লৈবাক্কী নহা ওইরিবা ইচানুপা অমসুং ইচানুপীশিং, থৌরমসিদা শরুক য়ারিবা মীপুম খুদিং, ইবেম্মা অমসুং ইবুংঙোশিং। খ্বাইদগী অহানবদা লৈবাক মীয়াম অদোমদা ধন্তেরাসকী য়াইফ পাউজেল পীজরি। ভগ্বান ধনৱন্তরীনা অদোম্বু হকচাং ফনা থম্বা ওইসনু, ইমা লক্ষ্মীনা থৌজালবীবা ওইসনু হায়না ঐহাক্না মপুগী মফমদা নিজরি। ঐহাক্না লাইবক ফবদগী কেদর্নাথ বদ্রিনাথ য়াত্রা তৌরুরগা লাক্লে, মসিনা মরম ওইরগা খরা থেংখ্রে। থেংবগীদমক্তা অদোম্না পুম্নমক্না ঙাকপীনবা হায়জরি।

মরূপশিং,

ঙসি অসি ভারতকী নহাশিংগী পাঙ্গলগী য়াম্না মরু ওইবা নুমিৎনি। মমাংগী চহি ৮দগী লৈবাক অসিদা থবক পীবা অমসুং মশানা মশাবু থবক পীজবগী খোঙথাং কয়া চত্থদুনা লাক্লি, মসিদা অনৌবা তাঙ্কক অমা ঙসি হাপ্লে। কেন্দ্র সরকারনা লৈবাক্না নীংতম্বগী চহি ৭৫ মপুং ফারকপা অসি য়েংলগা, কেন্দিদেত ৭৫০০০দা থৌরম অমগী খুত্থাংদা থবক খনবগী চিথী খুৎশিন্নগনি। মমাংগী চহি ৮দা থবক খনবগী চিথীশিং পীদুনা অদুম লাকখিবনি, অদুবু হন্দক্তি, মখোয়শিংদা থবক খনবগী চিথী অমুক্তা পুল্লপ পীবগী চৎনবী অমা হৌদোক্নবা ৱারেপ লৌখি। দিপার্তশিংসু মতমগী মখা পোন্না থবক পাংথোকহন্নবগীদমক্তা অমসুং অপীবা পান্দম অথুবা মতমদা ফংবগী অপুনবা ৱাখল্লোন লৈহন্নবগীদমক্তা, সরকারনা রোজগার মেলা থাংথোকপা হৌরিবনি। লাক্কদৌরিবা থাশিংদসু ভারত সরকারনা মতম-মতমগী ওইনা থবক খনবগী চিথী পীবা হৌরগনি। এন.দি.এ.না সরকার পায়বা রাজ্য অমসুং য়ু.তি.শিং অমদি বি.জে.পি. সরকারশিংনা মান্নবা থবক্কী মেলা কয়া পাংথোকপদসু ঐহাক্না নুংঙাইবা ফাওই। জম্মু কশ্মির, দদ্রা অমসুং নগর হবেলী, দামন অমসুং দিয়ু অমসুং অন্দমনা অমদি নিকোবর ইথৎনসু মথংগী নুমিৎ খরনিদা মান্নবা থৌরম পাংথোক্তুনা থবক খনবগী চিথী খুৎশিন্নগনি। থবক খনবগী চিথী ঙসি ফংলিবা নহাশিংবু ঐহাক্না থাগৎলি।

মরূপশিং,

লৈবাক্না নীংতম্বগী অমৃত কালদা খোঙদাবা মতমদা অদোম্না ভারত সরকারগা অমত্তা ওইনা লৈমিন্নরি। চাউখৎপা ভারত অমা ওইহনবগী পান্দমগা লোয়ননা ঐখোয়না আত্মানির্ভর ভারতকী লম্বীদা চৎলি। মসিদা ঐখোয়গী ইন্নোভেতরশিং, ওন্তোপ্রিনরশিং, ইন্দস্ত্রী, লৌমী, সর্ভিসেস অমসুং মেন্যুফেকচরিংগা মরী লৈনবা মীপুম খুদিংগী থৌদাং য়াম্না চাউই। মসিনা হায়বদি ভারত চাউখৎহনবদা পুম্নমক্কী মখুৎ মথৌ তাই হায়বনি। ভারত মচাশিংগী মফমদা তঙাই ফদবা খুদোংচাবশিং মতম চানা য়ৌরকপা, সরকারগী থবক থৌরমশিংনা খোঙজেল য়াঙলকপা মতমদা সবকা প্রয়াসকী মসিগুম্বা ৱাখল্লোনবু য়াকায়হনবা য়াগনি। ভারত মচাশিংগা মরী লৈনবা থবক থৌরম খুদিংমক পাংথোকপা, থবক খনবগী চিথী পীবগী মতৌনা ঐখোয়না মমাংগী চহি ৮-১০দা অহোংবা কয়া পুরকখি হায়বা তাক্লি। সরকারগী অপীকপা থবক্তা ফাওবা মতম য়াম্না চঙখিবা চহি ৮-১০গী মমাংগী মতমশিং উখ্রে। সরকারগী ফাইলশিংনা তেবল অমদগী তেবল অমদা চৎন-চৎনা উফুক কাখিবগী মতৌ ঐখোয়না থেংনখ্রে। অদুগা হৌজিক লৈবাক্কী ফিভম হোংলক্লিবা অসিদগী লৈবাক্কী থবক তৌবগী মওংদসু অহোংবা লাক্লে।

