অদিত্যা বির্লা গ্রুপকী চেয়রমেন, শ্রী কুমার মঙ্গলম বির্লাজী, থাইলেন্দ কিংদমগী ইকায় খুম্ননীংঙাই ওইরবা মীথুংলেনশিং, বির্লা ইমুংগী মীওই অমসুং মেনেজমেন্ত, থাইলেন্দ অমসুং ভারতকী কারবার লুচিংবশিং!

মরুপশিং,

নমস্কার,

শবাদি খ্রপ।

ঐখোয়না অদিত্যা বির্লা গ্রুপকী গোলদন জুবিলী নত্ত্রগা সুবর্না জয়ন্তী পাংথোক্নবা থাইলেন্দগী সুভর্নভুমীদা পুল্লি। মসি তসেংনা য়াম্না অখন্নবা থৌরম অমনি। ঐহাক্না অদিত্যা বির্লা গ্রুপকী তীমশিংবু থাগৎলি। গ্রুপ অসিনা থাইলেন্দদা পাংথোক্লিবা মশক নাইবা থবক কয়াগী মতাংদা শ্রী কুমার মঙ্গলম্না হৌজিক হায়খিবশিং তারে। থবকশিং অসিনা লৈবাক অসিগী মীয়াম কয়াদা খুদোংচাবা কয়া পীবগা লোয়ননা নুংঙাই য়াইফবসু ওইহল্লি।

মরুপশিং,
ভারতকা নাৎকী অচেৎপা মরী লৈনবা থাইলেন্দদা ঙসি ঐখোয় লৈরি। লৈবাক অসিদা ভারতকী মকোক থোংবা ইন্দস্ত্রীগী ইমুং অমনা চহি ৫০ ফানা থবক তৌরকপগী থৌরমসু পাংথোক্লি। কম্মর্স অমসুং কলচরনা পুম্নমকপু অমত্তা ওইহনবা ঙম্বগী মতিক লৈ হায়বসি মসিনা ঐহাকপু থাজহল্লে। লম্বোইবা অমসুং লল্লোনবা কয়ানা চহি চা কয়াদগী থাপ্ল-থাপ্লবা মফমশিংদা চৎনরি। মখোয়না ময়ুমদগী থাপ্না লাক্তুনা তোঙানবা চৎনবী কয়াগী মরক্তা তিল্লি। নাৎকী মরী অমসুং কম্মর্সকী ইথিলনা মালেম্বু লাক্কদৌরিবা মতমশিংদা অমত্তা ওইনা পুশিল্লক্লিবসি লেপ্তবা ওইসনু।

মরুপশিং,
অফবগী মাইকৈদা ভারত্তা হৌজিক অহোংবা লাক্লিবা খরগী মতাংদা ঐহাক্না পাউদম্নীংই। হৌজিক অসি ভারত্তা লৈবগী খ্বাইদগী চুনবা মতম্নি হায়না ঐহাক্না থাজনা হায়রি। ঙসিগী ভারত অসিদা হীরম কয়া অমা চাউখৎলি, হীরম কয়া অমা মরায় চায়থরি। ‘কারবার তৌবগী থৌওং’ হেন্না ফগৎলক্লি, ‘পুন্সি মহিং লাইহনবা’সু ফগৎলি। ঐখোয়গী উমংগী কভর হেনগৎলক্লি। পেতেন্ত অমসুং ত্রেদমার্ক মশিং হেনগৎলক্লি। পোত্থোক পুথোকপগী নীংথিবা মতৌ হেনগৎলক্লি। ইনফ্রাস্ত্রকচর খোঙজেল য়াঙনা শেমগৎ-শাগৎলি। খ্বাইদগী ফবা হকশেলগী সেবা ফংবা মীশিং হেনগৎলক্লি। অদুগা মান্নবা থৌওং অমদা, তেক্স মশিং হন্থরক্লি, তেক্সকী রেত হন্থরক্লি, রেদ-তেপিজমগী থৌওং হন্থরক্লি। অচানবা মীওইদা অহেনবা খুদোংচাবা পীবগী মতৌ হন্থরক্লি। শেঞ্জা থুমজা লোইশিনলক্লি। মবুকচেল শেংদবা মীওইশিং লোৎনরি। মরক্তা লৈবা মীওইশিংনা শক্তি পায়রম্বদু ঙসিদি পুৱারী ওনখ্রে।

মরুপশিং,
ভারতনা মমাংগী চহি মঙাদা তোঙানবা সেক্তরদা মায় পাকপগী থৌওং কয়া উখ্রে। মসিগী মরম অসি সরকারখক নত্তে। ভারতনা রুতিন ওইবা অমসুং ব্যুরোক্রেতিক ওইবা মওংদা থবক তৌদ্রে। মিৎয়েং শানবা থবক কয়া পায়খৎপদগী অহোংবা কয়া পুরক্লে। মীয়াম্না শরুক য়াদুনা থবকশিং অসিদা মপাঙ্গল হাপ্লকপা মতমদা মখোয়না মীয়ামগী ইহৌ ওইরকই অমসুং অঙকপা পান্দম কয়া ফংবা ঙম্লকই। ওইথোক্লোই হায়না মমাংদা খল্লম্বা থবকশিং ইমাং মক্তদা ওইথোক্লে। পুন্সিগী তঙাই ফদবা হীরমশিং চাউরাকপা মীওই ১০০%না ফংনরে। মসিগুম্বা অফবা খুদমদি – জন ধন য়োজনা, মসিনা নিয়র তোতেল ফাইনেন্সিএল ইনক্লুজন ফংলবনি। অমসুং সেনিতেসন কভরেজনা য়ুম্থোং খুদিংদা য়ৌরবা স্বচ্ছ ভারত মিসন্না অতোপ্পা খুদম অমনি।

মরুপশিং,
সর্ভিস দেলিভরীদা লিকেজ লৈবগী চাউরবা শিংনবা অমা ঐখোয়না ভারত্তা থেংনদুনা লাকখি। লাইরবশিংনা মসিনা মরম ওইরগা খ্বাইদগী অহেনবা অৱাবা থেংনৈ। লাইরবশিংগীদমক্তা থাদখিবা শেনফম অমত্তা লাইরবশিংদা য়ৌরমদবসিদা অদোম্না শোইদনা ঙক্কনি। ঐখোয়গী সরকারনা দি.বি.তি. শিজিন্নদুনা মসিবু লোইশিনখি। দি.বি.তি. হায়বদি দাইরেক্ত বেনেফিত ত্রান্সফর হায়বনি। দি.বি.তি.না মরক্কী মীওই অমসুং থবক নীংথিনা পাংথোক্তবগী মতৌ লোইশিনখ্রে। মসিদা অশোইবগী মফম য়াম্না পীকই। মসিনা হৌজিক ফাওবদা বিলিয়ন দোল্লর ২০ কনবা ঙমখ্রে। য়ুমথোং খুদিংদা এল.ই.দি. বল্ব থানবা অদোম্না উরম্লগনি। মখোয় অসিনা হেন্না ঙাল্লি অমসুং মৈ য়াম্না চাদে। মসিগী মতাংদা ভারত্তা করি পাংথোকই অদোম খঙবরা? ঐখোয়না মমাংগী চহি খরদা এল.ই.দি. বল্ব মিলিয়ন ৩৬০ হেন্না য়েন্থোকখ্রে। লম্বীদা থানবা মৈ খুদিংমক এল.ই.দি.দা ওন্থোকখ্রে। ঐখোয়না মসিগী খুত্থাংদা চাউরাক্না বিলিয়ন দোল্লর ৩.৫ কনবা ঙমখি। কার্বন থাদোকপসু অদুমক হন্থরক্লে। শেল তিংদবা হায়বসিনা শেল তুংশিনবনি হায়না ঐহাক্না য়াম্না চেৎনা থাজৈ। ইনর্জী কনবা হায়বসি ইনর্জী পুথোকপনি। মসিগুম্বা শেনফমশিং অসি অতোপ্পা কান্নবা থৌরাংশিংগী খুত্থাংদা মীওই মিলিয়ন কয়াগী মতেংগীদমক্তা হৌজিক শিজিন্নরি।

মরুপশিং,
ঙসিগী ভারতসিদা থবক কন্না শুজবা তেক্সপেয়রশিংগী হোৎনজমনবু শিংথানরি। ঐখোয়না মশক থোকপা থবক পাংথোকখিবা অসি তেক্সকী লমদনি। ভারতনা পীপল ফ্রেনলী তেক্স রেজিম ওইবসিদা ঐহাক্না নুংঙাইবা ফাওই। ঐখোয়না মসিবু হেন্না ফগৎহন্নবা খোঙফম চেৎলি। ঐখোয়না মমাংগী চহি মঙাসিদা মিদ্দল ক্লাসকী মফমদগী তেক্সকী পোৎলুম ফজনা হন্থহনখ্রে। অরোন অথুপ নত্ত্রগা অরানবা অহেনবা পোৎলুম হন্থহন্নবগীদমক্তা ঐখোয়না ফেসলেস তেক্স এসেসমেন্ততা মিৎয়েং চঙলি। ভারতনা কোর্পোরেত তেক্স রেত হন্থহন্নবা ৱারেপ লৌখিবগী মতাংদা অদোম পুম্নমক্না তারম্লগনি। ঐখোয়গী জি.এস.তি.না ভারতকী ইকোনোমিক ইন্তেগ্রেসনগী মঙলান মঙফাওনহল্লে। মসিবু পীপল ফ্রেনলী হেন্না অইহন্নবগীদমক্তা ঐখোয়না কন্না হোৎনরি। ঐহাক্না থমখিবা ৱারোলশিং অসিনা ভারতকী ইনভেস্তমেন্ত তৌবগী খ্বাইদগী পাম্নবা পন্থুংফম ওইহল্লবনি।

মরুপশিং,
 

ভারতনা মমাংগী চহি মঙাদা য়ু.এস. দোল্লর বিলিয়ন ২৮৬কী এফ.দি.আই. ফংখি। মমাংগী চহি ২০গা চাংদম্নবদা মশিং অসি চাউরাক্না তংখায় অমা হেন্না হেনগৎলি। মসিগী ৯০%দি ওতোমেতিক এপ্রুবেলদগী লাকখি। অদুগা মসিগী ৪০%না গ্রীন ফিল্দ ইনভেস্তমেন্তনি। মসিনা হায়বদি, ইনভেস্তরশিংনা ভারত্তা অশাংবা মতমগী থাজবা থম্লি হায়বনি। ভারতকী শাহৌ লৌবগী ফিভম অসি তোঙানবা রেতিং কয়াদা মমি তারি। য়ু.এন.সি.তি.এ.দি. মতুং ইন্না ঐখোয়না এফ.দি.আই.গী মকোক থোংবা পন্থুংফম ১০গী মনুং চল্লি অমসুং চহি ৫সিদা দবল্যু.আই.পি.ও.গী গ্লোবেল ইন্নোভেসন ইন্দেক্সতা থাক ২৪ কাখৎলি। অদুবু ঐহাক্না অখন্ননা হায়নীংবা হীরম ২ লৈ। ভারতনা চহি ৫গী মনুংদা ৱর্ল্দ বেঙ্ককী ‘কারবার তৌবদা লাইহনবা’গী রেঙ্কিংদা থাক ৭৯ কাখৎলে। ইং ২০১৪দা ১৪২শুবা থাক্তা লৈরম্বদগী ইং ২০১৯দা ৬৩দা লৈরে। মসি য়াম্না চাউনা মায় পাকপনি। ঐখোয়না চহি অহুম থংন-থংননা মকোক থোংবা রিফোর্মর ১০গী মনুং চনখি। ভারত্তা কারবার তৌবগী ভেরিএবল য়াম্না লৈ। ঐখোয় অসি য়াম্না চাউবা অমসুং তোঙানবা মগুন চেনবা লৈবাক অমনি। ঐখোয়গী লৈবাক্তা কেন্দ্র, রাজ্য অমসুং লোকেল লৈঙাক লৈ। তোঙানবা ৱাখল্লোন অমদা য়েংলুরগদি, ঐখোয়না মাইকৈ অমদা মিৎয়েং ওন্সিল্লিবা অসিনা ঐখোয়না রিফোর্ম পাংথোকপদা খোঙফম চেৎলি হায়বা ময়েক শেংনা তাক্লি। কারবার তৌবগী অকোয়বগী ফিভম হেন্না ফগৎহন্নবগীদমক্তা মীয়াম অমসুং সরকারনা অমত্তা ওইনা চুংশিন্নবা তাবনি।

মরুপশিং,

অতোপ্পা ৱাফম অমনা, ভারতকী ৱর্ল্দ ইকোনোমিক ফোরম ত্রাভেল অমসুং তুরিজম কম্পিতিতিবনেস ইন্দেক্সকী রেঙ্কিং য়াম্না ফগৎলে। ইং ২০১৪দা লৈরম্বা ৬৫শুবা থাক্তগী ঐখোয়না ইং ২০১৯দা ৩৪শুবা থাক্তা লৈরে। থৌওং অসি রেঙ্কিংদা মশক থোক্না ফগৎপগী মরক্তা অমা ওইরি। মীরমগী লমকোয়বা লাকপগী চাংসু ৫০% হেনগৎখি। লমকোয়বা অমনা মফম অমনা নুংঙাইবা অমসুং তেক্ত কায়দ্রবা মতমদা চৎকনি। অদুনা, লমকোয়বা য়াম্না লাক্লে হায়বসিনা ঐখোয়না হোৎনরিবা খুদিংমক্তা অপাম্বা মহৈ ফংবা ঙম্লে তাকপনি। ভারত্তা অফবা লম্বী শোরোক, অফবা এয়র কন্নেক্তিবিতী, হান্নদগী হেন্না লুবা নানবা মতৌ অমসুং আইন লৈরকপনা মালেম্বু ভারত্তা চিংদুনা পুরক্লি।

মরুপশিং,
 

হায়রিবা রেঙ্কিংশিং অসি লৈবাক অসিদা মশক থোকপা অহোংবা পুরক্লবা মতুংদা ফংবা ঙম্লিবনি। রেঙ্কিংশিং অসি ফোর্কাস্ত নত্তে। মখোয় অসিদি তসেংনা থোক্লবা থৌওংশিংগী অশেংবা মমিনি।

মরুপশিং,
ভারতনা অনৌবা মঙলান অমা তান্নরি – ত্রিলিয়ন মঙাগী শেন্মিৎলোন ওইবা। ঐখোয়না ইং ২০১৪দা সরকারগী চুক্লি পায়খিবা মতমদা, ভারতকী জি.দি.পি.না চাউরাকপা ত্রিলিয়ন দোল্লর ২ ওইরম্মি। চহি ৬৫সিদা ত্রিলিয়ন ২দা লৈবা। অদুবু, ঐখোয়না শুপ্নগী চহি ৫দা ত্রিলিয়ন দোল্লর ৩দা পুখি। মসিনা ঐখোয়না অথুবা মতমদা ত্রিলিয়ন দোল্লর ৫গী শেন্মিৎলোন য়ৌবা ঙমগনি হায়বগী থাজবা পীরি। ঐখোয়না নেক্স জেনেরেসন ইনফ্রাস্ত্রকচরগীদমক্তা ৱান পোইন্ত ফাইব ত্রিলিয়ন দোল্লরগীদমক্তা ইনভেস্ত তৌরগনি।

মরুপশিং,
ঐহাক্না তসেংনা চাউথোকচবা হীরম অমা হায়রগদি ভারতকী তেলেন্তনা থল্লবা অমসুং স্কিল লৈবা মেনপাৱর অসিনি। ভারতনা মালেমগী স্তার্তঅপ ইকোসীস্তেম অচৌবশিংগী মরক্তা লৈরিবসিনি। ভারত অসি দিজিতেল কস্তমরগী খ্বাইদগী চাউবা অমসুং খোঙজেল য়াঙনা শাহৌ লৌবশিংগী মরক্তা অমা ওইরি। লৈবাক অসিদা স্মার্ত ফোন শিজিন্নবা মীওই বিলিয়ন অমা অমসুং ইন্তর্নেত শিজিন্নবা মীওই বিলিয়ন তংখায় লৈ। ঐখোয়না ইন্দস্ত্রী ফোর পোইন্ত জিরোগা মান্নবা খোঙজেলদা চৎলি অমসুং চাউখৎ থৌরাং অমসুং লৈঙাকপগী তঙাই ফদবগী মখা পোন্না তেক্নোলোজী শিজিন্নবা ঙম্নবা হোৎনরি। কান্নবশিং অসিগা লোয়ননা, ঐখোয়না মালেমগী মেন্যুফেকচরিং অমা ওইবগী পান্দম থম্লি।

মরুপশিং,
‘থাইলেন্দ ফোর পোইন্ত জিরো’না থাইলেন্দবু সাইন্স, তেক্নোলোজী, ইন্নোভেসন অমসুং ক্রিএতিবিতীগী খুত্থাংদা শেম্বা ভেল্যুদা য়ুম্ফম ওইবা শেন্মিৎলোন ওইহন্নবা মিৎয়েং চঙলি। ভারতকী অপাম্বগা মখোয়গী থৌওং অসিগা য়াম্না চুনরি। দিজিতেল ইন্দিয়া, স্কিল ইন্দিয়া, গঙ্গা রিজুবিনেসন প্রোজেক্ত, স্বচ্ছ ভারত মিসন, স্মার্ত সিতী অমসুং জল জীবন মিসনগুম্বা ভারতকী খোঙথাংশিং অসিনা পার্ত্নর ওইবগী অফবা খুদোংচাবা কয়া পীরি।

মরুপশিং,
ভারতনা নুংঙাই য়াইফবা মতমদা মালেম্না নুংঙাই য়াইফগনি। ঐখোয়গী ভারতকী চাউখৎ থৌরাংগী পান্দম অসিদি অফবা গ্রহ অমা ওইহনবগী লম্বী য়াৎপনি। ভারত মচা মিলিয়ন ৫০০দা অয়ুশমান ভারতকী খুত্থাংদা হেন্না ফবা হেল্থকেয়র ফংহনবনা হেন্না ফবা গ্রহ অমা মথন্তনা ওইহনগনি। ঐখোয়না ইং ২০২৫ ফাওবদা তি.বি. মুত্থৎকনি হায়না ৱারেপ লৌরিবসিনা মালেম্না তি.বি.গী মাইয়োক্তা থেংনরিবা লানগী মপাঙ্গল হাপকনি। অদুগা, ঐখোয়গী মায় পাকপগী থৌওংশিংবু মালেমগা লান্নদুনা চৎলি। ঐখোয়গী সাউথ এসিয়া সেতিলাইতনা লমদমসিগী মীয়াম কয়াগী তেংবাংলি। অখন্ননা ঙামী অমসুং মহৈরোইশিং।

মরুপশিং,
ঐখোয়গী এক্ত ইস্ত পোলিসীগী ইথিলগী মখা পোন্না, ঐখোয়না লমদমসিগী শেন্মিৎলোন চাউখৎহন্নবা অহেনবা মিৎয়েং চঙলি। থাইলেন্দগী নোংচুপ সমুদ্র মপানগী হিথাংফমগা ভারতকী নোংপোক সমুদ্র মপান, হায়বদি চেন্নৈ, ভিশাখাপত্নম অমসুং কোলকতাগী মরক্তা হকথেংনবা কন্নেক্তিবিতী লৈবনা ঐখোয়গী শেন্মিৎলোনগী পার্ত্নরশিপ হেন্না ফগৎহনগনি। ঐখোয়না মসিগুম্বা কান্নবা ফিভমশিং অসিগী অহেনবা খুদোংচাবা লৌগদবনি। ঐখোয়গী জিওগ্রাফিকেল প্রোক্সিমিতীগী খুদোংচাবা খুদিংমক ঐখোয়গী ইপা-ইপুশিংনা লৌরম্বগুম্না ঐখোয়সু লৌগদবনি।

মরুপশিং,
ঐখোয়গী শেন্মিৎলোন অসিনা মতীক লৈবা অমসুং অমা অমগী তেংবাংনরিবা, ঐখোয়গী চৎনবীদা মান্নবা থৌওং কয়া লৈরিবা, ঐখোয়গী মরক্তা নুংশি চান্নবা লৈরিবা অসিদা ঐখোয় অনিমক্কী মায় পাকপা ফিভম লৈনবা ঐখোয়না নীংথিনা তেংবাংনবা য়াগনি হায়বগী অচেৎপা থাজবা লৈ। ঐহাক্না ৱাফম অমগা লোয়ননা ঐহাক্কী ৱারোল লোইশিঞ্জগে। ইনভেস্তমেন্ত অমসুং নুংঙাইনা কারবার তৌগে হায়রবদি ভারত্তা লাকপীয়ু। ইন্নোভেত তৌদুনা থৌওং অমা হৌদোক্কে হায়রবদি ভারত্তা লাকউ। খ্বাইদগী নীংথিবা তুরিস্ত মফম অমসুং মীয়ামগী নীংথিবা সেবাগীদমক্তা ভারত্তা লাকপীয়ু। ভারতনা অদোম্বু তরাম্না ওক্নবা ঙাইদুনা লৈরি।

থাগৎচরি।

খোপ খুন খ্রপ।

হন্না হন্না থাগৎচরি।

****