(কন্নরা লোলদা থমখিবা হৌদোকপগী ৱারোল)

কর্নাতকা অসি লল্বোইবা অমদি ঋসিশিংগী লমদমনি। কর্নাতকানা স্পিরিচুএলিতী, লৌশিং অমসুং সাইন্তিফিক ভেল্যুশিংগী ভারতী চৎনবীশিংবু মতম চুপ্পদা মপাঙ্গল কনখৎহল্লি। তুমকুরু অসি মসিদা অখন্নবা মফম অমা কল্লি। মসিদা সিদ্দগঙ্গা মথনা অচৌবা থৌদাং অমা লৌরি। ঙসি পুজ্য শিবকুমার স্বামীনা থম্বীরম্বা ‘ত্রিবিধা দাসোহা’ হায়বদি ‘অন্ন’, ‘অক্ষরা’ অমসুং ‘আসরে’গী হেরিতেজ অসি ঙসি সিদ্দলিঙ্গা স্বামীনা মখা তানা মাংদা পুরি। ঐহাক্না ইকাই খুম্নরবা লম্বোইবশিংদা ইকোক নোল্লি। ঐহাক্না গুব্বীদা লৈবা শ্রী চিদম্বরা আশ্রম অমসুং ভগৱান চন্নবসবেশ্বরদসু ইকোক নোন্না খুরুমজরি!

ইচিল-ইনাওশিং,

ঙসি লম্বোইবশিংগী থৌজালশিংগা লোয়ননা নহারোলশিংদা থবক্কী খুদোংচাবশিং পীনবা, খুঙ্গংদা লৈরিবা মীয়াম অমদি নুপীশিংগী পুন্সি লায়থোকহন্নবা, আর্মদ ফোর্সেসকী মপাঙ্গল কনখৎহন্নবা অমসুং মেদ ইন ইন্দিয়াগী ৱাখল্লোনগা মরী লৈনবা লুপা করোর কয়াগী প্রোজেক্তশিং কত্থোক্লি অমদি উরেপ-উয়ুং তম্লি। ঙসি তুমকুরুদা লৈবাক অসিগী অচৌবা হেলিকোপ্তর ফেক্তরী অমা শঙ্গাখি। ঙসি তুমকুরু ইন্দস্ত্রিএল তাউনশিপকী উরেপ-উয়ুংসু তমখি অমসুং থবক অসিগা লোয়ননা তুমকুরু জিলাদা লৈবা খুঙ্গং কয়াগীদমক থক্নবা ঈশিংগী স্কিমশিংসু হৌখ্রে অমসি ঐহাক্না মসিগীদমক মীয়ামদা নুংঙাইবা ফোঙদোকচরি।

