প্রধানমন্ত্রীগী লোইশঙ
প্রধান মন্ত্রীনা বিশাখপতনমদা তোঙান-তোঙনবা প্রোজেক্তশিংগী উরেপ-উয়ুং তম্বদা থমখিবা ৱরোল
Posted On:
12 NOV 2022 1:40PM by PIB Imphal
প্রিয়মইনা সোদরী, সোদরু-লারা নমস্কারম!
আন্ধ্র প্রদেশকী রাজ্যপাল শ্রী বিশ্ব ভুশনজী, মুখ্য মন্ত্রী ভাই জগন মোহন রেদ্দীজী, মন্ত্রী মন্দলদা ঐহাক্কী মরুপ ওইরিবা অশ্বিনী বৈস্নবজী, মফম অসিদা লেংশিনবীরিবা অতোপ্পা দিগনিতরীশিং অমসুং আন্ধ্র প্রদেশকী ইচিল-ইনাওশিং।
থা খরগী মমাংদা ঐহাক্না বিপ্লব ভীরুদু অল্লুরী সিতারামরাজুগী ১২৫শুবা মপোক কুমওনগী থৌরমদা আন্ধ্র প্রদেশধা লাকপগী খুদোংচাবা ফংখি। ঙসি অমুক হন্না আন্ধ্র প্রদেশ অমসুং বিশাখপতনমগী মরু ওইবা নুমিৎ ওইরিবা থৌরম অসিদা লাকপা ফংজরি। বিশাখপতনম অসি ভারতকী অখন্নবা পতনম অমনি, সহর অসি য়াম্না অখন্নৈ। মফম অসিদা মমল য়াম্লবা ললোন-ইতিক্কী চৎনবী অমা লৈজৈ। বিশাখপতনমনা অরিবা ভারতকী মরু ওইবা হীথাংফম অমা ওইদুনা চহি লিশিং কয়াগী মমাংদা নোংচুপ এসিয়া অমসুং রোমগী ললোন ইতিক তৌনবা লম্বীগী শরুক ওইখি অমসুং মসি ঙসিসু ভারতকী সেন্ত্রেল পোইন্ত ওইনা অদুমক লৈরি।
ঙসি কত্থোকখিবা অমসুং উরেপ-উয়ুং তমখিবা লুপা করোর ১০,৫০০ হেনবা প্রোজেক্তশিংনা আন্ধ্র প্রদেশ অমসুং বিশাখপতনমগী আশা অমসুং অনীংবশিং থুংহন্নবগী পাম্বৈ অমা ওইরগনি। ইনফ্রাস্ত্রকচরদগী হৌরগা ইজ ওফ লিবিং অমসুং আত্মনির্ভর ভারত ফাওবদা স্কিমশিং অসিনা অনৌবা দাইমেন্সনশিং হাংদোক্লগনি অমসুং চাউখৎপগী অনৌবা পনখৈশিং তম্না পুখৎলগনি। মসিগীদমক আন্ধ্র প্রদেশকী মীয়ামদা ঐহাক্না নুংঙাইবা ফোঙদোকচরি। ঐহাক্না ভারতকী হান্নগী উপ রাস্ত্রপতি, শ্রী এম. বেঙ্কৈয়া নাইদু গারু অমসুং শ্রী হরি বাবুবু অখন্ননা থাগৎপগী খুদোংচাবা লৌজনীই। মখোয়গী উনবা খুদিং ঐখোয়না আন্ধ্রগী চাউখৎ থৌরাংগী মতাংদা ৱারী শান্নৈ। আন্ধ্র প্রদেশকীদমক মহাক্না ফাওরিবা নুংশিবা অমসুং কত্থোকপা অসি লম্বা লৈতে।
মরুপশিং,
