ସୂଚନା ଓ ପ୍ରସାରଣ ମନ୍ତ୍ରଣାଳୟ

ଭାରତ ଡ୍ରୋନ୍ ଟେକ୍ନୋଲୋଜିର ଏକ କେନ୍ଦ୍ର ହେବ : କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଶ୍ରୀ ଅନୁରାଗ ସିଂହ ଠାକୁର


ଆସନ୍ତା ବର୍ଷ ସୁଦ୍ଧା ଭାରତକୁ ଅତି କମରେ ଏକ ଲକ୍ଷ ଡ୍ରୋନ୍ ପାଇଲଟ୍ ମାନଙ୍କର ଆବଶ୍ୟକତା ପଡିବ

ଡ୍ରୋନ୍ କ୍ଷେତ୍ରରେ ବର୍ଷକୁ ୬୦୦୦ କୋଟି ଟଙ୍କା ମୂଲ୍ୟର ରୋଜଗାର ସୃଷ୍ଟି ସମ୍ଭାବନା

ଚେନ୍ନାଇ ସ୍ଥିତ ଗରୁଡ ଏରୋସ୍ପେସ, ଅଗ୍ନି କଲେଜ ଅଫ୍ ଟେକ୍ନୋଲୋଜି ଠାରେ ପ୍ରଥମ ଡ୍ରୋନ୍ ସ୍କିଲିଂ ଆଣ୍ଡ ଟ୍ରେନିଂ ସମ୍ମିଳନୀର ଶୁଭାରମ୍ଭ ଏବଂ ଡ୍ରୋନ୍ ଯାତ୍ରାର ଉଦ୍‌ଘାଟନ

ଡ୍ରୋନ୍ କ୍ଷେତ୍ର ୨୦୨୩ ମସିହାରେ କୃଷି କ୍ଷେତ୍ରରେ ୩ ବିଲିୟନ ଡଲାର ଯୋଡିବ, ୧୦ କୋଟି ଚାଷୀ ମାନଙ୍କୁ ଏଥିରୁ ଲାଭ ମିଳିବ

Posted On: 06 DEC 2022 5:15PM by PIB Bhubaneshwar

ଭାରତ ଡ୍ରୋନ୍ ଟେକ୍ନୋଲୋଜିର ଏକ କେନ୍ଦ୍ରରେ ପରିଣତ ହେବ ଏବଂ ଆସନ୍ତା ବର୍ଷ ସୁଦ୍ଧା ଭାରତକୁ ଅତି କମରେ ଏକ ଲକ୍ଷ ଡ୍ରୋନ୍ ପାଇଲଟ୍ ମାନଙ୍କର ଆବଶ୍ୟକତା ପଡିବ ବୋଲି କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଶ୍ରୀ ଅନୁରାଗ ସିଂହ ଠାକୁର କହିଛନ୍ତି । ସେ ଆଜି ଚେନ୍ନାଇ ଠାରେ ‘ଡ୍ରୋନ୍ ଯାତ୍ରା ୨.୦’ କୁ ଉଦ୍‌ଘାଟନ କରିବା ପରେ ଏହି ସମାବେଶକୁ ସମ୍ବୋଧିତ କରିଥିଲେ ।

ଟେକ୍ନୋଲୋଜି ପ୍ରକୃତରେ ଦ୍ରୁତ ଗତିରେ ବିଶ୍ୱକୁ ପରିବର୍ତ୍ତନ କରିବାରେ ଲାଗିଛି ଏବଂ ଏହା ପୂର୍ବ ଅପେକ୍ଷା ବର୍ତ୍ତମାନ ଅଧିକ ପ୍ରାସଙ୍ଗିକ ହୋଇ ପଡିଛି, କାରଣ ଏହାର ପ୍ରୟୋଗ ପୃଥିବୀର ଅନେକ ଜଟିଳ ସମସ୍ୟାର ସମାଧାନ କରୁଛି ବୋଲି ମନ୍ତ୍ରୀ ତାଙ୍କ ବକ୍ତବ୍ୟରେ କହିଛନ୍ତି । ସେ ଗୁରୁତ୍ୱାରୋପ କରି କହିଥିଲେ ଯେ “ପ୍ରଧାନମନ୍ତ୍ରୀ ଶ୍ରୀ ମୋଦୀ ଥରେ ଭାରତ ନିକଟରେ ଏକ ମିଲିୟନ ସମସ୍ୟାର ଏକ ବିଲିୟନ ସମାଧାନ ରହିଛି ବୋଲି କହିଥିଲେ । ’ଏକ ବିଲିୟନ୍‌ରୁ ଅଧିକ ଲୋକ ବସବାସ କରୁଥିବା ଦେଶ ଭାବରେ , ଭାରତ ଆଗରେ ରହିବା ପାଇଁ ବୈଷୟିକ ଜ୍ଞାନ କୌଶଳ ବ୍ୟବହାର କରି ତାର ଲାଭ ଉଠାଉଛି ।”

