2004-14 ஆண்டுக் காலத்தில் ஐக்கிய முற்போக்குக் கூட்டணி ஆட்சி மற்றும் கடந்த 9 ஆண்டு காலத்தில் பிரதமர் திரு. நரேந்திர மோடி அரசின் ஆட்சிக் காலத்தின்போது மகாத்மா காந்தி தேசிய ஊரக வேலை உறுதித் திட்டத்தின் கீழ் மேற்கொள்ளப்பட்ட நிதி ஒதுக்கீடுகள் மற்றும் சொத்துக்கள் உருவாக்கம் ஆகிய இரண்டு அம்சங்கள் தொடர்பாக, காங்கிரஸ் மூத்த தலைவர் திரு. ராகுல் காந்தியுடன் விவாதிக்கத் தயார் என மத்திய ஊரக வளர்ச்சித்துறை அமைச்சர் திரு கிரிராஜ் சிங் இன்று சவால் விடுத்தார்.

உத்தரப் பிரதேசத்தின் நொய்டாவில் நடந்த சரஸ் மேளா நிகழ்ச்சிக்கு இடையே பேசிய திரு. கிரிராஜ் சிங், மகாத்மா காந்தி தேசிய ஊரக வேலை உறுதித் திட்டம் தொடர்பாக இந்தியில் திரு. ராகுல் காந்தி வெளியிட்ட முகநூல் பதிவிற்கு எதிராகக் கடும் விமர்சனங்களைத் தெரிவித்தார். மகாத்மா காந்தி தேசிய ஊரக வேலை உறுதித் திட்டத்திற்கான நிதியைக் குறைத்திருப்பதாக திரு. ராகுல் காந்தி கூறியதைக் குறிப்பிட்ட அமைச்சர் திரு. கிரிராஜ் சிங், உண்மைகளைத் தெரிந்து கொண்டு திரு. ராகுல் காந்தி பேச வேண்டும் என்று கூறினார். இதுபோன்ற குற்றச்சாட்டுகளை முன்வைக்கும் முன்பாக புள்ளி விவரங்களைப் பார்க்க வேண்டும் என்றும் அமைச்சர் தெரிவித்தார்.

காங்கிரஸ் தலைமையிலான ஐக்கிய முற்போக்குக் கூட்டணியின் 10 ஆண்டு கால ஆட்சியில், மகாத்மா காந்தி தேசிய ஊரக வேலை உறுதித் திட்டத்தின்  பட்ஜெட் மதிப்பீடு ரூ. 33,000 கோடியைத் தாண்டவில்லை என்றும், பெரும்பாலான நிதி ஆண்டுகளில், கிராமப்புற வேலைத் திட்டத்தை மோசமாகச் செயல்படுத்தியதால் அந்த நிதியிலும் குறிப்பிட்டத் தொகை திரும்பி வந்தது என்றும் திரு. கிரிராஜ் சிங் கூறினார். மறுபுறம், பிரதமர் திரு. நரேந்திர மோடி பொறுப்பேற்ற மே 2014 முதல், ஒவ்வொரு ஆண்டும் பட்ஜெட் மதிப்பீட்டை விட திருத்தப்பட்ட மதிப்பீடு அதிகமாக உள்ளது என்றும் அமைச்சர் கூறினார். இந்த ஆண்டும் ரூ.73,000 கோடி  பட்ஜெட் மதிப்பீடு எனவும் ஆனால் அதன் செலவு ஏற்கெனவே ரூ.89,400 கோடியைத் தொட்டுள்ளது என்றும் அவர் சுட்டிக்காட்டினார்.

