#IFFIWood, নবেম্বর ৮, ২০২২

করি, আই.এফ.এফ.আই. হায়খিবরা ঐখোয়বু? মানি, অশেংবনি, ঐখোয়গী থম্মোয় অমদি অদোমগী থম্মোয়গী থোঙজিলদা থিল্লরিবা ফিল্মগী সেলেব্রেসন অসিগী মরমদা অদোম খঙলম্লগনি হায়না ঐখোয়না থাজৈ‍।

হোয়, আই.এফ.এফ.আই., ইন্তরনেস্নেল ফিল্ম ফেস্তিবেল ওফ ইন্দিয়া, চহি ৭০গী মমাঙদা, ১৯৫২দা হৌদোকখিবনি, অমদি চহিগী ওইনা নবেম্বর থাদা পাঙথোক্তুনা লাক্লি‍। গোৱাদা অহানবা ওইনা ২০০৪দা পাঙথোকখিবদগী, ফেস্তিবেল অসি ফজরবা লমকোয় স্তেত অসিদা ময়ুম অমা ফংদুনা চহি খুদিংগী মফমসিদা হল্লক্লি‍। অদুগা ইং ২০১৪দা গোৱাবু আই.এফ.এফ.আই.গী লেঙদ্রবা মফম ওইনা লাউথোকখি‍।

অদোমসু খঙলমগনি খল্লি মদুদি আই.এফ.এফ.আই. অসি অতৈ কনানা শিনবা নত্তে লৈঙাক্না শিনবনি‍। হোয়, ফেস্তিবেল অসি চহি খুদিংগী ভারত লৈঙাক্না য়ুম্বু ওইরিবা স্তেত গোৱাগী লৈঙাক্কা খুৎশম্নরগা পাঙথোকপনি‍।

মরম অসিনা, মহৌশানা ৱাহং অমা থোরক্লি, অদোমগী ৱাখলদসু লাক্লমগনি হায়না ঐখোয়না থাজৈ: #WhyIFFI?

#WhyIFFI?

হোয়, করিগীদমক ঐখোয়না আই.এফ.এফ.আই. পাঙথোক্লিবনো? করিগীদমক্তা ঐখোয়না ফিল্ম ফেস্তিবেল অমা হেক্তবু পাঙথোক্লিবনো? অদুগা অতম্ননা, করিগীদমক লৈঙাক্না ফিল্ম ফেস্তিবেল পাঙথোক্লিবনো? অদুগা হান্নগীদা হঞ্জিল্লক্লগা, করিগীদমক লৈঙাক্না অতম্ননা আই.এফ.এফ.আই. পাঙথোক্লিবনো?

ঐখোয়না ৱাহংশিং অসি চুম্নসুম হংবা নত্তে, মসিবু পারিবা মীওই খরনা চিংনবগুম ঐখোয়না আই.এফ.এফ.আই. পাঙথোক্লোইদবনি হায়না হীরম অমত্তদা হায়বা নত্তে‍। মদুগী মহুত্তা, ঐখোয়না ৱাহংশিং অসি ঐখোয়না করিগী তৌরিবনো, ঐখোয়না করি তৌরিবনো হায়বসিগী মরুদা য়ৌনবগীদমক – মালেমগী খ্বাইদগী চাউবা দিমোক্রেসীগী লৈঙাক অসিনা অচৌবা ইন্তরনেস্নেল ফিল্ম ফেস্তিবেল অসি পাঙথোকপগী মরুদা লৈরিবা পান্দম পুন্না তম্মিন্নবা, থিদোক্নবা অমদি অমুক হন্না খঙদোক্নবা হংলিবনি‍।

অদুগা লৈরিবা ৱাফমদি আই.এফ.এফ.আই. পাঙথোকপখক্কী ৱাফম নত্তে‍। তশেংবনি, ফেস্তিবেল অসি পাঙথোকপখক্না মসিগী অরোইবা নত্তে, ওইবরানে?

অদুনা, মসিনা মীয়াম শরুক য়াবা, মীয়াম য়াওহনবা অমদি মীয়ামগী থৌদাংগা মরী লৈনবা ৱাহংশিং থোরকহল্লি‍। করিগীদমক মীয়াম্না আই.এফ.এফ.আই.দা শরুক য়ারিবনো? মখোয়না করি ফংগনি খল্লিবনো, মখোয়না ফেস্তিবেল অসিদগী করি ৱাহন্থোক লৌরিবনো?

