতম্বা মতুংদা ঐখোয়গী আর্তিসানশিংনা ফংফম থোকপা মিৎয়েং অমসুং মখোয়গী য়াইফ থৌরাংগীদমক্তা পাংথোকফম থোকপা থবক অমত্তা পাংথোকখিদ্রে, মতেংগী তঙাই ফদবা মতমদা মতেং ফংদনা লাকখ্রে। মসিনা মরম ওইরগা পুন্সি মহিং তান্নবগীদমক্তা অফংবা থবক শুবদগী মসিগুম্বা চৎনবী অসি থাদোক্নবগী ফিভম কয়া লৈরকখি। মতমগী তঙাই ফদবশিংগা মান্ননা চৎপা ঙম্বগী মখোয়গী মতিক মাঙশিল্লক্লে।

মখোয়বু ঐখোয়না হেক্তা থাদোক্তুনা চৎপা য়াবা নত্তে। ইশাগী ওইবা চৎনবী শিজিন্নদুনা মশাগী ক্রাফপু য়োকখত্তুনা লাক্লিবশিং অসি মখোয়গুম্বা কাঙলুপশিং অসিননি। মশাগী ওইবা তোঙানবা অমসুং তোপ-তোপ্পা পোত্থোকশিংগী মতেংদগী মশাগী শক্তাক শেম্লিবা কাঙবু অসি মখোয়নি। মখোয় অসিদি মরোমদোম লেপচবা ঙম্বা ভারতকী ইথিলগী অশেংবা খুদম্নি। ঐখোয়গী সরকারনা মখোয়গী কাঙলুপ অমসুং মীওইশিংবু বিশ্বকর্মনি হায়না লৌরি। ঐখোয়না মসিগী মরম অসিগীদমক্তা পি.এম. বিশ্বকর্মা কৌশল সম্মান য়োজনা হৌদোক্লিবনি। স্কিল অসি অনৌবনি, অদুবু মসিগী মরু ওইবদি য়াম্না লৈ।

মরুপশিং,

মীওই হায়বসিদি খুন্নাইগা লোয়ননা হিংবা জিবনি হায়না ঐখোয়না মহৌশাদগী ৱাফম অমা তাদুনা লাক্লি। খুন্নাইগী তোঙান-তোঙানবা পাঙ্গলদগী খুন্নাইগী পথাপ চলাই হায়নরিবনি। চাউখৎপদি লায়রদনা, খুন্নাই য়াওদনা হিংবা য়াদবা থবক খরসু লৈরিবনি। ঐখোয়না মসি খল্লুবা ঙমদে। ৱাখলনা লাম্বা ঙমদে। হায়রিবা থবকশিং অসিনা ঙসিদি তেক্নোলোজীগী মতেঙ্গা ফংলম্বা য়াই, মতমগী মতুং ইন্না মোদর্ন ওইরম্বসু য়াই, অদুবু মসিগুম্বা থবকশিং অসিগী চুনবগী মতাংদদি ঐখোয়না কৈদৌনুংদা ৱাহং হংবা য়ারোই। খুঙ্গংগী শেন্মিৎলোন নিংথীনা খঙবা মীওইশিংনা ইমুং অমগী ওইবা তোঙানবা দাক্তর লৈত্রবসু, সনা শাবা মীওই অমদি শোইদনা লৈতবা য়াদে হায়বা ৱাফম অসি নিংথীনা খঙগনি। হায়রিবা ইমুং অসিনা চারোন শুরোন কয়াদগী সনা শাবা মীওই অমখক্তদা সনা শাহন্দুনা লাক্নৈ, মখোয়দগী সনাগী লিক-কোন লৈগনি। মসিগুম্বা আর্তিসানশিং অসিনা খুঙ্গংদা ওইরো, শহর মচাদা ওইরো, মশাগী খুৎনা থবক শুদুনা মশাগী পুন্সি মহিং তাল্লিবনি। মখোয়গুম্বা চোইনা লৈরবা মীওইশিংদা পি.এম. বিশ্বকর্মা য়োজনানা অহেনবা মিৎয়েং চঙলিবনি।

মরুপশিং,

মহাত্মা গান্ধীজীগী গ্রাম স্বরাজকী ৱাখল্লোন্দা ঐখোয়না মিৎয়েং তারুবা মতমদা, খুঙ্গংগী পুন্সি মহিংদা লৌউ-শিংউ অমসুং অতোপ্পা থৌরাং কয়াগী মরু ওইবা কয়া লৈবা ঐখোয়না উগনি। খুঙ্গংগী কাঙলুপ খুদিংবু মখোয়গী চাউখৎ-থৌরাংগীদমক্তা মপাঙ্গল হাপ্পা হায়বসি ভারতকী চাউখৎপগী খোঙচত্তা য়াম্না মরু ওই।

