কিংদম ওফ থাইলেন্দগী সোসিএল দিবেলপমেন্তগী ইকাই খুম্নরবা মন্ত্রী,

থাইলেন্দ-ইন্দিয়া পার্লিয়ামেন্তরী ফ্রেন্দশিপ গ্রুপকী ইকাই খুম্নরবা মেম্বরশিং,

মরুপশিং,

হায়
কেম ছো?

সত শ্রী অকাল,

বনক্কম,
নমাস্কারাম,
সাভাদি খুপ,

থাইলেন্দগী অরিবা সুভর্নভুমিদা মফম অসিদা ময়ামগী মরক্তা লাকপা অসিদা নখোয়গী মচুনা শঙখিবা ওইনা ফাওই। মফম অসিগী এতমোস্ফিয়র, ফিজেৎ-চাকচা অসিনা অমত্তা ওইবগী ৱাখল্লোন অমা পোকহল্লি। মসিদা নখোয়না ভারত্তগী হৌরকখিবগী ৱা খক্তা নত্তে অদুবু মফম খুদিংমক্তা অমত্তা ওইবগী ৱাখল্লোন উবা ফংই। মফম অসিদা ৱারী শাবা নত্ত্রগা চিঞ্জাক নত্ত্রগা চৎনবী অমসুং লাইনীং নত্ত্রগা মফম অসিগী আর্কিতেকচর ওইরবসু ঐখোয়না ইন্দিয়ননেসকী ৱাখল্লোন অমা পোকই। মরুপশিং, মালেম পুম্বনা দীপাৱলীগী কুহ্মৈ পাঙথোক্নরি। ভারতকী পুর্বঞ্চলদগী থাইলেন্দদা মশিং য়াম্লবা মীওইশিংনা লাক্লি। অমসুং ঙসি নোংপোক থংবা ভারত্তা অমসুং হৌজিক ভারত পুম্বদা সুর্য় দেব অমসুং ছথ মাইয়াগী কুহ্মৈ হরাও তয়াম্বগা লোয়ননা পাঙথোক্লি। ভারতকী মীয়াম লোয়ননা থাইলেন্দদা লৈরিবা মরুপশিংদা ঐহাক্না ছথ পুজাগী য়াইফ মঙ্গোল পীজরি।

মরুপশিং,

মসি থাইলেন্দদা লাকপা ঐহাক্কী অহানবা ওফিসিএল ওইবা খোঙচৎনি। চহি অহুমগী মমাংদা থাইলেন্দগী নীংথৌনা লৈখিদবা মতমদা ঐহাক্না ভারতকী মহুৎ শিন্দুনা মফম অসিদা লাক্তুনা হকথেংননা ইকাই খুম্নবা উৎচখি। অমসুং ঙসি থাইলেন্দগী অনৌবা নীংথৌনা পানবা মতম অসিদা অমসুং ঐহাক্কী মরুপ প্রধান মন্ত্রী প্রয়ুত চান ও চাগী চেবাও লাকপদগী ঐহাক্না ঙসি ইন্দিয়া-এসিয়ন সম্মিৎতা শরুক য়ানবা লাক্লি। ঐহাক্না নীংথৌগী ইমুং মনুং, কিংদম ওফ থাইলেন্দগী সরকার অমসুং থাই মরুপশিংবু ভারতকী মীওই করোর ১৩০গী মহুৎ শিন্দুনা য়াইফ পাউজেল পীজরি।

মরুপশিং,

থাইলেন্দগী নীংথৌগী ইমুং মনুংনা ভারতপু লুম্না লৌবা অসি ঐখোয়গী অচেৎপা অমসুং পুৱারীগী মরীশিংগী খুদম অমনি। রাজকুমারি মহাচাক্রি মশামক সংস্কৃত লোলগী স্কোলর অমনি অমসুং কলচর অসিদা থৱায় লুপচৈ। ভারতকী লোয়ননা মহাক্কী য়াম্না অচেৎপা মরী অমা লৈনৈ অমসুং লৌশিং হায়বা অসি পাকচাউই। ভারতনা মহাকপু পদ্ম ভুশন অমসুং সংস্কৃত এৱার্দ পীদুনা ইকাই খুম্নবা ফংজবা অসি য়াম্না লাইবক ফবা ৱাফম অমনি।