অদুগা আই.এফ.এফ.আই. হায়রিবা ফিল্ম ফেস্তিবেল অসিবু মীৎয়েঙ তারিবশিংনা কনা কনানো? মসি কনাগী ওইফম থোকপগে? মসি ফিল্মমেকরশিং, ফিল্মগা মরী লৈনবা মীওইশিং, ফিল্মবু নুংশিজবশিং অমদি ফিল্মগী লমদা খঙ-হৈরবশিংগীরা? নৎত্রগা অতোপ্পশিংগীরা? মসি, “লম্বীদা থেংনরিবা নুপা অমদি নুপী” মীচমশিংদুগীরা? নৎত্রগা মসি অখন্নবা ওদিএন্স খরখক্কীরা?

ঐখোয় আই.এফ.এফ.আই. ১ য়ৌনবা চৎসি: পুম্নমক হৌরকখিবা মতমদুদা

ঐখোয়না অকক্নবা ৱাহংশিংদা খন্না খন্না, ঐখোয়না মতম পুম্নমক্তা তৌফম থোকপগুম্না, অহৌবদা চৎসি‍। ইহান হানবা আই.এফ.এফ.আই.গী ওর্গনাইজিং কম্মিতীগী চেয়রপর্সন, সি.এম. অগরৱালানা করি হায়খিবগে হায়বা ঐখোয় তাসি‍।

“ভারত্তা ইন্তরনেস্নেল ফিল্ম ফেস্তিবেল অমা পাঙথোক্নবগীদমক অহানবা ওইনা ৱা হৌদোকরকপদা, তোয়না হংনখিবা ৱাহং অমদি: অসিগুম্বা ফেস্তিবেল অমগী পান্দম করিনো, মসিনা করি পান্দম পুরক্কদৌরিবনো?‍ মদুগী পাউখুম মমায় অনি লোংবা ওইখি: অহানবদা, ফিল্ম ফেস্তিবেল অমনা পাঙথোক্লিবা লৈবাক্তুগী মীয়ামদা ফেস্তিবেল অদুদা শরুক য়ারিবা ফিল্ম পুথোকপা লৈবাক পুম্নমক্কী খ্বাইদগী ফজরবা ফিল্মশিং উবা ফংহল্লি; অনিসুবদা, ইন্তরনেস্নেল ফিল্ম ফেস্তিবেল অমনা শরুক য়ারিবা লৈবাকশিংগী মোসন-পিকচর ইন্দস্ত্রীশিংদা লৈরিবা মীওইশিংবু অমগা অমগা উনদুনা মখোয় পুম্নমক্কা মরী লৈনবা ৱাফমশিং তাথোক তাশিন তৌনবা, আর্ত মখল অসিগী চঙশিল্লিবা খোঙজেলগী মরমদা চাংদম্নবা অমদি তুংদা হেন্না চাওখৎহন্নবগীদমক থৌরাং য়াৎমিন্নবগী খুদোংচাবা ফংহল্লি‍।”

হোয়, মদু চুম্মি, মথক্কীশিং অসি মতমদুদা বোম্বে হায়না খঙনরম্বা মফমদুদা অহানবা ওইনা ১৯৫২দা পাঙথোকখিবা এসিয়াগী খ্বাইদগী লিরবা ফিল্ম ফেস্তিবেলশিংগী মরক্তা অমা ওইরিবা ফেস্তিবেল অসিগী ইহান হানবা ইদিসন অদুবু শিল্লি-লাংলিবদুগী ৱাহৈশিংনি‍। মহাক্না মথক্কী ৱাফম অসি জনুৱারী ২৪, ২৯৫২দা মহাক্কা তরাম্না ওকপগী ৱারোলদা ফোঙদোকখিবনি‍।

চেয়রপর্সন অসিনা মীওইবা অমা ওইনা ঐখোয় মশেলগী মরীদা, ঐখোয়গী নাত্তা, মহৈ মশিংদা অমদি রাজনিতীগী লমদা সিনেমাতিক মেদিয়ম্না পীরিবা অচৌবা ইথিলবু মখা তানা ফোঙদোকখি‍।

