ভারত ইমানা য়াইফরে!

ভারত ইমানা য়াইফরে!

থৌরম অসিদা তিনবীরিবা ত্রিপুরাগী রাজ্যপাল শ্রী সত্যদেব নরায়ন আর্য়জী, মফমসিগী মীয়াম্না পাম্নবা মুখ্য মন্ত্রী শ্রী মানিক সাহাজী, কেন্দ্র মন্ত্রী মন্দলগী ঐহাক্কী মরুপ, প্রতিমা ভৌমিকজী, ত্রিপুরা বিধান সভাগী স্পিকর শ্রী রতন চক্রবর্তীজী, দেপ্যুতী মুখ্য মন্ত্রী শ্রী জিষ্ণু দেব বর্মাজী, ঐহাক্কী মরুপ, এম.পি. শ্রী বিপ্লব দেবজী, ত্রিপুরা সরকারগী মন্ত্রী পুম্নমক অমসুং ঐহাক্কী নুংশিরবা ত্রিপুরাগী মীয়াম!

নোমোস্কার!

খুলুমুখা!

মাতা ত্রিপুরাসুন্দির পুন্যো ভুমিতে

এশে আমি নিজেকে ধোনয়ো মোনে কোর্ছী।

মাতা ত্রিপুরাসুন্দরীর এহ পুন্যো ভুমিকে অমার প্রোনাম জানাহ।।

ঐহাক্না খ্বাইদগী অহানবদা অদোমগী মফমদা ঙাকপীনবা হায়জরি, মরমদি ঐহাক্না মফমসিদা য়ৌরকপদা চাউরাক্না পুং অনিমুক থেংখ্রে। ঐহাক মেঘালয়দা লৈরম্বনি, মফমদুদা মতম খরা হেন্না লৌখ্রে অদুগা মফমসিদা মীওই খরদি পুং ১১দগী লৈরে হায়না ঐহাক্কী ইফমদা পাউদম্বীরে। অদোম্না অৱাবা কয়া খাঙদুনা ঐহাকপু থৌজালবীনবগীদমক্তা লৈবগীদমক্তা অদোমগী মফমদা তৌবীমল উৎলিবমখৈ মপুং ফাবা ঙম্লরোই। মফমসিদা লু-নানবগা মরী লৈনবা অচৌবা খোঙথাং অমা পায়খৎপগীদমক্তা ঐহাক্না ত্রিপুরাগী মীয়াম্বু খ্বাইদগী অহানবদা ইকায় খুম্নবা উৎচরি। অদোম্না মমাংগী চহি ৫সিদা লু-নানবগী থৌওংবু মীয়ামগী ইহৌ ওইহনখ্রে। মসিনা মরম ওইরগা, হন্দক্কী মতাংসিদা ত্রিপুরানা লৈবাক্কী অপীকপা রাজ্যশিংগী মরক্তা খ্বাইদগী লু-নানবা রাজ্য ওইরিবনি।

মরুপশিং,

ইমা ত্রিপুরা সুন্দরীগী থৌজালদগী ত্রিপুরাগী চাউখৎ থৌরাংগী খোঙচত্তা ঙসি অনৌবা শাফু অমা ফংলে। কন্নেক্তিবিতী, স্কিল দিভেলপমেন্ত অমসুং লাইরবশিংগী য়ুম শাবগা মরী লৈনবা স্কিমশিংগীদমক্তা অদোম পুম্নমকপু থাগৎচরি। ত্রিপুরানা মহাক্কী অহানবা দেন্তেল কোলেজ ঙসি ফংলে। মসিনা ত্রিপুরাগী নহারোলশিংবু মফমসিমক্তদা দাক্তর ওইবগী খুদোংচাবা ফংহল্লগনি। ত্রিপুরাগী লাইরবা ইমুং লাখ ২ হেনবনা ঙসি মশাগী অনৌবা পক্কা য়ুমদা চঙলি। মখোয়শিং অসিদগী অয়াম্বা য়ুম্বুদি নুপীশিংনি। অদুগা য়ুমশিং অসি লুপা লাখ ১ চঙলগা শাবনি হায়বা পুম্নমক্না খঙনরবনি। মশাগী মমিংদা লন-থুম ফংবা অহানবা নুপী কয়া মখোয়গী মনুংদা য়াওরি। লুপা লাখ কয়াগী লনথুমগী মপু ওইরবনি, মখোয় পুম্নমকপু লাখপতি ওইবগীদমক্তা ঐহাক্না থাগৎচরি।