মরুপশিং,

মরী অসি অসুক য়াম্না চেৎলিবা অসি করম্ননো হায়বা অদোম খঙলব্রা? ঐখোয়গী মরক্তা লৈনরিবা অনকপা মরী অসিগী মরম করিনো? অমনা অমবু থাজবা, পুন্না হিংমিন্নবগী পুন্সি মহিং, ইংনা চিংক্না পাল্লিবা অসি কদায়দগী লাকপনো? ৱাহংশিং অসিগী অচম্বা পাউখুম অমা লৈ। তশেংবদি ঐখোয়গী মরী অসি শুপ্নবগী সরকার অনিগী মরক্তা লৈবা মরী খক্তা নত্তে। অমসুং মরী অসিগীদমক অখন্নবা সরকার অমত্তনা থৌদাং লৌখিদে অমসুং মখোয়গী মতমদা ওইখিবা নত্তে, ঐখোয়না মদু হায়বা য়ারোই। অচুম্বদি পুৱারীগী মীকুপ খুদিংমক, পুৱারীগী হীরম খুদিংমক, পুৱারীগী থৌদোক খুদিংমক্না মরীশিং অসি শেমগৎখি, পাকথোক চাউথোকহনখি, চেৎশিনহনখি অমসুং ফগৎহন্দুনা অনৌবা পনখৈশিং য়ৌহনখি। মরীশিং অসি থমোয়, থৱায়, থাজবা অমসুং স্পিরিচুএলিতীগীনি। জম্বুদ্বীপকী মীথোলোজিকেল পেরিয়দকী মতমদগী ভারতকী মমিং য়াওদুনা লাকখি। থাইলেন্দ অসি সুভর্নভুমিগী শরুক ওইরমখি। জম্বুদ্বীপ অমসুং সুর্ভনবুমি, ভারত অমসুং থাইলেন্দ মসি চহি লিশিং কয়াদগী মরী লৈনরকখি। ভারতকী খা, নোংপোক অমসুং নোংচুপ থংবা সমুদ্র খোঙবানশিং অসি সমুদ্রগী লম্বেল অমনা চহি লিশিং কবাগী মমাংদগী খা-নোংপোক এসিয়াগা শম্নহন্দুনা লাকখি। সমুদ্রগী ইপোম লাক্তা মাইল লিশিং কয়া হী হোন্দুনা মতম অদুদা হীরোইশিংনা শেম্লমখিবা চাউখৎপা অমসুং নাৎকী ওইবা মরী অদু ঙসিসু লৈরি। লম্বেল অসিগী খুত্থাংদা খক্তা সমুদ্রগী ললোন ইতিক তৌরমখি। মীয়াম্না লম্বেল অসিগী খুত্থাংদা চৎথোক-চৎশিন তৌরমখি। অমসুং লম্বেলশিং অসিগী খুত্থাংদা খক্তা ঐখোয়গী ইপা-ইপুশিংনা ধর্ম অমসুং ফিলোসোফী, লৌশিং অমসুং সাইন্স, লোল অমসুং সহিত্য, কলা অমসুং ঈশৈ-নোংমাই অমসুং মখোয়গী পুন্সিরোল শিয়র তৌরমখি।

ইচিল-ইনাওশিং,

ঐহাক্না তোয়না হায়জৈ মদুদি ভগৱান রামগী ইকাই খুম্নবা অমসুং ভগৱান বুদ্ধগী মীনুংশিং অনিমক অসি ঐখোয়গী অমত্তা ওইবা হেরিতেজনি। রামায়ননা ভারত মচা করোর কয়াগী পুন্সিদা ইথিল পীবগী মতৌগুম রামায়নগী চপ মান্নবা মতিক ময়াই থাইলেন্দ উবা ফংই। ভারতকী অয়োধ্যা অসি থাইলেন্দদা অয়ুতথ্যা ওইরি। অয়োধ্যাদা অমুক হন্না মপোক অমা পোকখিবা নারায়ন, মহাক্কী ইকাই খুম্নরবা অমসুং শেংলবা গরুদা অসি থাইলেন্দদা য়াম্না অখন্ননা লৌনৈ।

মরুপশিং,

লোলগী থাক্তা খক্তা নত্তনা ৱাখল্লোন্দসু ঐখোয় অমগা অমগা য়াম্না নক্নৈ। অদুক্কী মতিক নক্নবনা মরম ওইদুনা ঐখোয়না মসি খঞ্জিল্লুদে। খুদম ওইনা নখোয়না ঐঙোন্দা সৱাদি মোদী হায়রি। সৱাদী অসি সংস্কৃতকী ৱাহৈ স্বাস্তিগা মরী লৈনৈ। মসি সু প্লস অস্তি হায়বদি য়াইফবা হায়বনি। হায়বদি নখোয়গী য়াইফবা ওইরসনু হায়বনি। মীংগৌ নত্ত্রগা লাইনীংদা ওইরবসু ঐখোয়গী অচেৎপা মরীশিংগী খুদমশিং য়াওদুনা লৈরি।

