নুংশিজরবা ইরৈচাশিং,  

খুরুমজরী!

১. ৭৪ শুবা রিপব্লিক দেগী মাংওইননা, য়ুম য়ুমদা লৈবীরিবা অমসুং মপান্দা লৈরিবা ভারত মচা খুদিংমক্তা ঐহাক্না পুকচেল শেংনা য়াইফ পাউজেল পীজরি।  কন্সতিত্যুসন হেক চৎনরকপা নুমিত্তগী ঙসি ফাওবা অসি অতোপ্পা লৈবাকশিংবু ইথিল পীরিবা ফজবা খোঙচৎ ওইদুনা লাক্লি। লৈবাক অসিগী মীপুম খুদিংমক্না ভারতকী ৱারী অসিগীদমক চাওথোকচনিঙাই ওই। রিপব্লিক দে পাংথোকপা মতমদা, ঐখোয়না লৈবাক অমা ওইনা পুন্না ঐখোয়না ফংজরকখিবা কয়াবু হরাও তয়াম্বা ফোংদোক্লিবনি।

২. ভারত অসি তশেংনমক হৌজিক ফাওবদা লৈরিবা খ্বাইদগী লিরবা সিবিলাইজেসনশিংগী লৈফমশিংগী মনুংদা অমা ওইরি। ভারতপু গনতন্ত্রগী মমা হায়না কৌনৈ। অদুম ওইনমক, মোদর্ন রিপব্লিক অমা ওইনদি ঐখোয় নৌরি। নিংখা তম্বগী ঙল্লিঙ্গৈ মতমদা, মশিং থিঙমদ্রবা পলশিং অমসুং অৱাবা কয়া মায়োক্নখি। য়াম্না কুইনা ফোরেন রুল তৌরম্বগী ফত্ত্রবা ফলশিংগী মনুংদা  য়াম্না শাথিনা লায়রবা অমসুং লাইরিক লাইশু তমদবা অনি অসিসু য়াওরি। অদুবু ভারতকী থাজবদি হোংলমদে। নিংজবা অমসুং থাজবগা লোইননা ঐখোয়না মীওইবা সমাজকী ৱারীদা তোঙানবা চাংয়েং অমা হৌখি। য়াম্লবা মখল মখা কয়াগী মীয়াম্না পুনশিন্দুনা লৈবাক অমা ওইনা শেম্লক্লিবা অসিদি অমুক্তা থোকখিদ্রিবা ওইখি। ঐখোয়না অসুম্না তৌখিবা অসি ঐখোয় অমতনি; ঐখোয় খুদিংমক ভারত মচা ঙাক্তনি হায়না থাজবা লৈবননি। দেমোক্রেতিক রিপব্লিক অমা ওইনা ঐখোয়না মায়পাক্লিবা অসিগী মরমদি মশিং য়াম্লবা লাইনিংশিং অমসুং মশিং য়াম্লবা লোনশিং অসিনা ঐখোয়বু তোখায় তোখায় খায়দোক্তনা অমত্তা ওইনা পুনশিনবীবননি। মদু ভারতকী মগুন্নি।

৩. হায়রিবা মগুন অসি মতমগী চাংয়েংদা অহোংবা লৈত্রবা কন্সতিত্যুসনগী মরুদা য়াওখি। রিপব্লিককী পুন্সিবু ঙাকপা হৌরকখিবা কন্সতিত্যুসন অসি নিংতম লানগী ফলনি। মহাত্মা গান্ধীনা লুচিংখিবা লৈবাক্কী খোঙজং অদু নিংতম্বা খক্তমক নত্তনা ঐখোয়গী ইশাগী অৱাংবা ৱাখল্লোনশিং নৌনা খঙজননবগী শরুকসু য়াওরি। অদুগুম্না লান্থেংনখিবা অমসুং কৎথোকপগী মতমশিং অদুনা ঐখোয়বু লোইলম শাসন্দগী খক্তমক নত্তনা ইম্পোজ ভেল্যু অমসুং অখুবা মালেমগী মীৎয়েংশিংদগীসু নিংখা তম্বা ফংহনবদা মতেং পাংখি। য়াওলশিং অমসুং রিফোর্মরশিংনা তুং মঙম শান্না য়েংবা ঙম্বশিং অমসুং ৱাখল ৱাংবশিংগা খুৎশম্নদুনা ঐখোয়বু শান্তিগী, ইচিল ইনাও ওইবগী অমসুং অমগা অমগা মান্নবগী লৈরম্বা মগুনশিং খঙহনবদা মতেং পাংখি। বেদিক্কী পাউতাকঃ आ नो भद्राः क्रतवो यन्तु विश्वत: “অফবা ৱাখল পুম্নমক মায়কৈ খুদিংদগী ঐখোয়দা চংহল্লু” অসি ইন্দুনা অনৌবা ভারতকী ৱাখল্লোন শেমগৎখিবশিংনা মপানগী চাওখৎপা ৱাখল্লোনশিংবু তরাম্না ওকখি । ঐখোয়গী কন্সতিত্যুসন্দা য়াম্না কুইরবা অমসুং মপুং ফাবা ৱাখল্লোনশিংনা পুনশিন্দুনা য়াওরি।