মরুপশিং,

কর্নাতকা অসি নহারোলশিংগী তেলেন্ত অমসুং ইন্নোভেসনগী লমদমনি। দ্রোনশিং মেন্যুফেকচর তৌবদগী তেজাস ফাইতর প্লেনশিং শাবা ফাওবদা মালেমনা কর্নাতকাগী মেন্যুফেকচরিং সেক্তরগী শক্তি অসু উবা ফংলি। দবল-ইঞ্জিন সরকারনা কর্নাতকা অসি ইনভেস্তরশিংগী অহানবা চোইস ওইহনখি। ঙসি শঙ্গাখিবা হেলিকোপ্তর ফেক্তরী অসিনা দবল ইঞ্জিন সরকারনা করম্না থবক তৌবগে হায়বগী খুদম ওইরি। ঙাকশেলগী মথৌ তাবশিংগীদমক মীরৈবাক্তা মীপাল তাংবা হন্থহন্নবা শকখিবা ৱাশক্কা লোয়ননা ২০১৬তা ঐহাক্না  মসিগী উরেপ-উয়ুং তম্বগী খুদোংচাবা ফংজখি। ঙসি আর্মদ ফোর্সেসনা শীজিন্নরিবা খুৎলাই অমদি ঙাকশেলগী ইক্বিপমেন্ত কয়ামরুম ভারত্তা শাজরিবা অসিদা নুংঙাইবা ফোঙদোকচরি। ঙসি এদভান্স এসোল্ত রাইফলশিংদগী হৌরগা তেঙ্কশিং, এয়রক্রাফ কেরিয়রশিং, হেলিকোপ্তরশোং, ফাইতর জেৎশিং, ত্রান্সপোর্ত এয়রক্রাফ ফাওবা পুম্নমক অসি ভারত্তা শাজরি। ২০১৪গী মমাংদা মসিগী মশিং অসি নীংশিংবীয়ু! হৌখিবা চহি ৮-৯ অসিদা এরোস্পেস সেক্তর অসিদা তৌখিবা ইনভেস্তমেন্ত অসি ২০১৪ অমদি চহি ১৫গী মমাংদা তৌখিবা ইনভেস্তমেন্তদগী শরুক মঙা হেনখি। ঙসি মেদ ইন ইন্দিয়াগী খুৎলাইশিং অসি ঐখোয়গী আর্মদ ফোর্সেসতা সপ্লাই তৌবা খক্তা নত্তনা দিফেন্স এক্সপোর্তশিং অসি ২০১৪গা চাংদম্নবা মতমদা শরুক কয়া হেনগৎলকখি। তুংলমচৎতা ফেসিলিতী অসিমক্তদা হেলিকোপ্তর কয়া শারগনি মসিনা লুপা করোর লাখ ৪রোমগী বিজিনেসশিং তৌহল্লগনি। অসিগুম্বা মেন্যূফেকচরিং য়ুনিৎশিং অসি লিংখৎলবা মতমদা মসিনা আর্মদ ফোর্সেসকী মপাঙ্গল হাপ্পা খক্তা নত্তনা থবক্কী অমদি মশানা মশাদা থবক পীজনবগী খুদোংচাবশিং পীরগনি। তুমকুরুদা লৈবা হেলিকোপ্তর মেন্যুফেকচরিং ফেসিলিতীগী মনাক্তা লৈবা অপীকপা বিজিনেসশিংদা শক্তি পীরগনি

মরুপশিং,

‘জাতি হান্না’ হায়বা ৱাখল্লোন লোয়ননা থবক তৌরবদি শোইদনা মাইপাক্কনি। হৌখিবা চহি ৮ অসিদা ঐখোয়না সরকারগী ফেক্তরীশিং অমসুং সরকারগী দিফেন্স কম্পনীশিংবু মপাঙ্গল কনখৎহন্দুনা মখোয়না থবক তৌবগী মওং ফগৎহল্লি অমরোমদনা ঐখোয়না প্রাইবেৎ সেক্তরগীদমক থোংশিংসু হাংখি।

ঐখোয়না ঐচ.এ.এল. – হিন্দুস্তান এরোনোতিক্স লিমিতেদনা কয়া য়াম্না কান্নবা পীখিবগে উবা ফংখ্রে । অমসুং ঙসি ঐহাক্না চহি খরগী মমাংদা থোকখিবা ৱাফমশিং নীংশিংজগে। ঐহাক্না থাজৈ মেদিয়ানা মসি শোইদনা তাবীগনি। মসি ঐখোয়গী সরকারদা তোঙান-তোঙানবা মরাল শীজিন্নবা এক্সক্যুজ ওইনা শীজিন্নখিবা ঐচ.এ.এল অদুমক্নি। মীয়ামবু লান্না লমজিংনবা অমসুং মীয়ামদা লান্না উনহন্নবা লালোং তৌখিবা ঐচ.এ.এল. অদুমক্নি। সমস্যা অসিদা মখোয়না পার্লিয়ামেন্তদা পুং কয়া কয়া মাংহনখি অদুবু ঐগী নুংশিরবা ইচিল-ইনাওশিং অরানবা হায়বা অসি ফনা চাউরবসু, তোইরবসু নত্ত্রগা কা হেল্লবসু মতম চুপ্পদা অচুম্বনা মাইথিবা পী। ঙসি ঐচ.এ.এল.গী হেলিকোপ্তর ফেক্তরী, ঐচ.এ.এল.গী শক্তি হেনগৎলক্লিবা অসিনা অরিবা নমথাকশিং অমসুং লান্না উনহনখিবা মীওই কয়ামরুম মীমাংদা পুথোকই। অচুম্বা হায়বা অসি মশানা থোকচরকই। ঙসি চপ মান্নবা ঐচ.এ.এল. অসিনা ইন্দিয়ন আর্মদ ফোর্সেসকীদমক মোদর্ন তেজাস শারি অমসুং মালেমগী মীৎয়েং থম্নফম মফম অমা ওইরি অমসুং দিফেন্স সেক্তরদা ভারতকী আত্মনির্ভারতাদা শাহৌ পীরি।

