ঙসি ফেব্রুৱারি ২১, ২০২৩দা ইতানগরদা ভারতকী রাস্ত্রপতি শ্রীমতি দ্রৌপতি মুর্মুনা অরুনাচল প্রদেস লেজিসলেতিপ এশেমব্লিগী অখন্নবা মীফমদা ৱা ঙাংখ্রে।

থৌরম অদুদা ৱা ঙাংবদা, রাস্ত্রপতিনা হায়খি সংসদকী থবক-থৌরমশিংদা থকশি-খাশি অমসুং চৎন-লোনচৎ হায়বসি য়াম্না মরুওই। ঐখোয়না মরৈ য়েৎনগদৌরিবা হিরম অমসুং মগুন অদু অৱাংবা থাক্কী ওইগদবনি। মসিগা লোয়ন্না, করিগুম্বা মতমদা চাউখৎ-থৌরাং অমসুং মীয়াম য়াইফনবা ৱাফমশিংদা ঐখোয় অমতা ওইনা য়ানবা পুরকপা মথৌ তাই। অরুনাচল প্রদেস লেজিসলেতিপ এশেমব্লিনা গনতন্ত্রগী খ্বাইদগী ৱাংবা মগুনশিং ঙাক্তুনা থম্বদা হরাওই। অফবা গনতন্ত্র অমা পুরক্নবা হায়রিবা গুনশিং অদু ঙাক্তুনা চৎপগীদমক মহাক্না এশেমব্লিগী হান্নগী অমসুং হৌজিক্কী মেম্বরশিং থাগৎখি।

রাস্ত্রপতিনা হায়খি ঙসিদি অকোয়বগী ফিবম মোৎশিল্লকপা অমসুং অইং-অশাগী খল হোংলকপা অসি অরুবা ৱাফমশিং ওইরে। হায়রিবা অরুবা ৱাফমশিং অসিগী পাম্বৈশিং ঐখোয়না থিগদবনি। অরুনাচল প্রদেসগুম্বা লম্মিৎ-তুমিৎকী য়াম্না মরুওইবা রাজ্যদা হায়রিবা ৱাফমশিং অসি য়াম্না মরুওই। হিরম অসিদা রাজ্য অসিগী থৌশিল শেম্বশিংনা চেকশিন্না থবক পায়খৎপদা হরাওই। পাক্কে দেক্লারেসনগী খুৎথাংদা অইং-অশাগী খল কাইরকপা থেংন্নবা অরুনাচল প্রদেসনা ৱারেপ লৌরে। অইং-অশাগী খল হোংলকপা থেংন্নবা অতোপ্পা রাজ্যশিংনা মসিগী নমুনা অসি লৌগনি হায়বগী থাজবা থম্লি।

দিজিতেল ইন্দিয়া প্রোগ্রামগী মখাদা চে শীজিন্নদবা ‘ই-বিধান’ থবক ওইনা পাংথোকপগীদমক রাস্ত্রপতিনা অরুনাচল প্রদেস লেজিসলেতিপ এশেমব্লি থাগৎখি। মহাক্না হায়খি রাজ্য সরকারনা ২০২২ অসি ‘ই-গভর্নান্সকী চহি’ ওইনা লাউথোক্লে অমসুং ই-গভর্নান্সকী প্রোজেক কয়া হৌদোক্লে। হায়রিবা প্রোজেকশিং অদুনা লৈবাক ঙাকপগী থবকশিংদা অহোংবা পুরকপা খক নত্তনা মীচম মীয়ামগী পুন্সি হিংবদা লাইহনবদা মতেং পাংলগনি।

স্কুলশিং, কোলেজশিং অমসুং য়ুনিভর্সিতিশিংগী মহৈরোয়শিংদা লেম্না এশেমব্লি লাইব্রেরি শীজিন্নবা য়াহনবদা হরাওবা ফোঙদোক্লদুনা রাস্ত্রপতিনা হায়খি ‘অদোমগী এশেমব্লি খঙসি’ হায়বা থবক্কী মখাদা মহৈরোয়শিং এশেমব্লিগী থবক-থৌরমশিং খঙনবা মতম মতমগী ওইনা এশেমব্লি অসিনা মহৈরোয়শিং কৌরি। নহারোলশিংনা মসিগী কান্নবা লৌগনি অমসুং লৈবাক অমসুং রাজ্য অসি চাউখৎহনবদা মতেং পাংগনি হায়বগী থাজবা থম্লি।

