থৌরম অসিদা শরুক য়াবীরিবা মন্ত্রী মন্দলগী ঐহাক্কী মরুপশিং, শ্রী হরদীপ সিংহ পুরীজী, রাজ্য মন্ত্রী শ্রী কৌশল কিশোরজী, মীনাক্ষী লেখীজী, দিল্লীগী অপরাজ্যপাল শ্রী বিনয় কুমার সক্সেনাজী, দিল্লীগী ইকাই খুম্নরবা এম.পি.শিং, অতোপ্পা দিগনিতরী পুম্নমক অমসুং নুংঙাইবনা থল্লবা বেনিফিসরী ইচিল-ইনাওশিং!

বিজ্ঞান ভবন্দা থৌরম কয়া পাঙথোকই। কোত তাই তৌবা মীওই কয়া তিল্লি। অদুবু ঙসি ঐখোয়গী ইমং-মনুংগী মীওই পুম্নমক মফম অসিদা উবা ফংজবগী মওং। মখোয়গী থৱায় য়াওবা অদু ময়েক শেংনা উবা ফংই। মখোয়না বিজ্ঞান ভবন অসি তাংনা উবা ফংই। ঙসি দিল্লীগী ইমুং কয়াগী, ঐখোয়গী লায়রবা ইচিল-ইনাও কয়াগী ওইনা মরু ওইবা নুমিৎ অমনি। চহি কয়া দিল্লীগী স্লমশিংদা লৈরম্বা ইমুংশিংগীদমক ঙসি অসি মখোয়গী পুন্সিগী অনৌবা অহৌবা অমনি। দিল্লীগী লায়রবা ইমুংশিংদা পক্কাগী য়ুম পীবগী হৌদোকখিবা কেম্পন অসিনা মফম অসিগী লায়রবা ইমুং কয়াগী মঙলান থুংহল্লগনি। ঙসি বেনিফিসরী কয়ানা মফম অসিদা মখোয়গী য়ুমশিংগী শো ফংলগনি। অমসুং ঐহাক্না ইমুং ৪-৫গা উনবগী খুদোংচাবা ফংজখি। ঐহাক্না মখোয়গী মাইথোংদা হরাওবা অমসুং নুংঙাইবগী মমি তাবা উবা ফংখি অমসুং মহাক্না হরাওবগী মতৌ অদুদা মহাক্না মথমোয়দা ফাওবা নুংঙাইবা অদু মমি তাখি। কালকাজী এক্সতেন্সনগী অহানবা তাঙ্কক খক্তদা য়ুম লিশিং ৩ হেন্না শাখি অমসুং য়াম্না থুনা অতোপ্পা ইমুংশিংসু মফম অসিদা লৈনবগী খুদোংচাবা ফংলগনি। তুংদা লাক্কদবা মতমশিংদা ভারত সরকারগী খোঙথাংশিং অসিনা দিল্লীবু মোদেল সিতী অমা ওইহনবদা অচৌবা থৌদাং অমা লৌরগনি হায়না ঐহাক্না থাজৈ।

মরুপশিং,

দিল্লীগুম্বা অচৌবা সহরশিংদা ঐখোয়না উরিবা চাউখৎ-থৌরাং, অচৌবা মঙলানশিং অমসুং পনখৈশিং অসিনা ঐহাক্কী লায়রবা ইচিল-ইনাওশিংগী হুমাং মমল, মখোয়গী হোৎনজমলগী য়ুম্ফম ওইরি। অদুবু লাইবকথিবদি সহরশিং চাউখৎহনবদা তারিবা হুমাং অসু লায়রবশিংগীনি, অদুবু মখোয়না হায়রিবা সহর অদুদা ফীভম চাদ্রবা পুন্সি মহিং অমা হিংলি হায়বা অসি অচুম্বনি। কনস্ত্রক্সন ৱার্করশিং শোত্থনা লৈরবদি কনস্ত্রক্সনসু মপুং ফাবা ঙমদে মসিনা মরম ওইদুনা হৌখিবা দিকেদ ৭ অসিদা ঐখোয়গী সহরশিংদা হোলিস্তিক দিবেলপমেন্ত, বেলেন্স দিবেলপমেন্ত লৈতনা লাকখি। দলান অৱাংবা লৈবা সহরগী মফমশিংনা পুমলং লংখি অমরোমদনা থংননা লৈরিবা স্লমশিংনা ফীভম শোক্না লৈখি। নাকল অমরোমদা সহরগী মফম খরবু পোস এরিয়া কৌখি অমরোমদনা মফম কয়াদা মীয়াম্না পুন্সিগী তঙাই ফদবা খুদোংচাবশিংগীদমক খৌরাংনা ঙাইদুনা লৈখি। খেন্নবনা থল্লবা মতম সহর অদুদা করম্না হোলিস্তিক দিবেলপমেন্ত পুরকপা ঙমগনি। আজাদী কা অমৃত কাল অসিদা ঐখোয়না খেন্নবা অসি মেনখৎকদবনি। মরম অসিনা ঙসি লৈবাক অসিনা ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’কী মন্ত্র ঙাক্না চৎতুনা পুম্নমক চাউখৎনবা হোৎনরি।