মরুপশিং,

ঙসি তুমকুরু ইন্দস্ত্রিএল তাউনসিপকীদমক মফম অসিদা থবক হৌরে। মসি ফুদ পার্ক্কী অমসুং হেলিকোপ্তর ফেক্তরীগী মতুংদা তুমকুরুদা পীবা অচৌবা খুদোল অমনি। অনৌবা ইন্দস্ত্রিএল তাউনশিপ অসিনা তুমকুরুবু কর্নাতকা খক্তা নত্তনা ভারত পুম্বগী অচৌবা ইন্দস্ত্রিএল সেন্তর অমা ওইহন্নবা শেমগৎপদা মতেং পাংলি।  মসি চেন্নাই-বেঙ্গলুরু ইন্দস্ত্রিএল কোরিদোরগী শরুক অমনি। হৌজিক্কী ওইনা চেন্নাই-বেঙ্গলুরু, বেঙ্গলুরু-মুম্বাই অমসুং হাইদরাবাদ-বেঙ্গলুরু ইন্দস্ত্রিএল কোরিদোরশিংগী থবক পাইখৎলি। মসিদা কর্নাতকাগী অচৌবা শরুক বারি। তুমকুরু ইন্দস্ত্রিএল তাউনশিপ অসি পি.এম. গতিশক্তি মাস্তরপ্লানগী মখাদা শেমগৎপদা নুংঙাইবা পোকই অমসুং মসিনা মুম্বাই-চেন্নাই হায়ৱে, বেঙ্গলুরু এয়রপোর্ত, তুমকুরু রেলৱে স্তেসন, মেঙ্গলুরু পোর্তকী খুত্থাংদা  মলতিমোদেল কন্নেক্তিবিতীগা শম্নহল্লগনি। মসিনা মরম ওইদুনা মফম অসিদা মশিং য়াম্লবা থবক পীবা ঙম্লগনি অমসুং মশানা-মশাবু থবক পীজনবা খুদোংচাবশিং ফংলগনি।

