কেন্দ্রগী মন্ত্রী-মন্দলদা লৈরিবা ঐহাক্কী মরুপশিং, শ্রী রাজনাথ সিংহজী, শ্রী অজয় ভত্তজী, সি.দি.এস. অনিল চৌহানজী, সর্ভিসেস অহুমগী চীফশিং, দিফেন্স সেক্রেতরী, দি.জি. এন.সি.সি. অমসুং ঙসি মফম অসিদা তিল্লিবা মশিং য়াম্লবা মীথুংলেন পুম্নমক অমসুং ঐগী নহা ওইরিবা মরুপশিং!

এন.সি.সি.না লৈবাক্কী নীংতম্বা চহি ৭৫ শুরকপগা লোয়ননা ৭৫শুবা কুমওন পাঙথোক্লি। ঐহাক্না চহি কয়া অসিদা এন.সি.সি.বু মশক তাক্লিবা মীওইশিং অমসুং জাতি শেমগৎপদা শরুক তম্লিবশিংবু ঐহাক্না থাগৎচরি। ঙসি ঐহাক্কী মাংদা লৈরিবা এন.সি.সি. কেদেৎযশিং অসিনা হেন্না অখন্নৈ। ঙসি দিজাইন তৌখিবা প্রোগ্রামগী মওং অসিনা মতমদা অহোংবা লাক্লে তাকপা খক্তা নত্তনা মসিগী মওংদসু অহোংবা লাকখি। মীৎয়েং তারিবশিংগী মশিং অসিসু মমাংদা অমুক্তা ওইখিদ্রি। থৌরম অসিসু দাইভর্সিতীনা থল্লি অদুবু মসিনা ভারতকী কাচিন কোয়া শিনবা থুংবদা ‘এক ভারত শ্রেস্থ ভারত’কী মন্ত্র অসি শন্দোকপগীদমক মতম চুপ্পদা নীংশিংদুনা লৈরগনি। এন.সি.সি.গী অপুনবা তীম, মাগী ওফিসরশিং অমসুং এদমিনিস্ত্রেতরশিংবু ঐহাক্না থমোয় শেংনা থাগৎপা ফোঙদোকচরি। নখোয়না এন.সি.সি.গী কেদেৎ ওইনা অমসুং লৈবাক্কী নহারোল ওইনা ‘অমৃত’কী মীরোল অমগী মশক তাক্লি। মসিগী ‘অমৃত’ মীরোল অসিনা লৈবাকপু মথংগী চহি ২৫দা অনৌবা পনখৈশিং য়ৌহনগনি অমসুং ভারতপু আত্মনির্ভর অমসুং চাউখৎপা ওইহনগনি।

মরুপশিং,

হৌজিক্তা ঐখোয়না লৈবাক্কী চাউখৎ-থৌরাংদা এন.সি.সি.গী থৌদাং অমসুং নখোয়না তৌরিবা শীংথানীংঙাই ওইরবা থবক উবা ফংখ্রে। নখোয়গী মরুপ অমনা ঐঙোন্দা য়ুনিতী ফ্লেম খুৎশিন্নখি। নখোয়না নুমিৎ ৬০দা নুমিৎ খুদিংগী কিলোমিতর ৫০ চেন্দুনা কন্যাকুমারীদগী দিল্লী ফাওবগী খোঙচৎ মপুং ফাহনখি। য়ুনিতী ফ্লেম রন্দা খোঙলোই কয়ানা ‘এক ভারত, শ্রেস্থ ভারত’কী ৱাখল্লোন অসিবু মপাঙ্গল কনখৎহন্নবা শরুক য়াখি। নখোয়না শীংথানীংঙাই ওইবা অমসুং ইথিল পীনীংঙাই ওইবা থবক অমা পাঙথোকখি। মফম অসিদা নুংঙাইরবা কলচরেল প্রোগ্রাম অমসু পাঙথোক্লি। ঐহাক্না ভারতকী কলচরেল দাইভর্সিতী, নখোয়গী স্কিল অমদি হৈশীংনবা উৎপগীদমক নখোয়বু থাগৎলি।