৪. ঐখোয়গী ফাউন্দিং দোক্যুমেন অসি মালেমগী খ্বাইদগী কুইনা লৈরক্লবা সিবিলাইজেসনগী হ্যুমেনিস্তিক ফিলোসোফীগা লোয়ননা হেন্না নৌরিবা পুৱারীদগী পোক্লকপা অনৌবা ৱাখল্লোনশিংদগী পুক্নিং থৌগৎলকপনি। কন্সতিত্যুসনগী দ্রাফতিং কমিতীগী মকোক ওইখিবা অমসুং মসিদা অরোইবা মপুং ফাবা মশক ওইহনবদা মরু ওইবা থৌদাং লৌখিবা দা. বি.আর. আম্বেদকরবু লৈবাক অসিনা মতম পুম্বদা শিংথাদুনা লৈরগনি। নুমিৎ অসিদা, অহৌবা দ্রাফ শেমখিবা জুরিস্ত বি.এন. রাউ অমসুং কন্সতিত্যুসন শেম্বদা মতেং পাংখিবা অতোপ্পা এক্সপর্তশিং অমসুং ওফিসরশিংবুসু  নিংশিংগদবনি। এসেমব্লী অদুগী মীওইশিংনা  ভারতকী মফম খুদিংমক অমসুং কম্যুনিতীশিংগী  মহুৎ শিনখি অমসুং মদুদা নুপী ১৫শু য়াওখি হায়বসিগীদমক ঐখোয়না চাওথোকচৈ।

৫. কন্সতিত্যুসন্দা হায়বগুম্না, মখোয়গী পান্দম অদুনা ঐখোয়গী রিপব্লিকপু লেপ্পা লৈতনা ঙাক শেল্লি। হায়রিবা মতম অসিদা, ভারতপু য়াম্না লাইরবা লাইরিক লাইশু হৈতবা লৈবাক অমদগী মালেমগী ফম্বাক্তা চংশিল্লক্লিবা থাজবা লৈবা লৈবাক অমা ওইনা ওন্থোক্লক্লি। কন্সতিত্যুসন শেম্বীরম্বশিংগী অপুনবা লৌশিংনা ঐখোয়গী লম্বী শেম্বীরমদ্রবদি মসি পুম্নমক ওইথোক্লম্লোই।

৬. বাবাসাহেব আম্বেদকর অমসুং অতোপ্পশিংনা ঐখোয়দা পাফল অমা অমসুং ৱাখলগী ঙাক্লৌ অমা পীবিরবসু লম্বী অসিদা চৎপদি ঐখোয়গী থৌদাংনি। ঐখোয়না মখোয়গী থাজবা মাংহনলক্ত্রি, অমসুং গান্ধীজিগী ৱাখল্লোন ‘সর্বোদয়া’, পুম্লমক্কী চাউখৎপা হায়বা অসিদসু হোৎনবগী মথৌ তারী হায়বা খঙলে। অদুগা, মায়কৈ খুদিংমক্তা হৌজিক ফাওবদা খুমাং চাউশিল্লক্লিবশিং অসিসু পুক্নিং থৌগৎনিঙাইনি।