মরুপশিং,

দবল ইঞ্জিন সরকারনা ফিজিকেল ইনফ্রাস্ত্রকচরদা পীবগুম্না সোসিএল ইনফ্রাস্ত্রকচরদা চপ মান্নবা মীৎয়েং চংলি। হৌখিবা চহিশিংদা ঐখোয়না ‘নিৱাস কে নীরু, ভুমিগে নীরাৱারি’ হায়বদি য়ুমথোং খুদিংদা ঈশিং ফংহনবা, লৌবুক খুদিংদা ঈশিং ফংহনবা হায়বা অসিদা মীৎয়েং চংদুনা লাকখি। ঙসি লৈবাক অসিদা থক্নবা ঈশিংগী নেৎৱার্ক অমুক্তা ওইখিদ্রিবা মওংদা পাকথোক-চাউথোকপগী থবক পাইখৎলি। চহি অসিগী বজেৎতা জল জীবন মিসনগীদমক এল্লোকেৎ তৌখিবা বজেৎতা মমাং চহিগা য়েংনবদা করোর ২০,০০০ হেনগৎলকখি। স্কিম অসিগী খ্বাইদগী চাউবা বেনিফিসরী অসি মখোয়গী য়ুমশিংদগী লাপনা চৎতুনা ঈশিং শোক্লিবা ইমা অমদি ইচে-ইচলশিংনা ওইরি। হৌখিবা চহি অহুমদা প্রোজেক্ত অসিগী স্কোপ অসি খুঙ্গংগী ইমুং করোর ৩দগী করোর ১১দা হেনগৎহনখি। ঐখোয়গী সরকারনা লেপ্পা লৈতনা ‘নিৱাস কে নীরু’ লোয়ননা ‘ভুমিগে নীরাৱারি’দা মীৎয়েং চংদুনা লাকখি। অপ্পর ভাদ্রা প্রোজেক্তকীদমক লুপা করোর ৫,৫০০ এল্লোকেৎ তৌখি মসিনা তুমকুরু, চিকমেঙ্গলু, চিত্রাদুর্গা, দাবনগেরে অমদি সেন্ত্রেল কর্নাতকাগী ইকংনা শোকহল্লবা মফমশিংদা কান্নবা পীরগনি। মসিনা দবল ইঞ্জিন সরকারগী লৌবুক অমসুং য়ুমথোং খুদিংদা ইশিং ফংহন্নবগী ফিরেপ অদু উৎখি। মসিনা নোংগী ইশিংগী মীপাল তাংলম্বা লৌমীশিংদসু কান্নবা পীরগনি।

মরুপশিং,

চহি অসিগী পোর-ফ্রেন্দলী অমসুং মিদল ক্লাস ফ্রেন্দলী বজেৎ অসি মালেম শিনবা থুংবদা খন্নরি। বজেৎ অসিনা মীপুম খুদিংমক করম্না পুনশিনগনি অমসুং ‘বিক্ষিৎ ভারত’ শেমগৎনবা খোঙথাংশিং লৌখৎনবা মপাঙ্গল কনবা রোদমেপ অমা পীরি। চহি অসিগী বজেৎনা নীংতম্বগী চহি ১০০ শুরকপদা মপাঙ্গল কনবা ভারতকী য়ুম্ফম শক্তি হেন্না পীরগনি। বজেৎ অসি সমর্থ ভারত, সম্পন্ন ভারত, স্বয়মপুর্ন ভারত, শক্তিমান ভারত, গতিৱান ভারতকী মাইকৈদা চংশিল্লিবা অচৌবা খোঙথাং অমনি। ‘আজাদী কা অমৃতকাল’দা বজেৎ অসিনা চাউখৎপা ভারতকী মাগী থৌদাংশিং পাঙথোকপগা লোয়ননা ফিরেপশিং থুংহনবদা চাউনা শরুক তম্লি। বজেৎ অসিদা খুঙ্গংশিং, লায়রবা, লৌমীশিং, শোত্থরবা, ত্রাইবেল, মিদল ক্লাস, নুপীশিং, নহারোলশিং অমসুং সিনিয়র সিতিজেনশিংগীদমক লৌখিবা অচৌবা ৱারেপনি। মসি মীপুম খুদিংমক কোনশিল্লিবা পাম্নরবা, পুম্নমক শুরবা, পুম্নমক ইনক্লুসিব ওইবা বজেৎ অমনি। বজেৎ অসিনা ভারতকী নহারোলশিংদা অনৌবা থবক্কী খুদোংচাবশিং পীরি। বজেৎ অসিনা ভারতকী নারী শক্তিনা শরুক য়াবা হেনগৎহনগনি। বজেৎ অসিনা ভারতকী লৌউ-শিংউ অমসুং খুঙ্গংশিং মতমগা চুনবা ওইহনগনি। বজেৎ অসিনা অপীকপা লৌমীশিং লোয়ননা ‘শ্রী অন্না’দা মালেমগী লৈরিবা শক্তি অসি পীগনি।  ঐখোয়না হীরম অহুমক খঙজিল্লি, নখোয়গী মথৌ তাবা, নখোয়দা পীবা তেংবাং অমসুং নখোয়গী ইনকম”। বজেৎ অসিনা ভারত্তা থবক্কী খুদোংচাবা হেনগৎহনগনি অমসুং মশানা মশাদা থবক পীজবা থৌগৎকনি। ঐখোয়না ‘অবস্যকতে, আধারা মত্তু আদায়া’ হায়বদি নখোয়গী মথৌ তাবশিং, তেংবাংশিং অমসুং নখোয়গী ইনকম য়েংশিল্লি। কর্নাতকাগী ইমুং খুদিংমক্না মসিগী কান্নবা ফংগনি।