আন্ধ্র প্রদেশকী মীয়ামগী য়াম্না অখন্নবা ৱাফম অমা লৈ মদুদি মখোয় অসি মীনুংশি ফাওবা অমসুং এন্তরপ্রাইজিং ওইবগী মওং-মতৌ চেল্লি। ঙসি মালেমগী কাচিন কোয়া খুদিংমক্তা আন্ধ্র প্রদেশকী মীয়াম্না লম খুদিংমক্তা মখোয়গী তেলেন্ত উৎথোক্লি। এজুকেসন নত্ত্রগা ওন্তপ্রিনোর্শিপ, তেক্নিলোজী নত্ত্রগা মেদিকেল প্রোফেসন ওইরবসু আন্ধ্র প্রদেশকী মিয়াম্না লম খুদিংমক্তা মশক থোকপা ঙমখি। মসিগী শকখঙবা অসি প্রোফেস্নেল ক্বালিতীশিংগী ফল খক্তা নত্তনা আন্ধ্র প্রদেশকী মীয়ামগী হরাউ-তয়াম্বা মতৌ অসিগী ফলনা ঙমহনবনি। আন্ধ্র প্রদেশকী মীয়ামগী হরাউ-তয়াম্বা মতৌ অসিনা মীপুম খুদিংমক্না মখোয়বু নুংশিহল্লি। তেলুগু ঙাংবা মীওইশিংনা মতম চুপ্পদা হেন্না ফনবাম অমসুং মতম চুপওদা হেন্না অফবা ফংনবা হোৎনৈ। ঙসি কত্থোকখিবা অমসুং উরেপ-উয়ুং তমখিবা প্রোজেক্তশিং অসিদা অপেনবা পোকচৈ অমসুং মসিনা রাজ্য অসিগী চাউখৎ খোঙচৎ খোঙজেল য়াংশিনবা ঙমহল্লগনি।
মরুপশিং,
অমৃত কালদা লৈবাক অসিনা চাউখৎপা ভারতকী পান্দমগা লোয়ননা চাউখৎ খোঙচৎতা খোঙজেল য়াংনা মাংদা চংশিল্লি। চাউখৎ খোঙচৎ অসি মলতিদাইমেনস্নেল ওই। মীচম প্রজাশিংগী মথৌ তাবা অমসুং তঙাই ফদবশিংদা মীৎয়েং চংলি। খ্বাইদগী ফবা মতমগা চুনবা ইনফ্রাস্ত্রকচর শেমগৎপা য়াওরি। ঙসিগী থৌরম অসিদসু ইনফ্রাস্ত্রকচরগী ঐখোয়গী বিজন অসি ময়েক শেংনা উবা ফংলি। ঐখোয়গী বিজন অসি ইনক্লুসিব দিবেলপমেন্তনি। ইনফ্রাস্ত্রকচরগী মতাংদা ঐখোয়না রেলৱেজ নত্ত্রগা রোদ ত্রান্সপোর্ত করম্বা শেমগৎকনি হায়বগী ৱাহংশিংদা মতম মাংহনখিদে। ঐখোয়না হীথাংফম নত্ত্রগা হায়ৱেদা মীৎয়েং চংগদ্রা হায়বগী মতাংদা চম্মনবা পোকখিদে। মমাংগী সরকারশিংনা ইনফ্রাস্ত্রকচর শেমগৎপদা আইসোলেতেদ এপ্রোচ শীজিন্নবনা মরম ওইদুনা লৈবাক অসিদা চাউনা অমাংবা থোকহনখি। মসিনা সপ্লাই চেন্দদা চৈথেং পীখি অমসুং লোজিস্তিক্সকী চাদিং ৱাংহনখি।
মরুপশিং,
সপ্লাই চেন অমসুং লোজিস্তিক্স অসি মলতি-মোদেল কন্নেক্তিবিতীগী মখা পোল্লি। মরম অসিনা ঐখোয়না ইনফ্রাস্ত্রকচরগী ইন্তিগ্রেতেদ ওইবা ৱাখল্লোন্দা মীৎয়েং চংখি। ঐখোয়না চাউখৎ থৌরাংগী ইন্তিগ্রেতেদ ওইবা ৱাখল্লোন মরু ওইনা লৌখি। ঙসি উরেপ উয়ুং তমখিবা ইকনোমিক কোরিদোরদা লেন-৬কী লম্বীগী প্রোবিজন য়াওরি। হীথাংফমশিং য়ৌনবা তোখাইবা লম্বী অমা শেমগনি। নাকল অমরোমদা বিশাখপতনম রেলৱে স্তেসন ফজথোকহনবা অমসুং স্তেৎ-ওফ-দি-আর্ত ফিশি হরবর শাবগী থবক পাইখৎলি।
