প্রধান মন্ত্রী, শ্রী নরেন্দ্র মোদীনা ঙসি ৭ লোক কল্য়ান মার্গতা এন.এম.এম.এল. সোসাইতীগী চহিগী জেনেরেল মীফম সোসাইতী অসিগী প্রেসিদেন্ত ওইনা থৌরম মপু ওইনা শরুক য়াখ্রে‍।

মহাক্কী ৱারোলদা, প্রধান মন্ত্রীনা ভারতকী হৌখিবশিংগী মরমদা মীয়ামদা হেন্না খঙহন্নবগীদমক লনাই মীওইশিং, ইনস্তিত্যুসনশিং অমদি থীমশিংগা মরী লৈননবা ভারতকী অনৌবা পুৱারীগী মরমদা থিজিন হুমজিনবগী মীৎয়েং পাকথোক চাউথোকহনবগী মথৌ তাবা ৱাফম থমখি‍। প্রধান মন্ত্রীনা লৈবাকসিদা লৈরিবা ইনস্তিত্যুসনশিংনা মপুং ওইনা হৌজিক্কী লোয়ননা তুংগী মীরোলশিংগী কান্ননবগীদমক নীংথিনা ওদিৎ তৌরবা অমদি থিজিন হুমজিল্লবা রেকোর্দেদ মেমোরীশিং শেমগৎপগী তঙায় ফদবা ৱাফমশিংসু থমখি‍।

প্রধানমন্ত্রী সঙ্গ্রহলয়গী মওং মতৌ অমদি য়াওরিবা মচাকশিংদা অপেনবা ফোঙদোক্লদুনা, প্রধান মন্ত্রীনা ম্যুজিয়ম অসি তশেংনা পান্দম চুম্মী অমদি লৈবাক্তা য়ুম্ফম ওই, মীওই খরখক্তা য়ুম্ফম ওইদে, অমদি মসিদা অহেনবা ইথিলগী মমি তাদে অমদি মথৌ তাবা ৱাফমশিং ৱাৎপগী ফীভমসু লৈতে হায়না মরুওইবা ৱাফম কয়া ফোঙদোকখি‍। ভারতকী প্রধান মন্ত্রী পুম্নমক্কী মায় পাকখিবশিং অমদি থৌদাংশিং উৎলিবা সঙ্গ্রহলয়গী পাউজেল মীয়ামদা য়ৌহন্নবগীদমক, লৈবাক শিনবা থুংনা লৈরিবা কলেজ অমদি য়ুনিভর্সিতীশিংদা সঙ্গ্রহলয় অসিগী মচাকশিংগী মরমদা কম্পিতিসনশিং পাঙথোক্তুনা নহাশিংগী মরক্তা মসিবু হেন্না পাম্নহন্নবা হোৎনবগী তঙায় ফদবা ৱাফমশিং শ্রী মোদীনা থমখি‍।

মতম খরগী মতুংদা, সঙ্গ্রহলয় অসিনা ভারত অমদি মালেমগী মফমশিংদগী দিল্লীদা লাকপা মীওইশিংগী পুক্নিং চিংশিনফম ওইরক্কনি হায়বগী থাজবা ৱাফম ফোঙদোকখি‍। ইং ১৮৭৫দা আর্য় সমাজ লিংখৎলম্বা অমদি মোদর্ন ইন্দিয়াগী খ্বাইদগী ইথিল লৈবা খুন্নাইগী অমদি নাৎকী মীশক অমা ওইরিবা স্বামী দয়ানন্দ সরস্বতীগী ২০০শুবা মপোক কুমওন ২০২৪দা তারে হায়না পল্লদুনা, শ্রী নরেন্দ্র মোদীনা লৈবাকসিগী একাদমিক অমদি কলচরেল ইনস্তিত্যুসনশিংদা লৈবাকসিগী অথোইবা মীৎয়েং শানবা অমদি খুন্নাইদা অহোংবা পুরকখিবা মীশক অসিনা লৌরম্বা থৌদাংশিং লোয়ননা ২০২৫তা চহি ১৫০ মপুং ফারক্কদৌরিবা আর্য় সমাজগী মরমদা নীংথিনা থিজিন হুমজিন্দুনা পুথোকপা ৱাখল লৌশিংগী মচাকশিং পুথোরক্নবা ৱাফম থমখি‍।

একজেক্যুতিব কাউন্সিলগী চেয়রমেন, শ্রী ন্রিপেন্দ্র মিস্রানা সোসাইতী অসিগী হৌজিক হৌজিক পাঙথোক্লিবা থবক থৌরমশিংগী মরমদা ৱা ঙাঙখি অমদি তুংগীদমক থম্লিবা মীৎয়েংশিং চাউরাক্না থমখি‍। অতম্ননা, মহাক্না মোদর্ন অমদি কন্তেম্পরেরী ভারতকী পুৱারীগী লমদা মাঙজিল থাবা ইনস্তিত্যুসন অমা ওইরিবা লাইব্রেরীগী থৌরাংশিং, লোয়ননা মমাঙ চহিগী এপ্রিলদা হাংদোকখিবা প্রধানমন্ত্রী সঙ্গ্রহলয়গী মরমদা ৱাফম কয়া থমখি‍।

এন.এম.এম.এল. সোসাইতী অমদি একজেক্যুতিব কাউন্সিলগী মেম্বরশিংনা, ইনস্তিত্যুসন অসিগী এনুএল রিপোর্ত অমদি ওদিতেদ একাউন্তশিং অয়াবা পীখিবা মীফম অদুদা শরুক য়াখি‍।

*****