মরুপশিং,

দিকেদ কয়া লৈবাক অসিদা লৈরম্বা সিস্তেমদা লৈতা লায়রবা হায়বা অসি লায়রবশিংগী সমস্যা খক্তনি হায়বগী ৱাখল্লোন লৈরমখি। অদুবু লৈবাক অসিদা ঙসি পাল্লিবা সরকার অসি লায়রবশিংগী সরকারনি অদুনা ঐখোয়না লায়রবশিংবু মরোমদোম থাদোক্তুনা থমলোই অমসুং ঙসি লায়রবশিংদা লৈবাক অসিগী থৌশিল-থৌরাংশিংনা মীৎয়েং চংলি। ঙসি লৈবাক অসিনা ৱারেপ লৌবা মতমদা লায়রবশিংগী খল্লি। ঐখোয়গী সরকারনা সহর অসিদা লৈরিবা লায়রবা ইচিল-ইনাওশিংদা চপ মান্নবা মীৎয়েং য়েংলি।

মরুপশিং,

দিল্লীদা মীওই লাখ ৫০ হেনবনা বেঙ্ক একাউন্ত ফাওবা লৈতে হায়বা অসি খঙবদা অঙকপা পোক্কনি। মীওইশিং অসি ভারতকী বেঙ্কিং সিস্তেমগা কন্নেক্ত তৌদে, মখোয়না বেঙ্কশিংনা পীবা কান্নবা খুদিংমক ফংদনা লাকখি। তশেংবদি লায়রবশিংনা বেঙ্ককী থোংজিলদা লেপ্পদা অকিবা পোকখি। মীওই অসিনা দিল্লীদা লৈজরবসু মখোয় অসি দিল্লীদগী লাপ্না লৈবগুম্না ফাওই। ঐখোয়গী সরকারনা ফীভম অসিদা অহোংবা পুরকখি। কেম্পেনগী খুত্থাংদা দিল্লীগী লায়রবা অমসুং লৈবাক্কী লায়রবশিংগী বেঙ্ক একাউন্তশিং হাংহনখি। কনাগুম্বা অমত্তনা মসিনা মখোয়দা করি কান্নবা পীগনি খঙলমখিদে। ঙসি দিল্লীগী লায়রবশিংনা সরকারগী স্কিমশিংগী দাইরেক্ত বেনিফিতশিং ফংলি। ঙসি দিল্লীদা মরুপ লিশিং কয়ানা স্ত্রীৎ ভেন্দরশিং হাংদোক্লি, মনা-মশিং অমসুং উহৈ-ৱাহৈ য়োল্লি। মরুপ কয়ানা ওতো-রিক্ষো, তেক্সি থৌরি। ঙসি ভিম-য়ু.পি.আই. লৈতবা মীওই অমত্তা লৈত্রে। শেলশিং হকথেংননা মোবাইলদা য়ৌরকই, পেমেন্তসু মোবাইলদগী তৌরি। মসিনা অচৌবা ফাইনান্সিএল সেক্যুরিতী ফংহল্লি। বেঙ্কিং সিস্তেমগা কন্নেক্ত তৌনবা মসিগী শক্তি অসিনা পি.এম. স্বনিধি য়োজনাগী য়ুম্ফম ওইখি। স্কিম অসিগী মখাদা সহর অসিদা লৈরিবা ঐখোয়গী স্ত্রীৎ ভেন্দরশিংদা মখোয়গী থবক্কীদমক শেলগী তেংবাং পীরি। অমসুং ঐহাক্না নুংঙাইবা পোকই মদুদি দিল্লীগী স্ত্রীৎ ভেন্দর লিশিং ৫০ হেনবা অসি ফম্লিবা ঐখোয়গী ইচিল-ইনাওশিংনা স্বনিধি য়োজনাগী কান্নবা লৌরি। মসিগী মথক্তা মু্দ্রা য়োজনাগী মখাদা গরেন্তী য়াওদনা লুপা করোর লিশিং ৩০গী তেংবং পীদুনা দিল্লীগী অপীকপা ওন্তপ্রিনোরশিংদা মতেং পাংখি।