মরুপশিং,

হৌখিবা চহি মঙা অসিদা ঐহাক্না মালেমগী লৈবাক কয়াদা চৎপগী খুদোংচাবা ফংজখি অমসুং মফম খুদিংমক্তা লৈবা ভারতকী মীয়াম উন্নবা, মখোয়গী মনাক্তা চৎনবা অমসুং মখোয়দগী থৌজাল নীজনবা মতম চুপ্পদা হোৎনৈ। অমসুং ঙসিসু ঐহাকপু থৌজাল পীনবা নখোয়না মশিং য়াম্না লাকপীরি। মসিগীদমক ঐহাক্না তৌবীমল খঙবা উৎচরি। অদুবু ঐহাক্না অসুম্না উন্নবা খুদিং ভারতকী সভ্যতাগী ফজরবা ইতিনফম অমা উবা ফংই। নখোয়না লৈবা মফম খুদিংমক্তা নখোয়দা ভারত উবা ফংই অমসুং ভারতকী কলচরগী ফজবশিং অমসুং সভ্যতা অদু নখোয়দা হিংদুনা থম্মিবা অসিদা ঐহাক্না য়াম্না চাউথোকচবা পোকই। লৈবাকশিং অদুগী লুচিংবশিং, বিজিনেস লীদরশিংনা ভারতকী মীওইশিংগী তেলেন্ত, হোৎনবা কনবা অমসুং দিস্সিপ্লিন অসি থাগৎনরকপা মতমদা ঐহাকসু চপ মান্ননা নুংঙাইবা পোকই। ঐহাক্না য়াম্না চাউথোকচবা পোকই। নখোয়না শান্তি লৈনা অমসুং ইংনা চিক্না লৈবগী মওং অসিদা থাজবা থম্মি। ভারতকী মীয়ামগী মসিগী শক্তম অসি অসিনা ভারত মচা খুদিংমক্কী ওইনা চাউথোকচবা পোক্নবগী ৱাফম অমা ওইরি, মসিগীদমক মালেম শিনবা থুংবদা লৈরিবা নখোয় পুম্নমকপু থাগৎফম থোকই।

মরুপশিং,

মালেমগী মফম অমা হেক্তদা ভারত মচাশিংনা লৈবদা মখোয়না ভারতকী মরী অদুমক থম্মিবা অসিদা ঐহাক্না নুংঙাইবা পোকই। মখোয়না ভারত্তা করি থোক্লি হায়বগী মরমদা পাউ অদুমক লৌই। অমসুং হৌখিবা চহি মঙা ভারতনা খুমাং চাউশিল্লিবা অসিগা লোয়ননা মালেম শিনবা থুংবদা লৈরিবা ঐহাক্কী ইরৈবাকচাশিংনা কোক ৱাংনা থাংগৎনা মশা ফনা চৎলি। মখোয়গী কনফিদেন্স শরুক কয়া শেনগৎলকই অমসুং মসি লৈবাক অসিগী মপাঙ্গলনি। মখোয়না মখোয়গী মপালগী মরুপশিংদা হায়বা য়ারনি, য়েংঙু – ঐহাক ভারত্তগী লাকপনি অমসুং ঐহাক্কী ভারতনা কয়াদা খোঙজেল য়াংনা খুমাং চাউশিল্লিবা। অমসুং মালেমদা লৈরিবা ভারত মচা অমা হেক্তনা করিগুম্বা অমা হায়বা মতমদা মালেমনা ঙসি য়াম্না মুন্না তারি। ভারত মচা করোর ১৩০না ঙসি অনৌবা ভারত অমা শেমগৎনবা থবক তৌরিবা অসি নখোয়না থাইলেন্দদসু খঙলমগনি। চহি ৫-৭ মমাংদা ভারত্তা লাক্লমখিবা মীওই কয়ানা ঙসি চৎপা মতমদা অহোংবা অসি উবা ফংগনি। ঙসি ভারত্তা লাক্লিবা অহোংবগী ফল অসিনা লৈবাক অসিগী মীয়াম, ইরৈবাকচাশিংনা ঐঙোন্দা অমুক হন্না থৌজাল পীনবীরি।