ଭାରତରେ ଡ୍ରୋନ୍ ଟେକ୍ନୋଲୋଜି କ୍ଷେତ୍ରରେ ହେଉଥିବା ଅଗ୍ରଗତି ବିଷୟରେ ବିସ୍ତୃତ ଭାବରେ ସେ ସୂଚନା ଦେଇ କହିଛନ୍ତି ଯେ , ବିଟିଂ ରିଟ୍ରିଟ୍ ସମୟରେ ଆଇଆଇଟିର ପୂର୍ବତନ ଛାତ୍ର ମାନଙ୍କ ନେତୃତ୍ୱରେ ଭାରତୀୟ ଷ୍ଟାର୍ଟ - ଅପ୍ ‘ବୋଟ୍‌ଲ୍ୟାବ୍ ଡାଇନାମିକ୍ସ’ ଦ୍ୱାରା ୧୦୦୦ ଭାରତରେ ପ୍ରସ୍ତୁତ ଡ୍ରୋନର ଚମତ୍କାର ପ୍ରଦର୍ଶନ ଦ୍ୱାରା ସମଗ୍ର ଦେଶ ଆଶ୍ଚର୍ଯ୍ୟଚକିତ ହୋଇଥିଲା । ସ୍ୱାମିତ୍ୱ ଯୋଜନା (ଗ୍ରାମ ଗୁଡିକର ସର୍ଭେ ଏବଂ ଗ୍ରାମାଂଚଳରେ ଉନ୍ନତତର ଟେକ୍ନୋଲୋଜି ସହିତ ମ୍ୟାପିଂ) ର ଏକ ଅଂଶ ଭାବରେ ଗ୍ରାମ ଗୁଡିକରେ ଡ୍ରୋନ୍ ମାଧ୍ୟମରେ ଜମି ଏବଂ ଘର ଉପରେ ସର୍ଭେ ପ୍ରସ୍ତୁତ କରା ଯାଉଛି ବୋଲି ସେ କହିଛନ୍ତି । ଗ୍ରାମାଂଚଳର ଜମିରେ କୀଟନାଶକ ଏବଂ ନାନୋ ସାର ସିଂଚନ ପାଇଁ ଡ୍ରୋନକୁ ବହୁଳ ଭାବେ ବ୍ୟବହାର କରା ଯାଉଛି ।

ସେ କହିଛନ୍ତି ଯେ, ନିକଟରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ (ଏମ୍‌ଓସିଏ) ଏବଂ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଭାରତର ୨୦୨୧ର କ୍ରିକେଟ୍ ସିଜନ୍‌ରେ ଆକାଶ ମାର୍ଗରୁ ସିଧାପ୍ରସାରଣ ଲାଗି ସିନେମାଟୋଗ୍ରାଫି ନିମନ୍ତେ ଡ୍ରୋନ ନିୟୋଜନ ପାଇଁ କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) କୁ ସର୍ତ୍ତମୂଳକ ରିହାତି ପ୍ରଦାନ କରିଥିଲେ । 

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଉଦ୍‌ଘାଟନ କରିଥିବା "କିଷାନ ଡ୍ରୋନ ଯାତ୍ରା" ର ଏକ ଅଂଶ ଭାବରେ କୀଟନାଶକ ସିଂଚନ କରିବା ପାଇଁ ୧୦୦ଟି କିଷାନ ଡ୍ରୋନ ଦେଶର ବିଭିନ୍ନ ଗ୍ରାମକୁ ପଠା ଯାଇଥିଲା ବୋଲି ସେ କହିଛନ୍ତି । ସେ ପ୍ରଧାନମନ୍ତ୍ରୀ ମୋଦୀଙ୍କ ମନ୍ତବ୍ୟକୁ ଉଦ୍ଧୃତ କରି କହିଛନ୍ତି ଯେ, “ବର୍ତ୍ତମାନ ଏହି ଦିଗରେ କିଷାନ ଡ୍ରୋନ ଏକ ନୂତନ ଯୁଗର ବିପ୍ଳବର ଶୁଭାରମ୍ଭ” ।

 

