জয় হিন্দ‍।

জয় হিন্দ‍।

ভারত ইমানা য়াইফরে‍।

ভারত ইমানা য়াইফরে‍।

অরুনাচল প্রদেশকী রাজ্যপাল শ্রী বি.দি. মিস্রা জী, মফমসিগী মীয়াম্না য়াবা নহা ওইরিবা মুখ্য মন্ত্রী শ্রী পেমা খন্দু জী, কেবিনেৎকী ঐগী মরূপ কিরন রিজিজু জী, উপ মুখ্য মন্ত্রী শ্রীমান চৌনা মীন জী, ইকায়খুম্নরবা এম.পি.শিং, এম.এল.এ.শিং, মেয়র, অতৈ অথোইবা মীওইশিং অমদি অরুনাচল প্রদেশকী ঐগী নুংশিজরবা ইচিল ইনাও অমদি ইচে ইচলশিং !

ঐ অরুনাচলদা কয়ারক হন্না লাকখ্রে‍। হেক লাকপা খুদিং অনৌবা ইনর্জী, অনৌবা মঙলান, অনৌবা থৌনা পুদুনা হল্লি‍। অদুবু ঐনা হায়জনিংবদি ঐ অরুনাচলদা কয়ামুক য়াম্না লাকখ্রবগে হায়ববু মশিং থিবদা চিত্থ নান্থবা য়াওরগনি‍। অদুবু অসুক চাউবা থৌরমদি হন্দক্না অহানবা উবনি মদুসু অয়ুক পুং ৯:৩০দা‍। অরুনাচলদা চীঙশিংদগী মীয়াম লাকপা হায়বসি চাওখৎ থৌরাংগী থবকশিংবু অদোমগী পুন্সিদা কয়ামুক য়াম্না মরু ওইনা লৌবগে হায়বা উৎলি অদুগা মসিগীদমক য়াম্লবা ময়াম্না থৌজাল পীনবিনবগীদমক লেঙবিরক্লি‍।

ইচিল ইনাওশিং,

অরুনাচলগী মীয়ামবু, অরুনাচল মীয়ামগী মীওক মীচান, য়েংলু য়েংলুবা খুদিংদা মখোয়গী মায়থোঙ মোমোন মীনোক্না লৈতেংদুনা লৈ‍। অরুনাচল প্রদেশকী মীয়ামগী মায়থোঙদা নুংশুক নুংজানবা, নীংহন্নবগী মমি তাবা উদে‍। অদুগা লমচৎ শাজৎকী লমদসু, ঐনা মতম পুম্নমক্তা ঙমখৈদা লৈরিবশিং অসিগী লমচৎ শাজৎ অরুনচল প্রদেশকী য়ুমথোঙ খুদিংদা, মীপুম খুদিংমক্কী পুন্সিদা মমি তাবা উই‍।

ঐখোয়গী মুখ্যমন্ত্রী পেমা জীগী মীৎয়েঙ মখাদা দবল ইঞ্জিন লৈঙাক্না হোৎনদুনা চাওখৎ থৌরাং কয়া পায়খৎখিবা অদুনা ঙসি অরুনাচলবু অসিগুম্বা পন্দোল অসিদা পুখৎলক্লিবনি‍। ঐনা পেমা জীবু অমদি মহাক্কী কাঙবু পুম্বগী মফমদা হন্না হন্না নুংঙাইবা ফোঙদোকচরি‍।