নুংশিজরবা ইরৈচাশিং,

৭. ঐখোয়গী ‘ সর্বোদয়া’গী মিসন অসিদা, খ্বাইদগী পুক্নিং থৌগৎনিঙাই ওইরিবদি ইকনোমিক্কী লমদা চাউখৎলক্লিবা অসিনি। হৌখিবা চহিদা, ভারতনা মালেমগী মঙাশুবা খ্বাইদগী চাউবা ইকনোমি ওইখি। মসি মালেমদা ইকনোমিগী অৱাবা কয়া থেংনখিবা অদুগী মায়োক্তা ফংলকখিবা মাইপাকপনি হায়বসি নিংশিংগদবনি। পেন্দেমিক অসিনা মালেমগী মফম অয়াম্বদা ইকনোমিক গ্রোথতা অকায়বা পীরকপা চহি মরি শুজিল্লক্লে। মশিগী অহৌবা মতমদা, কোবিদ-১৯নসু ভারতকী ইকনোমিদা য়াম্না থিনা শোকহনখি। অদুম ওইনমক, ঐখোয়গী হৈশিংলবা লুচিংবা অমসুং অখাং কনবা অসিনা লমজিংদুনা ঐখোয়না য়াম্না য়াঙনা অৱাবা অসিদগী থোক্লকখি অমসুং  গ্রোথ সাগা হনজিনখি। ইকনোমিগী সেক্তর অয়াম্বনা পেন্দেমিক্কী শাফুবু য়ৈথোকখি। ভারত অসি য়াম্না য়াঙনা চাউখৎলক্লিবা অচৌবা ইকনোমিশিংগী মনুং চনখি। মসি সরকারগী মতাং চাবা অমসুং প্রো-এক্তিব ওইবা ইন্তর্বেন্সনশিংনা ওইথোকহল্লিবনি। মরু ওইনা ‘আত্মানির্ভর ভারত’কী খোঙথাং অসিনা মীওই অয়াম্বদগী ফজবা পাউখুম ফংই। সেক্তর-স্পেসিফিক ওইবা  অখন্নবা স্কিমশিংসু লৈরে।

৮. হেন্না অপেনবা ওইরিবদি স্কিমশিং অমসুং প্রোগ্রামশিং অসিদা খুদোংচাদবশিং মায়োক্নরিবশিংবুসু য়াওহনলে অমসুং মখোয়বু অৱাবদগী কোকহনবদা মতেং পাংলে। মার্চ ২০২০দা লাউথোকখিবা ‘প্রধান মন্ত্রী গরিব কলয়ান অন্ন য়োজনা’ চৎনহনবনা সরকারনা লৈবাক অসিদা কোবিদ-১৯ খঙহৌদনা হেনগৎলকপা মতমদা শেল থুমগী অৱাবা মায়োক্নরিবা লাইরবা ইমুংশিংদা ফুদ সেক্যুরিতী পীবিখি। মতেং অসিনা মরম ওইদুনা, মীওই অমত্তগী মবুক লাম্না লৈখিদে। লাইরবা ইমুংশিং চাউখৎহনবা হায়বা অসিদা লেপ্তুনা, মীওই করোর ৮১রোম্বু কান্নবা পীদুনা স্কিম অসিগী মতম মায়পাক্না শাংদোকখি। তেংবাং অসিবু মখা তানা শাংদোক্তুনা, সরকারনা ২০২৩গী চহি অসিদসু  মীয়াম্না মখোয়গী থাগী রাসন শেল অমত্তা তিংদনা ফংহল্লগনি। শিংথানিঙাই ওইরবা খোঙথাং অসিগা লোয়ননা, ইকনোমিক দিবেলপমেন্তদগী কান্নবা ফংহন্দুনা  সরকারনা শোথহৌরবা কাংলুপশিংবু য়েংশিনবিবগী থৌদাংসু লৌখ্রে।