মরুপশিং,

ঐখোয়গী লায়রবা মরুপশিংনা রাশন কার্দশিংগা মরী লৈনবা খুদোংচাদবশিংনা মরম ওইদুনা অচৌবা শীংনবা অমা মায়োক্নরি। ঐখোয়না ‘ৱন নেসন, ৱন রাশন কার্দ’ হৌদোক্তুনা দিল্লীগী লায়রবা লাখ কয়াগী পুন্সি লাইথোকহনখি। অতোপ্পা রাজ্যশিংদগী লাকপা ঐখোয়গী মাইগ্রেন্ত শিন্মীশিংনা মমাংদা মখোয়গী রাশন কার্দশিং অদু শীজিন্নফম খঙদনা লৈরকখি। মদু শুপ্নগী চেজেৎ অমা ওইনা তাদুনা লৈখি। মসিনা মখোয়দা রাশনগী সমস্যা মায়োক্নহনখি। মসিগী অৱাবা অসি ‘ৱন নেসন, ৱন রাশন কার্দ’কী খুত্থাংদা কোকহল্লি। দিল্লীগী লায়রবশিংনা কোরোনাগী মালেমগী লাইচৎকী মতমদা স্কিম অসিগী কান্নবা লৌখি। গ্লোবেল ক্রাইসিসকী মতমদা কেন্দ্র সরকারনা হৌখিবা চহি অনি অসিদা দিল্লীগী মীয়ামদা লেম্না রাশন ফংহল্লি। দিল্লী খক্তদা কেন্দ্র সরকারনা লুপা করোর লিশিং অনি মখা হেন্না চাদিং তৌখি। ঐখোয়না তৌখিবশিং অদু পারুবদা মতম কোন্নররোই। ঐখোয়না পাম্বদি নখোয়গী পুন্সিদা অহোংবা অমা পুরকপনি।

মরুপশিং,

দিল্লীদা কেন্দ্র সরকারনা লায়রবা মীওই লাখ ৪০ হেনবদা ইন্সুরেন্স কবরসু পীখি। হীদাক লাংথক্কী মমল হন্থহন্নবা জন ঔশাধি কেন্দ্রশিংগী খুদোংচাবা পীরি। পুন্সিদা মসিগী সেক্যুরিতী অসি লৈরবা মতমদা লায়রবশিংনা ঙম্বা চাংদা পোত্থদনা থবক শুবা ঙম্মি। মহাক্না মশাবু লৈতা লায়রবা কোকহন্নবা, মাইথিবা পীনবা থবক তৌরি। লায়রবা অমগী পুন্সিদা অৱাবা কয়াম মায়োক্নবগে হায়বা অসি লায়রবা মীশক অমা নত্তনা কনাগুম্বনা হেন্না খঙবা ঙমলোই।

মরুপশিং,

দিল্লীদা মায়োক্নরিবা অতোপ্পা সমস্যা অমনা দিকেদ কয়াগী মমাংদা শেমগৎখিবা অনওথোরাইজ ওইবা কোলোনীশিংনি। ঐখোয়গী ইচিল ইনাও লাখ কয়ানা কোলোনীশিং অদুদা লৈরি। মহাক্না পুন্সি চুপ্পা মহাক্কী য়ুম অসিদা করি তৌরকপা য়াবগে হায়বগী অকিবগা লোয়ননা হিংলি। কেন্দ্র সরকারনা দিল্লীগী মীয়ামগী সমস্যা কোকহন্নবা থবকসু তৌরি। পি.এম.-উদয় য়োজনাগী খুত্থাংদা দিল্লীদা লৈরিবা অনওথোরাইজ কোলোনীশিংদা শারিবা য়ুমশিং রিগ্যুলরাইজ তৌনবা থবক পাইখৎলি। হৌজিক ফাওবদা মীওই লিশিং কয়ানা য়োজনাগী অসিগী কান্নবা ফংখ্রে। কেন্দ্র সরকারনা দিল্লীগী মিদল ক্লাসশিংদা মখোয়গী য়ুমগী মংজরিবা মঙলান অদু থুংহন্নবা মতেং কয়া ফংখি। দিল্লীগী লোৱর অমসুং মিদল ক্লাসকী মীয়াম্না মশাগী য়ুম শাবা ঙমজনবা মখোয়দা কেন্দ্র সরকারনা ইন্তরেস্ত সবসিদী পীরি। মসিদা কেন্দ্র সরকারনা লুপা করোর ৭০০ হেন্না চাদিং তৌখ্রে।