লাইরবশিংগী য়ুম শাবীবগী মতাংদা ত্রিপুরানা মকোক থোংবা রাজ্যশিংগী মনুং চল্লি। মানিকজী অমসুং মহাক্কী তীম্না য়াম্না থাগৎনিংঙাই ওইবা মওংদা থবক তৌখি। অহিং অমা য়ারেকপগী তেংবাং পীবা মতমদা মফমসিদদি পুন্সি চুপ্পা থৌজাল পীরিবনি হায়বসিদি মীপুম খুদিংনা খঙনরবনি। অদুবু, হৌজিক্তি মীপুম খুদিংগী কোকথক্তা পক্কা য়ুমথক ফংলি। মরম অদুনা, ঐখোয় পুম্নমক্না ত্রিপুরাগী থৌজাল ফংলি। ঐহাক্না মফমসিদা এয়রপোর্ত্তগী লাকখি, অদুনা মতম খরসু থেংথখ্রে, অদুগা এয়রপোর্ত অসি কয়াম্না লাপ্পি হায়বসু অদোম্না খঙলবনি। লম্বী মশাং অসিগী নাকল অনিমক্তা মীওই মশিং কয়া অমনা লেপ্পম্বা অমসুং মখোয়না থৌজাল পীরকপদা ঐহাক্না নুংঙাইবা ফাওই। মফমসিদা ঙসি তিল্লীবা মীয়াম মশিংদগী শরুক অনি হেনবনা ঐহাকপু থৌজাল পীনবা লম্বীদা থোক্লকখি। ঐহাক্না মখোয়বুসু ইকায় খুম্নজরি। ঐহাক্না মমাংদসু হায়খ্রে, ঐহাক ঙসি মেঘালয়দা নোর্থ ইস্তর্ন কাউন্সিলগী গোলদন জুবিলী থৌরম অমসুং মখোয়গী মীফমদা শরুক য়াখি। মীফম অদুদা ঐখোয়না ত্রিপুরা য়াওনা লাক্কদৌরিবা মতমশিংদা চাউখৎ থৌরাংগা মরী লৈনবা রোদমেপকী মতাংদা খন্ন-নৈনখি। ঐহাক্না মফমদুদা অৱাং নোংপোক রাজ্য ৮গী চাউখৎ থৌরাংগীদমক্তা অশ্তলক্ষমি, হায়বদি অশ্ত আধার, চাউখৎ থৌরাংগী হীরম ৮গী মতাংদা ৱাফম থমখি। ত্রিপুরাদা দবল ইঞ্জিন সরকার লৈরি। অদুনা চাউখৎ থৌরাংগী রোদমেপ অসি থবক্তা য়াম্না থুনা ওন্থোক্লি, মসিদা খোঙজেল লাক্লে, মসিমক ঐখোয়না হোৎনরি।

মরুপশিং,

দবল ইঞ্জিন সরকার লাক্ত্রিঙৈদা ত্রিপুরা অমসুং অৱাং নোংপোক্কী চাউখৎ থৌরাংগী মতাংদা শুপ্নগী মতাং অনিরক্তা খন্নরম্মি। অমনা, মীখল লাকপা মতমদা অদুগা অমনা হিংশাগী থৌদোক থোকপা মতমদা। অদুবু হৌজিক্তি মতমসি হোংলে, ঙসিদি লু-নানবা, ইনফ্রাস্ত্রকচরগী চাউখৎ থৌরাংগী মতাংদা ত্রিপুরাগী মরমদা খন্নরে। লাইরবশিংগী য়ুম লাখ কয়া ফংনরি, মসিগী মতাংদা খন্নরি। ত্রিপুরাগী কন্নেক্তিবিতীগা মরী লৈনবা ইনফ্রাস্ত্রকচরগীদমক্তা কেন্দ্র সরকারনা লুপা করোর লিশিং কয়া কায়থরি অদুগা লমদমসিগী সরকারনা মখোয়বু থবক্তা ওন্থোক্লি। ঙসিসু য়েংবীয়ু, ত্রিপুরাদা নেস্নেল হাইৱে কয়া য়াম্না লৈরে। হৌখিবা চহি ৫দা অনৌবা শোরোক কয়ানা খুঙ্গংশিংবু শম্নহল্লে। ঙসিদি, ত্রিপুরাগী খুঙ্গং খুদিংবু শোরোক্না শম্নহন্নবা থবকশিং খোঙজেল য়াঙনা পায়খৎলি। ঙসি উরেপ উয়ুং তম্লিবা শোরোকশিং অসিনা ত্রিপুরাগী শোরোক্কী নেতৱর্কপু মপাঙ্গল হেন্না হাপ্লগনি। আগর্তলা বাইপাস্তগী রাজ্যগী কোনুং ফাওবগী ত্রাফিক য়াম্না নুংঙাইরগনি, পুন্সি মহিং লাইথোক্লগনি।