ঐহাক্না নুমিৎ খরনিগী মমাংদা দিল্লীদা আদী মহোতসবতা শরুক য়াখি। হেন্দিক্রাফ অমসুং মরী লৈনবা অতোপ্পা থবক-থৌরমশিংদা হৈথোই শিংথোইরবা ঐখোয়গী ত্রাইবেল খুন্নাইগী মীওই কয়া লাক্নখিবা অমসুং মফমদুদা স্তোল কয়া ফমখিবা ঐহাক্না মফমদুদা উবা ফংজখি। লাখকী খুজি শাবগী মফমদুনা ঐহাক্কী পুক্নিং খ্বাইদগী চিংশিনখি। মখোয়না মতৌ করম্বা লাখকী খুজি শাবা, মচু শংবা, ময়েক নম্বগী থবকশিং মতৌ করম্না পাংথোক্লিবনো অমসুং খুঙ্গংগী নুপীশিংনা মতৌ করম্না মসিগুম্বা থবক অসি তৌরিবনো হায়বা ঐহাক খঙনিংবনা লাংতক্নখি। অদুগা মদুদা লাকপা মীওইশিংনা য়ামদ্রবদা মিনিত তরাদি লেপ্তুনা য়েংনবগী মতৌসু ঐহাক্না উবা ফংখি।

মতৌ অসুম্না, য়োৎকী থবক শুরিবা ঐহাক্কী য়োৎ শুবা ইচিল ইনাও, লৈবাক্না কোল লিক শারিবা ঐহাক্কী চফু শাবা মরুপশিং, উ শিজিন্নদুনা পোৎ-চৈ শারিবা, সনাগী থবক শুরিবা মরুপশিংবু ঐখোয়না শৌগৎপগী মথৌ য়াম্না তারে। ঐখোয়না স্ত্রীত ভেন্দরশিংগীদমক্তা পি.এম. স্বনিধী স্কিম হৌদোক্তুনা কান্নবা কয়া ফংহল্লিবা অসিগুম্না পি.এম. বিশ্বকর্মা য়োজনাগী খুত্থাংদগী মীওই করোর কয়াদসু কান্নবা অমসুং খুদোংচাবা কয়া ফংহল্লগনি। ঐহাক্না চহি কয়াগী মমাংদা য়ুরোপকী লৈবাক অমদা চৎলুই। সনাগী লিক-কোন অমসুং লৈতেংগী কারবার তৌবা গুজরাতী খরা ঐহাক্না থেংনখি। ঐহাক্না হৌজিক্কানবু কারবার অসি কমদৌরি হংবদা, সনাগী লৈতেংগী মতাংদা তেক্নোলোজী কয়া লাক্লে, মেছিন অনৌবা কয়া লৈরে, অদুবু খুৎনা শাবা সনাগী অখন্নবা অসিদি তোঙাল্লি, মার্কেত্তা য়াম্না পাম্নরি হায়না পাউদম্লকখি। মসিনা হায়বদি, লম অসিগী মতাংদা খুদোংচাবা য়াম্না লৈরি, ওইথোকপা য়াবা য়াম্না লৈরি হায়বনি।

মরুপশিং,

মসিগুম্বা কয়া থেংনরকপা অসিনা মরম ওইরগা ঐখোয়গী কেন্দ্র সরকারনা বিশ্বকর্মা মরুপ খুদিংদা হোলিস্তিক ইন্সতিত্যুস্নেল সপ্পোর্ত পীগনি। বিশ্বকর্মা মরুপশিংনা লোন ফংহনবা, স্কিলিং তৌবা, তেক্নিকেল সপ্পোর্ত পীবা, দিজিতেল ইম্পাৱর্মেন্ত তৌবা, ব্রান্দ প্রোমোসন তৌবীবা, মার্কেতিং অমসুং রো মেতরিএলগী হীরমশিং পাংথোকপদা হেন্না লায়থোকহন্নবা ঐখোয়না হোৎনগনি। পি.এম. বিশ্বকর্মা য়োজনা অসিগী পান্দমদি ত্রেদিস্নেল আর্তিসান অমসুং ক্রাফমেনশিংবু চাউখৎহনবগা লোয়ননা মখোয়গী মশক নাইরবা চৎনবীশিংবুশু ঙাক শেন্দুনা থম্বনি।

মরুপশিং,

হৌজিক্তি, ঐখোয়না মখোয়গী তঙাই ফদবগী মখা পোন্না, স্কিল ইনফ্রাস্ত্রকচর সীস্তেম্বু অনৌবা মওং-মতৌদা শীন্দোকপা হায়বসি য়াম্না মরু ওইরে। স্কিম অসিনা ঐখোয়গী বিশ্বকর্মা মরুপশিংদা য়ারিবমখৈ পীনবা হোৎনগনি। ঐখোয়না হৌজিক পায়খৎলিবা দিজিতেল লিতরেসী মিসন অসিদা ঐখোয়গী বিশ্বকর্মা মরুপশিংবুসু য়াওহনবা হায়বসিদা ঐখোয়না অহেনবা অমসুং অহানবা মিৎয়েং চঙবা তাবনি।

