আর্ম্দ ফোর্সশিংগা দিৱালী পাঙথোকপগী চৎনবী ঙাক্তুনা, প্রধান মন্ত্রীনা হন্দক্কী দিৱালী অসি কার্গিলদা লৈরিবা লান্মীশিংগা পাঙথোকমিন্নরি‍।

থৌনা ফরবা লান্মীশিংগী মফমদা ৱা ঙাঙলদুনা, প্রধান মন্ত্রীনা কার্গিলগী লৈবাক লৈহাউবু ইকায়খুম্নজবগী ইথিলনা মহাকপু মতম পুম্নমক্তা খুৎলায় পায়বা লান্মীশিংগী থৌনা ফরবা মপারী মমোমশিংগী মরক্তা চিংশিল্লি হায়খি‍। “চহি কয়াদগী অদোম্না ঐগী ইমুংগী শরুক অমা ওইদুনা লাক্লি”, হায়না প্রধান মন্ত্রীনা হায়খি‍। লান্মীশিং য়াওরগদি দিৱালীগী নুংঙাইবা হেনগৎলি অমদি মখোয়গী মরক্তা লৈরিবা দিৱালীগী মৈঙালনা মহাক্কী পুক্নিং মপাঙ্গল কনখৎহল্লি হায়বা ৱাফম প্রধান মন্ত্রীনা থমখি‍। “নাকল অমদা লৈবাকসিগী মনীং তম্বা ঙমখৈ লৈরি, অদুগা নাকল অমদনা খোঙফম চেৎনা লেপ্লিবা লান্মীশিং লৈরি‍। অসিগুম্বা থাক্কী দিৱালী অমা মফম কৈদসু পাঙথোক্লমগনি হায়না ঐনা থাজদে”, হায়না মহাক্না হায়খি‍। ভারতনা ঐখোয়গী নাৎ অমদি চৎনবীগী শরুক ওইরিবা থৌনা লিংজেলগী ৱারী অসিবু হরাও তয়াম্না পাঙথোক্লি হায়বা ৱাফম প্রধান মন্ত্রীনা থমখি‍। “ঙসি কার্গিলগী লানঙম ফিরাল থেৎখিবা লৈমায়সিদগী ঐনা ভারত অমদি মালেমদা লৈরিবা মীপুম খুদিংগী মফমদা দিৱালীগী য়াইফ-পাউজেল পীজরি”, হায়না প্রধান মন্ত্রীনা হায়খি‍।

মায় পাক্লবা মতুংদা কার্গিলদা মচু অহুমগী ফিরাল থেৎখিদবা পাকিস্তানগা শোক্নবা লান অমত্তা লৈখিদ্রি হায়না প্রধান মন্ত্রীনা থমখি‍। ঙসিগী মালেম অসিদা ভারতনা পাম্লিবা ৱাফমশিং থম্লদুনা, মৈঙালগী কুমহৈ অসিনা ঙসিগী জিওপোলিতকেল লেন্দস্কেপ অসিদা ইং তপ্পা অমদি নুংঙাই য়াইফবগী লম্বী তাকপা ওইরসনু হায়না প্রধান মন্ত্রীনা পাউজেল পীখি‍। দিৱালীগী মরুওইবা তাক্লদুনা, প্রধান মন্ত্রীনা “মসি তেরর লোইশিনবগী কুমহৈনি” হায়খি‍। দিৱালীগা মান্নবা ৱাফম চিংশিল্লদুনা, কার্গিলনা চপ মান্নবা থবক তৌখি অমদি মায় পাকপগী নুংঙাইবা ঙসিসু নীংশিংদুনা পাঙথোক্লি হায়না প্রধান মন্ত্রীনা ফোঙদোকখি‍।