ইচিল-ইনাওশিং,

২০১৪দগী হৌনা সরকারনা লৌখৎখিবা খোঙথাংশিং অসিনা সরকারগী তেংবাং ফংবদা অৱাবা ওইরম্বা খুন্নাইগী শরুকশিং শক্তি পীরি। সরকারগী স্কিমনা মখোয়দা য়ৌদবা নত্তগা মরক্তা লৈবা মীওইশিংনা মখোয়গী কান্নবা লৌথোকপা তৌরম্মি। চহি কয়াদগী খুন্নাইগী শরুক খুদিংমক্তা ঐখোয়না মমাংদা খুদোংচাবা ফংদনা লৈরম্বশিংদা সরকারনা তেংবাং পীরি। ঐখোয়গী সরকারদা অহানবা ওইনা ‘এমপ্লোয়ী-লেবর’ ক্লাসনা পেন্সন অমসুং ইন্সুরেন্সকী কান্নবা ফংলি। অপীকপা লৌমীশিংবু মতেং পাংলিবা পি.এম.-কিসান সম্মান নিধিগী শক্তি ঐখোয়গী সরকারনা পীখি। অহানবা ওইনা ঐখোয়না স্ত্রীৎ ভেন্দরশিংদা কোল্লাতরেল-ফ্রী লোনশিংগী পীখি। চহি অসিগী বজেৎনা চপ মান্নবা ৱাখল অদু মাংদা পুরি। অহানবা ওইনা ঐখোয়গী বিশ্বাকর্ম ইচিল-ইনাওশিংগীদমক লৈয়াক অসিদা স্কিম অমা শেমখি। বিশ্বাকর্ম হায়বগী ৱাহন্থোক্তি কুম্বরা, কাম্মারা, অক্কাসলিগা, শিল্পী, গারেকেলাসদাবা, বগ্গী অসিগুম্বা অতোপ্পা খুৎহৈবশিং নত্ত্রগা বিশ্বাকর্মশিংনা মখোয়গী মখুৎকী অমদি খুৎকী খুৎলাইশিংগী স্কিমনা পোৎ শারিবা অসিগুম্বা ঐখোয়গী মরুপশিং অসিনি। পি.এম.-বিকাস য়োজনানা মখোয়গী কলা অমদি স্কিলশিং হেনগৎহন্নবা অসিগুম্বা ইমুং লাখ কয়াদা হৌজিক মতেং পাংলগনি।

মরুপশিং,

সরকারনা লাইচৎ মনুংদা লায়রবা ইমুংশিংবু রাসন্দা চাদিং তৌবগী অৱাবা কোকহন্নবা থৌরাং তৌখি। ঐখোয়গী সরকারনা লায়রবশিংগীদমক লেম্না রাসন পীনবা লুপা করোর লাখ ৪ চাদিং তৌখি। লায়রবা ইমুং খুদিংমক্কী পক্কাগী য়ুমশিং শানবা লুপা করোর লিশিং ৭০ অমুক্তা ওইখিদ্রিবা মওংদা এল্লোকেৎ তৌখি। মসিনা মরম ওইদুনা কর্নাতকাগী লায়রবা ইমুং কয়ানা পক্কাগী য়ুমশিং ফংখি অমসুং মখোয়গী পুন্সিদা অহোংবা লাকখি।