মরুপশিং,
ইনফ্রাস্ত্রকচরগী ইন্তিগ্রেতেদ ওইবা ৱাখল্লোনগী অসি পি.এম. গতি শক্তি নেস্নেল মাস্তর প্লান্না ওইথোকপা ঙমহনখিবনি। গতি শক্তি প্লান্না ইনফ্রাস্ত্রকচর কনস্ত্রক্সন খোঙজেল য়াংখৎহনবা খক্তা নত্তনা প্রোজেক্ততা চংবা শেনফমশিং হন্থহনখি। মলতি-মোদেল ত্রান্সপোর্ত সিস্তেম অসি সহর খুদিংমক্কী তুংলমচৎনি অমসুং বিশাখপতনম্না মাইকৈ অসিদা খোঙথাং অমা লৌখৎলি। প্রোজেক্তশিং অসি আন্ধ্রগী মীয়াম্না মতম শাংনা ঙাইদুনা লাকখি হায়বা ঐহাক্না খঙই। অমসুং ঙসিদি মসি থুংহনবা ঙম্লে। আন্ধ্র প্রদেশ অমসুং মাগী সমুদ্র মপালগী মফমশিং অসিনা অনৌবা শাহৌ অমসুং শক্তিগা লোয়ননা চাউখৎ থৌরাংগী লমজেলদা মাংদা চংশিনবা ঙম্লগনি।
মরুপশিং,
ঙসি মালেম পুম্বনা অনৌবা অৱাবগী চহিচা অমদা চংশিল্লি। লৈবাক খরদা তঙাই ফদবা পোৎলমশিংগী অৱাৎপা লৈরি অমরোমদা লৈবাক খরদা ইনর্জী ক্রাইসিস থোক্লি। অয়াম্বা লৈবাক খুদিংমক্না ইকনোমী হন্থরকপগী ৱান্নরি। অদুবু পুম্নমক অসিগী চৈরক্তা ভারতনা লম কয়াদা অনৌবা পনখৈশিং য়ৌবা ঙম্লি। ভারতনা চাউখৎপগী অনৌবা য়ুগ অমা পুরক্লি। অমসুং মসি নখোয়না পুক্নিংদা ফাওবা খক্তা নত্তনা মালেম্না মসিদা মীৎয়েং হোংদনা য়েংনরি।
এক্সপর্তশিং অমসুং ইন্তেলেকচুএলশিংনা ভারতপু থাগৎনরিবা অসি নখোয়না উরম্লগনি। ঙসি ভারতনা মালেম পুম্বগী আশাগী হৌরকফম ওইরি। মসি ওইথোকপা ঙম্বগী মরম অমা খক্তা লৈ মদুদি ভারতনা মাগী প্রজাশিংগী অনীংবা অমসুং মথৌ তাবশিং খঙনা থবক তৌরি। থৌশিল-থৌরাং অমসুং ৱারেপ খুদিংমক্না মীচম প্রজাগী পুন্সি ফগৎহল্লি। পি.এল.আই. স্কিম, জি.এস.তি., আই.বি.সি. অমসুং নেস্নেল ইনফ্রাস্ত্রকচর পাইপলাইন অসিগুম্বা থৌশিল-থৌরাংশিংনা ভারত্তা ইনভেস্তমেন্ত হেনগৎনবগী মরম ওইখি। নাকল অমরোমদা লায়রবশিংগী য়াইফ থৌরাংগী স্কিমশিং পাকথোক চাউথোকহল্লি।
ঙসি চাউখৎ থৌরাংগী খোঙচৎতা মমাংদা মর্জিনেলাইজ তৌখিবা লমশিং অদু হাপচিনখ্রে। খ্বাইদগী শোত্থরবা জিলাশিংদা ফাওবা চাউখৎ-থৌরাংগী স্কিমশিং অসি এস্পিরেস্নেল দিস্ত্রিক্ত প্রোগ্রামগী মখাদা চৎনহল্লি। হৌখিবা চহি অনি মখাই অসিদা লৈবাক্কী লায়রবা মীওই করোর কয়াদা লেম্না চেং-হৱাই পীরি। হৌখিবা চহি অহুম মখাই অসিদা পি.