মরূপশিং,

কেন্দ্র সরকারগী বিভাগশিংগী মশেল নীংথিজনা তেংবাংনরিবা, মথৌ নীংথিনা পাংথোক্নরিবসিগী মরুমদা চহি ৭-৮গী কন্না হোৎনবগী থৌওং লৈরি। কর্ময়োগীশিংনা অচেৎপা ৱারেপ লৌরে। মমাংগী মতমশিংদদি থবক এপ্লাই তৌবদগী খুদোংচাবা থেংনবা হৌখিবগী ফিভম অদোমসু নীংশিংলমগনি। শক্তাক চে মখল কয়া হংই, শক্তাক চে অদুবু চুম্মি হায়নবগীদমক নেতাশিংগী ময়ুমদা কয়ারক হন্না চৎপা তানখি। ওফিসরশিংগী রিকম্মেন্দেসন পুদুন চৎনরম্মি। ঐখোয়গী সরকারগী অহৌবা মতমদা ঐখোয়না মসিগুম্বা চৎনবী অসি থিংখ্রবনি। সেল্ফ এতেস্তেসন তৌদুনা নহাশিংনা মশাগী চে চাংগী অচুম অরান তাকপগী খুদোংচাবা লৈহনখি। কেন্দ্র সরকারগী থবক লৌবদা গ্রুপ সি. অমসুং গ্রুপ দি.গী ইন্তর্ভিয়ু লৌথোকখিবনা অনিশুবা অচৌবা খোঙথাংনি। ইন্তর্বিয়ুগী থৌওং লৌথোকপদগী নহা কয়ানা কান্নবা ফংনখি।

মরূপশিং,

শেন্মিৎলোনগী মতাংদা ভারতনা ঙসিদি মালেমগী খ্বাইদগী মঙাশুবা থাক্তা লৈরি। ঐখোয়না মমাংগী চহি ৭-৮দা ১০শুবা থাক্তা লৈরম্বদগী ৫শুবা থাক্তা পুরকখি। মালেমগী ফিভম ফত্তে হায়বসি অশেংবনি, অতোপ্পা অচৌবা শেন্মিৎলোন কয়ানা অৱাবা মাইয়োক্নরি। মালেমগী লৈবাক কয়াদা পোৎ তাঙবা, থবক ফংদবা অমসুং অতোপ্পা শিংনবা কয়া লৈরি। চহি ১০০দা লাকপা খ্বাইদগী চাউবা ইরাংগী সাইদ ইফেক্ত নুমিৎ ১০০নিদা মাঙখ্রগনি, ঐখোয়না অসুম্না খনবা খক্তা নত্তনা, হিন্দুস্তানখক্তনা খনবা নত্তনা, মালেম্না খুদম ওইনসু উরিবনি। অদুবু ইরাং অসি য়াম্না চাউই, মসিগী সাইদ ইফেক্তনা মালেম পুম্বদা চৈথেং পীরি। ময়ামসিগী মরক্তা ভারতনা অনৌবা খোঙথাং কয়া লেপ্তনা পায়খৎলি, মালেমগী ইরাং মরকসিদা ঐখোয়গী লৈবাকপু করম্না কনবা ঙমগনি হায়দুনা রিস্ক কয়া লৌদুনা হোৎনরি। মসিগী সাইদ ইফেক্ত অসি লৈবাক অসিদা য়ারিবমখৈ করম্না হন্থহনগনি খল্লি। য়াম্না লুবা ফিভম্নি, অদুবু অদোম পুম্নমক্কী থৌজালদগী ঐখোয়না মসিদগী নান্থোকপা ঙম্লিবনি। হৌখিবা চহি ৮দা লৈবাক্কী শেন্মিৎলোনগী অৱাৎপা কয়া ঐখোয়না মেনখিবদগী পুম্নমক অসি ওইথোক্লিবনি।

