প্রধান মন্ত্রী, শ্রী নরেন্দ্র মোদীনা ঙসি গুজরাতকী বনাসকান্থাগী থরাদতা লুপা করোর ৮০০০ হেনবগী প্রোজেক্তশিং উরেপ-উয়ুং তমখ্রে।

প্রধান মন্ত্রীনা গুজরাত অমসুং লৈবাক পুম্বা অসি ঙরাং মোরবীদা থোকখিবা লাইবকথিবা থৌদোক্কী মতুংদা লৈখিদ্রবশিংগী অৱাবনা চৈথেং পীরি হায়না ফোঙদোকখি। অৱাবা পুংফম অসিদা ঐখোয় পুম্নমক্না অৱাবা তারবা মীওইশিংগী ইমুং-মনুংশিংগীদমক লেপ্পি। মহাক্না হায় মুখ্য মন্ত্রী অমসুং মহাক্কী তীমনা তেংবাং পীবগী থবক্কীদমক থৱায় য়াওনা হোৎনরি। মহাক্না হায়, “ঙরাং নুমিদাং ভুপেন্দ্রভাইনা কেবরিয়াদগী হকথেংননা মোরবীদা থুংখি অমসুং তেংবাং পীবগী থবক য়েংশিনখি। মহাক অমদি তেংবাং পীবগী থবক্তা য়াওরিবা ওফিসিএলশিংগা ঐহাক্না তৎতনা পাও ফাওনরি। এন.দি.আর.এফ. তীম অমসুং আর্মদ ফোর্সশিংগী পর্সনেলসু য়ৌশিনখ্রে। অম্বাজীগী লমদম অসিদগী গুজরাতকী মীয়ামদা ঐহাক্না থাজবা পীরি মদুদি তেংবাং পীবগী থবক পাইখৎপদা অঙম্বা থাক্তা হোৎনগনি”।

প্রধান মন্ত্রীনা হায় মদুদি মহাক্না থৌরম অসি তোক্লসিরা হায়না ফাওবা ৱাখল খনজানখি অদুবু বনাসকান্থাগী ৱাতর সপ্লাই প্রোজেক্তশিংগী মরু ওইবা অমসুং মীয়ামগী মীনুংশি খঙলদুনা মহাক্কী থৌনা হেনগৎহনখি অমসুং লুপা করোর ৮০০০ হেনবগী প্রোজেক্তশিং শঙ্গানবা মফম অসিদা লাকখি। মহাক্না হায় প্রোজেক্তশিং অসিনা বনাসকান্থা, পাতন অমসুং মহেসানা য়াওনা গুজরাতকী জিলা তরুক হেনবদা ইথৈ লৌথোংগী খুদোংচাবশিংদা মতেং পাংলগনি। হৌখিবা মতমদা রাজ্য অসিনা মায়োক্নখিবা অৱাবা অদু নীংশিংলদুনা প্রধান মন্ত্রীনা হায় গুজরাতকী মীয়ামগী মুৎনাইদ্রবা থৌনা-লিংজেলনা মখোয়দা লৈরিবা রিসোর্স অমা হেক্তনা অৱাবা অমা হেক্তবু মায়োক্নবগী শক্তি পীরি। শ্রী মোদীনা ঙসি জিলা অসিদা অওনবা পুরক্লিবা চাউখৎ থৌরাংগী থবকশিংগী মতাংদা পল্লদুনা হায়, “বনাসকান্থা অসি মসিগী হিংদুনা লৈরিবা খুদম অমনি”।

