ভারতকী রাস্ত্রপতি, শ্রীমতি দ্রৌপদি মুর্মুনা ঙসি (ওক্তোবর ৪, ২০২২) অহেমদবাদকী গুজরাত য়ুনিভর্সিতীগী স্তার্ত-অপ প্লেৎফোর্ম অমা ওইরিবা 'হরস্তার্ত' হৌদোকখ্রে। মহাক্না গুজরাত সরকারগী এজুকেসন অমসুং ত্রাইবেল দিবেলপমেন্তকা মরী লৈনবা তোঙান-তোঙানবা প্রোজেক্তশিং ভর্চুএল ওইনা গুজরাত য়ুনিভর্সিতীদগী শঙ্গাখ্রে/উরেপ উয়ুং তমখ্রে।

থৌরম অদুদা ৱা ঙাংলদুনা, রাস্ত্রপতিনা হায়খি মদুদি প্রধান মন্ত্রী, শ্রী নরেন্দ্র মোদীতা নত্তনা ভারতকী স্পেস প্রোগ্রামগী মপা ওইরিবা দা. ভিক্রম সরাভাই; হান্নগী ইস্রোগী চীয়রমেন দা. কে. কস্তুরিরঙ্গন; অমসুং কেন্দ্রগী গৃহ মন্ত্রী শ্রী অমিৎ শাহ য়াওনা য়ুনিভর্সিতী অসিগী এলুম্নাই ওইরম্বা অসি গুজরাত য়ুনিভর্সিতীগীদি য়াম্না চাউথোকচনিংঙাই অমনি।

রাস্ত্রপতিনা হায়খি মদুদি দা. ভিক্রম সরাভাইগুম্বা এলুম্নাই লৈবা ইন্সতিত্যুসন অমনা সাইন্স, রিসর্চ অমসুং ইন্নোভেসন্দা মকোক থোংবা হায়বসি মহৌশানি। মহাক্না পনখি মদুদি গুজরাত য়ুনিভর্সিতীগী কেপস্তা স্তার্ত-অপ ৪৫০ হেনবা লৈরি। অমসুং ইয়ুনিভর্সিতী অসিনা নুপীনা লুচিংবা স্তার্ত-অপ ১২৫ হেনববু শৌগৎলি। হায়রিবা থৌরাং অসিগী মখাদা নুপী ওন্ত্রপ্রিন্যুর ১৫,০০০ লোম্না ওনলাইন নৎত্রগা ওফ্লাইন্দা মরী লৈনরি। মহাক্না হায়খি মদুদি ওসিগুম্বা স্তার্ত-অপ ফ্রেন্দলী ওইবা য়ুনিভর্সিতী অসিদা নুপী ওন্ত্রপ্রিন্যুরশিংদা কত্থোকপা স্তার্ত-অপ প্লেৎফোর্ম শঙ্গাবা হায়বসি য়াম্না হরাওবা পোকচৈ। হায়রিবা ফম্বাক অসিনা নুপী ওন্ত্রপ্রিন্যুরশিংগী ইন্নোভেসন অমসুং স্তার্ত-অপকী থৌনাবু মপাঙ্গল হেনগৎহনবদা নত্তনা নুপী ওন্ত্রপ্রিন্যুরশিংবু তোঙান-তোঙানবা লৈঙাক্কী অমসুং প্রাইভেৎ এন্তর্প্রাইজশিংগা খুৎশম্নহন্নবগী কান্নরবা ফম্বাক অমসু ওইরগনি হায়না মহাক্না থাজবা থমখি।

রাস্ত্রপতি অসিনা হায়খি মদুদি এজুকেসনগা মরী লৈনবা মরুওইনা নুপী মচাশিং অমসুং ত্রাইবেল এজুকেসনগা মরী লৈননা গুজরাত্তা সাইনিক স্কুল, গর্লস লিতরেসী রেসিদেন্সিএল স্কুল অমসুং এক্লভিয়া মোদেল রেসিদেন্সিএল স্কুলগুম্বী প্রোজেক্তশিং শঙ্গাবদা হরাওবা পোকচৈ। মরমদি ভারতকী সাইন্স, রিসর্চ অমসুং ইন্নোভেসন্দা মখা তানা মপাঙ্গল কলহন্নবগী য়ুম্বী অসি স্কুল এজুকেসনগী থোঙদগী শাগৎকদবনি।