মরুপশিং,

ভারত অসি মালেমগী খ্বাইদগী চাউবা দেমোক্রেসীনি অমসুং মালেম পুম্বগী ওইনা ঐখোয়না খ্বাইদগী চাউবা দেমোক্রেসী ওইবা হায়বা অসি ঐখোয় পুম্নমক্কী ওইনা চাউথোকচবা পোক্নবগী ৱাফম অমনি অমদি মালেমনা মসি খঙনরি অদুবু দেমোক্রেসীগী খ্বাইদগী চাউবা কুহ্মৈ, মীখল করম তৌবগে হায়বা মসিদা য়াওবা মীওইশিংনা খঙবা ঙমগনি। মশানা মসি উজবা ফংগনি। চহি অসিগী জেনরেল ইলেক্সন্দা ভোতর মিলিয়ন ৬০০না ভোৎ থাদখি, মসি পুৱারীদা খ্বাইদগী ৱাংবনি। মালেমগী দেমোক্রেসীগী পুৱারীদা মসি খ্বাইদগী চাউবা কুহ্মৈনি অমসুং ভারত মচা খুদিংমক্না মসিগীদমক চাউথোকচবা পোক্কদবনি। অদোম খঙলবতা ভারতকী পুৱারীদা অহানবা ওইনা নুপী ভোত্তরশিংগী মশিং হায়বদি ভোৎ থাদবা নুপীশিংনা নুপাদগী তাদ্রে, নুপাগা মশিং চপ মান্ননা নুপীনসু ভোৎ থাদরি। মসি খক্তা নত্তে এম.পি. নুপী কয়ানা হান্নদগী হেন্না হন্দক্তি লোক সভাদা কারকখি। ঐখোয়না দেমোক্রেসীগীদমক লৌরিবা ঐখোয়গী ফিরেপ অসি য়াম্না চেৎলি অদোম তাবদা অঙকপা পোক্কনি মদুদি গুজরাতকী গীর উমংদা ভোত্তর অমা খক্তা লৈ, শুপ্নগী অমা, মদুসু চীংখোংদা লৈবা উমংদা। ভোত্তর অমা খক্তগীদমক তোখাইবা পুলিস বুথ অমা শাখি। মসি ঐখোয়গীদমক দেমোক্রেসী অসি কয়াম চাউবগে, কয়াম মরু ওইবগী হায়বগী খুদমনি।

ইচিল-ইনাওশিং,

ভারত্তা দিকেদ তরুক্কী মতুংদা হায়বদি চহি ৬০গী মতুংদা সরকারনা চহি মঙাগী তর্ম লোইরবা মতুংদা হেন্না চাউবা মেন্দেৎ অমা ফংখি মসি নখোয়গীদমক্তদি পাউ অমা ওইরগনি। মসি চহি ৬০গী মমাংদা থোকখ্রে অমসুং অহানবা ওইনা চহি ৬০গী মতুংদা থোক্লি। অমসুং মসিগী মরম অসি ভারতনা হৌখিবা চহি মঙাদা মাইপাকখিবশিং অদুনা ওইরি। মসিনা তাকপদি ভারতকী মীয়ামগী অনীংবা অপাম্বশিং অমসুং থাজবা অসি হেনগৎলে তাকপনি। ঐখোয়না ওইথোক্লরোই খল্লবা পান্দমশিং থুংহন্নবা মাইকৈদা হৌজিক থবক পাইখৎলি। ভারতনা হিংসা অমসুং তোখাই তাবগী মরু হুলহনগদবা অচৌবা মরম অমগীদমক লৈবাক অসি লিবরেৎ তৌনবগী ৱারেপ লৌখিবা অদু নখোয় পুম্নমক্না খঙলমগনি। ঐখোয়না করি তৌখিবগে খঙলব্রা? ঐখোয়না করি তৌখি? থাইলেন্দদা লৈবা ভারত মচা খুদিংমক্না ভারতনা করি তৌখিবগে খঙই। অচুম্বা ৱারেপ লৌবা মতমদা, ফিরেপ চুম্বা মতমদা মদুগী খোঞ্জেল অদু মালেম শিনবা থুংবনা তাবা ফংগনি অমসুং ঙসি মসি থাইলেন্দদা তাবা ফংলি। নখোয়না লেপতুনা ইকাই খুম্নবা উৎলিবা অসি ভারতকী সংবিধানগীনি, ভারতকী মেম্বর ওফ পার্লিয়ামেন্তগীনি। নখোয়গী মীনুংশিং, নখোয়গী থৱায় য়াওবা অমসুং নখোয়গী তেংবাংনা ভারতকী পার্লিয়ামেন্তরিয়ন মেম্বর খুদিংমক্কী য়াম্না অচৌবা শক্তি অমা ওইরগনি। মসিগীদমক ঐহাক্না তৌবীমল খঙবা উৎচরি, ময়াম ফমথবীয়ু। থাগৎচরি।