মরুপশিং,

নখোয়না রিপব্লিক দে পরেদতসু শরুক য়াখি। পরেদ অসি অখন্নৈ মরমদি মসি অহানবা ওইনা কর্তব্য পথতা পাঙথোকখি। অমসুং হৌজিক মতমসি দিল্লী খরা ইংই। নখোয় কয়ানা পন্থা অসি হৈনরমদবা য়াই। অদুম ওইনমক ঐহাক্না দিল্লীদা লৈবা মফম খরা চৎনবা নখোয়দা শোইদনা হায়জনীংই। নখোয়না মতম কাইথোক্কদ্রা? নখোয়না নেস্নেল ৱার মেমোরিএল অমসুং পুলিস মেমোরিএলদা চৎখিদবা ওইরবদি শোইদনা চৎলু। মতৌ অসুম্না লাল কিলাদা লৈবা নেতাজী সুভাস চন্দ্র বোস ম্যুজিয়মদসু শোইদনা চৎপীয়ু। অনৌবা পি.এম. ম্যুজিয়ম অমসু নীংতম্বা ফংলবা ভারতকী পি.এম.শিংগী মশক তাক্নবা শাখি। নখোয়না হৌখিবা চহি ৭৫ অসিদা লৈবাক্কী চাউখৎ খোঙচৎকী মরমদা খঙবা ঙমগনি। নখোয়না সরদার বল্লভভাই পতেল অমসুং বাবাসাহেব অম্বেদকরগী ফজরবা ম্যুজিয়মশিংসু য়েংবীয়ু। মফম অসিদা কয়া অমা লৈরি। মফমশিং অসিদগী নখোয়না ইথিল খরা ফংগনি অমসুং অচেৎপা পান্দমশিংগা লোয়ননা লেপ্পা লৈতনা খুমাং চাউশিনহনগনি।

ঐগী নহা ওইরিবা মরুপশিং,

লৈবাক অমা চল্লাইবদা খ্বাইদগী মরু ওইবা শক্তি অসি নহারোলনি। নখোয়গী চহি মতাংদা থৱায় য়াওবা অমদি হোৎননীংবা য়াওরি। নখোয়গী মঙলান কয়া লৈরমগনি। মঙলানশিংনা ফিরেপশিং ওইরক্লবা মতমদা নখোয়না ফিরেপশিং অদু থুংহন্নবা কন্না হোৎনৈ মতম অদুদা নখোয়না মাইপাকপা ঙম্মি। মসি ভারতকী নহারোলশিংগীদমক অনৌবা খুদোংচাবশিংগী মতমনি। মীপুম খুদিংমক্না হায়রি ভারতকী মতম য়ৌরক্লে। ঙসি মালেম পুম্বনা ভারত্তা মীৎয়েং থম্নরক্লি। অমসুং মসিগী অচৌবা মরম অসি ভারতকী নহারোলনা ওইরি। ঙসি ভারতকী নহারোলনা কয়া য়াম্না মমিৎ মনা শীংলবগে হায়বগী খুদম অমা ঙসি ঐনা শোইদনা পীজনীংই। নখোয়না খঙলে মদুদি চহি অসিদা ভারতনা জি-২০ প্রিসাইদ তৌরি, মসি মালেমগী খ্বাইদগী শক্তি লৈবা ইকনোমী ২০গী লুপ অমনি। হীরম অসিদা ভারত শিনবা থুংবদগী নহারোল কয়ানা ঐঙোন্দা চীথি ইরকপদা ঐহাক্না অঙকপা পোকখি। লৈবাক্কী মাইপাকপশিং অমসুং মরু ওইবশিংদা নখোয়গুম্বা নহা ওইরিবা মীওইশিংনা থৱায় য়াওরকপা অসি তশেংনমক চাউথোকচফম থোকপা ৱাফম অমনি।

মরুপশিং,

সরকারগী মরু ওইবা অসি মতম চুপ্পদা থৱায় য়াওনা হৌরক্লিবা নহারোলশিংনা ওইরগনি। ঙসি ভারতনা নখোয়গী মঙলানশিং থুংহনবদা মতেং পাংবা ঙমগদবা নহারোল পুম্নমক্তা ফম্পাক পীনবা হোৎনরি। ঙসি ভারত্তা নহারোলশিংগীদমক অনৌবা সেক্তরশিং হাংলক্লি। ভারতকী দিজিতেল রিভোল্যুসন, স্তার্ত-অপ রিভোল্যুসন নত্ত্রগা ইন্নোভেসন রিভোল্যুসন ওইরবসু নহারোলশিংনা খ্বাইদগী চাউবা বেনিফিসরীশিং ওইরি। লৈবাক্কী নহারোলশিংনা দিফেন্স সেক্তরদা পুরক্লিবা রিফোর্মশিং অসিদগী কান্নবা ফংলি। এসোল্ত রাইফলশিং অমসুং বুল্লেৎ প্রুফ জেক্কেৎশিং ফাওবা মীরমদগী পুশিল্লক্লম্বা মতম অমা লৈরমখি। ঙসি অসিগুম্বা আর্মীনা মথৌ তাবা পোৎলম কয়ামরুম ভারত্তা শাজরি। ঙসি ঐখোয়গী বোর্দর ইনফ্রাস্ত্রকচর খোঙজেল য়াংনা চাউখৎলি। কেম্পেন পুম্নমক অসিনা ভারতকী নহারোলগীদমক অনৌবা ওইথোকপা য়াবশিং অমদি খুদোংচাবশিং পুরকখি।

