প্রধান মন্ত্রী, শ্রী নরেন্দ্র মোদীনা ঙসি ভীদিও মেসেজকী খুত্থাংদা গুজরাত রোজগার মেলাদা ৱা ঙাংখ্রে।  

প্রধান মন্ত্রীনা গ্রেদ কয়া অমগী তোঙানবা-তোঙানবা ফমশিংগীদমক্তা এপোইন্তমেন্ত লেতরশিং পীখ্রবা নহা ওইরিবা কেন্দিদেত লিশিং কয়া অমবু থাগৎপা ফোংদোকখ্রে। প্রধান মন্ত্রীনা নৌহৌননা অমুক নিংশিংখি মদুদি ধন্তেরাসকী য়াম্না য়াইফরবা নুমিৎ অদুদা মহাক্না নেস্নেলগী থাক্তা রোজগার মেলা অসি হৌদোকখি, মসিদা মহাক্না কেন্দিদেত ৭৫,০০০গী এপোইন্তমেন্ত লেতরশিং য়েন্থোকখি। অসিগা চপ মান্নবা মখলগী রোজগার মেলাশিং অসি রাজ্য কয়া অমদা অমসুং য়ুনিয়ন তেরিতোরিশিংদা শিল্লগনি হায়না প্রধান মন্ত্রীনা, ধন্তেরাসকী নুমিত্তা হায়খি। মহাক্না হায়খি মদুদি গুজরাতনা মসিগী মতাংদা য়াম্না খোংজেল য়াংনা থবক পাইখৎলক্লি অমসুং ঙসি কেন্দিদাত ৫০০০না গুজরাত পঞ্চায়ত সর্বিস বোর্দতগী এপোইন্তমেন্ত লেতরশিং ফংলগনি, কেন্দিদেত ৮০০০না গুজরাত সব ইনস্পেক্তর রেক্রুৎমেন্ত বোর্দত অমসুং লোকরক্সক রেক্রুৎমেন্ত বোর্দতগী মখোয়গী এপোইন্তমেন্ত লেতরশিং ফংলগনি। প্রধান মন্ত্রীনা গুজরাতকী মুখ্য মন্ত্রী অমসুং মহাক্কী তীমবু মসিগী মতাংদা য়াম্না য়াংনা থবক পাইখৎপগীদমক্তা থাগৎখি। হন্দক্কী মতাং অসিদা নহা লিশিং ১০ গুজরাত্তা এপোইন্তমেন্ত লেতরশিং পীখ্রে অমসুং মথংগী চহি অমদা ফম লিশিং ৩৫ মেনশিন্নবা পান্দম থমখ্রে হায়না প্রধান মন্ত্রীনা খঙহল্লকখি।

প্রধান মন্ত্রীনা গুজরাত্তা থবক ফংহনবা অমসুং মশানা মশাবু থবক পীজবগী কুদোংচাবা কয়া অমা পীবগীদমক্তা রাজ্য অসিগী ন্যু ইন্দস্ত্রিয়েল পোলিসীদা ক্রেদিৎ পীখি। মহাক্না ওজাসগুম্বা দিজিতেল প্লেতফোর্মশিং অমসুং ক্লাস ৩ অমসুং ৪গী ফমশিংদা ইন্তরভ্যু তৌবগী থৌওং অদু লৌথোকখিবা অদুবু থাগৎখি। ‘অনুবনধম’ মোবাইল এপ অমসুং ঢেব পোর্তেলগী খুত্থাংদা থবক থিরিবশিং অমসুং থবক পীরিবশিংগী মরক্তা কনেক্ত তৌদুনা রাজ্য অসিদা থবক ফংহনবদা য়াম্না কোম্না অয়েৎপা লৈতনা পাংথোকপা ঙমহল্লে হায়না মহাক্না হায়খি। অসিগা চপ মান্ননা, গুজরাত পব্লিক সর্বিস কমিসনগী রেপিদ রেক্রুৎমেন্ত মোদেল অসিসু লৈবাক শিনবা থুংনা থাগৎপা ফোংদোক্নরক্লি।

অসিগুম্বা মখলগী রোজগার মেলাশিং অসি লাক্কদবা থাশিংদা নেস্নেল অমসুং রাজ্যগী থাক্তা মখাতানা অদুমক চৎথখিগনি হায়না প্রধান মন্ত্রীনা হায়খি। অমরোমদনা, কেন্দ্র সরকারনা থবক লাখ ১০ পীনবা কন্না হোৎনরি, মসিগী কেমপেন অসিদা রাজ্যশিং অমসুং য়ুনিয়ন তেরিতোরীশিংশু মসিদা শরুক য়াদুনা খুৎশম্ননা থবক পাইখৎলি, হায়রিবা মশিং অসি শিংথানিংঙাই ওইবা মওংদা হেনগৎলকখিগনি। “মসিনা লাস্ত মাইল দেলিভরী অমসুং সরকারগী স্কীমশিং অসিবু মপুং ফানা য়ৌহনবদা কেমপেন অসিবু হেন্না মপাঙ্গল কনখৎহল্লগনি” হায়না মহাক্না হায়খি।

২০৪৭ ফাওবদা ভারতপু চাউখৎপা লৈবাক অমা ওইবা ঙম্নবগী খোংচৎ অসিদা মসিগী নহাশিং অসিনা লৌগদবা য়াম্না মরু ওইবা থৌদাং অদুবু পল্লদুনা, প্রধান মন্ত্রীনা মখোয়দা খুনাই অমসুং লৈবাক অসিগীদমক্তা মখোয়গী মথৌদাং অদুবু মপুং ফানা পাংথোক্নবা হায়খি। মহাক্না মখাতানা তমশিনবা অমসুং হৈজিনবা খঙজিনবা অমসুং থবক ফংবনা মখোয়গী চাউখৎবগী লম্বিদা অরোইবা পন্থুংনি হায়না খনগনু হায়নসু হায়খি। “মসিনা নখোয়গীদমক্তা অনৌবা লম্বিদা থোং কয়া হাংলিবনি। নশসাগী থবক অদুবু অচেৎপা ফিরেপ অমগা কত্থোকপগা লোইননা থবক তৌবনা হায়নিংঙাই লৈতনা অপেনবা ফাওগনি অমসুং চাউ্খৎপা অমসুং খুমাং চাউশিনবগী থোং হাংগনি”, হায়না হায়দুনা প্রধান মন্ত্রীনা ৱারোইশিন তাখি।

My remarks at the Gujarat Rozgar Mela. Congratulations to the newly inducted appointees. https://t.co/IGwKXdwnRP

— Narendra Modi (@narendramodi) October 29, 2022

**********