মরুপশিং,

ঙসিগী বিশ্বকর্মশিংনা হয়েংগী ওন্তোপ্রিনর ওইবা ঙমগনি হায়বসি ঐখোয়গী পান্দম্নি। মসিগীদমক্তা, মখোয়গী বিজনেস মোদেলদা সস্তেনেবিলিতী লৈহনবা হায়বসি য়াম্না মথৌ তাই। ৱাফম অসিবু মুন্না খন্নদুনা, মখোয়না শাবা পোত্থোকশিংবু হেন্না মগুন লৈহন্নবা, পুক্নিং চিংশিনবা দিজাইন, পেকেজিং অমসুং ব্রান্দিং হেন্না ফগৎহন্নবা ঐখোয়না থবক তৌরি। ঐখোয়না তাঞ্জা অসিদা কস্তমরশিঙ্গেএ অপাম্বশিংবুসু খন্নরি। ঐখোয়না মিৎয়েং থম্লিবা অসিদি লৈবাক্কী কৈথেলখক্তা নত্তে, মালেমগী কৈথেলদসু ঐখোয়না পান্দম থম্লি। ঐহাক্না স্তেকহোলদর খুদিংগী মফমদা বিশ্বকর্মশিংবু নিংথীনা লমজিং লমতাকপীদুনা মখোয়গী মফমদা মরী লৈনবা ই-পাউশিং নিংথীনা খঙহন্দুনা মখোয়না তুংলমচত্তা চঙশিনবদা তেংবাংবীয়ু হায়জরি। মসিগীদমক্তা অদোম্না গ্রাউন্দদা চৎপা তাবনি অমসুং মখোয়গুম্বা বিশ্বকর্মা মরুপশিংগী মরক্তা তিন্দুনা মখোয়গী মঙলানশিংদা মশা পানবীবগী মথৌ তাই।

মরুপশিং,

আর্তিসান অমসুং ক্রাফমেনশিংবু ঐখোয়গী ভেল্যু চেনগী শরুক ওইহন্দুনা মখোয়গী মপাঙ্গল হাপ্পগী মথৌ তাই। মখোয়গী মনুংদগী য়াম্লবা মীওই কয়ানা ঐখোয়গী এম.এস.এম.ই. সেক্তরগী সপ্লাইয়র অমসুং প্রদ্যুসর ওইবা ঙমগনি। মতিক চাবা তুল অমসুং তেক্নোলোজীগী মতেংদগী মখোয়বু ঐখোয়গী শেন্মিৎলোনগী মরু ওইবা শরুক অমা ওইহনবা য়াগনি। ইন্দস্ত্রীগী মীওইশিংনা মখোয়গী তঙাই ফদবগী মখা পোন্না বিশ্বকর্মশিংগা মরী লৈনদুনা ইন্দস্ত্রীশিংগী পোত্থোক পুথোকপগী চাংসু হেনগৎহনবা য়াগনি। মখোয়শিংগী মফমদা ইন্দস্ত্রীশিংনা স্কিল অমসুং ক্বালিতী ত্রেনিং পীবসু য়াই।

সরকারনা মশাগী স্কিমশিংবু নিংথীনা চুনহন্দুনা তেংবাংনবগী থৌওং হেনগৎহনবা য়াগনি অমসুং বেঙ্কশিংনা প্রোজেক্তশিং অসিদা ফাইনান্স তৌবসু য়ারগনি। মসিগী মতৌ অসিদি স্তেকহোলদর খুদিংগী মায় পাকপা ওইগনি। কোর্পোরেত কম্পেনীশিংনা অফবা মমলদা মগুন লৈবা পোত্থোক ফংগনি। বেঙ্কশিংগী শেলশিংসু থাজবা য়াবা স্কিমশিংদা থাদবা য়ারগনি। মসিনা সরকারগী স্কিম অসিগী পাক শন্না কান্নবা পীবা অমসুং ফংবগী মতৌসু মমি তাহনবা ঙমগনি।