মরূপশিং,

লৌউ-শিংউ, প্রাইভেত সেক্তর, অপীকপা অমসুং ময়াই ওইরপ্পা ইন্দস্ত্রীশিংগী মপাঙ্গল লৈবা ইকোসীস্তেম অমা ঐখোয়না লৈবাক অসিদা শেম্বা তাই। মসিনা লৈবাক্কী থবক পীবা ঙম্বা খ্বাইদগী চাউবা সেক্তরনি। ঙসিগী ঐখোয়গী খ্বাইদগী চাউবা পাঙ্গলদি নহাশিংগী স্কিল দিভেলপমেন্ত তৌবনা ওইগনি। প্রধান মন্ত্রী কৌশল বিকাস য়োজনাগী মখাদা লৈবাক্কী ইন্দস্ত্রীশিংগী তঙাই ফদবগী মখা পোন্না নহাশিংগী ত্রেনিং পীবগী অচৌবা খোঙথাং অমা পায়খৎলি। হৌজিক ফাওবগী ওইনা, মসিগী মখাদা অমসুং স্কিল ইন্দিয়া কেম্পেনগী মতেংদগী নহা করোর ১.২৫ ত্রেন তৌখ্রে। লৈবাক্কী মফম খুদিংদা কৌশল বিকাস কেন্দ্র হাংদোকখ্রে। মমাংগী চহি ৮সিদা কেন্দ্র সরকারনা হাইয়র এজুকেসন ইন্সতিত্যুসন অনৌবা কয়া হাংদোকখ্রে। ঐখোয়না নহাশিংগী মফমদা স্পেস সেক্তর হাংদোক্লে, দ্রোন পোলিসী লায়হল্লে, মসিদগী নহাশিংগী খুদোংচাবা য়াম্না হেল্লে।

মরূপশিং,

লৈবাক অসিদা থবক পীবা নত্ত্রগা মশাগী থবক পীনবা শীনবদা থেংনবা খ্বাইদগী চাউবা শিংনবা অসিদি বেঙ্কিংগী খুদোংচাবা ফংবদা ৱানা থোকপসিনি। মসিবুসু ঐখোয়না লৈহন্দ্রে। মুদ্র য়োজনানা লৈবাক্কী খুঙ্গং অমসুং অপীকপা শহর মচাশিংদা ওন্তোপ্রিনর মশিং হেনগৎহল্লে। ঙসি ফাওবদা য়োজনা অসিনা চাউরাকপা নহা করোর লাখ ২০দা তেংবাংখ্রে। মশাবু থবক পীজবগী মসিগুম্বা স্কিম অমত্তা মমাংদা লৈরমদে। মসিদগী কান্নবা ফংলিবশিং অসিগী মরক্তগী ৭%তি মশাগী অহানবা কারবার হৌদোকপা মীওইনি। অদুগা মশক থোকপা ৱাফম অমনা, মুদ্র য়োজনা ফংলিবা বেনিফিশরী ৭০%দি ঐখোয়গী ইচে-ইচলশিংনি। মমাংগী চহিশিংদা সেল্ফ হেল্প গ্রুপ্তগী নুপী করোর ৮না মসিগী মনুং চল্লকখি অমসুং মখোয়গী মফমদা ভারত সরকারনা শেলগী তেংবাংসু পীরি। হায়রিবা নুপী করোর কয়াসিনা হৌজিক্তি মশাগী পোত্থোকশিংবু লৈবাক শিনবা থুংবদা য়োল্লি, মশাগী শেন্থোক হেনগৎহল্লি।  ঐহাক্না ঙরাং বদ্রিনাথতা থেংনখিবা সেল্ফ হেল্প গ্রুপশিংগী উন্নবা মতমদা, বদ্রিনাথ য়াত্রাগীদমক্তা লাকখিবা মীওই খুদিংদগী গ্রুপ অমমম্না চাউরাক্না লুপা লাখ ২.৫ তানবা ঙমখি হায়না ফোংদোক্লকখি।