মরুপশিং,

হৌজিক্তি, ত্রিপুরাগী খুত্থাংদা নোর্থ ইস্ত ইন্তর্নেস্নেল ত্রেদকী গেতৱে অমসু লৈরক্লে। আগর্তলা-আখ্রা রেলৱে লাইন্না কারবারগী অনৌবা থোঙ কয়া হাংলে। মতৌ অসুম্না, ভারত-থাইলেন্দ-ম্যানমার হাইৱেগুম্বা রোদ ইনফ্রাস্ত্রকচরগী খুত্থাংদগী নোর্থ ইস্ত অমসুং অতোপ্পা লৈবাকশিংগী মরীগী থোঙ হাংদোক্লি। ত্রিপুরাগী মহারাজা বির বিক্রম এয়রপোর্ত্তা ইন্তর্নেস্নেল তর্মিনেল লৈবদগী লৈবাক অমসুং মীরমগী কন্নেক্তিবিতী হেন্না নুংঙাইহল্লে। মসিনা ত্রিপুরাবু অৱাং নোংপোক্কী মরু ওইবা লোজিস্তিক্স হব অমা ওইহল্লে। ঐখোয়না ত্রিপুরাদা ইন্তর্নেত য়ৌহন্নবা হোৎনবশিংদগী মীয়াম অমসুং মহাশিংনা কান্নবা কয়া অমা ফংলে। ত্রিপুরাগী পঞ্চায়ত কয়াদসু দবল ইঞ্জিন সরকার লাক্লবা মতুংদা ওপ্তিকেল ফাইবর য়ৌহল্লে।

মরুপশিং,

বি.জে.পি.গী দবল ইঞ্জিন সরকারনা ফিজিকেল অমসুং দিজিতেল ইনফ্রাস্ত্রকচরখক্তদা নত্তনা সোসিএল ইনফ্রাস্ত্রকচরদসু অহেনবা মিৎয়েং চঙলি। লাইয়েংবা অসি য়ুমদগী নক্না পাংথোকপা, হোঙবা, পুম্নমক্না মসিগী খুদোংচাবা ফংবা হায়বসিদা বি.জে.পি. সরকারনা অহানবা মিৎয়েং চঙলি। মসিদা আয়ুশমান ভারত য়োজনানা য়াম্না তেংবাংলি। য়োজনা অসিগী মখাদা অৱাং নোংপোক্কী খুঙ্গংশিংদা হেল্থ অমসুং ৱেলনেস সেন্তর লিশিং ৭ হেন্না লিংখ্রে। মসিগী মনুংদগী চাউরাকপা ১০০০দি ত্রিপুরাগীনি। সেন্তরশিং অসিদা অনাবা লিশিং কয়াবু কেন্সর, দাইবিতিজকুম্বা অরুবা লাইনা কয়াগী স্ক্রিনিং তৌখ্রে। মতৌ অসুম্না, আয়ুশমান ভারত পি.এম.-জে.এ.ৱাই. য়োজনাগী মখাদা ত্রিপুরাগী লাইরবা লিশিং কয়ানা লুপা লাখ ৫ ফাওবগী লেম্না লাইয়েংবগী খুদোংচাবা ফংলে।

মরুপশিং,

অমাংশঙ, মৈ, গ্যাস কন্নেক্সন ওইরো, হীরমশিং অসিদা মশক থোকপা থবক পাংথোক্লে। হৌজিক্তি গ্যাস গ্রিদসু শারে। ত্রিপুরাগী য়ুমশিংদা অহোংবা গ্যাস পাইপকী খুত্থাংদা য়ৌহন্নবগীদমক্তা দবল ইঞ্জিন সরকারনা খোঙজেল য়াঙনা থবক পায়খৎলি। য়ুম্থোং খুদিংদা তোতি ঈশিং য়ৌহন্নবগীদমক্তা দবল ইঞ্জিন সরকারনা দবল স্পীদতা থবক তৌরি। ত্রিপুরাগী অনৌবা ইমুং লাখ ৪দা শুপ্নগী চহি ৩ খক্তদা তোতি ঈশিংগী খুদোংচাবা পীখি। ইং ২০১৭কী মমাংদা ত্রিপুরাগী লাইরবশিংগী রেসনগী হক মৎপীরম্মি। ঙসিদি, দবল ইঞ্জিন সরকারনা লাইরবশিংদা মখোয়গী রাসন ফংহল্লি অমসুং মমাংগী চহি ৩দদি লেম্না রাসন পীবগী থবক ফাওবা পাংথোকখি।