মরুপশিং,

কেন্দ্র সরকারগী পান্দমদি দিল্লীবু লৈবাক্কী কোনুং অমা ওইবগী থাক অসিগা মরী লৈননা তঙাই ফদবা হীরম খুদিংমক লৈবা মশক থোকপা শহর অমা ওইহনবনি। দিল্লীগী মীয়াম, দিল্লীগী লায়রবা, দিল্লীগী য়াম্লবা মিদল ক্লাস মখোয়না দিল্লীগী চাউখৎ-থৌরাং খোঙজেল য়াংশিনহন্নবা ঐখোয়না পায়খৎখিবা থবক্কী শাখি ওইরি। হন্দক লাল কিলাদগী ঐহাক্না লৈবাক অসিগী এস্পিরেস্নেল সোসাইতীগী মতাংদা ৱা ঙাং ঙাংখি। দিল্লীগী লায়রবা নত্ত্রগা মিদল ক্লাসতা এস্পিরেস্নেল অমসুং ফিনোমিনেল তেলেন্ত লৈ। মহাক্কী খুদোংচাবা, মহাক্কী অনীংপা অপাম্বা থুংহনবা হায়বা অসি সরকারগী খ্বাইদগী মরু ওইবা থৌদাংনি।

মরুপশিং,

ঐখোয়গী সরকারনা ২০১৪দা লাকপা মতমদা দিল্লী-এন.সি.আর.দা কিমি ১৯০ খক্তগী মেত্রো চেলমখি। ঙসি দিল্লী-এন.সি.আর.গী মেত্রো এক্সপান্সন অসি কিমি ৪০০দা হেনগৎহনখি। হৌখিবা চহি ৮ অসিদা মফম অসিদা অনৌবা মেত্রো স্তেসন ১৩৫ শাখি। ঙসি দিল্লীদা লৈবা কোলেজ চৎলিবা ইচানুপা অমসুং ইচানুপীশিং, থবক তৌরিবা য়াম্লবা মীয়াম্না মেত্রো সর্ভিস অসিগীদমক থৌবীমল খঙবা উৎনবা চিথীশিং ইরক্লি। মেত্রো ফেসিলিতীশিং পাকথোক চাউথোরকপা লোয়ননা মখোয়গী শেল অদু নুমিৎ খুদিংগী তুংশিনবা ঙম্লি অমসুং মতমসু মাংহনদ্রে। ত্রাফিক চিনবগী খুদোংচাদবা অসিদগী দিল্লীগী অৱাবা কোকহন্নবা লম্বীশিং পাকথোকহনখি, মতমগা চুনবা মওংদা শেমগৎখি মসিগীদমক ভারত সরকারনা লুপা করোর লিশিং ৫০ ইনভেস্ত তৌখি। দিল্লীদা নাকল অমদা পেরিফেরেল এক্সপ্রেসৱেশিং শারি অমরোমদনা কর্তব্য পথ শেমগৎলি। দ্বারকা এক্সপ্রেসৱে নত্ত্রগা অর্বান এক্সতেন্সন রোদ, অক্ষরধামদগী ভাঘপত ফাওবা লেন ৬ এক্সেস কন্ত্রোল হায়ৱে নত্ত্রআ গুরুগ্রাম-সোহনা রোদকী ইলিবেতেদ কোরিদোর ওইরবসু কেন্দ্র সরকারনা দিল্লীদা অসিগুম্বা চাউখৎ থৌরাংগী থবক কয়া পায়খৎলি মসিনা লৈবাক অসিগী কোনুংদা মোদর্ন ইনফ্রাস্ত্রকচর পুরক্লগনি।