মরুপশিং,

ঐখোয়গী স্পেস সেক্তর অসি নহারোলবু ঐখোয়না থাজবদা ফংবা ফলশিংগী অফবা খুদম অমনি। লৈবাক অসিনা নহা ওইরিবা তেলেন্তকীদমক স্পেস সেক্তরগী থোং হাংখি। অমসুং অতেনবা মতমগী মনুংদা অহানবা প্রাইবেৎ সেতলাইৎ লোঞ্চ তৌখি। মতৌ অসুম্না এনিমেসন অমসুং গেমিং সেক্তরনা তেলেন্ত লৈবা নহারোলশিংগীদমক খুদোংচাবা কয়ামরুম পুরকখি। নখোয়না নশামক্না দ্রোন শীজিন্নবা নত্ত্রগা কনাগুম্বা অমনা দ্রোন শীজিন্নবা উবা ফংলমগনি। হৌজিক দ্রোনশিংগী স্কোপ অসি লেপ্পা লৈতনা হেনগৎলক্লি। এনতর্তেন্তমেন্ত, লোজিস্তিক্স নত্ত্রগা লৌউ-শিংউ ওইরবসু, দ্রোন তেক্নোলোজী মফম খুদিংমক্তা উবা ফংলি। ঙসি লৈবাক্কী নহারোলশিংনা ভারত্তা মখল পুম্নমক্কী দ্রোনশিং শানবা মাংদা থোরক্লি।

মরুপশিং,

অয়াম্বনা সেক্যুরিতী ফোর্সশিং অমসুং এজেন্সীশিং য়াওবা পাম্মি হায়বা ঐহাক্না খঙই। মসি মখোয়গীদমক মরু ওইনা ঐখোয়গী ইচানুপীশিংগীদমক্তা অচৌবা খুদোংচাবা অমা শোইদনা ওইগনি। পুলিস অমসুং পেরামিলিতরী ফোর্সশিংদা লৈরিবা ইচানুপীশিংগী মশিং অসি হৌখিবা চহি নিপালদা শরুক অনিরোম ওইরকখি। আর্মীগী ৱিং অহুমমক্তা লৈবা ফ্রন্ত লাইনশিংদা নুপীশিং দিপ্লোই তৌবা অসি ক্লিয়র তৌখ্রে। ঙসি অগনিবীরশিং ওইনা অহানবা ওইনা ইন্দিয়ন নেভীদা নুপীশিংনা চংখি। নুপীশিংনা আর্মদ ফোর্সেসতা কোম্বেৎ রোলশিং লৌবা হৌরে। এন.দি.এ. পুনেদা নুপী কেদেৎশিংগী অহানবা বেৎচকী ত্রেনিং হৌখ্রে। ঐখোয়গী সরকারনা মিলিতরী স্কুলশিংদা নুপীমচাশিং এদমিনিসন তৌবগী অয়াবা পীখ্রে। ঙসি সাইনিক স্কুলশিংদা নুপী মহৈরোয় ১৫০০না তাম্বা উবদা ঐহাক্না নুংঙাইবা ফাওই। ঐখোয়না এন.সি.সি.দসু অহোংবা উবা ফংলি। হৌখিবা দিকেদ অসিদা এন.সি.সি.দা নুপীমচাশিংনা য়াওরকপসু লেপ্পা লৈতনা হেনগৎলক্লি। মফম অসিদা পাঙথোকখিবা পরেদ অদুসু ইচানুপী অমনা লুচিংখি। ঙমখৈ অমদি সমুদ্র মপালগী মফমশিংদা এন.সি.সি.গী থৌদাং হেনগৎহন্নবা কেম্পেন্দা মশিং য়াম্লবা নহারোলশিংনা য়াওশিল্লি। হৌজিক ফাওবদা কেদেৎ লাখ অমরোমনা ঙমখৈ অমদি সমুদ্র মপালগী মফমশিংদগী এনরোল তৌরকখি। অসিগুম্বা অচৌবা য়ুব শক্তি অসিনা লৈবাক শেমগৎপা অমদি লৈবাক্কী চাউখৎ খোঙচৎতা য়াওরবা মতমদা ঐহাক্না চাউনা থাজবগা লোয়ননা হায়গে মদুদি পান্দম অমত্তা ওইথোক্তবা লৈরোই। ঐহাক্না থাজৈ নখোয় পুম্নমক্না লৈবাক্কী ফিরেপশিং মাইপাকহনবদা ওর্গনাইজেসন লোয়ননা মীওই অমা ওইনা নখোয়গী থৌদাং য়াগনি।