মরুপশিং,

হন্দক্তা গান্ধীজীগী ১৫০শুবা মপোক কুমওন্দা ভারতনা মশাবু ওপন দেফিকেসন ফ্রী ওইরে হায়না লাউথোকখি। মসি খক্তা নত্তে ঙসি ভারতকী লায়রশিংগী চাকশঙ অসি মৈখু চেন্দ্রে। ঐখোয়না চহি ৩গী মনুংদা য়ুম করোর ৮দা এল.পি.জি. গ্যাস কন্নেক্সন পীখি। করোর ৮ হায়বা অসি থাইলেন্দগী অপুনবা মীশিংদগী হেন্না য়াম্মি। মালেমগী খ্বাইদগী চাউবা হেল্থকিয়র স্কিম, আয়ুশ্মান ভারতনা ঙসি লুপা লাখ ৫ ফাওবগী ভারত মচা করোর ৫০দা লেম্না লায়েং ফংহল্লি। স্কিম অসি হন্দক্তা চহি অমা মপুং ফাখি অদুবু মসিগী মখাদা মীওই লাখ ৬০না লেম্না লায়েং ফংলি।

মরুপশিং,

হৌখিবা চহি ৫দা ঐখোয়না ভারত মচা খুদিংমকপু বেঙ্ক একাউন্তগা কন্নেক্ত তৌখি, ইলেক্ত্রিসিতী কন্নেক্সনগা কন্নেক্ত তৌখি অমসুং হৌজিক ঐখোয়না মিসন অমা হৌরক্লি মসিনা য়ুমথোং খুদিংদা ঈশিং মরাং কাইনা ফংহন্নবা মাইকৈদা থবক তৌরি। ২০২২দা ভারতনা নীংতম্বগী চহি ৭৫ শুরকপা মতমদা লায়রবা খুদিংমক্কী পক্কাগী য়ুমশিং শানবা খোঙথাংশিং লৌখৎলি। ভারতকী মাইপাকপশিংগী মতাংদা নখোয়না তাবা মতমদা চাউথোকচবা হেনগৎকনি।

মরুপশিং,

ঐহাক্না ঙসি স্তেজতা কাদ্রিঙৈগী মমাংদা ঐহাক্না ভারতকী অথৌবা মপার অনিগী কোম্মেমোরেতিব সাইন ফোঙবগী খুদোংচাবা ফংজখি। চহি ৩-৪গী মমাংদা সন্ত তিরু ভল্লুবরগী মেগনম ওপস তিরুকুরলগী গুজরাতি ৱাহন্থোক ফোঙবা ফংজখিবা অদু নীংশিংলি। অমসুং হৌজিক তুরুকুরলগী ৱাহন্থোক থাই লোলদা হন্দোকপ্না লমদম অসিগী মীয়ামদা চাউনা কান্নবা পীগনি হায়না ঐহাক্না থাজৈ। মরমদি মসি লাইরিক অমা খক্তা ওইবতা নত্তনা পুন্সি হিংবদা লমজিং মৈরা অমা ওইরি। চহি লিশিং অনি মখাই হেল্লা অরিবা লাইরিক অসিদা য়াওরিবা লৌশিং অসি ঙসিদি ঐখোয়গী য়াম্না মমল লৈবা হেরিতেজ ওইরি। খুদম ওইনা সন্ত তিরু ভল্লুরনা হায়রম্মি – তালাত্রি তান্দ পোরুল-এল্লাম তক্কারক বেলনামৈ সেদার পোরুতত্তি। মসিগী ৱাহন্থোক্তি মতিক চাবা মীশক অমনা কন্না হোৎনদুনা শেল তাল্লি মদু অতোপ্পগী য়াইফনবা শীজিন্নৈ। ভারত অমসুং ভারত মচাশিংনা মসিগী ৱাখল্লোন্দগী ইথিল লৌরি।

মরুপশিং,

ঙসি গুরু নানক দেবজীগী ৫৫০শুবা প্রকাশোৎসবকী থৌরমদা নীংশিং শেনয়েক ফোঙলি। অমসুং চহি ৫০গী মমাংদা বেঙ্কোক্তা গুরু নানক দেবকীগী ৫০০শুবা প্রকাশোৎসব অসি চাউনা পাঙথোকখি হায়না ঐঙোন্দা পাউদম্বীরকখি। ঐহাক্না থাজৈ মদুদি মহাক্কী ৫৫০শুবা প্রকাশোৎসব অসিসু চপ মান্নবা মওংদা চাউনা পালন তৌগনি। ফিৎসা-নুলোক নত্ত্রগা বিষ্ণুলোক্তা সিখ ফুরুপনা শাখিবা গুরুনানক দেবজী গার্দেন অসি শীংথানীংঙাই ওইবা খোঙথাং অমনি।