অদোম নীংশিংবিরমগনি, অদুগা পেমা জীনসু শন্দোক্না তাকপিখ্রে মদুদি ফেব্রুৱারী ২০১৯দা এয়রপোর্ত অসিগী উরেপ উয়ুং তমখিবনি অমদি মদুগী খুদোংচাবা ঐনা ফংজখি‍। অদোমদি খঙবিরিবদুনি, উরেপ উয়ুংসু ঐখোয়না তম্লগা শঙ্গাবসু ঐখোয়না শঙ্গাবগী থবক খুৎশু অমা ঐখোয়না পুরক্লি‍। পন্থবা, থিন্থবা, ককঙাওনদুনা লৈবগী মতমদু হৌখ্রে‍। অদুবু ঐ ৱাফম অমগা থমজগে, ২০১৯ ফেব্রুৱারীদা ঐনা মসিগী উরেপ উয়ুং তমখিবনি‍। মতমদুদা ২০১৯গী মে থাদা মীখল পাঙথোক্কদবনি‍। মতমদুদা পোলিতিকেল কমেন্তেতর পুম্নমক্না মখোয়গী মীৎয়েঙদা মমাঙগী অনোক উপ্তুনা লৈরম্মী, মখোয়না লাউ খোংবা হৌরকখি, ইবা হৌরকখি, ৱাফম কয়া ফোঙদোকপা হৌরকখি, এয়রপোর্ত করিসু শাবা ওইথোক্লোই, মসিদি মীখল লৈবগী মোদীনা মফমসিদা উরেপ উয়ুং তম্বনি হায়খি‍। হীরম খুদিংদা মখোয়দা মীখলখক্তমক উদুনা লৈ‍। হীরম খুদিংদা, অফবা থবক খুদিংদা মখোয়না মীখলগী মচু শঙজিনবগী চৎনবী অমা লৈখি‍।

মখোয় পুম্নমক্কী মফমদা ঙসি এয়রপোর্ত শঙ্গারিবা অসি মতিক চাবা পাউখুম্নি, মখোয়গী মমায়দা খুপাক্না থাবগুম্বনি‍। অদুগা পোলিতিকেল কমেন্তেতরশিং অসিদা ঐনা থমজনিংবদি, অরিবা অনোক লৌথোকপিরোল লৈবাক অসি অনৌবা মঙলান, অনৌবা থৌনাগা লোয়ননা চঙশিল্লক্লিবনি, রাজনিতীগী খলদা থাঙ্গত্তুনা ওনবা তোকপিরো‍। মসিবু মীখলগীদমক লাউথোকপনি হায়খিবা কমেন্তেতরশিং ঙসি চহি অহুমগী মনুংদা মতমগা চুনরবা ঐখোয়গী এয়রপোর্ত অসি মমিৎমক্না উবা ফংলবনি‍। ময়াম মরকসিদা, মীওই লাখ কয়াগী মমাঙদা, অরুনাচল পুম্বা ঙসি ওন্লাইন্দগী য়াওররিবা অসি ঐগীদমক্তদি লাইবক ফবনি‍। মসিমকসু য়াম্না চাউথোকচনিংঙাইগী ৱাফম অমনি‍।

ঙসি মফমসিদা মীখলসু লৈতে, মীখল অমত্তসু লাক্কদবা লৈতে‍। মদু ওইদুনসু থবক অসি পায়খৎলি, মরমদি ঙসি লৈবাকসিদা লৈরিবা লৈঙাক অসিনা মরুওইবা মীৎয়েঙ থম্লিবা অসি লৈবাকসিনা চাওখৎপনি, লৈবাক মীয়াম চাওখৎহনবদুনি‍। চহিদা নুমিৎ ৩৬৫, পুং কুনমরি, ঐখোয়না লৈবাক্কী চাওখৎনবগীদমক থবক তৌরি‍। অদোমসু য়েংবিয়ু, হৌজিক ঐনা নুমিৎ থোরকপা মফম ওইরিবা অরুনাচলদা লৈরি অমদি নুমিদাংৱাইরমদা নুমিৎ তারিবা দামন্দা চৎকনি অদুগা মরক্তা কাসীদসু চৎকনি‍। হোৎনরিবা পুম্নমকসি মঙলান অমখক্না লমজিংলগা চৎলিবনি, পুক্নিং লুপ্লিবনি – ঐগী লৈবাক্না মাঙদা চঙশিন্নবা‍। ঐখোয়না মীখলগী অমাঙ অতোং য়েংলগা থবক তৌদে, মীখলগী কান্ননবগীদমক অপীক অপীকপা পান্দম থম্লগা থবক তৌবা মীওইশিংসু নত্তে‍। ঐখোয়গী মঙলান্দি ইমা ভারতনি, হিন্দুস্তান্নি, মীওই করোর ১৩০ অসিনি‍।