রাস্ত্রপতিনা হায়খি চহিচা কয়াদগী অরুনাচল প্রদেসতা মশানা মশাবু লৈঙাকচবা অমসুং মীয়ামগী গনতন্ত্রগী থবকশিংগী অফবা চৎনবী অমা লৈরক্লি। রাজ্য অসিগী মীয়াম্না অনৌবা মতমগী গনতন্ত্রগী থবকশিংদা থৱায় য়াওনা শরুক য়াবগা লোয়ন্না মখোয় রাজনিতিগী লৌশিং লৈবা অমসুং গনতন্ত্রগা থাজবগী মমি তারি।লৈবাক চাউখৎনবা অমসুং মীয়াম য়াইফনবা মতম পুম্নমক্তা মখোয়না থবক তৌগনি হায়বগী থাজবা মীয়ামগী মীহুৎশিংদগী মীয়াম্না থম্লি। রাজ্য অমগী থৌশিল শেম্নবগী খ্বাইদগী ৱাংবা ওইনা, রাজ্য অসি চাউখৎহনবদা এশেমব্লিগী মেম্বরশিংগী মরুওইবা থৌদাং লৈরি।  

রাস্ত্রপতিনা হায়খি ঐখোয়গী লৈবাক অসি হিরম খুদিংমক্তা চাউখৎনবা হিরম খুদিংমক্তা নুপীশিং শরুক য়াগদবনি। অরুনাচল প্রদেস লেজিসলেতিপ এশেমব্লি য়াওনা রাজ্যশিংগী এশেমব্লিশিং অমসুং অতোপ্পা মীয়ামগী মীহুৎশিংনা শেম্বা বোদিশিংদা নুপীশিং শরুক য়াবা হেনগৎহনগদবনি।

রাস্ত্রপতিনা হায়খি অরুনাচল প্রদেস ভারতকী মরুওইবা শরুক অমনি অমসুং ভারতকী এক্ত ইস্ত পোলিসিগী মরুওইবা থৌদাং লৌরিবা রাজ্য অমনি। লম্বী, রেল অমসুং নোংথক্কী লম্বীগী খুদোংচাবশিং ৱাৎপা মরম্না মতম কয়াগী মমাঙদগী অৱাং-নোংপোক লমদম অসি শেন-থুম চাউখৎপগী কান্নবশিং ৱাৎনা ফংদুনা লাক্লি। অদুবা কেন্দ্র সরকারনা লমদম অসিগী লম্বী-থোংগী ফিবম ফগৎহন্নবা থবক পায়খৎলে। অরুনাচল প্রদেসতা চাউখৎপগী নুমিৎ মঙাল য়ৌরকপদা হরাওই। ইনাকখুল্লবা মহৌশাগী লনশিং অমসুং মগুন লৈরবা মীওই কয়া লৈবা মরম্না, অরুনাচল প্রদেস অসি শেন থাদফম অমা ওইবা অমসুং ললোন-ইতিক্কী মফম অমা ওইনবগী খুদোংচাবশিং মপুংফানা লৈরি।

রাস্ত্রপতিনা হায়খি মখোয়গী হৌরকফম থাদোক্তনা লমদম অসিগী মীয়াম চাউখৎপগী লম্বীদা চঙশিল্লক্লি অমসুং লমদম অসিগী চৎনবী, কলচর অমসুং গুনশিং ঙাক্তুনা থম্বা অমসুং য়োকখৎপা ঐখোয়না দরকার ওই। অরুনাচল প্রদেস মীয়ামগী মীহুৎশিং ওইনা, রাজ্য অসিগী ইনাকখুল্লবা কলচরগী মগুনশিং অমসুং চৎনবীশিং ঙাক্তুনা থম্নবা অমসুং য়োকখৎনবা এশেমব্লি অসিগী মেম্বরশিং মরুওইবা থৌদাং অমা লৌগদবনি।

*****