মরুপশিং,

মসিগুম্বা স্কিমশিংগী কান্নবা খ্বাইদগী ফংবশিংদি ঐখোয়গী ইমা-ইবেল, ইচে-ইচলশিংনি। লাখ ১ হেনবা ত্রিপুরাগী মীরোনবী মমাশিংনা প্রধান মন্ত্রী মাত্রি বন্দনা য়োজনাগী কান্নবসু ফংখি। মসিগী মখাদা, মমা খুদিংদা মচি ওইবা চিঞ্জাক ফংহন্নবগীদমক্তা লুপা লিশিং কয়া মখোয়গী বেঙ্ক একাউন্ততা হকথেংননা হাপখ্রে। ঙসিদি, দেলিবরী অয়াম্বা হোস্পিতালদা তৌরে, মসিনা মমা অমসুং অঙাং অনিমকপু খুদোংথীবা থোকপদগী কল্লে। ত্রিপুরাগী ইচে-ইচলশিংবু মরোমদোম লেপচবা ঙমহন্নবগীদমক্তা সরকারনা পায়খৎলিবা খোঙথাং অসি য়াম্না থাগৎনিংঙাইনি। নুপীশিংদা থবক পীনবগীদমক্তা লুপা করোর কয়াগী পেকেজ অমা সরকারনা পীরে হায়না ঐহাক্কী ইফমদা তম্লে। ত্রিপুরাদা দবল ইঞ্জিন সরকার লাকপদগী নুপীশিংগী সেল্ফ হেল্প গ্রুপ মশিংসু শরুক ৯ হেনগৎখ্রে।

ইচিল ইনাওশিং,

মতমগা চুনদবা ৱাখল্লোন চেনবা অমসুং অচান মীরায় নাইবা দলশিংনা ত্রিপুরাদা দিকেদ কয়া শক্তি পায়দুনা লাকখি। মখোয়না ত্রিপুরাগী চাউখৎ থৌরাংগীদমক্তা করিমত্তা খনবীরমদে। রাজ্যসিগী রিসোর্সশিংবু মশাগী কান্নবা খক্তগী শিজিন্নখি। মসিনা লাইরবা, নহা, লৌমী অমসুং নুপীশিংদা খ্বাইদগী অৱাবা নংহনখি। মসিগুম্বা ৱাখল্লোন্না মীয়ামদা কৈদৌনুংদা তেংবাংবা ঙম্লোই, য়ারোই। মখোয়দি নেগেতিবিতী শন্দোকপা খক্তা খঙবনি। মখোয়গী মনাক্তা পোজিতিব এজেন্দা হায়বা অমত্তা লৈতে। মঙলান লৈবা, মদুবু মঙফাওনহনবগী লম্বীসু লৈবদি দবল ইঞ্জিন সরকার খক্তনি। অৱাবা শন্দোকপা মীওইনা মনিং হনবা গিয়রদা চৎপনি অদুগা ত্রিপুরাগী তঙাই ফদবদি এক্সেলেরেতরনি।

মরুপশিং,

শক্তিখক পাম্বগী রাজনিতীনা ঐখোয়গী ত্রাইবেল খুন্নাইদা অৱাবা য়াম্না পীরে। মখোয়না ত্রাইবেল খুন্নাইবু চাউখৎ থৌরাংদগী লাপ্না থম্বীখি। বি.জে.পি.না মসিগুম্বা রাজনিতীবু হোংদোকখি। মসিনা মরম ওইদুনা, ঙসিদি ত্রাইবেল খুন্নাইগী অহানবা অপাম্বসি বি.জে.পি. ওইরিবনি। গুজরাত্তা হন্দক্তা মীখল পাংথোকখি। চহি ২৭কী মতুংদা হন্দক গুজরাত্তা পাক শন্না ফংখিবা মায় পাকপা অসিদা ত্রাইবেল খুন্নাইগী অচৌবা থৌদাং য়াওরি। ত্রাইবেলশিংগী অপুনবা সিত ২৭তা বি.জে.পি.না ২৪ কাখিবনি।