মীওই কয়ানা ইমা ভারতকীদমক নীংতম লান মনুংদা লৈবাক্কীদমক কত্থোকপগী লম্বেল খনখি। অদুবু নীংতম্বা ভারত অসিদা লৈবাক্কীদমক মীকুপ খুদিংমক হিংবনা লৈবাকপু মালেমগী অনৌবা পনখৈ তম্না পুখৎপা ঙমগনি। মীওই কয়ানা লৈবাক্কী অপুনবা শক্তম থুগাইনবা ফিরেপ অসি থুংহন্নবা ‘এক ভারত শ্রেস্থ ভারত’কী ৱাখল্লোনশিংদা অশোইবশিং থীরি। ভারত ইমাগী মচাশিংগী মরক্তা সমস্যা কয়াদা তোখাই-তোখাই তাহন্নবগী লালোংশিং শিল্লি। অসিগুম্বা ফত্ত্রবা খোঙথাংশিং অসি লৈজরবসু ভারতকী মচাশিংগী মরক্তা তোখাই-তোখাই তাহনবা কৈদৌনুংদা ঙমলোই। মরম অসিনা অপুনবগী মন্ত্র অসিনা খ্বাইদগী ফবা শীদা হীদাকনি, খ্বাইদগী অথোইবা শক্তিনি। ভারতকী তুংলমচৎকী অপুনবগী মন্ত্র অসি হেন্না মাইপাক্নবগী ফিরেপ, তৌবা ঙম্বা অমসুং অমত্তা ঙাইরবা লম্বীনি। ঐখোয়না লম্বেল অদুদা চৎতুনা খুদোংথিবশিং অদু থেংনগদবনি। ঐখোয়না লৈবাক্কীদমক হিংদুনা ঐখোয়গী মীৎমাংদা চাউখৎপা ভারত অমা উনবা হোৎনগদবনি। মাইপাকপা ভারত অমা উনবগীদমক মসিদগী হেন্না পীকপা ফিরেপ লৈররোই। ফিরেপ অসি থুংহন্নবগীদমক নখোয় পুম্নমক্তা ঐহাক্না য়াইফ মঙ্গোল পীজরি। মথংগী চহি ২৫গী মতম অসি ভারতকী অমৃত কালনি মসি নখোয়গীসু অমৃত কালনি। ২০৪৭তা চাউখৎপা লৈবাক অমা ওইনা নীংতম্বগী চহি ১০০ পালন তৌবা মতমদা নখোয়না লৈবাক্কী মমাই চুমগদৌরিবনি। মথংগী চহি ২৫দা নখোয়না লৈগদবা মফম অদু খন্দুনা য়েংবীয়ু মরুপশিং। মরম অসিনা ঐখোয়না মীকুপ অমত্তা অমসুং খুদোংচাবা অমত্তা মাংহল্লোইদবনি। ঐখোয়না ইমা ভারতপু অনৌবা পনখৈশিংদা পুখৎনবা ফিরেপ কাইরোইদবনি অমসুং অনৌবা মাইপাকপশিংগা লোয়ননা মাংদা চংশিনগদবনি। নখোয় পুম্নমক্তা ঐহাক্না য়াইফ মঙ্গোল পীজরি। ঐহাক্কা লোয়ননা নখোয়না অঙম্বা চাংদা হৌনা হায়বীয়ু – ভারত মাতা কী জয়! ভারত মাতা কী জয়! ভারত মাতা কী জয়!

ভন্দে মাতার, ভন্দে মাতারম!

ভন্দে মাতার, ভন্দে মাতারম!

ভন্দে মাতার, ভন্দে মাতারম!

ভন্দে মাতার, ভন্দে মাতারম!

হন্না-হন্না থাগৎচরি!

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদা হিন্দীদা পীখি।

***