মরূপশিং,

খুঙ্গংগী মফমশিংদা থবক পীবগী খ্বাইদগী চাউবা খুদম অমদি ঐখোয়গী খাদি অমসুং ভিলেজ ইন্দস্ত্রীনি। লৈবাক অসিদা খ্বাইদগী অহানবা ওইনা, খাদি অমসুং ভিলেজ ইন্দস্ত্রীগী অপুনবা মমলনা লুপা করোর লাখ ১ হেনখ্রে। হায়রিবা চহিশিং অসিদা খাদি অমসুং ভিলেজ ইন্দস্ত্রীনা করোর ১দগী হেনবা থবক পীখি। মসিগী মনুংদা নুপীশিংগী মশিং য়াম্না য়াওরি।

মরূপশিং,

স্তার্তঅপ ইন্দিয়া কেম্পেন্না লৈবাক্কী নহাশিংগী মপাঙ্গলবু মালেম শিনবা থুংবগী মাঙদা পুথোকখ্রে। ইং ২০১৪গী মমাংদা স্তার্তঅপ খরদগী হৌজিক্তি মখোয়গী মশিংনা লিশিং ৮০ হেল্লে। লুপা করোরগী কম্পেনী কয়া অমা ঐখোয়না মতমসিদা শেমখি। ঙসিদি, লৈবাক্কী নহা লাখ কয়ানা হায়রিবা স্তার্তঅপ লিশিং কয়াসিদা থবক তৌরি। লৈবাক্কী এম.এস.এম.ই., অপীকপা ইন্দস্ত্রীশিংদসু লৈবাক্কী মীওই করোর কয়ানা থবক তৌরি, অমসুং মসিগী মনুংদগী চাউরবা শরুক অমদি মমাংগী চহি খরসিদা চঙখিবনি, থবক ফংখিবনি। কোরোনাগী মতমদা কেন্দ্র সরকারনা এম.এস.এম.ই. হিংগৎহন্নবা লুপা করোর লাখ ৩গী তেংবাং পীখি, মসিনা মরম ওইরগা থবক করোর কয়া কনবা ঙমখি। ভারত সরকারনা মনরেগাগী খুত্থাংদগীসু মীওই করোর ৭তা থবক পীদুনা লাক্লি। অদুগা হৌজিক ঐখোয়না এসেত হেনগৎহনবা, এসেত শেমগৎপদা অহেনবা মিৎয়েং চঙলি। দিজিতেল ইন্দিয়া অভিয়ান্না লৈবাক শিনবা থুংবদা দিজিতেল ওন্তোপ্রিনর লাখ কয়া শেমখ্রে। লৈবাক্কী কম্মন সর্ভিস সেন্তর লাখ ৫ হেনবনা নহা লাখ কয়াদা থবক পীরি। ৫জি. লাকপদগী দিজিতেল সেক্তরদা থবক লৈবগী চাংসু য়াম্না হেনগৎলগনি।

মরূপশিং,

লৈবাক অসিগী ২১শুবা চহি চাগী খ্বাইদগী মরু ওইবা থৌওংদি মেক ইন ইন্দিয়া অমসুং আত্মানির্ভর ভারতনি। ঙসিদি, লৈবাক অসিনা হীরম খরগী খ্বাইদগী চাউবা ইম্পোর্তর ওইরম্বদগী হীরমদুমক্কী খ্বাইদগী চাউবা এক্সপোর্তর ওইরে। গ্লোবেল হব ওইবগী মাইকৈদা ভারতনা সেক্তর কয়াদা খোঙ থাংজিল্লি। ভারত্তগী মোবাইল ফোন বিলিয়ন অমা থা খুদিংগী মালেমদা এক্সপোর্ত তৌই হায়বা পাউদম লাকপা মতমদা মসিনা ভারতকী মপাঙ্গল তাক্লি। ভারতনা এক্সপোর্তকী হীরমদা মশাগী হান্নগী রেকোর্দ কয়া অমা থুগাইবা মতমদা, মসিনা থবক পীবগী খুদোংচাবা কয়া গ্রাউন্দ লেভেলদা লৈরে হায়বা ৱাফম তাক্লি। ঙসিদি, গারিদগী হৌরগা মেত্রো কোচ, ত্রেন দব্বা অমসুং দিফেন্সকী স্পেয়র পার্ত ফাওবগী সেক্তর কয়াদা এক্সপোর্ত তৌবগী চাং য়াম্না হেনগৎলক্লি। ভারত্তা ফেক্তরী কয়া লৈরকপদগী মসি ওইথোক্লিবনি। ফেক্তরী মশিং হেনগৎলবনিনা মসিদা থবক তৌগদবা মীওই মশিংসু হেনগৎপা তাবনি।