৯. ইকনোমিগী ফীভম ফবনা, ঐখোয়না শিংথানিঙাই ওইরবা খোঙথাং কয়া অমা হৌদোকপা অমসুং পাইখৎপা ঙম্লে। অমত্তা ঙাইরবা পান্দমদি মীপুম খুদিংমক্না মশাগী অমসুং ময়াম অপুনবগী মখোয় মখোয়গী অশেংবা তৌবা ঙম্বগী চাং অমসুং মপাঙ্গলবু খঙজবা মফম অমা শেম্বনি। পান্দম অসিগী অচুম্বা য়ুম্বীদি মহৈ মশিংনা ওইবনা, নেস্নেল এজুকেসন পোলিসীনা অচৌবা অহোংবা কয়া হৌদোকখ্রে। মসিনা এজুকেসনগী তু-ফোল পান্দমশিংবু মরিক চুম্না হায়রিঃ ইকনোমিক অমসুং সোসিএল এম্পৱার্মেন্তগী খুৎলাই অমা ওইনা অমসুং অচুম্বা তাকপগী পাম্বৈ অমা ওইনা। পোলিসী অসিনা ঐখোয়গী সিবিলাইজেসনগী পরাশিংবু হৌজিক্কী পুন্সিদা হেন্না চানহল্লি, অদুগা তম্লিবা মীওই অদুবুসু ২১শুবা চহি চাগী লানশিংগীদমক্তা শেম-শাহল্লি। নেস্নেল এজুকেসন পোলিসীনা তম্বগী থৌওং অসিবু হেন্না পাক শন্দোকহনবদা অমসুং মনুং চংশিনহনবদা তেক্নোলোজীনা লৌরিবা থৌদাং অসিবু থাগৎলি।

১০. কোবিদ-১৯গী ঙল্লিঙৈ মতমদগী খঙলকপগুম, তেক্নোলোজীনা লাইফ-চেঞ্জিং পোসিবিলিতীশিং পীরি। দিজিতেল ইন্দিয়া মিসন অসিনা খুঙ্গং-শহর খায়রিবা অসি পুনশিন্নহন্দুনা ইনফোর্মেসন অমসুং কম্যুনিকেসন তেক্নোলোজীবু ইনক্লুসিব ওইহন্নবা হোৎনরি। ইনফ্রাস্ত্রকচর পাকথোক্লকপনা অরাপ-অরাপ্পা মফমশিংদা লৈবা মীওই কয়ানা ইন্তর্নেৎকী কান্নবশিং ফংলে অমসুং সরকারনা পীবা মখল কয়াগী সর্বিসশিং ফংলে। সাইন্স অমসুং তেক্নোলোজীগী লমদা লৈরিবা ঐখোয়গী মায়পাকপশিং অসি ঐখোয়না চাউথোকচনবগী মরম ওইরি। স্পেস তেক্নোলোজীদা অহানবা ওইরিবশিংগী মনুংদা ভারতসু য়াওরি। মতম কুইনা পন্দুনা লৈরম্বা সেক্তর অসিগী রিফোর্মশিং পাংথোকপদগী হৌজিক্তী প্রাইবেৎ ইন্তর্প্রাইজশিংবু ক্বেস্ত অসিদা য়াওননবগী কৌরক্লে। ভারতকী এস্ত্রোনোৎশিংবু স্পেসতা পুনবগী প্রোগ্রাম ‘গগনয়ান’ অসি পাঙথোক্নবা হোৎনরি। মসি ভারতকী মেদেন হ্যুমেন স্পেস ফ্লাইৎ ওইগদৌরিবনি। ঐখোয়না থৱানমীচাকশিংদা য়ৌরবসু, ঐখোয়গী খোঙদি লৈবাক্তা থম্লি।

১১. ভারতকী মার্স মিসন অসি এক্সত্রাওর্দিনরী ওইরবা নুপীশিংগী তিম অমনা পৱার তৌখিবনি, অমসুং ঐখোয়গী ইচে-ইচলশিং অমসুং ইচানুপীশিং অসি অতোপ্পা লমশিংদসু মনিংদা লৈত্রে। ৱিমেন্স এম্পৱার্মেন্ত অমসুং জেন্দর ইক্বেলিতী অসিসু ঐখোয়না চহি খরা অসিদা কন্না খুমাং চাউশিনলকপদগী হৌজিক্তি খোলাউ ওইদ্রে। ‘বেতি বচাও, বেতি পরাও’ কেম্পেন অসিদা মীয়াম্না শরুক য়ারকপদগী হিরম খুদিংমক্তা নুপীনা শরুক য়ারকপগী মশিং হেনগৎলিক্লি। রাজ্য কয়াদা, এজুকেস্নেল ইন্সতিত্যুসনশিংদা অমসুং মখল কয়াগী প্রোফেস্নেলশিংগী দেলিগেসনশিংগী মিতিংদা ঐহাক্না চৎলুবা মতমদা নহা ওইরিবা নুপীশিংগী থৌনা অদুনা ঐহাকপু পুক্নিং চিংশিনখি। মখোয়শিং অসিনা হয়েংগী ভারতকী মশক শেমগদৌরিবনি হায়বসি ঐহাক্কী ৱাখলদা চেৎনা থাজখি। করিগুম্বা লৈবাক্কী মীওই তংখায় অমনা মখোয়গী তৌবা ঙম্বগী পাঙ্গল উত্তুনা নেসন-বিলদিংদা শরুক য়ানবগী পুক্নিং থৌগৎলবদি করম্বা মিরেকলনো ফংবা ঙম্লোইদবা?       