ইচিল-ইনাওশিং,

শেংলবা কুহ্মৈ অসিদা ভারত সকরারনা হৌখিবা চহি অমা অসিদা বেঙ্কোক য়াওনা মালেম শিনবা থুংবদা প্রোগ্রামশিং পাঙথোক্লি। গুরু নানক দেবজী অসি ভারত খক্তগী নত্তে, সিখ পন্থ খক্তগী নত্তে অদুবু মহাক্কী ৱাখল্লোন অমসুং মহাক্না ৱা ঙাংখিবা অদু মালেম পুম্বগী, মীওইবা জাতি পুম্বগী হেরিতেজ ওইরি। অমসুং ভারত মচা ঐখোয়না মালেমদা ঐখোয়গী হেরিতেজকী কান্নবা অসি ফংহন্নবগী অখন্নবা থৌদাং লৌগদবনি।

মরুপশিং,

নুমিৎ খরনিগী মতুংদা করতারপুর সাহিব ফাওবা দাইরেক্ত কন্নেক্তিবিতী লৈহল্লগনি। নবেম্বর ৯দা করতারপুর কোরিদোর হাংদোক্লবা মতুংদা হৌজিক ভারত্তগী ভক্তাশিংনা করতারপুর সাহিবতা হকথেংননা চৎপা ফংলগনি। ভারত্তা লাক্তুনা গুরু নানক দেবজীগী লেগেসী অসি য়েংবীরনবা হায়জরি।

মরুপশিং,

ভারত্তা ভগৱান বুদ্ধগা মরী লৈনবা তীর্থ য়াত্রাগী মফমশিংদা মীৎয়েং চংনবা সরকারনা থবক কন্না পাইখৎলি। লদাখতগী বোথ গয়া, সারনাথতগী সাঞ্চি ফাওবা ভগৱান বুদ্ধগা মরী লৈনবা মফমশিংদা কন্নেক্তিবিতীগী ওইবা অমুক্তা উখিদ্রিবা মওংদা খোঙথাংশিং পাইখৎলি। অসিগুম্বা মফমশিং অসি বুদ্ধ সর্কিত হায়না শেমগৎলি। মফম অসিদা মতমগা চুনবা ফেসিলিতী থম্লি। থাইলেন্দগী নখোয়গী মরুপশিংগা লোয়ননা মফম অদুদা চৎপদা নখোয়না অমুক্তা ফংখিদ্রিবা এক্সপরিয়েন্স ফংগনি।

মরুপশিং,

ঐখোয়গী অরিবা ললোন ইতিক্কী মরীশিংদা তেক্সতাইলনা মরু ওইবা থৌদাং লৌরি। হৌজিক তুরিজমনা মসিগী লিঙ্ক অসি মপাঙ্গল হাপ্পি। ভারতনা থাইলেন্দ য়াওনা অপুনবা এসিয়ন রিজনগী পাম্নরবা দেস্তিনেসন ওইরক্লি। হৌখিবা চহি ৪দা ভারতনা ত্রেবেল এন্দ তুরিজমগী গ্লোবেল ইন্দেক্সতা ১৮শুবা রেঙ্কতা হাইগৎলকখি। তুরিজমগী মরীশিং অসি তুংদা হেন্না মপাঙ্গল কল্লক্কনি। হেরিতেজ, স্পিরিচুএল অমসুং মেদিকেল তুরিজমগা মরী লৈনবা ঐখোয়গী ফেসিলিতীশিং অসি মপাঙ্গল হেন্না কনখৎহনখি। মসি খক্তা নত্তে তুরিজমগী কন্নেক্তিবিতী ইনফ্রাস্ত্রকচরদা অমুক্তা ওইখিদ্রিবা মওংদা থবক পাইখৎখি।

মরুপশিং,

ঐহাক্না মফম অসিদা এসিয়ন-ইন্দিয়া অমসুং মরী লৈনবা মীফমশিংগীদমক লাকখি। তশেংবদি ঐখোয়গী সরকারগী ফোরেন পোলিসীগী মরু ওইবা অসি এসিয়ন লৈবাকশিংগা লোয়ননা ঐখোয়গী মরী ফগৎহনবনি। মসিগীদমক ঐখোয়না এক্ত ইস্ত পোলিসীদা অখন্নবা মীৎয়েং থমখি। মমাং চহিদা ইন্দিয়া-এসিয়ন পার্তনরশিপ দাইলোগকী সিলভর জুবিলী পাঙথোকখি। মসি এসিয়ন লৈবাক তরাগী মকোক থোংবা লুচিংবশিংনা অমত্তা ওইনা ভারত্তা পাঙথোকপা কম্মেমোরেতিব সম্মিৎতা শরুক য়াখিবা অহানবনি অমসুং মখোয়না জুনুৱারী ২৬তা রিপব্লিক দেদা লাকপীখি।