প্রধান মন্ত্রীনা অৱাং গুজরাতকী জিলা লিশিং কয়াদা ফ্লোরাইদ য়াওবা ঈশিং থেংনখিবা মতমদা লমদম অসিগী লৌউ-শিংউগী পুন্সিদা ঈশিংগা মরী লৈনবা সমস্যাশিং অসিনা চাউনা চৈথেং পীখিবা অদু নীংশিংখি। মহাক্না হায় লম মপু অমত্তনা মখোয়গী লম করিগুম্বা য়োনবা পাম্লবদি লৈবীনবা মীওই অমত্তা ফংদবগী ফীভমদা লৈরমখি। প্রধান মন্ত্রীনা শাওরদুনা হায়, “ঐহাক্না লম অদুগী ‘সেবক’ হেক ওইবদগী হৌনা ঐখোয়গী সরকারনা লমদম অসিগী খুদোংচাদবশিং মশক খঙদোকখি অমসুং কত্থোকপগা লোয়ননা অমদি পুকচেল শএেংনা মখোয়বু থুংহন্নবা মাইকৈদা থবক তৌদুনা লাকখি”। শ্রী মোদীনা হায়, “ঐখোয়না ঈশিং য়োকশিনবদা, চেক দামশিং অমসুং পুখ্রিশিং শাবদা মীৎয়েং চংখি”। প্রধান মন্ত্রীনা সুজলাম-সুফলাম য়োজনা, ৱাস্মো য়োজনা অমসুং পানি সমিতিশিংগী খুদমশিং পীখি। মহাক্না নুপীশিংনা লৌখিবা মরু ওইবা থৌদাংনা মরম ওইদুনা কচ্ছ য়াওনা অৱাং গুজরাতকী লমদম পুম্বদা দ্রিপ ইরিগেসনগা লোয়ননা খুমাং চাউশিনবা ঙমহনখি অমসুং ‘পর দ্রোপ মোর ক্রোপ’ মোদেলনা লমদম অসিগী এগ্রিকলচর, হোর্তিকলচর লোয়ননা তুরিজমদা শাহৌ পীরি হায়না মহাক্না ফোঙদোকখি। প্রধান মন্ত্রীনা মখা তারদুনা হায়, “নাকল অমদা ঐখোয়গী বনাস দাইরী লৈ অমরোমদা এম.দবল্যু. ১০০গী সোলর পাৱর প্লান্ত লৈরি, ঐখোয়না লমদম অসিদা লৈরিবা য়ুম খুদিংমক্তা তোতি ঈশিং ফংহন্নবা পান্দম অদু থুংহনবা ঙমখি”। শ্রী মোদীনা হায় দ্রিপ ইরিগেসন অমসুং মাইক্রো ইরিগেসন তেক্নিকশিংনা লৈবাক পুম্ববু বনাসকান্থাদা পুক্নিং চীংশিল্লি অমসুং মালেম শিনবা থুংবনা শকখঙনরি। প্রধান মন্ত্রীনা হায়, “ঙসি বনাসকান্থানা চাউখৎ থৌরাংগী পুৱারৌদা মাগী মশাগী পন্দুপ ইজরি”। মহাক্না হায় মদুদি বনাসকান্থাগী লম হেক্তর লাখ ৪ অসি দ্রিপ অমসুং মাইক্রো ইরিগেসনগীদমক শীজিন্ননবা কত্থোকখি মসিনা ৱাতর তেবল মখা তানা হন্থবা ঙমহনখিদে। মহাক্না হায়, “মসিনা শুপ্নগী নখোয়দা কান্নবা পীবা খক্তা নত্তনা তুংগী মীরোলশিংগী পুন্সিবু সেক্যুর ওইহল্লি”। সুজলাম-সুফলাম য়োজনাগী মতাংদা পল্লদুনা প্রধান মন্ত্রীনা মখোয়গী খোঙথাংশিং অমসুং কত্থোকপনা অশোইবা থীরিবা মীওইশিংবু তুমিন্না লৈহনখিবা অমসুং সুজলাম-সুফলাম য়োজনাবু চাউনা মাইপাকপা ঙমহনখিবগীদমক লমদম অসিগী মীয়ামবু থাগৎপা ফোঙদোকখি।

হৌখিবা চহি ১৯-২০দা তৌখিবা থবকশিংগী মতাংদা পল্লদুনা প্রধান মন্ত্রীনা হায় সুজলাম-সুফলাম য়োজনাগী মখাদা অশাংবা রিচার্জ কেনেল কিলোমিতর কয়া শাখি। মহাক্না মখা তারদুনা হায় খুঙ্গংগী পুখ্রিশিং অসি পাইপলাইনশিং তিংবা অমসুং গ্রাউন্দৱাতরগী লেবেলশিং ৱাংখৎহনবনা মরম ওইদুনা হিংগৎহনবা ঙমখি। প্রধান মন্ত্রীনা হায় মদুদি শাগদৌরিবা পাইপলাইন অনি শাগদৌরিবা অসিনা খুঙ্গংশিংগী পুখ্রি লিশিং ১ হেনবদা কান্নবা পীরগনি। প্রোজেক্ত প্লানশিংগী মতাংদা শন্দোক্না তাক্লদুনা প্রধান মন্ত্রীনা হায় পাইপলাইন অসি মুক্তেশ্বর দাম অমসুং কর্মবত তলব ফাওবা শাংদোক্লি অমসুং অৱাংবা মফমশিংদা লৈবা মফমশিংদা ইলেক্ত্রিক পম্পশিংগী মতেংগা লোয়ননা ঈশিং চীংখৎলি। প্রধান মন্ত্রীনা মখা তারদুনা হায় নর্মদাগী মপুং ওইবা কেনেলদগী দিস্ত্রিব্যুসন কেনেল অমা শারি মসিনা থরাদ, বাব অমসুং সুইগাও তলুকাশিংদা লৈবা খুঙ্গং কয়াদা কান্নবা পীরগনি। প্রধান মন্ত্রীনা হায়, “পাতন অমসুং বনাসকান্থাগী তলুকা ৬তা লৈবা খুঙ্গং কয়ানা কসরা-দন্তিৱাদা পাইপলাইন্দগী কান্নবা ফংলি। লাক্কদৌরিবা মতম অসিদা নর্মদা তুরেলগী ঈশিং অসি মুক্তেশ্বর দাম অমসুং কর্মবত পুখ্রিদা য়ৌরক্লগনি। মসিনা বনাসকান্থাগী বদগাম, পাতনগী সিদ্ধাপুর অমসুং মহেসানাগী খেরালু তলুকাদা কান্নবা পীরগনি”।