“ফেস্তিবেল অসিদা উৎকদৌরিবা ফিল্মশিংগী মনুংদা, অনৌবা এন্তরতেনমেন্তকী মওং অমা ওইনা হৌরকখিবা মোসন-পিকচরনা মীওইবগী মরী, নাৎ, মহৈ মশিং অমদি রাজনিতীগী লমদা কয়া য়াম্না মনুং হঞ্জিন্না চঙশিনখ্রবগে হায়বদু উৎলি‍। অতম্ননা হায়রবদা, মহৈ মশিংগী লমদা, মসিনা, মদুগী মরুওইবা ঐখোয়না খজিকখক্তমক লৌশিনবা ঙম্লিবা, অনৌবা থোঙ কয়া হাংদোক্লি‍। নাৎকী লমদা মসিনা মালেমগী ওইবা কলচরগী য়ুম্ফম থোনবদা মরুওইবা থৌদাং য়াখি অমদি য়ারি‍। অদুবু মালেমগী ওইবা মরীদা মোসন পিকচরগী মরুওইবা লৈরিবা অসিদগী হেন্না মীওইবগী মরীগী লম অমত্তদা লৈতে‍। লৈবাকশিংগী কল্চরেল অমদি কম্মর্সিএল ওইবা মরীদা মসিগী অফবা অমদি ফত্তবা মতিক মীপুম খুদিংনা উনরবনি‍। মোসন পিকচর অমদি লৈবাক অমগী মীয়াম্না অতোপ্পা লৈবাক্কী মীয়ামদা উৎলিবা মওং মতৌ অনিগী মরক্তা লৈনরিবা মরী অসি মসিদগী হেন্না ময়েক শেংনিংঙাই লৈত্রে‍।”

চেয়রপর্সন্না তোঙান তোঙানবা লৈবাক্কী মীওইশিংগী মরক্তা অমগা অমগগী য়াইফনবা খন্নবা অমদি ৱাখল তামিন্নবগী মরী শাগৎপদা সিনেমাগী মতিক, অমদি মসিনা কমদৌনা “মালেম পুম্বগী ওইবা লিতরেচর অমগী হৌরকফম ওইহনবগে” হায়বদা ৱাফম কয়া থমখি‍।

“মী অমদি ৱাখল্লোন ইন্তরচেঞ্জ তৌবা য়াওনা মোসন পিকচর পুথোকপা অমদি য়েন্থোকপদা লৈরিবা অশেংবা মালেমগী তেংবাংনবগী মরী অসিনা অমনা অমগী য়াইফনবা খন্নবা অমদি ৱাখল তামিন্নবগী ফীভম পুরকপা ঙমগনি‍। অতোপ্পা লমগী মীওইশিংনা য়েংননবা থাখিবা মোসন পিকচর খুদিংমক মদুবু পুথোক্লিবা লৈবাক্তুগী মীয়াম্না মালেমগী মীয়ামগী মফমদা থাবা এম্বেসেদর অমমম ওইরিবনি‍। মসিনা মীপুম খুদিংনা খঙবা ঙম্বা মালেমগী ওইবা লোল অমা ঙাংলি‍। লোলনা খাইদোক্নরিবা মীওইশিং, অতোপ্পা লমগী মীওইশিংগী মরমদা রেদিওদগী নৎত্রগা প্রেসতগী খঙবা ঙমদবশিং স্ক্রীন্দগী খঙনিংবা ফাওহল্লি‍। অদুগা মখোয়না স্ক্রীন্দগী তম্লকপশিংনা ফুরুপশিংগী মরক্তা লৈবা থাজনদবা অমদি নুংশিনদবশিং মাঙহনখিবদা মতেং পাংই‍। মরমদি মসিনা মালেমগী ওইবা লোল অমা ঙাংলি, মোসন পিকচরনা মালেম পুম্বগী ওইবা লিতরেচর– মীওইবা কাঙলুপকী থবক থৌওং খুদিংমক নৎত্রগা অয়াম্বনা লেপ্পা লৈতনা রেকোর্দ তৌরিবা লিতরেচর অমগী হৌরকফম পীরি‍। ঐখোয়বু নুংঙাইহন্নবা অমদি ঈ-পাউ ফংহন্নবগীদমক, মসিনা হৌখিববু নৌনা পুথোরকই, হৌজিক ওইরিববু অনৌবা পুন্সি হাপ্লি, অমদি হয়েংগীদমক্তা মসিনা ঐখোয়বু “তুংলমচত্তা লুপশিন্দুনা, মীওইবগী মীৎনা হেক উবা ঙম্লিবমখৈ, মালেমগী শক্লোন অমদি তুংদা লাক্কদৌরিবা অঙকপা পুম্নমকপু উহল্লি”‍।”