ଭାରତର ବୃହତ୍ତମ ଡ୍ରୋନ୍ ଉତ୍ପାଦନ ସଂସ୍ଥା ଗରୁଡ ଏରୋସ୍ପେସ୍ ଦ୍ୱାରା କରା ଯାଇଥିବା ମହାନ ପ୍ରୟାସକୁ ସେ ପ୍ରଶଂସା କରିଥିଲେ । ଏହି ସଂସ୍ଥା ପରିଦର୍ଶନ କରିବା ସମୟରେ ମନ୍ତ୍ରୀ ଗରୁଡ କିଷାନ ଡ୍ରୋନର ଉନ୍ନତ ଉପକରଣ ଏବଂ ଉତ୍ପାଦନ ପ୍ରକ୍ରିୟାକୁ ମଧ୍ୟ ଦେଖିଥିଲେ, ଯାହାକୁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଚଳିତ ବର୍ଷ ଆରମ୍ଭରେ ଉଦ୍‌ଘାଟନ କରିଥିଲେ । ଏତେ କମ୍ ସମୟ ମଧ୍ୟରେ ଏହି ସଂସ୍ଥା ପାଇଥିବା ସଫଳତାକୁ ନେଇ ସେ ଖୁସି ବ୍ୟକ୍ତ କରିଥିଲେ । ଏହି ସଂସ୍ଥାରେ ଥିବା ଇଞ୍ଜିନିୟର ମାନେ ଉନ୍ନତ ମାନର ‘ଭାରତରେ ପ୍ରସ୍ତୁତ’ ଡ୍ରୋନର କାର୍ଯ୍ୟ ବିଷୟରେ ମନ୍ତ୍ରୀଙ୍କୁ ବିସ୍ତୃତ ଭାବରେ ବୁଝାଇ ଥିଲେ ।

କୃଷି ଉତ୍ପାଦନ ବୃଦ୍ଧି ପାଇଁ କୃଷି କ୍ଷେତ୍ରରେ ଟେକ୍ନୋଲୋଜିର ବ୍ୟବହାରକୁ ପ୍ରୋତ୍ସାହିତ କରିବାକୁ ସେ ସରକାରଙ୍କ ପ୍ରତିବଦ୍ଧତାକୁ ମଧ୍ୟ ଦୋହରାଇ ଥିଲେ । ସେ କହିଥିଲେ ଯେ, ଏହା ପରିକଳ୍ପନା କରା ଯାଇଛି , ଏହି ଡ୍ରୋନ ଗୁଡିକ ଚାଷ ଜମିରେ କୀଟନାଶକ ବ୍ୟବହାରକୁ ସୁବ୍ୟବସ୍ଥିତ କରିବାରେ ସାହାଯ୍ୟ କରିବ, ଯାହା ଆମ ଚାଷୀ ମାନଙ୍କର ଲାଭକୁ ଆହୁରି ଅଧିକ କରିବ ।

ଚଳିତ ବର୍ଷ ମେ ମାସରେ, ପ୍ରଧାନମନ୍ତ୍ରୀ ଶ୍ରୀ ମୋଦୀ ଭାରତର ସବୁଠୁ ବଡ ଡ୍ରୋନ ମହୋତ୍ସବ - ଭାରତ ଡ୍ରୋନ ମହୋତ୍ସବ ୨୦୨୨ର ଉଦ୍‌ଘାଟନ କରିଥିଲେ, ଯେଉଁଠାରେ ସେ କିଷାନ ଡ୍ରୋନ ପାଇଲଟ୍ ମାନଙ୍କ ସହ କଥାବାର୍ତ୍ତା ମଧ୍ୟ କରିଥିଲେ । ଡ୍ରୋନ୍ ଟେକ୍ନୋଲୋଜିକୁ ପ୍ରୋତ୍ସାହିତ କରିବା ହେଉଛି ଉତ୍ତମ ଶାସନ ଏବଂ ଜୀବନର ସୁଗମତା ପାଇଁ ଆମର ପ୍ରତିବଦ୍ଧତାକୁ ଆଗକୁ ବଢ଼ାଇବା ପାଇଁ ଅନ୍ୟ ଏକ ପ୍ରୟାସ ଅଟେ ।