১২. হায়রিবা শক্তি পীবগী মঙলান অসিনা নাকন্দা লৈরিবা মার্জিনেলাইজ তৌরিবা সেদ্যুল কাস্ত অমসুং সেদ্যুল ত্রাইবশিংদা লৈঙাক্না মতৌ করম্না চঙশিনগদগে হায়বদু তাক্লি। তশেংনা হায়রবদা, পান্দম অসি অৱাবা কোক্তুনা মখোয়বু চাউখৎহন্নবা খক্তমক নত্তে, মসিদা মখোয়দগী তমজনবগী পান্দমসু য়াওরি। ত্রাইবেল কম্ম্যুনিতীশিং অসিদা মরুওইনা হীরম কয়াদা লৌবা য়াবা অকোইববু কনবদগী হৌরগা খুন্নাই অসিবু হেন্না অপুনবা অমা শাগৎনবগী পরা কয়া অমা লৈরি।

নুংশিজরবা ইরৈচাশিং,

১৩. লৈঙাক্লোনগী হীরম খুদিংমকপু অহোংবা পুরক্নবা হৌখিবা চহি খরসিদা লৌখৎখিবা থৌরাং অমসুং মীয়ামগী হৈ শিংবা এনর্জী কয়া পুথোক্নবা হোৎনখিবগী কয়াগী মহয়না মালেম অসিনা ভারতপু অনৌবা ইকাইখুম্নবগী মশক অমদা য়েংবা হৌনরক্লে। ঐখোয়না তোঙান তোঙানবা মালেমগী ফোরমশিংদা শরুক য়াবনা অফবা মগুন অমা শেম্বা হৌরে। মালেমগী ফম্বাক্তা ভারতনা কল্লিবা ইকাইখুম্নবা অসিনা অনৌবা খুদোংচাবা অমসুং থৌদাং কয়া লাক্লে। হন্দক চহি অসিদা, ময়াম্নসু খঙবীরি, ভারতনা গ্রুপ ওব ২০ নেসন্সকী ময়াই তাংবল লৌগদৌরি। মালেম পুম্বা ইচিল ইনাও ওইনা হিংমিন্নবগী ৱাখল্লোনগা লোয়ননা, ঐখোয়না পুম্নমক্কী শান্তি অমসুং নুংঙাই য়াইফবগীদমক লেপ্লি। অসুম্না, জি২০ প্রেজিদেন্সি অসি গনতন্ত্র অমসুং মলতিলেতরেলিজম শৌগৎনবা খুদোংচাবা অমনি অমসুং মসি হেন্না ফরবা মালেম অমা অমসুং হেন্না ফরবা তুংলমচৎ অমা শেম্নবগী খুদোংচাবা অমনি। ভারতকী লুচিং মখাদা, ঐহাক্না থাজৈ মদুদি, জি২০ অসিনা হেন্না ফবা অমসুং তুং কোইনা চৎনবা য়াবা মালেমগী ওর্দর অমা শেমগৎনবা হোৎনরিবসি হেন্না শক্তি পীগনি।