ঙসি এয়রপোর্ত অসিগা লোয়ননা মেগাৱাত ৬০০কী কামেং হায়দ্রো প্রোজেক্তসু মীয়ামদা কত্থোক্লি‍। মসিসু অচৌবা পন্দোল অমনি‍। চাওখৎ থৌরাংগী অমদি চাওখৎপগী অনৌবা ইনোৎকী অপুনবা শক্তম্না অরুনাচলবু অনৌবা খোঙজেলগা লোয়ননা অনৌবা পন্দোল তম্না পুদুনা চৎলি‍। অসিগুম্লবা পন্দোল অসিগীদমক ঐনা অরুনাচলগী ঐগী নুংশিরবা ইচি ইনাও, ইচে ইচলশিং, অৱাং নোংপোক স্তেত পুম্নমক্কী ইচিল ইনাও, ইচে ইচলশিংগী মফমদা নুংঙাইবা ফোঙদোকচরি, য়াইফ-পাউজেল পীজরি‍।

নীংতম্লবা মতুংদা অৱাং নোংপোক লমদম তোপ তোপ্পা খোঙজেল অমদা চৎখি‍। চহি কয়া লমদম অসি মীৎয়েঙ চঙবিদবা, মীরায়বিবগী অৱাবা তাদুনা লৈরবনি‍। মতমদুদা দিল্লীদা ফমদুনা খুজিল থৌরাং য়াৎলিবশিংগী মফমদদি মফমসিদা মীখল মায় পাকপখক্তনি মখোয়না মীৎয়েঙ চঙলিবা‍। ফীভম অসি চহি কয়া লৈদুনা লাকখিবা অদোম খঙলিবনি‍। অতল জীগী লৈঙাক লাক্লবা মতুং অহানবা ওইনা ফীভম অসিবু হোংদোক্নবা হোৎনখিবনি‍। অৱাং নোংপোক চাওখৎনবগীদমক তোঙানবা মন্ত্রালয় শেমখিবা অহানবা লৈঙাক ওইখিবনি‍।

অদুবু মদুগী মতুংদা লাকখিবা লৈঙাক্না খোঙজেল অদুবু মাঙদা পুখৎলমখিদে‍। তুংদা অওনবগী খোঙজেল অমা ২০১৪গী মতুংদা, অদোম্না ঐবু ময়ামগী থৌগল তৌনবা তাঞ্জা পীরক্লবা মতুংদা হৌরকখি‍। মমাঙগী লৈঙাকশিংনা অরুনাচল প্রদেশতি য়াম্না লাপ্না লৈবনি, অৱাং নোংপোক য়াম্না লাপ্না লৈবনি খল্লম্মী‍। অরাপ্পা ঙমখৈদা লৈবা মীওইশিংবু মমাঙদা চিদাইগী খুল ওইনা লৌবিরম্মী‍। অদুবু ঐখোয়গী লৈঙাকনা চিদাইগী খুল, চিদাইগী তোর্বান ওইনা লৌবগী মহুৎ, লৈবাক্কী অহানবা খুল ওইনা লৌদুনা থবক পায়খৎখি‍। মদুগী মহৈনা অৱাং নোংপোক চাওখৎহনবদা লৈবাক্কী মরুওইবা মীৎয়েঙ থমখি‍।