মরূপশিং,

মেন্যুফেকচরিং অমসুং তুরিজম অসিদি থবক য়াম্না পীবা ঙম্বা অদুগুম্বা সেক্তর অনিনি। মরম অদুনা, কেন্দ্র সরকারনা সেক্তর অসিগা মরী লৈনবা মশক থোকপা থবক কয়া পায়খৎলিবনি। মালেমগী কম্পেনীশিংনা ভারত্তা লাক্তুনা মখোয়গী ফেক্তরী শাদুনা মালেমগী দিমান্দ পীবা ঙমহনবগী থবকশিংদা ভারতনা অহেনবা মিৎয়েং চঙলি। সরকারনা প্রদক্সনগী মখা পোনবা ইন্সেন্তিব পীনবগীদমক্তা পি.এল.আই. স্কিম চলায়রি। প্রদক্সন য়াম্না তৌরিবমখৈ, পুক্নিং হেন্না থৌগৎকনি, মসি ভারতকী পোলিসীনি। মসিগী মরমদগী অফবা মহৈ কয়া ঐখোয়না ঙসি উবা ফংলে। মমাংগী চহিশিংদা ই.পি.এফ.ও.গী দেতা লেপ্তনা লাকখিবশিংনা থবক পীবগী মরী লৈননা শেম্বা ভারতকী পোলিসীনা মথৌ নীংথিনা তৌরি হায়বা তাক্লি। নুমিৎ নিনিগী মমাংদা লাকপা দেতানা হন্দক্কী চহিগী ওগস্ত থাদা চাউরাকপা মীওই লাখ ১৭কা ই.পি.এফ.ও.গা মরী লৈনখি হায়বা খঙবা ঙম্লে। মসিনা হায়বদি, মখোয়না লৈবাক্কী ফোর্মেল ইকোনোমীগী শরুক ওইরে হায়বনি। মখোয়গী মরক্তগী মীওই লাখ ৮দি চহি ১৮-২৫গী কাঙলুপকী মীওইশিংনি।

মরূপশিং,

ইনফ্রাস্ত্রকচর ফগৎহনবগা থবক পীবগী চাং হেনগৎপগা চাউরবা মরী অমা লৈনৈ, মসিগী তোপ তোপ্পা মাইকৈ অমা লৈ অমসুং মালেম পুম্বনসু মসিনা থবক পীবগী চাং য়াম্না হেনগৎহল্লি হায়না য়ানরবনি। মমাংগী চহি ৮দা লৈবাক অসিদা কিলোমীতর লিশিং কয়াগী হাইৱেগী থবক পাংথোকখি। রেলৱে লাইন শরুক অনি থোক্না হেনগৎহনবগী থবক কয়া পায়খৎখ্রে, রেলৱে গেজ পাকথোক চাউথোকহনখ্রে, রেলৱেগী ইলেক্ত্রিফিকেসনগী থবকশিং লৈবাক শিনবা থুংনা পাংথোক্লি। লৈবাক অসিদা অনৌবা এয়র্পোর্ত কয়া শারক্লি, রেলৱে স্তেসনশিংবু মোদর্বনাইজ তৌরি, অনৌবা ৱাতরৱে কয়া শেমগৎলি। লৈবাক শীনবা থিংবদা ওপ্তিকেল ফাইবর তিংবগী থবক চত্থরি। ৱেলনেস সেন্তর লাখ কয়া লিংখৎখ্রে। পি.এম. অৱস য়োজনাগী মখাদা য়ুম করোর ৩ হেন্না শাখ্রে। অদুগা, ঙসি নুমিদাংসু, ধন্তেরাসকী মতমসিদা মধ্য প্রদেশকী ইচিল ইনাও লাখ ৪দা মখোয়গী য়ুমগী শো শিন্নগদৌরি। মসিগী মতাংদা ঐহাক্না ৱাফম খরা কুপথনা থমগনি। ঙসি নুমিদাংগী ঐহাক্কী ৱারোল তাবীয়ু।