ইচিল-ইনাওশিং,

বজেৎ অসিদা মিদল ক্লাস্তা কান্নবা পীগদবা অমুক্তা লৌখিদ্রিবা ৱারেপশিং য়াওরি। লুপা লাখ ৭ ফাওবগী ইনকমদা জিরো ইনকম তেক্স ওইবনা মরম ওইদুনা মিদল ক্লাসতা নুংঙাইবা পোক্নরি। অনৌবা থবক ফংবা, অনৌবা বিজিনেস তৌরিবা মরু ওইনা চহি ৩০গী মখাদা লৈবা নহাশিংনা থা খুদিংগী মখোয়গী একাউন্তদা শেল হেন্না চংলগনি। মতৌ অসুম্না দিপোজিৎ লিমিৎ অসি লুপা লাখ ১৫দগী লাখ ৩০দা শরুক অনি হেনগৎহল্লিবা অসিনা থবক্তগী পোত্থারবা কর্মচারিশিং অমসুং সিনিয়র সিতিজেনশিংদা কান্নবা পীরগনি। মমাংদা লাখ ৩ ওইরম্বা অদু লীব এনকেশমেন্তগী তেক্স রিবেৎ হৌজিক লাখ ২৫ ফাওবা ওইহনখ্রে। মসিনা তুমকুরু অমসুং বেঙ্গলুরু য়াওনা লৈবাক্কী ইমুং লাখ কয়াদা শেল হেন্না লাকহল্লগনি।

মরুপশিং,

নুপীশিংগী ফাইনান্সিএল ইনক্লুজন পীবা হায়বা অসিদা বি.জে.পি. সরকারনা খ্বাইদগী মরু ওইবা মীৎয়েং চংলি।  নুপীশিংদা ফাইনান্সিএল ইনক্লুজন পীবনা য়ুমদা মখোয়গী খোঙলাউদা শক্তি পীরি অমসুং য়ুমগী ওইবা ৱারেপশিং লৌবদা মখোয়না শরুক য়াবা হেনগৎহল্লি। বজেৎ অসিদা ঐখোয়না ঐখোয়গী ইমা, ইচে-ইচল অমদি ইচানুপী কয়ানা বেঙ্কশিংদা য়াওহন্নবা অচৌবা খোঙথাং অমা লৌখৎখি। ঐখোয়না মহিলা সম্মান সেভিং সর্তিফিকেৎশিংগী মতাংদা পুথোকখি। মসিগী মখাদা ইচে-ইচলশিংনা লুপা লাখ ২ ফাওবা ইনভেস্ত তৌবা ঙম্লগনি ,মসিগী খ্বাইদগী চাউবা শেন্দোই অসি চাদা ৭.৫ ওইরগনি। মসিনা ইমুং অমদি খুন্নাইদা নুপীশিংনা লৌবা থৌদাং হেন্না হেনগৎহনগনি। সুকন্য সমৃদ্ধি, মুদ্রা, জন-ধন বেঙ্ক একাউন্তশিং, মুদ্রা লোনশিং অমসুং পি.এম. আৱাজকী মতুংদা মসি নুপীশিংদা ইকনোমিক এম্পাৱরমেন্ত পীনবা অচৌবা থৌশিল অমনি। খুঙ্গংশিংদা নুপী সেল্ফ-হেল্প গ্রুপশিংগী মতিক-ময়াই হেনগৎহন্নবা বজেৎতা মরু ওইবা ৱারেপশিং লৌখি।