ঐখোয়গী স্তার্তঅপশিংনা মখোয়গী ই-কম্মর্স মোদেলগী খুত্থাংদা ক্রাফ পোত্থোকশিংগী অচৌবা কৈথেল শেমগৎপা য়াগনি। মসিগুম্বা পোত্থোকশিং অসিদা স্তার্তঅপশিংনা হেন্না ফবা তেক্নোলোজী, দিজাইন, পেকেজিং অমসুং ফাইনান্সিংগী তেংবাং পীবা ঙমগনি। ঐহাক্না প্রাইভেত সেক্তরগা লৈনরিবা মরীশিংবু পি.এম. বিশ্বকর্মগী খুত্থাংদা হেন্না কলহনবা ঙমগনি অমসুং প্রাইভেত সেক্তরগী ইন্নোভেসন তৌবগী শক্তি অসুং কারবার তৌবগী থোওংশিংবু হেন্না পাকথোক চাউথোকহনবা ঙমগনি হায়বগী থাজবা লৈ।

মরুপশিং,

মফমসিদা ঙসি শরুক য়ারিবা স্তেকহোলদরশিংনা ইশাগী মরক্তা খন্ন-নৈনদুনা থবক তৌবগী থৌরাং অমা য়াৎপীয়ু হায়না ঐহাক্না হায়জনিংই। মনুং হঞ্জিন্না লৈরিবা বিশ্বকর্মশিংদা য়ৌশিন্নবা হোৎনবীয়ু। পুন্সিদা অহানবা ওইনা সরকারগী কান্নবা ফংগদবা মীওই কয়া অমসু মখোয়গী মরক্তা য়াওগনি। মখোয়শিং অসিদি অয়াম্বনা দলিত, ত্রাইবেল, শোত্থরবা খুন্নাইগী মীওই নত্ত্রগা নুপীশিংনা ওইগনি। মরম অদুনা, কাঙলোন নাইবা অমসুং থবক্তা হকথেংননা ওন্থোকপা য়াবা থৌরাং য়াৎপগী মথৌ তাগনি। সরকারগী স্কিমগী তঙাই ফদবা মীওইশিংদা স্কিম অসিগী মতাংদা মমুৎ তানা খঙহনবগী মথৌ তাগনি। কান্নবশিং অসি মখোয়গী মফমদা য়ৌহনফম থোক্লবনি।

ঐখোয়না অকক্নবা মতম অমা লেপ্তুনা মিসন মোদতা থবক তৌগদবনি। অদোম্না হীরম অসিগী মতাংদা খন্ন-নৈনবা মতমদা অদোম্না বজেত নিংথীনা খঙগনি, স্কিম অসিগী তঙাই ফদবা করম্বা মীওইনা তসেংনা লৈবগে হায়বগে হায়বা অদোম্না খঙগনি, থবকশিং অসিবু মপুং ফানা পাংথোকপদা করি পাম্বৈ শিজিন্নগনি, স্কিম অসিগী মওং-মতৌ করম্না তৌগনি, মসিদগী লাকপা পোত্থোক করি ওইগনি হায়বা অদোম্না নিংথীনা খঙগনি হায়না ঐহাক্না থাজৈ। মদু ওইরবদি, মসিগী তসেংবা কান্নবা অদু তঙাই ফদবা মীওইশিংদা শোইদনা য়ৌহনবা ঙমগনি।

মরুপশিং,

ঙসিগী ৱেবিনার অসিদি পরিং অসিগী অরোইবনি। ঐখোয়না ঙসি ফাওবদা ৱেবিনার ১২ পাংথোকখ্রে, বজেৎকী তোঙান-তোঙানবা হীরমশিংদা ৱেবিনার পাংথোকখি, ৱাফম কয়া অমা খন্ন-নৈনখি। হংচিত্তগী পার্লিয়ামেন্ত হৌবা মতমদা, সন্সদ খুদিংনা অনৌবা থাজবা অমসুং অনৌবা পাউতাক কয়াগা লোয়ননা পার্লিয়ামেন্ততা চৎপা ঙম্লগনি, বজেত অসি পাস তৌদ্রিবা ফাওবা থৱাই য়াওবগী ইথিল উবা ফংলগনি। মসিগুম্বা ৱারী শাবগী থৌওং অসি য়াম্না তোপ-তোপ্পা থৌওং অমনি, লৈবাক মীয়াম পুম্বনা অমসুং হিন্দুস্তানগী জিলা খুদিংনা শরুক য়াবা অদুগুম্বা থবক-থৌরম অমনি। মসিগীদমক্তা মতম কাইথোকপীরকপা মীওই খুদিংবু ঐহাক্না ইকায় খুম্নজরি।

ঙসি ৱেবিনার অসিদা তিল্লীবা মীপুম খুদিংমক, ঙসি ফাওবদা পাংথোকখিবা ৱেবিনার চলায়খিবা অমসুং ওইথোকহনখিবা, মপুং ওইবা পাউতাক পীবিরকখিবা পুম্নমকপু ঐহাক্না অমুক্কা হন্না ইকায় খুম্নজরি।

পুম্নমকপু য়াইফ পাউজেল পীজরি।

***