“মারি মা হায়বীয়ু, মারি মা হায়বীয়ু”

জয় ইমা অম্বে,

ঙসি অসি মঙাশুবা শাইওন, স্কন্দমাতা লাৎপগী নুমিৎনি। অসিগুম্বা য়াইফরবা মতমসিদা ঐহাক্না ইমা অম্বে খুরুমজবগী খুদোংচাবা ফংজরে। ইমাবু লাৎচবগী মতাংদা ঐহাক্না ৱাফম অমা থমজনীংই, ঐখোয়গী পুন্সিদি ইমাগী তম্পাক্তা লেনবনি, অদোম খুদিংগীসুনি, অমসুং মফমসিদা লাকপা খুদিংগী অনৌবা পাঙ্গল অমসুং ইথিল ফংদুনা হল্লি হায়বসিদি অদোম্নসু থেংনরম্লগনি, অনৌবা থাজবা পুদুনা হল্লিবনি। লৈবাক অসিনা চাউখৎপা ভারত অমগী অচৌবা ৱারেপ লৌবগী মতমদা ঐহাক্না অম্বাজীদা লাক্লি। লৈবাক মীয়াম করোর ১৩০না চহি ২৫গী মনুংদা ঐখোয়না হিন্দুস্তানবু চাউখৎপা লৈবাক অমা ওইহন্নবা পুন্না ৱাশকমিন্নরি। ইমা অম্বাগী থৌজালদগী ঐখোয়না ঐখোয়গী ৱারেপশিং পাংথোকপা ঙম্বগী পাঙ্গল ফংলগনি। ঙসিগী য়াইফরবা নুমিৎ অসিদা, ঐহাক্না বনস্কন্থাগা লোয়ননা গুজরাতকী তোঙানবা জিলা কয়াগী মীওই লিশিং কয়াগীদমক্তা করোর লিশিং কয়াগী প্রোজেক্তশিং খুদোল তম্বগী ঐহাক্না খুদোংচাবা ফংলে। ঙসি খুৎশিন্নখিবা য়ুম লিশিং ৪৫গা উরেপ উয়ুং তমখিবগা পুন্সিল্লবদি য়ুম লিশিং ৬১ তারে, মসিগী বেনিফিশরী খুদিংবু ঐহাক্না থাগৎচরি। ঙসি য়ুম ফংলিবী নুপীশিংবু অখন্ননা থাগৎচরি। হন্দক্তি, অদোম্না অনৌবা য়ুমদা দিৱালী পাংথোক্লগনি, ইশাগী ইয়ুমদা পাংথোক্লগনি। পাখন খন্দুনা লৈরম্বশিংনা মশাগী পক্কা য়ুমদা দিৱালী পাংথোকপা হায়বসিবু নুংঙাইরোইদবা ৱাফম্লা, হন্দক্কী অসিনা অদোমগী খ্বাইদগী চাউবা দিৱালী ওইরগনি।