2019-20 நிதி ஆண்டில் பட்ஜெட் மதிப்பீடு ரூ.60,000 கோடியாகவும், திருத்தப்பட்ட மதிப்பீடு ரூ.71,000 கோடியாகவும் இருந்ததாக அவர் கூறினார். 2020-21-ல் ரூ.61,500 கோடி பட்ஜெட் மதிப்பீடு எனவும் ஆனால் செலவு ஒரு லட்சத்து 11 ஆயிரத்து 500 கோடி ரூபாயாக உயர்ந்தது என்றும் அவர் தெரிவித்தார்.  கோவிட் தொற்று காரணமாக நகரங்களிலிருந்து கிராமங்களுக்கு மக்களின் இடப் பெயர்வு அதிகரித்ததன் காரணமாக அந்த ஆண்டில் மகாத்மா காந்தி ஊரக வேலை உறுதித் திட்டத்துக்கான ஆரம்ப ஒதுக்கீட்டை விட கிட்டத்தட்ட இருமடங்கு செலவு அதிகரித்தது என அவர் கூறினார். இதேபோல், 2021-2022-ம் நிதி ஆண்டில் பட்ஜெட் மதிப்படு ரூ.73,000 கோடி எனவும் ஆனால் திருத்தப்பட்ட மதிப்பீடு ரூ.99, 117 கோடியைத் தொட்டது எனவும் அவர் குறிப்பிட்டார்.

ஐக்கிய முற்போக்குக் கூட்டணி ஆட்சியின் போது கிராமப்புற வேலை உறுதித் திட்டத்தின் கீழ் சொத்து உருவாக்கத்தை சரிபார்த்து விவாதிக்க வருமாறு திரு ராகுல் காந்திக்கு அமைச்சர் சவால் விடுத்தார். முந்தைய ஐக்கிய முற்போக்குக் கூட்டணி ஆட்சியில் இத்திட்டத்தில் சொத்து உருவாக்கம் வெறும் 17 சதவிகிதம்தான் என்றும் அவர் கூறினார். அதே நேரத்தில் பிரதமர் திரு. நரேந்திர மோடியின் ஆட்சியில் கடந்த 9 ஆண்டுகளில், இத்திட்டத்தில் சொத்து உருவாக்கம் ஏற்கெனவே 60 சதவிகிதத்தை தாண்டியுள்ளது எனவும் அவர் தெரிவித்தார். பள்ளங்களைத் தோண்டுவதும் குழிகளை நிரப்புவதும் என இருந்த மகாத்மா காந்தி தேசிய ஊரக வேலை உறுதித் திட்டத்தின் பணிகளையும் அதன் நோக்கத்தையும் பிரதமர் திரு. நரேந்திர மோடி மாற்றி அமைத்ததாகவும்  திரு கிரிராஜ் சிங் கூறினார்.

மகாத்மா காந்தி தேசிய ஊரக வேலை உறுதித் திட்டச் சட்டத்தின் (MGNREGA) கீழ் ஆதார் எண்ணை இணைப்பதன் மூலம் ஏழைகளுக்கு எதிராக அரசு ஆதாரை தவறாகப் பயன்படுத்துகிறது என்று ராகுல் காந்தி கூறிய குற்றச் சாட்டுக்குப்  பதில் அளித்த அமைச்சர் திரு. கிரிராஜ் சிங், திட்டங்களை செயல்படுத்துவதில் முழு வெளிப்படைத்தன்மையை கொண்டு வர வேண்டும் என்பதே பிரதமர் திரு. நரேந்திர மோடி தலைமையிலான மத்திய அரசின் நோக்கம் என்றார்.

காங்கிரஸ் மூத்த தலைவர் திரு ராகுல் காந்தி நேற்று, பிஜேபி தலைமையிலான அரசு மகாத்மா காந்தி தேசிய ஊரக வேலை உறுதித் திட்டத்திற்கான (MGNREGA) நிதி ஒதுக்கீட்டைக் குறைத்துள்ளதாகக் குற்றம் சாட்டி இருந்தார். மேலும் இந்தியாவின் கிராமப்புற பொருளாதாரத்தின் அடித்தளமாக உள்ள ஊரக வேலைத் திட்டம் மத்திய அரசின் கொள்கைகளால் பாதிக்கப்பட்டு வருவதாகக் கூறி இருந்தார்.

***

AP  / PLM  / DL