হৌজিক্তি কলচর নৎত্রগা এগ্রিকলচর ওইরবসু, কম্মর্স নৎত্রগা কন্নেক্তিভিতী ওইরবসু অৱাং-নোংপোক লমদম মমৈদা নত্তবা মমাঙ থাবা মীৎয়েঙ ফংলে‍। ত্রেদ নৎত্রগা তুরিজমগী ওইরবসু, তেলিকোমগী নৎত্রগা তেক্সতাইল্সকী ওইরবসু অৱাং নোংপোক্না অহানবা মীৎয়েঙ ফংলি‍। দ্রোন তেক্নোলোজীদগী হৌরগা কৃসি উরান ফাওবদা, এয়রপোর্ত্তগী হৌরগা হিথাংফমগা লৈবা কন্নেক্তিভিতী ফাওবদা অৱাং নোংপোক্তা অহানবা মীৎয়েঙ থম্লি‍। ভারতকী খ্বাইদগী শাংবা থোং নৎত্রগা খ্বাইদগী শাংবা রেলরোদ থোং ওইরবসু, রেল লম্বী তিংবা নৎত্রগা রেকোর্দ ওইবা খোঙজেলদা হায়ৱে শেমগৎপা ওইরবসু অৱাং নোংপোক লমদম্না মাঙজিল থারি‍। মসিগী মহৈনা ঙসি অৱাং নোংপোক্তা মতিং অমদি খুদোংচাবগী অনৌবা খোঙজেল অমা হৌরক্লি, অনৌবা পন্দুপ অমা হৌরক্লি‍।

ঙসিগী শঙ্গাবগী থৌরম অসি অনৌবা ভারতকী খোঙজঙ অসিগী ময়েক লারবা খুদম্নি‍। দোনী পোলো এয়রপোর্ত, অরুনাচলগী মরিশুবা মথৌ তৌরিবা এয়রপোর্ত ওইরে‍। নীংতম্লবা মতুংদা চহি ৭০ চুপ্না অৱাং নোংপোক্তা শুপ্নতগী এয়রপোর্ত ৯ লৈরম্মী‍। অদুগা ঐখোয়গী লৈঙাক্না শুপ্নতগী চহি নিপান্দা অনৌবা এয়রপোর্ত তরেৎ শাগৎখি‍। মফমসিদা নীংতমবগী চহি ৭৫ শুরবা মতুংদা নোংথক্কী কন্নেক্তিভিতী নৌনা ফংলবা মফম কয়া লৈরি‍। মরম অসিনা অৱাং নোংপোক্তা পাইরকপা প্লেনগী মশিংসু শরুক অনি হেন্না হেনগৎলে‍।

মরূপশিং,

ইতানগরগী দোনী-পোলো এয়রপোর্ত অসি, অরুনাচল প্রদেশকী মাঙলমচৎ অমদি নাৎকী খুদম অমসু ওইরে‍। ঐঙোন্দা পাউদম্লকপদা, পেমা জীনা হায়রকপদা দোনী হায়বদি নুমিৎ অদুগা পোলো হায়বসিনা থা হায়বনি হায়রি‍। অসুম্না অরুনাচল প্রদেশকী দোনী-পোলোগী নাৎ অসিনা ঐঙোন্দা চাওখৎপগী পারা অমসু তম্বিরি‍। মঙাল হায়বসি অমত্তনি, অদুবু নুমিৎকী মঙাল অমসুং থাগী মেঙলবা মঙাল অনিমক্কী মশা মশাগী ওইবা মরুওইবা, মচৎ লৈজরি‍। মতৌ অসুম্না ঐখোয়না চাওখৎপগী ৱাফম খন্নবদা, অচৌ-অচৌবা প্রোজেক্ত ওইরবসু নৎত্রগা লায়রবশিংদা য়ৌহন্নবা মীয়ামগী য়াইফ-থৌরাংশিং ওইরবসু, অনিমক চাওখৎপা পুরক্নবগীদমক মরুওই‍।