প্রধান মন্ত্রীনা মহাক কার্গিল লানবু উহৌই, মমুৎ তানা উহৌই হায়না নীংশিংখি‍। লান্মীশিংনা লান্ফমদা য়েক্নবশিংদা চপ চাবা পাউখুম পীরিঙৈদা নমহৌবা চহি ২৩ শুরবা ফোতোগ্রাফশিং ঙাক শেন্দুনা থম্বগা লোয়ননা মহাক্না মফমদুদা লান্মীশিং উনবা লাকপদা উৎলকপগীদমক মহাক্না ওথোরিতীগী মফমদা থাগৎপা ফোঙদোকখি‍। “মীচম অমা ওইনা, ঐগী থৌদাংনা ঐবু লান্ফমদা চিংদুনা পুরক্লি”, হায়বা ৱাফম প্রধান মন্ত্রীনা ফোঙদোকখি‍। লৈবাক মীয়াম্না তাশিন খোমজিল্লকপা পোৎলমশিং থিনবা মহাক লাকখি হায়না নীংশিংলদুনা, প্রধান মন্ত্রীনা মতমদু মহাক্না লাই খুরুমজবগী মীৎকুপ অমা ওইখি হায়খি‍। মতমদুদা লৈখিবা অইং-অশাগী ফীভম পল্লদুনা, প্রধান মন্ত্রীনা মতমদু মীপুম খুদিংগী পুক্নিং, হকচাং অমসুং থৱায় লুপ্তুনা লৈনবা খোল্লাউ অমা লাকখি অমদি ঐখোয়গী অকোয়বদা মায় পাকপগী খোল্লাউনা নিনখি হায়না ফোঙদোকখি‍।

“ঐখোয়না ইকায়খুম্নরিবা ভারত অসি শুপ্নতগী লমখৈ অমা নত্তে অচঙবা থৱায়, লেঙদ্রবা ইথিল, লোইনাইদনা লৈরিবা অমনি”, হায়না প্রধান মন্ত্রীনা ফোঙদোকখি‍। “ঐখোয়না ভারতকী মরমদা পনবদা ভারতকী নাৎকী নুংগী ওইবা শক্তম মাঙদা চোংথোরকই, পারী পুরীগী হৌখ্রবা পুন্সিরোলশিংনা মথন্তা থোরক্তুনা ভারতকী ফিদম ময়োল চোংখৎলকই”, হায়না শ্রী মোদীনা মখা তাখি‍। ভারত অসি মায়কৈ অমদা অতিয়া পক্না ৱাংলবা হিমালয়দগী হৌরগা ইন্দিয়ন ওসীন ফাওবা কোল্লিবা খুৎশু খুৎলায়না ঈচেল অমনি হায়না মহাক্না মখা তাখি‍। চাওখৎলবা সিভিলাইজেসন কয়া লৈঙোয়গী মপৈ ওন্দুনা তুমখিবা কয়া লৈখ্রবসু ভারতকী নাৎকী ঈচেল লেপ্তনা চেন্থদুনা লাক্লি হায়বা ৱাফম প্রধান মন্ত্রীনা নৌহৌননা নীংশিংখি‍। লমদম অমগী থৌনা ফরবা মপারী মমোমশিংনা মখোয়গী থৌনা অমদি মচাক মরলশিংদা মপুং ফানা থাজবা থম্লবা মতমদা লৈবাক অমনা শিবা নাইদনা লৈবা ঙমই হায়বা ৱাফমসু মহাক্না  ফোঙদোকখি‍।