১৪. জি২০ হায়বসিনা মালেমগী মীশিংগী শরুক অহুম থোকপগী অনি কল্লিবনা অমসুং মালেমগী জি.দি.পি.গী চাদা ৮৫ কী চাং কনবনা মসি মালেমগী শিংনবা কয়াগী পাম্বৈ পুথোকনবগী অমসুং খন্ন-নৈননবগী মতীক চারবা ফোরম অমা ওইরি। ঐহাক্কী ৱাখলদা, গ্লোবেল ৱার্মিং অমসুং অইং অশা হোংলকপা অসিনা মখোয়গী মনুংদা খ্বাইদগী মরুওইবা হীরম অমা ওইরি। মালেমগী শাবগী চাং ৱাংখৎলক্লি অমসুং কা হেন্না ইংবা শাবগী চাং হেনগৎলক্লি। ঐখোয়না তৌফম খঙদবা ফিভম অমা মাইয়োক্নরিঃ মীওই কয়া লায়রবদগী কন্নবা হোৎনবদা, ঐখোয়না শেন্মিৎলোন চাউখৎহনবা চঙই, অদুবু হায়রিবা চাউখৎপসি ফোসিল ফ্যুলদগী লাক্লি। লাইবক থীবদি, লাইরবশিংনা মালেমগী শাবগী চাং ৱাংখৎলকপগী চৈনা অতৈশিংদগী হেন্না খাঙলি। এনর্জীগী অতোপ্পা হৌরকফম শেমগৎপা অমসুং চৎনহনবনা পাম্বৈশিংগী মনুংদা অমা ওইগনি। ভারতনা হীরম অসিগী মাইকৈদা সোলার এনর্জী অমসুং ইলেক্ত্রিক ভেহিকলশিংগী পোলিসী পুথোক্তুনা শীংথাবা য়ানা লুচিংলি। মালেমগী থাক্তা, চাউখৎলক্লিবা শেন্মিৎলোনশিংনা চাউখৎখ্রবা লৈবাকশিংদগী তেক্নোলোজী লান্নবা অমসুং শেলগী তেংবাংগী মওংদা মতেং চঙলি।

১৫. চাউখৎপা অমসুং অকোইবগী মরক্তা খল অমা চানা থম্নবগীদমক, ঐখোয়না অরিবা চৎনরোলবু অনৌবা মীৎয়েং অমগা লোয়ননা য়েংবা তঙাইফদে। ঐখোয়না ঐখোয়গী খ্বাইদগী তঙাইফদবসি করিনো হায়বদু খনগদবনি। মহৌশাগী পুন্সি মহিংগী মগুন্দা য়াওরিবা সাইন্তিফিক ওইবা হীরমশিং অসি মুন্না খঙগদবনি। ঐখোয়না অমুক্কা হন্না, মহৌশাবু নুংশিবা অমসুং পাক চাউরবা য়ুনিভর্স অসিদা উৎলম্লিবা ইকাই খুম্নবা অসি নৌনা মৈরি চুখৎকদবনি। মতাং অসিদা মহাত্মা গান্ধী অসি ঐখোয়গী মতমগী অশেংবা প্রোফেতনি হায়জগে, মরমদি মহাক্না মওং অমা লৈতনা ইন্দস্ত্রিএলাইজ তৌরকপগী মাঙজবা মাংজৌননা উখ্রে অমসুং মালেম পুম্বদা মসিগী লম্বী অসিবু শেমজিন্নবা চেকশেন ৱা ফোংদোকখ্রে।

১৬. করিগুম্বা ঐখোয়না ঐখোয়গী অঙাংশিং অসি অসিগুম্বা অদুক্কী মতীক নৌবা গ্রহ অসিদা নুংঙাইনা হিংহন্নিংবা তারবদি ঐখোয়না ঐখোয়গী পুন্সি মহিং অসি শেমদোকপা তঙাইফদে। শেমদোক্কদবশিং অসিদা হায়বা য়াবশিংগী মনুংদা অমদি চীঞ্জাক্নি। য়ুনাইতেদ নেসন্সনা ভারতনা হায়জবা অমা য়াবীরকপা অমসুং ২০২৩বু মিলেতকী অন্তর্জাতিগী নুমিত হায়না লাউথোকপীবসি পনবদা অদুক্কী মতীক হরাওজৈ। মিলেতশিং অসি ঐখোয়গী চীঞ্জাক্কী মরুওইবা মচল অমা ওইরম্মি অমসুং মখোয় অসি হৌজক খুন্নাই অসিগী কাংলুপশিংদা নৌনা অমুক হঞ্জিনলক্লি। মিলেতকুম্বা কোর্স ওইবা গ্রেনশিং অসি ইকো-ফ্রেন্দলী ওই মরমদি, মখোয়না হৌনবা হোৎনবদা ঈশিং খরতমক চঙই অদুগা মখোয়না মচি য়াম্না ৱাংনা পীরি। করিগুম্বা মী কয়া অমনা মিলেত্তা মায় ওনশিনলকপা তারবদি মসিনা ইকোলোজী কনগনি অমসুং হকশেল হেন্না ফগৎহনগনি।