ঙসি এয়রপোর্তনচিংবা অচৌবা ইনফ্রাস্ত্রকচরগী মরুওইবা য়াম্না লৈবগুম, লায়রবশিংগী থৌগল, মখোয়গী মঙলান মঙফাওনহন্নবগী থৌরাংগী মরুওইবসু লৈ‍। ঙসি করিগুম্বা এয়রপোর্ত শারবসু মদুগী কান্নবা মীয়ামদা কমদৌনা ফংহনগনি হায়বসিদা উরান য়োজনানা থবক পায়খৎলি‍। ফ্লাইত সর্ভিস হৌরবা মতুংদা, লম কোয়বা মীশিং কমদৌনা হেনগৎহনগনি, মদুগী কান্নবা অপীকপা করবারৱালাশিংদা ফংহনগনি, দুকান ফম্লিবশিংদা ফংহনগনি, তেক্সী দ্রাইভরশিংদা ফংহনগনি হায়বসিদা ঐখোয়না থবক পায়খৎলি‍।

মরূপশিং,

অরুনাচল প্রদেশতা ঙসি য়ৌশিনবা ঙমদবা মফমশিং, ঙমখৈগী মফমশিংদা লম্বী অমদি হায়ৱেশিং শেমগৎলি‍। কেন্দ্র লৈঙাক্না লম্বী শেমগৎনবগীদমক চাউরাক্না লুপা করোর লিশিং ৫০ অমগসু থাদগদৌরি‍। অসুম্না য়াম্লবা ইনফ্রাস্ত্রকচর লৈরবা মতমদা, লম কোয়বা মীশিংসু হেনগৎলক্কনি‍। অরুনাচলগী কাচিন কোয়া শিনবা থুংনা মহৌশাগী ফজখ্রবা মফমশিংনা লৈতেংলি‍। খুঙ্গং খুদিংদা অকোয়বগী ফীভম ঙাক শেনবগী ৱাখল্লোন লৈ‍। হোম স্তে অমদি লমদমসিগী ইন্দস্ত্রীশিংগী খুত্থাঙদা য়ুমথোঙ খুদিংগী শেন্থোক হেনগৎহনবা য়াই‍। মদুগীদমক খুঙ্গং খুদিংদা চৎপা য়াননবা ফীভম শেমগৎপা মথৌ তাই‍। মসিগীদমক, ঙসি অরুনাচলগী খুঙ্গং চাদা ৮৫ হেনবদা প্রধান মন্ত্রী গ্রাম সরক শেমগৎলি‍।

মরূপশিং,

এয়রপোর্ত অমদি হেন্না ফবা ইনফ্রাস্ত্রকচর শেমগৎলবা মতুংদা অরুনাচলদা কার্গোগী খুদোংচাবা হেনগৎলক্লি‍। মসিনা মফমসিগী লৌমীশিংনা মখোয়গী পোক্নফম অরুনাচলগী ৱাংমদা লৈবা কৈথেলশিংদা লায়না মখোয়গী পোত্থোক য়োনবা ফংলগনি, মখোয়দা ঙসিগা চাংদম্নবদা শেন্দোং হেন্না ফংহল্লগনি‍। অরুনাচলগী লৌমীশিংনা পি.এম. কিসান সম্মান নিধিগী কান্নবসু ফংলি‍।

মরূপশিং,

অৱাং নোংপোক্কীদমক ঐখোয়গী লৈঙাক্না কমদৌনা থবক পায়খৎলিবগে হায়বগী খুদম অমা হায়রগদি বান্সকী লৌফমশিং অসিসুনি‍। ৱা মফমসিগী পুন্সি মহিংগী মরুওইবা শরুক অমা ওইরিবনি‍। ঙসি ৱাগী পোত্থোক লৈবাক পুম্বদা মীয়াম্না পাম্নরি‍। অদুবু অঙ্গ্রেজকী মতমদগী হৌনা ৱা য়ানবদা অথিংবা থম্লমদুনা ঐখোয়গী ত্রাইবেল ইচিল ইনাওশিংবু, ঐখোয়গী অৱাং নোংপোক লমদমগী মীয়ামগী পুন্সিদা অপনবা ওইহল্লম্মী‍। মরম অসিনা ঐখোয়না আইন অদুদা অহোংবা পুরকখি, অমদি হৌজিক্তি অদোম্না ৱা থাবা য়ারে, ৱা য়ানবা য়ারে, ৱা য়োনবা য়ারে, ৱাদা ভেল্যু এদিসন তৌদুনা ওপন কৈথেলদা পুদুনা অদোম্না লল্লোন ইতিক তৌবা য়ারে‍। মহৈ মরোং লোকপগুম, ৱাসু থাদুনা লোকপা য়ারে‍।