কার্গিলগী লান্ফম ভারত লান্মীগী থৌনাগী অরংবা খুদম্নি‍। “দ্রাস, বতালিক অমসুং তাইগর হিলশিং অসি চীংথক্তা তোংদুনা লৈরিবা য়েক্নবশিং ভারত লান্মীগী থৌনা লিংজেলগী মমাঙদা মায়থিখিবগী খুদমশিংনি” হায়না শ্রী মোদীনা ফোঙদোকখি‍। ভারতপু ঙমখৈদা ঙাক্লিবসি ভারত লান্মীগী খাঙবা কল্লবা য়ুম্বীশিংনি হায়না মহাক্না হায়খি‍। লৈবাক অমগী ঙমখৈ নীংথিনা ঙাক শেন্দুনা থম্লবা, শেন্মিৎলোন চাওখৎলবা অমদি খুন্নাইদা মশানা মশাবু থাজবনা থল্লবা মতমদা লৈবাক অমা মপাঙ্গল কনবা ওইগদৌরিবনি হায়না মহাক্না মখা তাখি‍। লৈবাকসিগী মতিক ময়াইগী পাউ তাবা মতমদা লৈবাক পুম্বগী পুক্নিং থৌনা হেনগৎলি হায়বা ৱাফম প্রধান মন্ত্রীনা থমখি‍। লৈবাক মীয়ামগী মরক্তা অমনা অমবু তেংবাংনবগী ইথিলগী মরমদা পল্লদুনা, প্রধান মন্ত্রীনা স্বছ্চ ভারত মিসন অমসুং মৈ অমদি ঈশিংগা লোয়ননা পক্কাগী য়ুম মতম চানা ফংহনখিববু খুদম ওইনা পীখি অমদি লান্মী খুদিংমক্না মদুগীদমক চাউথোকচবা পোকখি হায়বা ৱাফম থমখি‍। অরাপ্পদা সর্ভিসশিং অসিনা লান্মীশিংগী য়ুমদা য়ৌখিবা মতমদা, মখোয়দা অপেনবা ওইরি‍। লান্মীশিংনা কন্নেক্তিভিতীগী ফীভম ফগৎলকপদা খঙই, মদুনা মখোয়বু ময়ুমগা  ঈ-পাউ ফাওনবদা লায়হল্লি অমদি সুতি মতমদা য়ুমদা লায়না য়ৌবা ঙমহল্লি হায়না মহাক্না মখা তাখি‍। চহি ৭-৮গী মমাঙদা মালেমগী ১০শুবা খ্বাইদগী চাউবা শেন্মিৎলোন ওইরম্বদগী ৫শুবা ফীভমদা হন্দক্তা কাখৎলকখিববু মহাক্না পনখি‍। ইনোভেসনগী ইহুলবু হিংহন্দুনা থম্লিবা স্তার্তঅপ ৮০,০০০ হেনবগী মরমদসু প্রধান মন্ত্রীনা ৱাফম কয়া ফোঙদোকখি‍। নুমিৎ নিনিগী মমাঙদা, ইস্রোনা ব্রোদবেন্দ ইন্তরনেৎ হেন্না পাকথোক চাউথোকহন্নবা সেতলাইৎ ৩৬ থংন-থংননা থাগত্তুনা অনৌবা রেকোর্দ অমা থমখিববুসু মহাক্না নীংশিংখি‍। মচু অহুমগী ফিরালনা ভারত মচাশিংবু ঙাকথোকখিবা য়ুক্রেনগী লানগী মরমদসু প্রধান মন্ত্রীনা ৱাফম কয়া থমখি‍।

মসি ভারতনা লৈবাক মপানগী অমদি মনুংগী য়েক্নবশিংগী মায়োক্তা মায় পাক্না চত্থরিবা লান্থেং অসিগী মহৈনি হায়না প্রধান মন্ত্রীনা ফোঙদোকখি‍। “অদোম্না লৈবাক মনুংদা য়েক্নবশিংগী মায়োক্তা অকনবা থবক লৌখৎপগা লোয়ননা ঙমখৈদা চুঙ্গোয় ওইনা লেপ্লিবনি‍।” লৈবাক অসিনা তেরোরিজম, নক্সলিজম অমসুং এক্সত্রিমিজম মুত্থৎনবা মায় পাক্না থবক পায়খৎলি হায়বা ৱাফম শ্রী মোদীনা ফোঙদোকখি‍। মতম অমদা লৈবাক্কী য়াম্লবা শরুকপু য়োৎশিল্লম্লবা নক্সলিজমগী মরমদা ৱা ঙাঙলদুনা, মখোয়গী মফম লেপ্পা লৈতনা পীকশিল্লক্লি হায়না প্রধান মন্ত্রীনা হায়খি‍। শেঞ্জা থুমজাগী মরমদা পল্লদুনা, প্রধান মন্ত্রীনা ভারতনা অকনবা লান্থেং অমা চত্থরি হায়খি‍। “শেঞ্জা থুমজা তৌবা মীওইশিং ফনা মপাঙ্গল কনবা ওইরবসু মখোয়না চৎন-কাঙলোন্দগী নাথৈদুনা চেনবা ঙম্লোই”, হায়খি‍। অশোয়বা লৈঙাক্না ঐখোয়গী চাওখৎ লমজেলদা খুরৌ ওইদুনা লৈবাকসিগী মঙম নীংথিনা ফুদোকপা ঙমহল্লমখিদে হায়না মহাক্না মখা তাখি‍। “সবকা সাথ, সবকা বিকাস, সবকা বিস্বাস অমসুং সবকা প্রয়াস হায়রিবা লাইৱাসিগা লোয়ননা ঐখোয়না অসিগুম্বা অৱাৎ অপাশিং অসি খুৎলৈ থুনা লৌথোক্নবা হোৎনরি”, হায়না মহাক্না মখা ফোঙদোকখি‍।

