ঙসি গৱাদা পাংথোকখিবা ৫৩শুবা ইন্তরনেসনেল ফিল্ম ফেস্তিবেল ওফ ইন্দিয়া(ইফি) লোইশিনবা থৌরমদা মীয়াম্না চিরনজিবী হায়না খঙনবা তোল্লিৱুদকী মেগা স্তার, পদ্ম ভুষন ফংলবা শ্রী কোনিদেলা সিবা সঙ্কারা ভারা প্রসাদতা ইন্দিয়ান ফিল্ম পর্সোনেলিতি এৱার্দ ২০২২ লান্থোকখ্রে।

ইফি, ভারত সরকার অমসুং প্রধান মন্ত্রী থাগৎপগী মথক্তা, মহাক্কী মমা-মপা অমসুং তেলুগু ফিল্ম ইন্দস্ত্রি থাগৎলদুনা চিরনজিবীনা হায়খি, “ঐহাকপু কোনিদেলা সিবা সঙ্কারা ভারা প্রসাদ ওইনা পোকপীবগীদমক ঐনা মতম পুম্নমক্তা ঐগী ইমা-ইপা থাগৎলি অমসুং ঐ চিরনজিবী ওইনা অমুক হন্না পোকপীবগীদমক তেলুগু ফিল্ম ইন্দস্ত্রি থাগৎলি। ঐগী পুন্সি অসিগীদমক ইন্দস্ত্রি অসিদা ঐনা লমন তোল্লে”।

লেমজনিঙাই ওইরবা মনা অসি লৌরবা মতুংদা, মহাক রাজনিতিদগী হল্লকপদা মহাক্কী ফেনশিংনা মহাক তরাম্না লৌশিনবগীদমক চিরনজিবীনা থম্মোয় শেংনা থাগৎখি। মহাক্না হায়খি ঐঙোন্দা উৎলিবা মীনুংশি অসি মমল য়াম্মি। ইন্দস্ত্রি অসিদা ঐ চহি ৪৫ হেন্না লৈরক্লে, হায়রিবা মতম অসিগী মনুংদা রাজনিতিদা চহি ১০ রোম মাঙখ্রে, তুংদা ঐ ফিল্ম ইন্দস্ত্রিদা হল্লকপনি। কমদৌনা মীয়াম্না ঐ য়াগনি হায়না খনবদা ঐ চিংনবা ফাওখি। অদুবু ঐগী ফেনশিংদা লৈরিবা নুংশিবা অমসুং পামজবা অদু অহোংবা লৈখিদে, মখোয়গী থম্মোয়দা ঐগী মফম লেংদনা লৈরমখি। ঐনা কৈদৌঙৈদা অদোম থাদোক্লোই, ঐনা মীয়ামগা লোয়ন্না লৈগনি হায়না ঐনা ৱাশক্লি।

মমল য়াম্লবা পুন্সিগী এক্সপেরিয়েন্স অমা ফংবা অমসুং মতেং পাংবগীদমক, মনা ফংলবা মতুংদা চিরনজিবীনা সরকার অমসুং ফিল্ম ইন্দস্ত্রি থাগৎখি। মহাক্না হায়খি “ ঐনা ঐগী কোক নোঞ্জরি অমসুং মীওই খুদিংমক অমমমতা ওইনা থাগৎচরি। কনাগুম্বা অমনা ফিল্ম ইন্দস্ত্রিদা চংবা পাম্লবদি, লাকপীয়ু, মসি শেঞ্জা-থুমজা লৈতবা শীনফম অমনি, অদোমদা অরানবা ৱাখল অমতা ফাওরোই, করিগুম্বা অদোমগী হৈশিংবা লৈরবদি, অদোম্না মদু উৎথোকপা য়াগনি অমসুং অদোম মিংচৎ ফংগনি”।

চহি ৪০ হেন্না ফিল্মগী শীনফমদা খোঙদারক্লবা চিরনজিবীনা তেলুগু, হিন্দি ফিল্ম খর, তামিল অমসুং কন্নারা ফিচর ফিল্ম ১৫০ হেনবদা শরুক য়াখ্রে।

*****