ইচিল ইনাওশিং,

লায়রবশিংনা পুন্সিগী পোৎলুমদগী ৱাংমা লাল্লকপা মতমদা মখোয়না মখোয়গা লোয়ননা লৈবাক্কী চাওখৎপগী অনৌবা মরু হুনবা হৌরকই‍। মরম অসিনা, ঙসি লায়রবা মীওইশিং নীংবা কায়বা অমদি পাঙ্গল শোন্থবগী ফীভমদগী মপান থোরকহনবা, মখোয়বু চাউথোকচনা হিংহনবা হায়বসিদা লৈবাক্কী মরুওইবা মীৎয়েঙ থম্লি‍। মমাঙদদি চীংদা মহৈ মশিং অমদি অনা লায়েংগী মরমদা খুদোংচাদবা ফীভম মায়োক্নদুনা লৈরম্মী‍। অদুবু হৌজিক্তি অফবা হকশেলগী থৌরাংগা লোয়ননা অয়ুস্মান ভারত য়োজনাগী খুত্থাঙদা লুপা লাখ ৫ ফাওবগী লেম্না লায়েংবগী খুদোংচাবসু ফংহল্লে‍। লায়রবশিংদা প্রধান মন্ত্রী অৱাস য়োজনাগী মখাদা পক্কাগী য়ুম ফংহল্লি‍। মরুওইনা ত্রাইবেলগী মফমশিংদা, ত্রাইবেলগী অঙাংশিং মহৈ মশিং তম্বদা শোত্থহৌদনবগীদমক কেন্দ্র লৈঙাক্না লুপা করোর ৫০০ থাদদুনা একলব্য মোদেল স্কুল হাংদোক্লি‍।

মরম অমা নৎত্রগা অমদগী হিংসাগী লম্বীদা চৎলুরবা নহাশিংবু তোঙানবা কাঙলোন অমগী মখাদা মীয়াম মরক্তা অমুক হঞ্জিলহন্নবগী থৌরাং পায়খৎলি‍। মদুগীদমক তোঙানবা ফন্দ শেম্লি‍। স্তার্তঅপ ইন্দিয়াগী থৌনাগা মরী শম্নহন্নগীদমক অরুনাচল স্তার্তঅপ পোলিসীগী খুত্থাঙদা অরুনাচল প্রদেশতসু পুন্না থবক পায়খৎমিন্নরি‍। মসিনা তাকপদি, চাওখৎপগী শিবা নাইদ্রবা ঈচেল অসি, মথক্তগী হৌরগা, ঙসি খুঙ্গংদা, লায়রবশিংদা, নহাশিংদা, নুপীশিংদা য়ৌহন্দুনা পাঙ্গল হাপ্লরি‍।

মরূপশিং,

লৈবাকসিনা ২০১৪গী মতুংদা খুঙ্গংশিংদা মৈ ফংহন্নবগীদমক থৌরাং পায়খৎপা হৌখি‍। থৌরাং অসিগী অচৌবা কান্নবা অরুনাচল প্রদেশকী খুঙ্গংশিংসু ফংখি‍। মফমসিগী য়াম্লবা খুঙ্গংশিংদা, নীংতম্লবা মতুংদা অহানবা ওইনা মৈ ফংহনখি‍। মতুংদা কেন্দ্র লৈঙাক্না সৌভাগ্য স্কীম শেমদুনা য়ুমথোঙ খুদিংদা মৈ কন্নেক্সন পীননবা থৌরাং পায়খৎখি‍। অরুনাচলদসু য়ুম লিশিং কয়াদা লেম্না মৈগী কন্নেক্সন পীখি‍। অদুগা হৌজিক মফমসদিগী য়ুমশিংদা মৈ য়ৌরক্লবা মতমসিদা য়ুমশিং অসিদা মৈঙাল ফংবদা নত্তনা মফমসিগী মীয়ামগী পুন্সিবুসু ঙান্থোকহল্লে‍।