ইচিল ইনাওশিং,

ঐখোয়না নুপীশিংবু ইকায় খুম্নবগী ৱারী শাবা মতমদা মসি য়াম্না লায়বা ৱাফম ওইনা খল্লি। অদুবু, ঐখোয়না মসিবু য়াম্না লুনা খন্নবা মতমদা, নুপীশিংবু ইকায় খুম্নবা হায়বসি ঐখোয়গী সংস্কারদা কয়া য়াম্না লুনা লৈবগে হায়বা খঙবা ঙম্মি। মালেমগী মথৌনা মপাঙ্গল লৈবা মীয়ামশিংগী ৱারী শানবা মতমদা, মখোয়গী মমিংদা মখোয়গী মপাগী মমিং নপ্পা ঐখোয়না উই। ইয়াম্বা অদুগী মচাদো য়াম্না থৌনা ফৈ, অসুম্না হায়নৈকো। ভারত্তদি, থৌনা ফবা মীওইশিংগা মখোয়গী মমাগা মরী লৈননা ঐখোয়না ৱারী শানৈ। ঐহাক খুদম পীজগে, অদোমসু খন্থবীয়ু, ঐখোয়না অর্জুনগী মতাংদা তারে, অদুবু মহাকপু পান্দুগী মচা হায়নদবনি, ঐখোয়না মহাক্কী মমিং, পার্থ তাই। পার্থ হায়বদি করিনো? মসিদি পৃথা হায়বনি। মহাক অসি কুন্তীগী মচানি। অর্জুনগী মতাংদা খন্নবা মতমদা, কোন্তেয়াগী মচানুপা, কুন্তীপুত্র হায়রগসু খঙনৈ। মতৌ অসিগুম্না, খ্বাইদগী মপাঙ্গল লৈবা শ্রী কৃষ্ণবু শক্তাকপা মতমদা মহাকপু দেবকীনন্দন হায়নৈ। দেবকীগী মচানুপা কৃষ্ণ, ঐখোয়না অসুম্না হায়নৈ। হনুমাঞ্জীগী ৱারী শাবা মতমদসু, হনুমান্দগী হেন্না মপাঙ্গল মথৌনা লৈবদি ঐখোয়না অমত্তা তাদ্রি, মহাকপু অঞ্জনী পুত্র হায়নৈ। মসিনা হায়বদি মথৌনা মপাঙ্গল লৈবা মীওইশিংবু ভারত্তা মমাগী মিংদা ঐখোয়না খঙনৈ। মসিনি নুপীগী মতিক মগুন, মস্নি নুপীগী মপাঙ্গল, অমসুং মসি ঐখোয়না ঐখোয়গী চৎনবীদগী ফংলিবনি। মসিনি ঐখোয়গী সংস্কার। মসিদা নত্তনা, ঐখোয়না ঐখোয়গী লৈবাক ভারতপু ইমা ওইনা উই, অমসুং ইশাবুনা ইমা ভারতকী মচাশিংনি হায়না লৌই।

মরূপশিং,

মসিগুম্বা ফজরবা সংস্কৃতীগা মরী লৈনরবসু, য়ুমগী লন-থুম, য়ুমগী শেল-থুমগী ৱারেপ লৌবগী হক অসি মপা নত্ত্রগা মচাশিংগী ওইনবা ঐখোয়না উরি। য়ুম ওইরবদি নুপাগী মিংদা, গাড়ি লৈরবসু নুপাগী মিংদা, দুকান ওইরো, লৌ ওইরো, নুপাগী মিংদা লোয়না লৈনৈ। নুপীশিংগী মিংদা করিমত্তা লৈতে, মপুরোইবা লৈখিদ্রবা মতুংদা মচাগী মমিংদা লোয়না ওল্লি। ঐখোয়না পীগদৌরিবা প্রধান মন্ত্রী অৱস, দীন্দয়াল অৱস খুদিং মমাগী মিংদা পীগনি হায়না ঐখোয়না ৱারেপ লৌখ্রে। মরম অদুনা, ইং ২০১৪গী মতুংদগী সরকারনা লাইরবশিংগীদমক্তা য়ুম শাদুনা পীগদৌরিবা খুদিং মমাগী মিংদা নত্ত্রগা মমা অমসুং মহাক্কী মপুরোইবগী মিংদা, নত্ত্রগা মমা অমসুং মহাক্কী মচাগী মিংদা পীগনি হায়না ঐখোয়না ৱারেপ লৌখ্রে। ঐখোয়না ঙসি ফাওবদা লাইরবশিংগী য়ুম করোর ৩ হেন্না শাবীখ্রে, পীখ্রে। মখোয়গুম্বা য়ুম ফংলবশিংগী মাইথোংদা মোমোন মীনোক ঐখোয়না উরি, মখোয়শিং অসিগী মরক্তগী খ্বাইদগী য়াম্বদি য়ুম্বুরেম্বী ইমা অমসুং ইচে ইচল কয়াগীনি। ইশাগী য়ুম ফংবদগী, য়ুমগী অচঙবা শেনফম য়েংলুবদা মখোয় পুম্নমক লাক্ষপতি ওইরবনি। মনিংদা লৈরিবা অদোম ফজনা তারিকো! লাইরবা খুদিংদা পক্কা য়ুম পীবগী খোঙথাংবু খোঙজেল য়াঙনা পায়খৎপগীদমক্তা ঐহাক্না গুজরাত সরকারবু থাগৎচরি। মমাংগী চহিদা গুজরাত্তা য়ুম লাখ অমা মখায় শাবা লোইখ্রে। কুহ্মৈ মতম মনুংদা ইচে-ইচল অমসুং ইমাশিংনা চাকখুম চলায়বদা অৱাবা মাইয়োক্নহন্দনবা, লেম্না রেসন য়েনবগী স্কিম অসি মথংগী থা অহুমগা অমুক শাংদোক্লে। অৱাবা মতমদা লৈবাক মীয়াম করোর ৮০ হেনবদা লেম্না রেসন য়েনবগী স্কিমগীদমক্তা সরকারনা চাউরাকপা লুপা করোর লাখ ৪ চাদিং তৌরি। মমাংগী দিকেদ অনিদগী ঐহাক্না ঐখোয়গী ইমা অমসুং ইচে ইচলশিংবু মপাঙ্গল হাপ্নবা থবক তৌবগী খুদোংচাবা ফংজখি। বনস্কন্থানা মসিগী ফিভমগী অচৌবা শাখী ওইরি। ইমা অম্বাজী অমসুং ইমা নালেশ্বরী লৈরিবা মফমসিগী নুপীমচাশিংনা মহৈ-মশিংগী লমদা মনিঙদা লৈবসি ঐহাক্না য়াম্না নুংঙাইতে। মরম অদুনা, ঐহাক্না বনস্কন্থাগী লৌবুকশিং অশ্নগ-অমান্না থলহনগনি হায়না ৱাশক লৌখিবা মতমদা, ঐহাক্না অদোম্না ইশাগী য়ুমদা ইমা সরস্বতীগী মফম খাকপীয়ু হায়জখিবনি। ইচানুপীশিংনা মহৈ তমদ্রবদি ইমা সরস্বতীনা য়ুমদা কৈদৌনুংদা লাক্লোই হায়না ঐহাক্না হন্না হন্না হায়খিবা ঐহাক নিংশিংলি। সরস্বতী লৈতবা মফমদা, লক্ষ্মমীসু চঙনিংদবনি। বনস্কন্থাগী ইচে ইচলশিংনা, ত্রাইবেলশিংনা ঐহাক্কী ৱা লৌবীবদা ঐহাক্না নুংঙাইবা ফাওই। ঙসিদি, অমা নর্মদাগী নীরনা মফমসিগী লাইবক হোংহল্লি, নুপীমচাশিংসু থৱাই য়াওনা স্কুল কোলেজ চৎলি। মেলন্যুত্রিসনগী মাইয়োক্তা থেংনরিবা লান অসিদসু মখোয়না য়াম্না তেংবাংখিবনি। অঙাং পোকপা মতমদা মমাশিংদা সুখরী (রেসিপী) পীবা নত্ত্রগা শঙ্গোম য়েনবগী খোঙজংবু, বনস্কন্থানা মায় পাক্না মখা তানা চত্থরি।