মোদর্ন ৱারফ্যারগী তেক্নোলোজীদা খুমাঙ চাওশিল্লিবা অসিদা ৱাফম কয়া থম্লদুনা, প্রধান মন্ত্রীনা তুংলমচৎকী লানগী মওং মতৌ হোংলক্লগনি অমদি হায়রিবা অনৌবা চক অসিদা ঐখোয়না অনৌবা শিংনবশিং, অনৌবা থৌওং অমদি লৈবাক্কী ঙাকশেলগী হোংলক্লিবা মথৌ তাবশিংগী মতুং ইন্না লৈবাকসিগী লান্মীগী পাঙ্গল শেমগৎলি হায়বা ৱাফম প্রধান মন্ত্রীনা ফোঙদোকখি‍। চহি কয়াদগী মথৌ তাদুনা লাক্লবা লান্মীদা অহোংবা পুরকপগী মতাঙদা, প্রধান মন্ত্রীনা শিংনবা খুদিংমক খুৎলৈ থুনা থেংনবা ঙম্নবগীদমক ঐখোয়গী লান্মীশিংগী মরক্তা হেন্না ফবা মওংদা খুৎশম্ননা চৎমিন্ননবা পায়খৎপা য়াবা খোঙথাঙশিং পায়খৎলি হায়বা ৱাফম থমখি‍। “মসিগীদমক্তা, সি.দি.এস.কুম্বা ইন্সতিত্যুসন অমা শেমখি‍। ঐখোয়গী লান্মীশিংনা মথৌ তৌবদা হেন্না নুংঙাইহন্নবগীদমক ঙমখৈ পরিংদা মতমগা চুনবা ইনফ্রাস্ত্রকচরগী নেৎৱর্ক অমা শেমগৎলি”, হায়না মহাক্না হায়খি‍। লৈবাকসিদা সৈনিক স্কুল কয়াসু হাংদোক্লি হায়না মহাক্না মখা তাখি‍।

আত্মনিরভর ভারতকী মরমদা পল্লদুনা, প্রধান মন্ত্রীনা লৈবাকসিগী ঙাকশেলগী খ্বাইদগী মরুওইবা মায়ওন্দি ভারত লান্মীদা মতমগা চুনবা লমদমসিদা শাজবা খুৎলায় পায়হনবনি হায়না ফোঙদোকখি‍। ঐখোয়গী ঙাকশেলগী সেক্সন অহুম্মক্না মপান লৈবাক্তগী পুশিল্লকপা খুৎলায় অমদি সিস্তেমশিংদা তাংদুনা লৈবা হন্থহন্নবা অমদি ইরোমদোম লেপচবা ঙম্নবা ফিরেপ লৌরে হায়না প্রধান মন্ত্রীনা পাউদমখি‍। “ঙাকশেলগী খুৎলায় পিস ৪০০ হেনববু মপান লৈবাক্তগী লৌদনা ভারত মশাদা শাজরগনি হায়বা ফিরেপ লৌরিবা ঐখোয়গী আর্ম্দ ফোরসশিংবু ঐনা ইকায়খুম্নরি”, হায়না মহাক্না হায়খি‍। লমদমসিদা পুথোকচবা খুৎলায় শীজিন্নবগী কান্নবশিং পল্লদুনা, ঐখোয়গী লান্মীশিংনা লৈবাকসিদা শাজবা খুৎলায়গা লোয়ননা লান্থেংনবা মতমদা মখোয়দা থাজবা হেনগৎলক্কনি অমদি মখোয়না লান্দারুবা মতমদা য়েক্নবদা অঙকপা পোকহনবগা লোয়ননা য়েক্নবগী পুক্নিং শোন্থহনগনি হায়না প্রধান মন্ত্রীনা হায়খি‍। প্রধান মন্ত্রীনা প্রচন্দ লাইত কোম্বেৎ হেলিকোপ্তর, তেজাস ফাইতর অমসুং অচৌবা এয়রক্রাফ্ত কেরিয়র বিক্রান্তপু খুদম ওইনা পীখি, অমদি অরিহন্ত, পৃথবী, আকাস, ত্রিসুল, পিনাক অমসুং অর্জুন হায়রিবা ভারতকী মিসাইলগী মতিংগী মরমদসু ফোঙদোকখি‍। ঙসিদি ভারতনা মশাগী মিসাইল দিফেন্স সিস্তেম মপাঙ্গল কনখৎহনবগা লোয়ননা দিফেন্স ইকুইপমেন্তকী এক্সপোর্তর অমসু ওইরে, অমদি দ্রোন্নচিংবা মতমগা চুনবা অমদি মতিং লৈবা তেক্নোলোজীগী লমদসু খুমাঙ চাওশিন্না থবক পায়খৎলি হায়না মহাক্না মখা তাখি‍।