মরুপশিং,

জঞ্জাজিয় গৌরব দিবসকী মরু ওইবা খ্বাইদগী হান্না খঙবসি বি.জে.পি. সরকারনি। ভগ্বান বির্সা মুন্দাগী মপোক নুমিৎ, নবেম্বর ১৫বু জঞ্জাজিয় গৌরব দিবস হায়না বি.জে.পি.না লৈবাক শিনবা থুংবদা পাংথোকপা হৌখি। লৈবাক্কী নিংতম লান্দা ত্রাইবেল খুন্নাইনা লৌখিবা থৌদাংশিংবু লৈবাক অমসুং মীরমদা খঙহল্লি। ঙসিদি, লৈবাক শিনবা থুংবদা ত্রাইবেল ফ্রীদম ফাইতর ম্যুজিয়ম ১০ শারে। রাস্ত্রপতি শ্রীমতি দ্রৌপদি মুর্মুজীনা ত্রিপুরাদা হন্দক্তা মহারাজা বিরেন্দ্র কিশোর মানিক্যা ম্যুজিয়ম অমসুং সংস্কৃতিক কেন্দ্রগী উরেপ উয়ুং তমখি। ত্রিপুরাগী ত্রাইবেলশিংগী কলা-সংস্কৃতীবু খুমাং চাউশিলহন্নবগীদমক্তা ত্রিপুরা সরকারনা লেপ্তনা হোৎনরি। মসিগুম্বা থবকশিংদা মতেঙ্গা পাংবগী খুদোংচাবা বি.জে.পি.না ফংজরি। মসিগুম্বা হোৎনজমন কয়াগী মহৈ ওইনা, ত্রিপুরা য়াওনা লৈবাক্কী ত্রাইবেল খুন্নাইশিংনা বি.জে.পি.দা থম্লিবা থাজবসু নোংম-নোংমগী হেনগৎলক্লি।

ইচিল ইনাওশিং,

ত্রিপুরাগী অপীকপা লৌমী, ইন্দস্ত্রী তৌবা মীওিশিংদা খ্বাইদগী হেনবা খুদোংচাবা ফংবা হায়বসিদা দবল ইঞ্জিন সরকারনা কন্না হোৎনরি। মফমসিগী লোকেলবু মতৌ করম্না গ্লোবেল ওইহন্সিগে হায়নাকন্না হোৎনরি। ঙসিদি ত্রিপুরাগী কিহোম মীরমদা য়ৌরি। মসিদা নত্তনা, মেত্রিক তোন কয়াগী অতোপ্পা উহৈ অমসুং মনা-মশিংশু ঙসিদি বাঙ্গলাদেশ, জর্মনী, দুবাইগীদমক্তা মফমসিদগী এক্সপোর্ত তৌরি। মসিনা লৌমীশিংগী শেন্দোং লৈহল্লি। ত্রিপুরাগী লৌমীশিংনা পি.এম. কিসান সম্মান নিধীগী মখাদা লুপা করোর ৫০০ হেনবগী শেনফম ফংনখ্রে। বি.জে.পি. সরকারনা ত্রিপুরাগী অগর-ৱুদ ইন্দস্ত্রীদা মিৎয়েং চঙলিবসিগী মহৈসু মথংগী চহি খরদা উবা ফংলগনি। মসিনা ত্রিপুরাগী নহাশিংদা অনৌবা খুদোংচাবা কয়া পীগনি, অনৌবা শেন্দান লম্বী পীগনি।

মরুপশিং,

ত্রিপুরানা ঙসিদি শান্তি অমসুং চাউখৎ-থৌরাংগী লম্বীদা চৎপা অসিনা খ্বাইদগী মরু ওইবা ৱাফম্নি। চাউখৎ থৌরাংগী দবল ইঞ্জিন মহৈশিং ত্রিপুরানা ঙসিদি ফংলে। ঐহাক্না ত্রিপুরা মীয়ামগী মতিক মগুন্দা থাজবা লৈ। চাউখৎ থৌরাংগী খোঙজেল করম্না হেনগৎহনগদগে হায়বগী থাজবগা লোয়ননা ঙসিদি রাজ্যসিগী অফবা তুংগী মতমগীদমক্তা শঙ্গারিবা অমসুং উরেপ উয়ুং তম্লিবা প্রোজেক্তশিং অসিগীদমক্তা পুম্নমকপু থাগৎচরি। ঐহাক্না ত্রিপুরা মীয়ামদা অমুক্কা হন্না য়াওফ পাউজেল পীজরি। লাক্কদৌরিবা মতমশিংদা ত্রিপুরানা অনৌবা থাক্তা কাগনি হায়বগী থাজবগা লোয়ননা অদোম্বু থাগৎচরি।

ভারত ইমানা য়াইফরে!

ভারত ইমানা য়াইফরে!

*****