ইচিল ইনাওশিং,

ইমাগী তেংবাংবগী ৱারেপ ঐখোয়না লৌখি, ইং ২০১৪গী মতুংদগী লৈবাক শিনবা থুংবদা মসিগী থবক চত্থরি। ইমা, ইচে-ইচল, ইচানুপীশিংগী পুন্সিদা থেংনবা অয়েৎপা খুদিংমক কোকহন্নবা ঐখোয়না মখোয়বু ভারতকী চাউখৎ-থৌরাংগী খোঙচৎকী দ্রাইবর ওইহল্লি। বেতি বচাও, বেতি পরহাওদগী হৌদুনা ফোর্স্তা নুপীশিং মপুং ফানা শরুক য়াহনবা ফাওবদা, নুপীশিংগী খুদোংচাবগী থোঙ হাংদোক্লে। অমাংশঙ, গ্যাস কন্নেক্সন, হর ঘর জল, জন ধন একাউন্ত নত্ত্রগা মুদ্রা স্কিমগী মখাদা গেরেন্তী য়াওদনা লোন পীবগী থৌওং ওইরো, কেন্দ্র সরকারগী অচৌবা স্কিম খুদিংগী ময়োলদা লৈবাক্কী মাতৃশক্তি, নারী শক্তি লৈরি।