“লান্না খ্বাইদগী অরোইবা পাম্বৈনি হায়বা চৎনবীবু ঐখোয়না ইন্দুনা চৎলি”, হায়না শ্রী মোদীনা ফোঙদোকখি‍। ভারতনা মতম পুম্নমক্তা মালেমদা ইং তপ্পা পুরকপদা মীৎয়েঙ থম্লি হায়না মহাক্না হায়খি‍। “ঐখোয় লানগী মায়োক্তা লৈ, অদুম ওইনমক ইং তপ্পা হায়বসি পাঙ্গল য়াওদনা ওইথোক্তে”, হায়না শ্রী মোদীনা ফোঙদোকখি‍। ঐখোয়গী য়েক্নবশিংদা মতিং অমদি লাল্লোং লৈ, অদুগা কনাগুম্বনা ঐখোয়না মীৎয়েঙ থম্লক্লবদি ঐখোয়গী লান্মীশিংনা য়েক্নবশিংদা মখোয়না তৌরিবদুগী মতুং ইন্না চপ চাবা পাউখুম কমদৌনা পীগনি হায়বসু খঙই হায়না মহাক্না মখা তাখি‍। মীনায় নাইথাংগী ৱাখল্লোন কোকহন্নবা লৌখৎলিবা থৌরাংশিংগী মরমদা ফোঙদোক্লদুনা, প্রধান মন্ত্রীনা কর্তব্য পথ শঙ্গাখিববু খুদম ওইনা পীখি অমদি মসিনা অনৌবা ভারতকী থাজববু য়োকখৎলি হায়খি‍। “নেস্নেল ৱার মেমোরিএল নৎত্রগা নেস্নেল পুলিস মেমোরিএল ওইরবসু, হায়রিবশিং অসিনা অনৌবা ভারতকী অনৌবা শক্তম শেম্লি”, হায়না মহাক্না হায়খি‍। অনৌবা ইন্দিয়ন নেভী ইনসাইনবু নীংশিংলদুনা, প্রধান মন্ত্রীনা “হৌজিক্তি সিভাজীগী থৌনা ফবগী মতিক ঈশিং লান্মীগী ফিরালদা হাপ্লে” হায়খি‍।

ঙসিদি মালেম পুম্বগী মীৎয়েঙ ভারত অমদি মাগী চাউখৎ মতিংদা থম্লি হায়না প্রধান মন্ত্রীনা ফোঙদোকখি‍। হায়রিবা ভারতকী মতিং অসিগী খুদম অজাদী কা অমৃৎ কাল অসিনা ওইগদৌরিবনি হায়না শ্রী মোদীনা হায়খি‍। “মসিদা অদোমগী থৌদাং চাউই মরমদি অদোম ভারতকী চাউথোকচফম্নি”, হায়না প্রধান মন্ত্রীনা ফোঙদোকখি‍। ইন্দিয়ন আর্ম্দ ফোর্সকী লান্মীশিংগী মফমদা কত্থোকপা শৈরেং অমা থীদুনা মহাক্কী ৱারোল লোইশিনখি‍।

Privileged to spend Diwali with our brave Jawans in Kargil. https://t.co/ZQ0rP8GB8U

— Narendra Modi (@narendramodi) October 24, 2022

A spirited Diwali in Kargil! pic.twitter.com/qtIGesk98x

— Narendra Modi (@narendramodi) October 24, 2022

*****