ইচিল-ইনাওশিং,

মদু শুপ্নগী দিপ্লোমেতিক ইভেন্ত ওইখিদে। এসিয়নগা ভারতকী লৈনরিবা কলচরগী মরী অসি রিপব্লিক দে পরেদতা উবা ফংখিদ্রবসু মদুনা ভারতকী কাচিন কোয়া য়ৌখি।

মরুপশিং,

থাইলেন্দ অমসুং অতোপ্পা এসিয়ন লৈবাকশিংগা শম্নহন্নবা ফিজিকেল নত্ত্রগা দিজিতেল ইনফ্রাস্ত্রকচর ওইরবসু ঙসি ভারতকী ৱর্ল্দ ক্লাস ফেসিলিতীশিং অসি পাকথোক চাউথোরক্লি। নোংথক, সমুদ্র নত্ত্রগা মখাগী লম্বী ওইরবসু ভারত অমসুং থাইলেন্দনা খোঙজেল য়াংনা খুমাং চাউশিল্লি। ঙসি লৈবাক অনিগী মরক্তা চয়োল খুদিংগী ফ্লাইৎ ৩০০রোম পাইরি। ভারতকী দেস্তিনেসন ১৮না থাইলেন্দগা হকথেংননা শম্নরি। ঙসি লৈবাক অনিগী মরক্তা লৈরিবা দেস্তিনেসন অনিগী মরক্তা লৈরিবা এভরেজ ফ্লাইৎ তাইম অসি পুং ২দগী ৪গী মনুংদা লৈরি। মসি ভারত মনুংদা পাইবগা মান্নরি। ঐহাক্কী পার্লিয়ামেন্তরী কন্সতিত্যুন্সী, মালেমগী খ্বাইদগী অরিবা সহর, কাশী অসিদা হৌজিক চহি অসিগী বেঙ্কোক্কা দাইরেক্ত ফ্লাইৎ লৈরে অমসুং মসি পাম্নরক্লি। মসিনা মরম ওইদুনা ঐখোয়গী অরিবা কলচরশিংগী মরী অসি শক্তি লৈরক্লি অমসুং বুদ্ধিস্ত তুরিস্ত মশিং য়াম্না সারনাথতা লাক্লি। ঐখোয়না ভারতকী অৱাং নোংপোক্তগী থাইলেন্দ ফাওবা কন্নেক্ত তৌবদা মীৎয়েং থম্লি। ঐখোয়না অৱাং নোংপোক ভারত অসিবা খা নোংপোক এসিয়াগী গেৎৱে ওইনা শেমগৎলি। মসি ঐখোয়গী এক্ত ইস্ত পোলিসী অমসুং থাইলেন্দগী এক্ত ৱেস্ত পোলিসী মপাঙ্গল কনগৎহনবদা মতেং ওইরগনি।  হন্দক্কী ফেব্রুৱারীদা বেঙ্কোক্তা মসিগী ৱাখল্লোন অসিগী লোয়ননা অহানবা ওইনা ভারতকী মপালদা নোর্থ ইস্ত ইন্দিয়া ফেস্তিবেল পাঙথোকখি। মসিনা থাইলেন্দদা অৱাং নোংপোক ভারতকী মরমদা খঙনীংবা অমসুং ভাব তাবা হেনগৎহনখি হায়না ঐঙোন্দা পাউদমলকখি। অমসুং ইন্দিয়া-ম্যান্মার-থাইলেন্দ হায়ৱে হায়বদি ত্রাইলেতরেল হায়ৱে অসি লোইরবা মতুংদা অৱাং নোংপোক ভারত অমসুং থাইলেন্দগী মরক্তা অপনবা লৈতবা কন্নেক্তিবিতী লৈহল্লগনি। মসিনা অপুনবা লমদম অসিদা ললোন-ইতিক হেনগৎহনগনি অমসুং তুরিজমদা হেন্না শক্তি পীরগনি।