ପ୍ରତିରକ୍ଷା ଠାରୁ ଆରମ୍ଭ କରି କୃଷି ଏବଂ ସ୍ୱାସ୍ଥ୍ୟ ଏବଂ ମନୋରଞ୍ଜନ ପର୍ଯ୍ୟନ୍ତ ବିଭିନ୍ନ କ୍ଷେତ୍ର ପାଇଁ ଡ୍ରୋନ୍ ଟେକ୍ନୋଲୋଜି ଜରୁରୀ ବୋଲି ସେ କହିଛନ୍ତି । ପ୍ରଡକ୍ସନ୍ ଲିଙ୍କଡ୍ ଇନସେଂଟିଭ୍ (ପିଏଲ୍‌ଆଇ) ଭଳି ଯୋଜନା ଗୁଡିକ ମାଧ୍ୟମରେ ଦେଶରେ ଏକ ଶକ୍ତିଶାଳୀ ଡ୍ରୋନ୍ ଉତ୍ପାଦନ ପାରିବେଶିକ ବ୍ୟବସ୍ଥା ସୃଷ୍ଟି କରିବା ଦିଗରେ ମଧ୍ୟ ଭାରତ ଆଗକୁ ବଢ଼ୁଛି ବୋଲି ସେ ତାଙ୍କ ବକ୍ତବ୍ୟରେ ଉଲ୍ଲେଖ କରିଛନ୍ତି ।

ସେ କହିଛନ୍ତି ଯେ, ମୋଦୀ ସରକାର ତିନିଟି ଗୁରୁତ୍ୱପୂର୍ଣ୍ଣ ଦୃଷ୍ଟିକୋଣ ମାଧ୍ୟମରେ ଅତ୍ୟାଧୁନିକ ଡ୍ରୋନ୍ ଟେକ୍ନୋଲୋଜି ଏବଂ ସେବା ଗୁଡିକର ଚାହିଦା ବୃଦ୍ଧି କରିବାକୁ ଚେଷ୍ଟା କରୁଛନ୍ତି । ପ୍ରଭାବଶାଳୀ ନୀତି ଗୁଡିକ ହେଉଛି ନୂତନ ଡ୍ରୋନ୍ ନିୟମ, ୨୦୨୧ ; ଡ୍ରୋନ୍ ଏବଂ ଡ୍ରୋନ୍ ଉପାଦାନ ଗୁଡ଼ିକ ପାଇଁ ପିଏଲ୍‌ଆଇ ଆକାରରେ ପ୍ରୋତ୍ସାହନ ପ୍ରଦାନ କରିବା; ଏବଂ ସ୍ୱଦେଶୀ ଚାହିଦା ସୃଷ୍ଟି କରିବା ଯେଉଁଥିରେ କେନ୍ଦ୍ର ସରକାରଙ୍କ ୧୨ ଟି ମନ୍ତ୍ରଣାଳୟକୁ ଏହାକୁ ଆଗକୁ ନେବାକୁ ଦାୟିତ୍ୱ ଦିଆ ଯାଇଛି ।

୨୦୨୩ ମସିହାରେ ଭାରତକୁ ଅତି କମ୍‌ରେ ଏକ ଲକ୍ଷ ପାଇଲଟ୍ ମାନଙ୍କର ଆବଶ୍ୟକତା ପଡିବ ବୋଲି ଦର୍ଶାଇ ସେ କହିଛନ୍ତି ଯେ ପ୍ରତ୍ୟେକ ପାଇଲଟ୍ ମାସକୁ ଅତି କମରେ ୫୦ - ୮୦ ହଜାର ଟଙ୍କା ରୋଜଗାର କରିବେ । ଯଦି ଆପଣ ହାରାହାରି ୫୦୦୦୦ x ୧ ଲକ୍ଷ ଯୁବକ x ୧୨ ମାସ = ୬୦୦୦ କୋଟି ଟଙ୍କାର ବର୍ଷକୁ ରୋଜଗାର ଡ୍ରୋନ୍ ସେକ୍ଟରରେ ସୃଷ୍ଟି ହୋଇପାରିବ ବୋଲି ସେ କହିଥିଲେ ।

ଏହା ବ୍ୟତୀତ ଉଦ୍ୟୋଗ ସମୂହ ଏବଂ ସରକାରୀ ଏଜେନ୍ସି ଯେଉଁମାନେ ଡ୍ରୋନ୍ ବ୍ୟବହାର କରନ୍ତି ସେମାନେ ମଧ୍ୟ ଏହା ଦ୍ୱାରା ପ୍ରଭାବିତ ହେବେ । ଆଗାମୀ ଦୁଇ ବର୍ଷ ମଧ୍ୟରେ ଏକ ଲକ୍ଷ ‘ଭାରତରେ ପ୍ରସ୍ତୁତ' ଡ୍ରୋନ୍ ତିଆରି କରିବାକୁ ଗରୁଡ ଏରୋସ୍ପେସ୍‌ର ଯୋଜନାକୁ ସେ ପ୍ରଶଂସା କରିଛନ୍ତି ।