মরুপশিং,

দিল্লী এন.সি.আর.গী রেপিদ রেলগুম্বা সর্ভিসশিং অথুবদা হৌরগনি। ন্যু দিল্লী রেলৱে স্তেসনগী চাউনা শেমগৎ-শাগৎলিবা অসিগী পিকচরশিং ময়াম্না শোইদনা উবীরম্লগনি। দ্বারকাদা লম হেক্তর ৮০দা হৌজিক শাগৎলিবা ভারত বন্দনা পার্ক অসি মথংগী থা খরা অসিদা লোইশিন্নবা মাইকৈদা চংশিল্লিবা অসিদা ঐহাক্না নুংঙাইবা পোকই। দি.দি.এ.না দিল্লীগী অচৌবা পার্ক ৭০০ হেন্না য়েংশিল্লি হায়না তাকপীরকই। ৱাজিরাবাদ বেরাজতগী ওখালা বেরেজ ফাওবগী কিমি ২২গী স্ত্রেচতা দি.দি.এ.না তোঙান-তোঙানবা পার্কশিং শেমগৎলি।

মরুপশিং,

ঙসি ঐহাক্কী লায়রবা ইচিল-ইনাও কয়ানা মখোয়গী পুন্সিগী অনৌবা অহৌবা অমা হৌরগনি অদুনা মখোয়দগী ঐহাক্না করিগুম্বা খরদি আশা তৌরি। নখোয়দা ঐহাক্না থম্বা আশা অদু নখোয়না থুংহনগদ্রা? ঐহাক্না নখোয়না থবক খরা শীজিন্নজগে? তৌগদ্রা, মদু কাউথোক্কদ্রা, কাউথোকলোইদ্রো? ভারত সরকারনা লায়রবশিংগীদমক য়ুম করোর কয়া শাখি। য়ুমদা তোতি ঈশিং ফংহল্লি। মৈগী কন্নেক্সন পীরি। মৈখু চেনদনা চাক থোংনবা ইমা অমদি ইচে-ইচলশিংগীদমক উজ্জ্বলা সিলিন্দরশিং ফংহল্লি। কান্নবশিং অসিগী মরক্তা ঐখোয়না ৱাফম অমা থমহৌবা তাই। ঐখোয়গী য়ুমদা এল.ই.দি. ব্লব খক্তা থানগদবনি। থানগদ্রা? অনিশুবদা ঐখোয়না ফীভম অমত্তা কোলোনী অমত্তদা ঈশিং মাংহল্লোইদবনি। নখোয়না ঈশিং ফংনবগী অৱাবা খংলি। বাথরুমদা বালতিন মথক মখা ওন্থোক্লগা থম্মু, কোনজিল থিংজিল্লু। অদোম্না করিগুম্বা অয়ুক পুং তরুক্তা হৌগৎপা পাম্লবদি মসিনা বেক ওইগনি, করিগুম্বা ঈশিং তারক্লবসু বালতিন থনবগী মখোল তাগনি। ঈশিং য়োকশিনবা হায়বা অসি য়াম্না মরু ওই, মৈ মাংহনদবা হায়বা অসি য়াম্না মরু ওই। অমসুং মসিগী হেন্না মরু ওইবা ৱাফম অসিনা ঐখোয়না মফম অসিদা স্লম এনভাইর্নমেন্ত লৈহনদবা অসিনা ওইরি। ঐখোয়গী কোলোনী অসি লুনানবা, ফজবা ওইহনগদবনি, লুনানবগী এনভাইর্নমেন্ত অমা শেমগৎকদবনি অমসুং নখোয়গী কোলোনীদা লৈরিবা তাৱর অনিগী মরক্তা অথোই অহেন তানৌ। করম্বা তাৱরনা খ্বাইদগী লুনানবগে হায়বগী থা খুদিংগী অথোই অহেন তানৌ। দিকেদ কয়াদগী স্লমশিংগী মতাংদা খন্নরম্বা ৱাখল্লোন, স্লমগা মরী লৈনবা অমোৎ অকাই অসি মুত্থৎপগী থৌদাং নখোয়না লৌগদবনি। দিল্লী অমসুং লৈবাক অসি চাউখৎহনবদা নখোয়গী থৌদাং পাঙথোক্কনি হায়না ঐহাক্না থাজবা থম্মি। দিল্লীগী প্রজা খুদিংমক্না শরুক তম্বগা লোয়ননা দিল্লী অমসুং লৈবাক অসিগী চাউখৎ খোঙচৎ অসি লেপ্পা লৈতনা মাংদা চংশিল্লগনি। থাজবা অসিগা লোয়ননা পুম্নমক্তা য়াইফ মঙ্গোল পীজরি। হন্না হন্না নুংঙাইবা ফোঙদোকচরি। হন্না-হন্না থাগৎচরি!

***