প্রধান মন্ত্রীনা হায় “কনাগুম্বদা ঈসিং ফংহনবা হায়বা অসি অথোইবা গুন অমা ওইনা লৌনৈ”। “ঈশিং ফংলিবা মীওই অদুনা অমৃত ফংলি অমসুং অমৃত অদুনা কনাগুম্বা অমবু মাইথিবা পীবা ঙমদবা মীওই অমা ওইহল্লি। মীয়াম্না মীশক অদুদা মখোয়গী থৌজালশিং পীবি। মসিনা ঐখোয়গী পুন্সিদা ঈশিংগী মরু ওইবা অসি’। হীরম অসিদা পাইখৎখিবা খোঙথাংশিংগী মতাংদা প্রধান মন্ত্রীনা লৌউ-শিংউ অমসুং এনিমেল হসবেন্দরীগী অনৌবা ওইথোকপা য়াবশিংগী খুদমশিং পীখি। মহাক্না লমগী আউতপুৎ হেনগৎলকপনা মরম ওইদুনা চাউখৎলক্লিবা ফুদ-প্রোসেসিং ইন্দস্ত্রীগী মরমদা পাউদমখি। শ্রী মোদীনা থা খরগী মমাংদা অলুগী প্রোসেসিং প্লান্ত অমগী উরেপ-উয়ুং তমখিবা অদু নীংশিংখি। প্রধান মন্ত্রীনা মখা তারদুনা হায়, “কেন্দ্র সরকারনা ফুদ প্রোসেসিং ইন্দস্ত্রীগী লম অসি পাকথোক চাউথোকহল্লি। লৌমীশিংনা সেক্তর অসিগী প্রদ্যুসর য়ুনিয়নশিং অমসুং সখি মন্দলশিংগা থবক তৌমিন্নরি”। কোল্দ স্তোরেজ প্লান্ত অমা নত্ত্রগা ফুদ প্রোসেসিং প্লান্ত শাবা ওইরবসু সরকারনা লুপা করোর কয়া চংনা ওর্গনাইজেসনশিংগী মতেং পাংলি। প্রধান মন্ত্রীনা হায় মদুদি লৌমীশিংনা কম্ফোই পাম্বীগী মপু ওইবা খক্তা নত্তনা জ্যুস মেন্যুফেকচরিং য়ুনিৎকী শিয়র অমা পাইনবা মঙলানগা লোয়ননা ঐখোয়না মাংদা চংশিল্লি। প্রধান মন্ত্রীনা উহৈ অমসুং মনা-মশিংদগী অচারশিং, মুরব্বা অমসুং চৎনীশিংগী প্রদক্ত কয়া পুথোক্তুনা ঙসি সখি মন্দলশিংনা শীংথানীংঙাই ওইবা থবক তৌরি হায়না পাউদমখ। মহাক্না হায় সরকার অসিনা ইন্দস্ত্রী অসিবু হেন্না চাউখৎহন্নবগীদমক সখি মন্দলশিংদা পীবা বেঙ্ক লোনশিংগী লিমিৎ অসি শরুক অনি ওইহনখি। মহাক্না হায়, “বন ধন কেন্দ্রশিং ত্রাইবেলনা খুন্দাবা মফমশিংদা হাংদোক্তুনা ত্রাইবেল নুপীশিংগী ওইবা সখি মন্দলশিং অসিনা উমংগী পোত্থোকশিংদগী খ্বাইদগী ফাবা প্রদক্তশিং পুথোকপা ঙম্লগনি”।