ଗରୁଡ ଡ୍ରୋନ୍ ସ୍କିଲିଂ ଆଣ୍ଡ ଟ୍ରେନିଂ ସମ୍ମିଳନୀ ଯାହା ସାରା ଦେଶର ୭୭୫ ଟି ଜିଲ୍ଲାରେ ଅନୁଷ୍ଠିତ ହେବାକୁ ଯାଉଛି , ୧୦ ଲକ୍ଷ ଯୁବକ ମାନଙ୍କ ନିକଟରେ ପହଂଚିବ ବୋଲି ଆଶା କରା ଯାଉଛି । ଏକ ଲକ୍ଷ ଯୁବକଙ୍କୁ ତାଲିମ ଦେବା ଲକ୍ଷ୍ୟରେ, କେବଳ ଡ୍ରୋନ୍ ପାରିବେଶିକ ବ୍ୟବସ୍ଥା ନୁହେଁ କିମ୍ବା ଯୁବକ ମାନଙ୍କ ପାଇଁ ରୋଜଗାର ସୃଷ୍ଟି କରିବା ପାଇଁ ନୁହେଁ, କୃଷି, ଖଣି, ସରକାରୀ ବିଭାଗ ଏବଂ ଅନ୍ୟାନ୍ୟ ଉଦ୍ୟୋଗ ଗୁଡିକରେ ବ୍ୟାପକ ପ୍ରଭାବ ସୃଷ୍ଟି କରିବ ବୋଲି ଆଶା ରହିଛି ।

ବର୍ତ୍ତମାନ ଦେଶରେ ୨୦୦ ରୁ ଅଧିକ ଡ୍ରୋନ୍ ଷ୍ଟାର୍ଟ - ଅପ୍ କାର୍ଯ୍ୟ କରୁଥିବା ସମ୍ପର୍କରେ ସୂଚନା ଦେଇ ମନ୍ତ୍ରୀ କହିଛନ୍ତି ଯେ , ଯୁବକ ମାନଙ୍କ ପାଇଁ ଲକ୍ଷ ଲକ୍ଷ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବାକୁ ଏହି ସଂଖ୍ୟା ବୃଦ୍ଧି ପାଇବ ।

ପ୍ରଭାବଶାଳୀ ନୀତି, ଉଦ୍ୟୋଗକୁ ପ୍ରୋତ୍ସାହନ ଏବଂ ‘ବ୍ୟବସାୟ କରିବାର ସହଜତା’ ଡ୍ରୋନ୍ କ୍ଷେତ୍ରକୁ ବହୁ ଆବଶ୍ୟକୀୟ ପ୍ରେରଣା ଯୋଗାଉଛି ଯାହା ଭାରତରେ ଏହାର ବିଶାଳ ସମ୍ଭାବନାକୁ ଦର୍ଶାଉଛି ବୋଲି ମନ୍ତ୍ରୀ କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, “ପ୍ରଧାନମନ୍ତ୍ରୀ ଶ୍ରୀ ମୋଦୀଙ୍କ 'ଆତ୍ମନିର୍ଭର ଭାରତ'ର ଦୃଷ୍ଟିକୋଣ ଅନୁସାରେ, ମୁଁ ନିଶ୍ଚିତ ଯେ ବୃଦ୍ଧି ପାଉଥିବା ନବସୃଜନ ଏବଂ ଅତ୍ୟାଧୁନିକ ଡ୍ରୋନ ଟେକ୍ନୋଲୋଜି ପାରିବେଶିକ ବ୍ୟବସ୍ଥା ଅମୃତ କାଳରେ ଏକ ଆତ୍ମନିର୍ଭର ତଥା ନିରନ୍ତର ବିକଶିତ ନୂତନ ଭାରତକୁ ନିଶ୍ଚିତ କରିବ ।”

ପ୍ରଥମ ଡ୍ରୋନ୍ ସ୍କିଲିଂ ଆଣ୍ଡ ଟ୍ରେନିଂ କନଫରେନ୍ସର ଉଦଘାଟନୀ ଉତ୍ସବରେ ମନ୍ତ୍ରୀ ଏକ ଡ୍ରୋନ୍ ଚଳାଇ ଥିଲେ । ଡ୍ରୋନ୍ ପାଇଲଟ୍ ପ୍ରଶିକ୍ଷଶ ସମ୍ପୂର୍ଣ୍ଣ କରିଥିବା ଛାତ୍ରଛାତ୍ରୀ ମାନଙ୍କୁ ମନ୍ତ୍ରୀ ପ୍ରମାଣପତ୍ର ପ୍ରଦାନ କରିଥିଲେ ।

******

SSP

 

 

 

 



(Release ID: 1881303) Visitor Counter : 155