গুজরাতনা অতোপ্পা সেক্তরশিংগী মরক্তা এজুকেসনগী হীরমদসু মশক থোক্না চাউখৎপা পুরকখ্রে। রাজ্য অসিগী স্কুল দ্রোপ আউৎকী চাংসু হৌখিবা চহি কুনলোমসিদা চাদা ২২ লৈরম্বদগী চাদা ১.৩৭ দা হন্থরে। ওজাগা মহৈরোইগা লৈনবা রেসিওসু ৪০দগী ২৬দা হন্থরে। ঙসিদি 'ভিদ্যা সমিকশা কেন্দ্র'গী থোংদা, মহৈরোই অমসুং ওজাশিংগী রিএল তাইম মোনিতরিংসু মহৈলোইশঙ ৫৫,০০০দা তৌরি, মসিনা মহৈরোইশিংগী লর্নিং আউৎকমদা হেনগৎহল্লে । মহাক্না ফোংদোকখি মদুদি 'মিসন স্কুল ওব এক্সিলেন্স'কী মখাদা, মহৈলোইশঙ ২২,০০০গী ইনফ্রাস্ত্রকচরশিংবু রাজ্য অসিদা মথংগী চহি মঙা অসিদা অপগ্রেদ তৌনবগী পান্দম থমখ্রে।

রাস্ত্রপতি অসিনা হায়খি মদুদি গুজরাতনা হায়র এজুকেসনগী লমদা মশক থোকনা চাউখৎপা পুরকখ্রে। ২০০১-০২দা রাজ্য অসিদা লৈরম্বা কোলেজগী মশীং অসি ৭৭৫ ওইরম্মি অদুবু ২০২০-২১দদি হায়রিবা মশীং অসি ৩,১০০ হেন্না হেনগৎলে। ভারতকী ইহান হানবা এজুকেসন ক্বালিতী অমসুং মোনিতরিং সেল ওইরিবা, 'গরিমা সেল' অসিসু রাজ্য অসিদা হায়র এজুকেসন য়েংশিন্নবা হৌদোকখিবনি। মহাক্না হায়খি মদুদি 'ভন বন্ধু-কল্যান য়োজনা' মপুং ফানা চলাইরদুনা ত্রাইবেল সোসাইতীদসু মতীক চানা ময়েক চৎপগী চাং হেনগৎলে। হায়রিবা থৌশিল অসিনসু ত্রাইবেল মহৈরোইশিংগী মরক্তা স্কুল দ্রোপ আউৎ তৌবগী চাং ফগৎলে।

রাস্ত্রপতিনা হায়খি মদুদি গুজরাতনা চহি কুনলোম অসিদা চাউখৎপগী হীরম কয়ামরোমদা মকোক থোংবা রাজ্য অমা ওইদুনা লাক্লি। মসিনা ইন্দস্ত্রী, ইন্নোভেসন অমসুং ইনফ্রাস্ত্রকচর চাউখৎনবগী ওইবা বেঞ্চমার্ক কয়া অমা পুথোকখ্রে।

রাস্ত্রপতিনা হায়খি মদুদি রাজ্য খুদিংমক্কী ওইবা চাউখৎপগী মওং অমমম লৈজৈ, মসি রাজ্য অদুগী রিসোর্স অমসুং তঙাইফদবশিং অদুনা লেপ্পী। অদুবু গুজরাতনা মায়কৈ খুদিংদা চাউখৎপগী মতৌ অমা পুরক্লিবা অসিনা অতোপ্পা রাজ্যশিংদা মপুং ওইবা চাউখৎপা পুরক্নবগী লম্বী অমা তাক্লে। ভারতনা অমৃত কালগী মনুংদা করিগুম্বা রাজ্য খুদিংমক্না অমদগী অমনা মতৌ তম্নদুনা মখোয়গী মায় পাকপগী মোদেলশিং লৌখৎতুনা মাংজিল থানা চঙশিল্লবদি চাউখৎলবা লৈবাক অমগী মফম কনবা ঙমগনি হায়বগী থাজবা মহাক্না ফোংদোকখি।

রাস্ত্রপতিগী ৱারোল য়েংবীনবগীদমক মফম অসিদা নম্বীয়ু -

***************