মরূপশিং,

ভারত সরকারনা ইনফ্রাস্ত্রকচরদা লুপা করোর লাখ কয়া থাদরি। চাউখৎ থৌরাংগীদমক্তা পাংথোক্লিবা মসিগুম্বা অচৌবা প্রোজেক্তশিংনা লোকেলগী নহাশিংদা থবক্কী খুদোংচাবা কয়া শোইদনা পীগনি। মোদর্ন ইনফ্রাস্ত্রকচরগীদমক্তা পাংথোক্লিবা থবকশিং অসিনা তুরিজম সেক্তরসু য়াম্না হেন্না খুমাং চাউশিলহনগনি। লাইনীংবা, স্পিরিচুএলিতীগী লৈবাক্কী পুৱারী ওইরবা মফমশিংবু চাউখৎহল্লি। মসিগুম্বা থবকশিং অসিনা নহাশিংগী থবক্কী খুদোংচাবা কয়া লৈহল্লি, মনুং হঞ্জিনবা মফমশিংগী নহাশিংদসু মান্নবা খুদোংচাবা ফংহল্লি। কেন্দ্র সরকারনা থবক মশিং হেন্না পীবা ঙম্নবগীদমক্তা থৌওং কয়া অমা পায়খৎলি।

মরূপশিং,

লৈবাক্কী নহাশিংবু ঐখোয়না ঐখোয়গী খ্বাইদগী চাউবা পাঙ্গলনি হায়না লৌই। নীংৎম্বগী অমৃত কাল অসিদা ঐখোয়না চাউখৎপা ভারত অমগী পান্দম থম্লিবসিগী দ্রাইভর্দি ঐখোয়গী নহাশিংনি, অদোম পুম্নমক্নি। ঙসি থবকী ফংবগী চিথী ফংলিবশিংদা ঐহাক্না অখন্ননা হায়নীংবদি, অদোম্না ওফিস কারকপা মতমদা ইশাগী থৌদাং নীংশিংবীয়ু। মীয়ামগী সেবাগীদমক্তা অদোম্বু খল্লিবনি। ২১শুবা ভারত সরকারগী থবক অসি ইশাগী নুংঙাইনবা নত্তে, অকক্নবা মতমগী মনুংদা থবক তৌদুনা লৈবাক মীয়ামগী নুংঙাইহন্নবগীদমক্তনি। মতাং মতম্না কয়া য়াম্না ফত্তবা ওইসনু, সেবা তৌনবা খোঙফম চেৎলিবা অমসুং অকক্নবা মতমদা পাংথোক্কদবনি হায়বা ৱাখল্লোন ঐখোয়না মতম পুম্বদা ইদুনা চৎকদবনি। ৱারেপ অসিবু ৱাখল্লোন্দা থমদুনা, মীয়ামগী সেবা তৌগনি হায়ববু খ্বাইদগী অৱাংবা থাক্তা থমগনি হায়না অদোমগী মফমদগী থাজবা থম্লি। অদোমগী মঙলানশিং ঙসিদগী হৌরবনি, মসিনা ভারতনা চাউখৎলবা মতমদা মপুং ফাগনি হায়বা অদোম কাওগনু। অদোম পুম্নমকপু থবক খনবগী চিথী ফংবগীদমক্তা অমসুং অনৌবা পুন্সি অমগীদমক্তা ঐহাক্না য়াইফ পাউজেল পীজরি। অদোম্না ঐহাক্কী খোঙলোই ওইদুনা লৈবাক্কী মীচম মীয়ামগী অনীংবা অপাম্বা খুদিংমক ফংহন্নবা হোৎনবদা থবক অমত্তা চিত্থদনা পাংথোক্কনি হায়বগী ঐহাক্না থাজবা থম্লি। হৌজিক অসিদি ধন্তেরাসকী শেংলবা পুংফম অমসু ওইরি। ঐখোয়গী লমদমসিদা মসিগী মরু ওইবা য়াম্না লৈ। দিৱালীসু হয়েং হংচিত্তা ঙাইরে। হায়বদি, মতমসি কুহ্মৈগী মতম্নি হায়বনি। মতমসিদা অদোমগী খুত্তা চিথী অসি ফংবসি, কুহ্মৈ পাংথোক্নিংবগী অচৌবা অপাম্বগা লোয়ননা করিগুম্বা অমা পাংথোক্কে হায়বগী ৱারেপ অমসু লৈগনি থাজৈ। অমৃত কালগী চহি ২৫, অদোমগী পুন্সিগীসু চহি ২৫, মসিগুম্বা মরু ওইবা চহি ২৫সিদা ঐখোয়না পুন্দুনা লৈবাকপু অনৌবা থাক্তা পুখৎলসি। ঐহাক্না পুম্নমক্কী মফমদা য়াইফ পাউজেল পীজরি। পুম্নমকপু হন্না হন্না থাগৎচরি!

***