এম. কিসান য়োজনাগী মখাদা লৌমীশিংগী একাউন্তশিংদা চহি খুদিংগী হকথেংননা লুপা লিশিং ৬ য়ৌহল্লি। মতৌ অসুম্না সনরাইস সেক্তরগা মরী লৈনবা ঐখোয়গী থৌশিল-থৌরাংনা মরম ওইদুনা নহারোলশিংগীদমক অনৌবা খুদোংচাবা কয়া পীরি। দ্রোনশিংদগী হৌরগা গেমিং, স্পেসতগী হৌরগা স্তার্ত-অপশিং ফাওবা, সেক্তর খুদিংমক্তা ঐখোয়গী থৌশিল-থৌরাংনা মরম ওইদুনা মাংদা চংশিন্নবা খুদোংচাবা অমা ফংলি।
মরুপশিং,
পান্দম ময়েক শেংলবা মতমদা অতিয়া পক্না ৱাংবা ওইরবসু নত্ত্রগা সমুদ্রগী লৈরোল নুংদা ওইরবসু ঐখোয়না খুদোংচাবশিং লৌবা ঙমগনি। আন্ধ্র প্রদেশতা মোদর্ন তেক্নোলোজীগী খুত্থাংদা দীপ ৱাতর এক্সত্রেক্সন তৌরি অসি মসিগী অচৌবা খুদম অমনি। ঙসি লৈবাক অসিনা ব্ল্যু ইকনোমীগা মরী লৈনবা লোইনাইদ্রবা ওইথোকপা য়াবশিং ফংনবা অচৌবা থৌরাং অমা পাইখৎলি। ব্ল্যু ইকনোমী অসি অহানবা ওইনা খ্বাইদগী মরু ওইনা লৌনরকখি।
হৌজিক ঙামীশিংদা কিসান ক্রেদিত কার্দশিংগুম্বা অনৌবা খুদোংচাবা ফংহল্লি। ঙসি বিশাখপতনম ফিশিং হরবর মতমগা চুনবা মওংদা শেমগৎপা থবক হৌখি, মসিনা ঐখোয়গী ঙামী ইচিল-ইনাওশিংগী পুন্সি নুংঙাইহল্লগনি। লায়রবশিংগী শক্তি হেনগৎলকপনা মখোয়না মোদর্ন ইনফ্রাস্ত্রকচরগা মরী লৈনবা খুদোংচাবশিং অসি ফংলগনি, ঐখোয়গী চাউখৎপা ভারতকী মঙলানসু থুংহনবা ঙম্লগনি।
মরুপশিং,
চহিচা কয়াদগী সমুদ্র অসি ভারতকী য়াইফনবগী হৌরফম অমা ওইদুনা লাকখি অমসুং ঐখোয়গী সমুদ্র তোর্বানশিং অসিনা য়াইফনবগী গেৎৱে ওইদুনা লাকখি। লুপা করোর লিশিং কয়াগী লৈবাক্কী হীথাংফমশিং চাউখৎহন্নবা প্রোজেক্তশিং অসি ঙসিগী মতুংদা হেন্না শাহৌ ফংলগনি। ঙসি ২১শুবা চহিচাগী ভারতনা চাউখৎ থৌরাংগী হোলিস্তিক ওইবা ৱাখল্লোন থবক ওইনা ওন্থোক্লি। আন্ধ্র প্রদেশনা লৈবাক্কী চাউখৎ খোঙচৎতা মরু ওইবা থৌদাং মখা তানা লৌগনি হায়না ঐহাক্না থাজৈ।
ফিরেপ অসিগা লোয়ননা ময়াম পুম্নমকপু ঐহাক্না অমুক্কা হন্না থাগৎচরি!
ঐহাক্কা লোয়ননা খুৎ অনিমক থাংগৎতুনা হৌনা হায়বীয়ু-
ভারত ইমানা য়াইফরে
ভারত ইমানা য়াইফরে
ভারত ইমানা য়াইফরে
হন্না-হন্না থাগৎচরি!
***
(Release ID: 1875429)
Visitor Counter : 116
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam