এক্সেলেন্সী, নমস্কার!

ঈশিং ইচাউ অমসুং লৈবাক নিংখায়বগী থৌদোক্না সেন্ত্রেল ভিএতনামদা অৱা-অনা কয়া নংহল্লিবা অসিগা মরী লৈননা ঐহাক্না ভারত পুম্বগী মহুৎ শিন্দুনা খ্বাইদগী অহানবদা নুংঙাইতবা ফোংদোক্লি। ভারতনা থাখিবা তেংবাংবগী পোৎলমশিংনা ইরাং অসিগা মাইয়োক্নবদা তেংবাংগনি হায়বগী ঐহাক্না থাজবা থম্লি।

এক্সেলেন্সী,
ভিএতনাম্না কোবিদ-১৯গা মায় পাক্না থেংনবগী মতৌবু মালেম শিনবা থুংবনা থাগৎনরি। ঐহাক্না ভিএতনাম অমসুং মখোয়গী মীয়াম্বু মসিগীদমক্তা থাগৎপা ফোংদোকচরি।

এক্সেলেন্সী,
ঐখোয়না মমাংগী থাদা এসিয়ন-ভারত ভর্চুএল সম্মিত্তা উন্নখি। অদোম ৱারী শাবগী খুদোংচাবা অমা ঙসিগী নুমিৎ অসিদসু ফংবদা ঐহাক্না নুংঙাইবা ফাওরি। ভিএতনাম্না ভারতকী এক্ত ইস্ত পোলিসীগী মরু ওইবা য়ুম্বী অমা ওইরি, অমসুং ঐখয়গী ইন্দো-পেসিফিক ভিজনগী মরু ওইবা খোঙলোই অমসু ওইরি। ঐখোয়গী পাক শনবা স্ত্রেতজিক পার্ত্নরশিপকী মনুং চনবা হীরমশিং ঙসিদি য়াম্না পাকথোক চাউথোক্লে। ঐখোয়গী লৈবাক অনিগী মরক্তা লৈনরিবা মরীসু খোঙজেঙ য়াঙনা চাউখৎপগা লোয়ননা অনৌবা হীরম কয়াসু কোন্সিল্লক্লি।

ঐখোয়না ভিএতনামগা লৈনরিবা মরী অসিবু অশাংবা মতম অমসুং স্ত্রেতজিক ওইবা মিৎয়েংদগী য়েংলি। শান্তি, তংদু লৈতাবা অমসুং নুংঙাই য়াইফবনা ঐখোয়গী ইন্দো-পেসিফিক মফমগী অপুনবা পান্দম ওইরি। ঐখোয়গী তেংবাংনবা অসিনা লমদমসিগী শান্তি ঙাকপা অমসুং তংদু লৈতানা লৈহনবদা মশক থোক্না তেংবাংগনি।

ঙসিগী ভর্চুএল সম্মিত অসিদা ঐখোয়না ঐখোয়গী পাক শনবা স্ত্রেতজিক পার্ত্নরশিপকী মনুং চনবা হৌজিক তেংবাংনবগী থৌওংশিং নৈনগনি। রিজনেল অমসুং মলতিলেতরেল থাক্তা ঐখোয়গী মরক্তা তেংবাংনবগী মতৌগী মতাংদা খন্ন-নৈনবগী অফবা খুদোংচাবা অমসু ঙসিগী থৌরমসিনা পীরি।

মালেমগী ওইনা শিংনবা অমসুং ঐখোয়গী লমদমগী তুংগী মতমগী মতাংদা য়েংবা ঐখোয়গী মিৎয়েংশিংদা মান্নবা মতৌ কয়া য়াওরি, অমসুং ঐখোয়গী মান্নবা ভেল্যুশিং হেন্না খুমাং চাউশিলহন্নবা ঐখোয়না পুন্না হোৎনমিন্নবা য়াগনি। ঐখোয়না মথংগী চহিদা য়ু.এন. সেক্যুরিতী কাউন্সিলগী মেম্বর ওইরগনি। মসিগা লোয়ননা, ঐখোয়গী তেংবাংনবগী থৌওংদা মালেমগী ফম্বাক্তা মরু ওইবগী চাংসু মখা তানা হেনগৎলগনি।

ঐখোয়গী বাইলেতরেল ইনগেজমেন্ত অসিগী ইং ২০১২দগী ২০২৩ ফাওবগী জোইন্ত ভিজন দোক্যুমেন্ত অমসুং প্লান ওফ এক্সন অমা ঐখোয়না ঙসি ফোঙবসিদা য়াম্না নুংঙাইবা ফাওরি। শান্তি, নুংঙাই য়াইফবা অমসুং মীয়ামগী ওইবা ঐখোয়গী অপুনবা মিৎয়েং অসিনা ঐখোয়গী মরীনা কয়া য়াম্না চেৎপগে হায়বগী ৱারোল অমা মালেমদা তাক্কনি। ঐখোয়না শানরিবা ৱারী অসিগা লোয়ননা, মরূ ওইবা য়ানচে তরেৎ অমসু লৈবাক অনিগী মরক্তা ঙসি খুৎয়েক পীনখ্রে

হায়রিবশিং অসিগী মনুনফদা দিফেন্স, সাইন্তিফিক রিসর্চ, ন্যুক্লিয়র পাৱর, পেত্রো-কেমিকেল, রিন্যুএবল ইনর্জী অমসুং কেন্সর লাইয়েংবগুম্বা তোঙানবা হীরমশিং মনুং চল্লি। ঐখোয়না চাউখৎপদা তেংবাংনবা অমসুং নাৎ-চৎনবী ঙাক-শেনবগী হীরমদা অনৌবা খোঙথাং কয়া অমসু পায়খৎলি। ঐখোয়গী মরক্তা তেংবাংনরিবা অসিনা পাকথোক চাউথোরকপা অমসুং মতিক লৈবশিং পুম্নমক থৌওংশিং অসিদা মমি তারি।

এক্সেলেন্সী,
ঐহাক্না অদোম্বু ভর্চুএল সম্মিত অসিদা অমুক্কা হন্না তরাম্না ওক্লি। অদোমগী ৱাহৌদোক থম্বীনবা ঐহাক্না অদোমগী মফমদা হংগৎচরি।

*********