ইচিল ইনাওশিং,

অরুনাচল প্রদেশতা চাওখৎপগী খোঙজেল অমা লাক্লিবসিনা খুঙ্গং খুদিংদা, য়ুমথোঙ খুদিংদা য়ৌহন্নবগী মিসন পায়খত্তুনা থবক তৌরি‍। ঙমখৈগা তাইনবা খুঙ্গংশিংদা মচু মমেন্না থল্লবা ঙমখৈগী খুলগী থাক্তা থাঙ্গত্তুনা মখোয়বু মপাঙ্গল কনখৎহন্নবা ঐখোয়না হোৎনরি‍। ঙমখৈগা তাইনবা খুঙ্গং খুদিংদা ওইথোকপা য়াবা কয়াগী থোঙ হাংদোরক্লবা মতমদা, মফমদুদা নুংঙাই য়াইফবসু হৌরক্কদৌরিবনি‍।

ভাইব্রেন্ত বোর্দর ভিলেজ প্রোগ্রামগী মখাদা ঙমখৈগী খুলশিংদগী য়ুম হোংলকপা লেপহন্নবা অমদি মফমদুদা অওনবা পুরক্নবগী থৌরাং খোঙজেল য়াঙনা পায়খৎলি‍। লৈঙাক্কী খুত্থাঙদা ঙমখৈগী লমদমগী নহাশিংবু এন.সি.সি.দা য়াওহন্নবগীদমক অখন্নবা থৌরাং অমা পায়খৎলি‍। ঙমখৈদা তারিবা খুলশিং, মফমদুগী নহাশিংবু এন.সি.সি.দা মশিং য়াম্না শরুক য়াহন্নবগী থৌরাংনি‍। এন.সি.সি.দা য়াওরবা খুলশিং অসিগী নহাশিংনা লান্মীগী ওফিসরশিংদগী ত্রেনিং ফংগনি‍। মসিনা নহাশিংগী অরংবা মরাইবক অমগী লম্বী শেম্বিগনি, লোয়ননা মখোয়দা লৈবাক্কী থৌগলগী ইহুলসু হেন্না পোকহনগনি‍।

মরূপশিং,

সবকা সাথ-সবকা বিকাস হায়রিবা লাইৱা অসিদা চত্তুনা দবল ইঞ্জিন লৈঙাক্না অরুনাচল চাওখৎহন্নবগীদমক, মীয়ামগী পুন্সি হিংবদা কোমহন্নবগীদমক থবক পায়খৎলি‍। চাওখৎপগী মঙাল মশেক অসি মতৌ অসুম্না মঙাল য়েন্দুনা লৈবা ওইসনু হায়না ঐনা থৌনিজরি‍।

ঐনা অমুক্কা হন্না পেমা জী অমদি মহাক্কী লৈঙাকপু ভারত লৈঙাক্কী স্কীমশিংবু মাঙদা পুখৎপদা মতেং পাংলিবসিগীদমক নুংঙাইবা ফোঙদোকচরি‍। অদুগা ঐখোয়গী অৱাং নোংপোক লমদমগী মরূপশিং, ঐখোয়গী ইমা, ইচে-ইচলশিংগী মফমদসু নুংঙাইবা ফোঙদোকচরি‍।

ময়ামগী মফমদা য়াইফ-পাউজেল পীজরি, হন্না হন্না থাগৎচরি‍!

************