ইচিল-ইনাওশিং,

থাইলেন্দগী শেন্মীৎলোন মপাঙ্গল কনখৎহনবদা নখোয় পুম্নমক্না মরু ওইবা থৌদাং অমা লৌরিবা অসিদা ঐহাক্না নুংঙাইবা পোকই। থাইলেন্দ অমসুং ভারতকী মপাঙ্গল কনবা ত্রেদ অমসুং কলচরেলগী মরীশিং অসিগী নখোয়না শক্তি লৈরিবা লিঙ্কনি। ঙসি ভারত অসি মালেমদা খোঙজেল য়াংনা চাউখৎলিবা ইকনোমীশিংগী মনুংদা অমা ওইরি। লাক্কদৌরিবা চহি ৫ অসিদা ভারতনা দোলর ত্রিলিয়ন ৫গী ইকনোমী ওইরগনি। পান্দম অসি ফংনবা মাইকৈদা ঐখোয়না চংশিল্লি মসিদা নখোয়গী থৌদাং য়াম্না মরু ওই।

মরুপশিং,

ঙসি ঐখোয়না ভারতকী ইনোভেতিব মাইন্দ অমসুং তেলেন্ত পুক্নিং থৌগৎলি। ইনফোর্মেসন অমসুং কম্ম্যুনিকেসন তেক্নোলোজীদা তৌরিবা থবক, খোঙথাং অসিনা থাইলেন্দনসু মসিদগী কান্নবা ফংলি। স্পেস তেক্নোলোজী, বাইও-তেক্নোলোজী নত্ত্রগা ফার্মা ওইরবসু ভারত অমসুং থাইলেন্দগী মরক্তা পীনরিবা তেংবাং অসি হেনগৎলক্লি। হন্দক্তা ঐখোয়গী সরকারনা ভারত অমসুং এসিয়ন লৈবাকশিংগী মরক্তা রিসর্চ অমসুং দিবেলপমেন্তগী লমদা মরু ওইবা ৱারেপ অমা লৌখি। ঐখোয়না এসিয়ন লৈবাকশিংগী নহারোল লিশিং অমদা আই.আই.তি.শিংদা পোস্ত-দোক্তরেল ফেলোশিপ তৌহন্নবা ৱারেপ লৌখি। ঐহাক্না থাইগী মরুপ অমসুং মহৈরোয়শিংদা মসিগী কান্নবা লৌনবা হায়জরি।

মরুপশিং,

হৌখিবা চহি ৫দা ঐখোয়না মালেমগী মফম শিনবা থুংবদা লৈরিবা ভারত মচা খুদিংমক্কীদমক সরকার অসি লৈহন্নবা হোৎন্দুনা লাকখি। ভারতকা লোয়ননা লৈনরিবা মরী মপাঙ্গল কনখৎহন্নবা হোৎন্দুনা লাকখি। মসিগীদমক ও.সি.আই. কার্দ স্কিম অসি ফ্লেক্সিবল ওইহনখি। ঐখোয়না ও.সি.আই. কার্দ হোল্দরশিংনা অনৌবা পেন্সন স্কিমদা এনরোল তৌবা য়ানবা ৱারেপ লৌখি। ঐখোয়গী এম্বেসীশিংনা হৌজিক নখোয়গী সমস্যাশিং কোকহন্নবা প্রোএক্তিব ওইনা হোৎনরি, পুং ২৪ মতেং পাংনবা লৈরি। ঐখোয়না কন্সুলর সর্ভিসেস হেন্না কানহন্নবা মওংদা থবক তৌরি।

মরুপশিং,

ঙসি করিগুম্বা ভারতনা মালেমদা অনৌবা পনখৈ য়ৌবা ঙম্লবদি মদুদা নখোয়গুম্বা মরুপশিংগী থৌদাং য়াম্না চাউই। ঐখোয়না থৌদাং অসি হেন্না মপাঙ্গল কনখৎহনবা তাই অমসুং ঐহাক্না থাজৈ মদুদি নখোয়না মফম অমা হেক্তদা লৈরবসু, রিসোর্স অমা হেক্তা লৈরবসু, মতিক-ময়াই অমা হেক্তা লৈরবসু ইমা ভারতকী শেবা তৌনবা খুদোংচাবা অমা নখোয়না শোইদনা ফংগনি। থাজবা অসিগা লোয়ননা ঐহাকপু থৌজাল পীনবীনবা মফম অসিদা লাকপীরিবা মশিং য়াম্লবা মীয়ামবু থমোয় শেংনা তৌবীমল খঙবা উৎচরি।

নুংঙাইবা ফোঙদোকচরি।

থাগৎচরি!

খোপ খুন খপ!!!

খঙহঞ্জবা: পি.এম.গী ৱারোল অসি হিন্দীদা পীখিবনি। মসি ৱারোল অসিগী চাউরাকপা ৱাহন্থোক্নি।

****