প্রধান মন্ত্রীনা হায় পি.এম. কিসান সম্মান নিধিনা লৌমীশিংদা চাউনা কান্নবা পীরি। মহাক্না লৌমীশিংদা চম্মনবা পোকহন্দনবা লৌমীশিংগীদমক হারশিংগী অমত্তা ওইবা পেন ইন্দিয়া ব্রান্দ নেম ‘ভারত’ লোঞ্চ তৌখিবগী মতাংদা ফোঙদোকখি। মহাক্না হায় সরকার অসিনা মালেমগী মমল লুপা ২০০০ হেন্না পীবা য়ুরিয়া বেগ অসি সরকারনা লৌমীশিংদা লুপা ২৬০দা ফংহল্লি। মতৌ অসুম্না মহাক্না বনাস দাইরী ফুতপ্রিন্ত অসি উত্তর প্রদেশ, হরিয়ানা, রাজস্থান, ওরিশা, আন্ধ্র প্রদেশ অমসুং ঝারখন্দদা পাকথোক চাউথোকপা ঙম্বদা নুংঙাইবা ফোঙদোকখি। গোবরধনগুম্বা স্কিমশিং, বাইও-ফ্যুলনা লাইবস্তোক্কী য়ুতিলিতী হেনগৎহল্লি। মহাক্না মখা তারদুনা হায়, “সরকারনা দাইরী সেক্তর মপাঙ্গল কনখৎহন্নবা লেপ্পা লৈতনা থবক তৌরি”।

প্রধান মন্ত্রীনা লৈবাক অসিগী সেক্যুরিতীদা বনাসকান্থাগুম্বা লমদমশিংনা থৌদাং লৌবা হেনগৎলক্লিবা অসিগী মতাংদসু পনখি। দীসাদা লৈরিবা এয়রফোর্স এয়রপোর্ত অমসুং নদাবেৎকী ‘সীমা-দর্শন’না লমদম অসিগী পুন্সিগী ক্বালিতী ফগৎহল্লি। মহাক্না হায় ঙমখৈদা লৈরিবা জিলাদা এন.সি.সি.গী এক্সপান্সন তৌবা অমসুং বাইব্রেন্ত বোর্দর ভিলেজ প্রোগ্রামগী মখাদা ঙমখৈগী খুঙ্গংশিংদা অখন্নবা মীৎয়েং চংলিবা অসিগী মতাংদা পাউদমখি।

কচ্ছকী য়ুহার হাবদা লৈখিদ্রবশিংবু নীংশিংদুনা স্মৃতি বন শাখিবগী মতাংদা পাউদমলদুনা প্রধান মন্ত্রীনা মীয়ামদা অমসুং বনাস দাইরী মেনেজমেন্তদা মীয়াম্না মেমোরিএল অসিদা চৎনবা পুক্নিং থৌগৎলু হায়না ফোঙদোকখি। মহাক্না মখা তারদুনা হায়, “জাতিগী মীংচৎ হেনগৎহল্লিবা, গুজরাতকী মীংচৎ হেনগৎহল্লিবা অসিগুম্বা থবক খুদিংমক অসি দবল ইঞ্জিন সরকারগী ফিরেপনি। ঐখোয়গী শক্তি অসি সবকা সাথ, সবকা বিকাস, সবকা বিশ্বাস অমসুং সবকা প্রয়াসতা য়াওরি”। 

থৌরম অদুদা মেম্বর ওফ পার্লিয়ামেন্ত, শ্রী প্রভাতভাই পতেল, শ্রী ভারতসিনহ ধাবি অমসুং শ্রী দিনেশভাই অনাবৈদ্যা, গুজরাত সরকারগী মন্ত্রী, শ্রী রুশিকেশ পতেল, শ্রী জিতুভাই চৌধুরী, শ্রী কিরিতসিনহ ভঘেলা অমসুং শ্রী গজেন্দ্রসিনহ পরমারনা শরুক য়াখি।

বেকগ্রাউন্দ

প্রধান মন্ত্রী, শ্রী নরেন্দ্র মোদীনা বনাসকান্থদা লৈবা থরাদতা চৎখ্রে অমসুং লুপা করোর ৮০০০ হেনবগী ৱাতর সপ্লাই প্রোজেক্তশিংগী উরেপ-উয়ুং তমখ্রে। প্রধান মন্ত্রীনা লুপা করোর ১৫৬০ হেন্না চঙগদবা মেন নর্মদা কেনেলদগী কাসারাদগী দান্তিৱারা ফাওবগী পাইপলাই য়াওনা ৱাতর সপ্লাইগা মরী লৈনবা প্রোজেক্তশিংগী উরেপ উয়ুং তমখ্রে‍। প্রোজেক্তশিং অসিনা লমদম অদুগী ৱাতর সপ্লাইগী ফীভম ফগৎহনগনি অমদি লৌমীশিংদসু কান্নহনগনি‍। প্রধান মন্ত্রী সুজলাম-সুফলাম কেনেল হেন্না ফগৎহনবা, মোধেরা-মোতী দাউ পাইপলাইনবু মুক্তেস্বর দাম-কর্মবৎ পাৎ ফাওবা শাংদোকপা, সান্তপুরা তালুকাগী খুঙ্গং ১১দা পাইখৎকদবা লিফ্ত ইরিগেসন স্কিম অমদি অতৈ কয়া য়াওনা তোঙান তোঙানবা প্রোজেক্তশিং লাউথোক্লমখি‍।

*****