১৭. রিপব্লিক্কী চহি অমা হৌখ্রে অমসুং অতোপ্পা চহি অমা অমুক লাক্লি। মতম অদু তম্বা ঙমদবা অহোংবা কয়া অমগী মতম ওইখি। লাইচৎ লাকখিবগা লোইননা মালেম অসি নুমিত খরগী মনুংদা কয়াগী মতীক হোংখি। হায়রিবা চহি অহুম অসিগী মনুংদা, ঐখোয়না মহীক অসিবু মায়থিবা পীরে হেক খল্লুবগা মসিগী শাথিরবা মকোক অদু হেক্তমক থাংগৎলকই। অদুমওইনমক, কিনিংঙাইদি অমত্তা লৈতে মদুদি ঐখোয়না মসিগী মতম অসিগী মনুংদা তমখ্রে মদুদি ঐখোয়গী লুচিং, ঐখোয়গী সাইন্তিস্ত অমসুং দোক্তরশিং, ঐখোয়গী এদমিনিস্ত্রেতরশিং অমসুং 'কোরোনা ৱারিয়র'শিংনা লাক্কদবা ফিভম অমহেক্তা লাকশিন্নবা অঙম্বা মওংদা হোৎনরক্কনি। মসিগী মতাং অসিদা, ঐখোয় খুদিংমক্না ঐখোয়গী থাজবা মাঙদনবা অমসুং এলর্ত ওইনা লৈনবা তমখ্রে।

নুংশিজরবা ইরৈচাশিং,

১৮. তোঙান তোঙানবা হীরমশিংদা হোৎনরিবা মীওই কয়াগী চারোন্না মখোয়গী মমল নাইদ্রবা মওংদা ঐখোয়গী রিপব্লিক্কী ৱারী শেমগৎপদা লৌরিবা থৌদাংগীদমক থাগৎনিংঙাই ওই। ঐহাক্না লৌমীশিং, শিন্মীশিং, সাইন্তিস্তশিং অমসুং ইঞ্জিনীয়রশিংগী অপুনবা থৌনানা ঐখোয়গী লৈবাক অসিবু "জয় জৱান, জয় কিশান, জয় বিগ্যান, জয় অনুসন্ধন"গী ইনোৎ ফংহনবগীদমক ঐহাক্না শিংথাজরি। ঐহাক্না লৈবাক্কী চাউখৎপগী লম্বীদা থৌদাং য়ারিবা খুদিংমকপু থাগৎচরি। ঐহাক্না ঐখোয়গী দাইস্পোরা, ভারতকী নাৎ অমসুং চাউখৎলোনগী থৌনা লৈরবা এম্বেসেদোরশিংদা য়াইফ পাউজেল পীজরি,

১৯. রিপব্লিক দেগী থৌরম অসিদা, ঐহাক্না ঐখোয়গী ঙমখৈ ঙাক্লিবা অমসুং লৈবাক্কীদমক কত্থোক্নবগীদমক শেম শাদুনা লৈরিবা জৱানশিংগী মফমদা অখন্ননা থাগৎপগী পাউজেল পীজরি। ঐহাক্না মখোয়গী মরৈচাশিংদা ইন্তর্নেল সেক্যুরিতী পীরিবা পেরামিলিতরী ফোর্সশিং অমসুং পুলিস ফোর্সশিংগী থৌনা ফরবা লান্মীশিংবুসু থাগৎপা ফোংদোকচরি। ঐহাক্না ঐখোয়গী আর্ম্দ ফোর্সেস, পেরামিলিতরী ফোর্সেস অমসুং পুলিস ফোর্সেসকী থৌনা ফনা মখোয়গী মথৌদা থৱাই থাখ্রবশিংগী মফমদা ইকাই খুম্নবা উৎচরি। ঐহাক্না নুংশিরবা অঙাং খুদিংমক্কী মফমদা মখোয়গী মঙম শাল্লবা তুংগী পুন্সিগীদমক থৌজাল পীজরি। অমুক্কা হন্না, রিপব্লিক দে অসিদা ময়াম পুম্নমক্কী মফমদা য়াইফ পাউজেল পীজরি।

থাগৎচরি,

জয় হিন্দ!

জয় ভারত!

*****