ইচিল-ইনাওশিং,

বজেৎ অসিগী অয়াম্বা শরুক্না খুঙ্গংগী শেন্মীৎলোন্দা মীৎয়েং চংলি অমরোমদা দিজিতেল তেক্নোলোজী অমসুং কোওপরেতিবশিং চাউথোকহন্দুনা খোঙথাং খুদিংদা লৌমীশিংদা মতেং পাংলি। মসিনা লৌমীশিং, শা-ঙা লোইরিবশিং অমসুং ঙামীশিংদা কান্নবা পীরগনি অমরোমদা কর্নাতকাগী চু থারিবা লৌমীশিংনা সুগরকেন কোওপরেতিবশিং লিংখৎপদা মতেং ফংলগনি। লাক্কদৌরিবা মতমশিংদা অনৌবা কোওপরেতিব সোসাইতী কয়া শেম্লগনি অমসুং লৈবাক শিনবা থুংবদা তুংলমচৎতা চেং-হৱাই থম্নবগী স্তোর মশিং কয়া হাংদোক্লগনি। মসিগা লোয়ননা অপীকপা লৌমীশিংনা মখোয়গী চেং-হৱাই অদু থমজদুনা অকাবা মমলদা য়োনবা ফংলগনি। মসি খক্তা নত্তনা হেল্প সেন্তর কয়া হাংদোক্লি মসিনা মহৌশাগী লৌউ-পথাপকী খুত্থাংদা অপীকপা লৌমীশিংগী চংবা শেনফম হন্থহল্লগনি।

মরুপশিং,

কর্নাতকাদা লৈরিবা নখোয় পুম্নমক্না মিল্লেৎশিং নত্ত্রগা কোর্স গ্রেনগী মতাংদা মুন্না খঙই। মরম অসিনা নখোয়না কোর্স সিরিএলশিংবু ‘সিরি ধান্যা’ হায়না খঙনৈ। হৌজিক লৈবাক অসিনা কর্নাতকাগী মীয়ামগী ৱাখল্লোনগা লোয়ননা মাংদা চংশিল্লি। হৌজিক লৈবাক শিনবা থুংবদা মিল্লেৎপু ‘শ্রী অন্ন’গী শক্তাক পীখ্রে। শ্রী-অন্ন হায়বগী ৱাহন্থোক অসি খ্বাইদগী ফবা ‘মহৈ-মরোং’ হায়বনি। কর্নাতকাদা শ্রী অন্ন রাগী, শ্রী অন্ন নবনে, শ্রী অন্ন হরকা, শ্রী অনন কোরলে, শ্রী অন্ন উদলু, শ্রী অন্ন বরগু, শ্রী অন্ন সচ্চে, শ্রী অন্ন বিজীজোদা – অসিগুম্বা শ্রী অন্ন কয়া লৌমীশিংনা পুথোকই। কনানা কর্নাতকাগী ‘রাগী মুদ্দে’, ‘রাগী রোতি’গী মহাও করম্না কাওগনি? চহি অসিগী বজেৎতা  মহৈ-মরোংশিং পুথোকপদা চাউনা মীৎয়েং চংখি। কর্নাতকাগী ইকংনা শোকহল্লবা মফমশিংদা লৈবা অপীকপা লৌমীশিংদা মসিনা চাউনা কান্নবা পীরগনি।

মরুপশিং,

দবল ইঞ্জিন সরকারনা থমোয় শেংনা হোৎনবনা মরম ওইদুনা ঙসি ভারতকী প্রজাশিংনা থাজবা চাউনা থম্মি। ঐখোয়না ইরৈবাকচা খুদিংমক্কী পুন্সি শাফনা থম্নবা অমদি অফবা তুংলমচৎকীদমক অয়ুক নুমিদাং হোৎনরি। নখোয়না লেপ্পা লৈতনা থৌজালশিং পীনবীবনা ঐখোয়গী পুম্নমক্কী শক্তি অমদি ইথিল ওইরি। বজেৎ অসিগীদমক অমসুং ঙসি তুমকুরুদা শঙ্গাখিবা অমসুং উরেপ-উয়ুং তমখিবা চাউখৎ-থৌরাংগী প্রোজেক্তশিংগীদমক ঐহাক্না পুম্নমকপু অমুক হন্না নুংঙাইবা ফোঙদোকচরি। ঙসি নখোয়না মশিং য়াম্না থোরক্তুনা নখোয়গী থৌজালশিং পীনবীরি। ঐহাক্না পুম্নমকপু থমোয় শেংনা তৌবীমল খঙবা উৎচরি।

থাগৎচরি!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***