ইন্তরনেস্নেল ফিল্ম ফেস্তিবেল ওফ ইন্দিয়াগী ইহান হানবা ইদিসন্দা লাকখিবা মীথুংশিংবু তরাম্না ওক্লদুনা, শিল্লি লাংলিবদুনা, লৈবাক অমনা মালেমগী মীয়ামদা য়েংহন্নবগীদমক থারিবা ফিল্মশিং অদুনা মখোয়গী মীয়ামগী পুন্সি মহিং অমদি মীওইবা খুন্নাইদা মায়োক্নরিবা অচৌবা ৱায়েৎশিংদা উৎলিবা মখোয়গী মওং মতৌবু লান্না উহন্দনবা, ইন্তরনেস্নেল এক্সচেঞ্জকী থৌরাং শেমগৎপদা ইন্তরনেস্নেল ফিল্ম ফেস্তিবেলশিংনা মরুওইবা থৌদাং লৌফম থোকই হায়বা ৱাফম থমখি‍।

অথোইবা লৈবাক ভারতকী ইন্তরনেস্নেল ফিল্ম ফেস্তিবেল অসিবু পুক্নিং থৌগৎলিবা অচৌবা পান্দমদা অমুক হঞ্জিল্লক্তুনা: চেয়রপর্সন্না মহাক্কী ৱারোল অসুম্না লোইশিনখি‍।

“লোইশিল্লকপদা, ঐনা ময়ামগী মফমদা নীংশিংজরি মদুদি পাঙথোক্লিবা ফেস্তিবেল, ভারতকী অসিগুম্বা মখলগী, নৎত্রগা এসিয়াগীসু ওইরম্বা য়াই, ফেস্তিবেল অসি হিদান্নবগী নত্তে মহুৎ শিন্দুনা শরুক য়াবগীনি‍। মফমসিদা ঐখোয়না লম্বা পানদুনা থেংনবা নত্তে, অমনা অমগী আর্ত, হৈশিংবা অমদি খোঙজেলবু য়েংনবা অমদি থাগৎননবা; অমনা অমবু খঙননবা অমদি অমনা অমগী প্রোব্লেমশিং খঙননবা; অমনা অমগী পুন্সিগী মরমদা করিগুম্বা খরা তমশিলহৌনবা; অমদি মালেমগী মীয়ামগী মরক্তা হেন্না ফজবা কলচরেলগী পুন্সি অমা য়োকখৎনবগীদমক্নি‍।”

নীংশিংবগী লম্বী পরিংদা চত্তুনা, মতমদুদা পুক্নিং থৌগৎখিবা ফীভমশিং অসিনা অদোমদা করি ফাওহনবগে হায়বা ঐখোয়দা খঙহনবিরকউ‍। মসিনা পুক্নিংদা ইনোৎ অমা হাপ্পরা, অদোমবু আই.এফ.এফ.আই. অমদি ফিল্ম অমসুং পুন্সিগা অমুক হন্না নুংশিনহনবা ঙম্বরা? ঙমদবরা? ঐখোয়না আই.এফ.এফ.আই.বু কমদৌনা হেন্না ফবা মওংদা পাঙথোকপা য়াগদগে হায়বা খঙহনবিরকউ‍।

অদুগা, ঐখোয়দা শোয়দনসু খঙহনবিরকউ - #WhyIFFI? অদোমগী পাউখুম iffi-pib[at]nic[dot]in থাবিরকউ; হেন্না ফবদি মদুবু ত্বীত তৌদুনা (ঐখোয়না অদোমূগী পাউখুম চীত্থহৌদনবা, হেস্তেগ #WhyIFFI শীজিন্নবা কাউবিগনু) মালেমগী মফমদা সেয়র তৌবিয়ু‍।

অদুগা ৱাফম অমনা, ৫৩শুবা আই.এফ.এফ.আই.গা মরী লৈনবা অপদেৎ খুদিংমক ফেস্তিবেল ৱেবসাইত www.iffigoa.org, নৎত্রগা পি.আই.বি. ৱেবসাইত (pib.gov.in), আই.এফ.এফ.আই.গী ত্বীতর, ফেসবুক অমসুং ইন্সতাগ্রামদা লৈরিবা সোসিএল মিদায়া একাউন্তশিংদা অমদি পি.আই.বি. গোৱাগী সোসিএল মিদিয়া হেন্দলশিংদগী ফংবিগনি‍। ঙাইদুনা লৈবিয়ু, ঐখোয় সিনেমাতিক সেলেব্রেসনগী কপ্তগী মরাং কায়না থকখিসি... অমদি মসিগী নুংঙাইবা লৌমিন্নখিসি‍।

***