মরূপশিং,

মমানা নুংঙাইবা মতমদা, ইমুংনা নুংঙাইগনি, অমসুং ইমুংনা নুংঙাইবা মতমদা, খুন্নাইনা নুংঙাইগনি অমসুং খুন্নাইনা নুংঙাইরকপা মতমদা লৈবাক্না নুংঙাইগনি। ঐখোয়না লেপ্পা লৈতনা ফংনবা হোৎনরিবা অসি মসিগুম্বা চাউখৎ-থৌরাং অসিবুনি। অদোম্না অমুক্তা হায়বীয়ুকো, মন্দির মমাংদা ত্রাফিক জাম লৈরিবা অসিদগী ঐখোয়না নীং তম্ফম থোকপরা? মফমসিদা শান্তি লৈবা অকোয়বগী ফিভম লৈবা পাম্বরা পামদবরা? চাউর-চাউরবা ত্রক কয়া মন্দির মমাংদা মার্বল পুদুনা চৎলিবসিগী মশাগী ওইবা অতোপ্পা লম্বী অমা লৈফম থোকপরা থোক্তবরা? ঐখোয়না রেলৱে লাইন অমসুং বাইপাসকী থবক্কী খুত্থাংদা পুম্নমক্কী অপাম্বা পীরবনি।

ইচিল ইনাওশিং,

ঙসিদি, অদোম্না তাবদা অঙকপা ফাওগদবা ৱারী অমা হায়গে। তরঙ্গা হিল-অম্বাজী-অবু রোদ লাইন অসি ইং ১৯৩০দা বৃতিশ লৈঙাক্কী মতমদগী ৱাহৌদোক থমখ্রবনি। হায়বদি, চাউরাক্না চহি ১০০গী মমাংদা মসিগীদমক্তা খন্নখ্রে হায়বনি, মসিগী ফাইলশিং লৈরি। বৃতিশকী মতমদগী মসিগী মতাংদা খন্নবা হৌখ্রবনি, হায়বদি, লমদম অসিদা রেল লাইন লাকপা হায়বসি কয়া য়াম্না মরু ওইবগে হায়বনি, রেল লাইন কয়া য়াম্না তঙাই ফরমদবগে হায়বনি, মসি চহি ১০০গী মমাংদা খঙখ্রবনি। অদুবু মরূপশিং, ইমা অম্বানা মসি ঐহাক্না পাংথোকপা পাম্বজাৎনি। অদুবু নীংতম্লবা মতুংদা ফাওবা মসিগী থবক হৌদবসি লাইবক থীবনি। নীংতম্বা ফংলবা মতুংগী দিকেদ কয়াদা ফাইলশিং অসি তাদুনা অদুমক লৈরকখি। ঐহাক্না গুজরাতকী মুখ্য মন্ত্রী ওইরিঙৈ মতমদা, মসিগীদমক্তা য়াম্না চেল্লম্বনি। কেন্দ্রদা অতোপ্পা সরকার লৈবনা ঐহাক্কী ৱা কনা অমত্তনা তাবীখিদে। নীংতম্বগী অমৃত মহোৎসবকী মতমদা ঐখোয়না মসিগী রেলৱে লাইন অসিবু ইমা অম্বাগী খুয়াখাদা শিন্নবা ফংবসি ঐখোয়গী দবল ইঞ্জিন সরকারগী লাইবক ফবনি। মসিগী রেল লাইন অমসুং বাই-পাস অসিনা মফমসিবু ত্রাফিক জামদগী নীং তমহনগনি অমসুং মসিনা মার্বল ইন্দস্ত্রীদসু তেংবাংগনি। ঙসিদগী মথৌ তৌবা হৌরিবা অখন্নবা ফ্রৈত কোরিদোর অসিনা লমদম অসিবু মশক থোক্না তেংবাংগনি। মসিনা মরম ওইরগা মফমসিগী মার্বল, অলু, হেঞ্জাং নাপী, খামেন অশিনবা অমসুং শঙ্গোম পুথোকপদা থবক চিল্লিবা মফমসিগী ঐখোয়গী লৌমীশিংদা য়াম্না কান্নবা পীগনি। মখোয়শিং থাদোকপগী অরায়বা লম্বী ফংলগনি, য়ৌহন্নীংবা মফমদা লায়না য়ৌহনবা য়ারগনি। মফমসিদগী কিসান রেল অথুবা মতমদা চেনবা হৌবা য়াই, মসিনা লৌমীশিংদা অখন্ননা কান্নবা পীগনি।

ইচিল ইনাওশিং,

তুরিজম সেক্তরনা খ্বাইদগী হেনবা কান্নবা ফংগনি। মফমসিদদি ইমা অম্বাজী মশামক লৈরবনি। ঐহাক্না মুখ্য মন্ত্রী ওইরিঙৈদা, মফমসিদা শক্তিপীথ ৫১ হৌদোকখিবনি। ইমা অম্বাসু মসিগী মনুংদা অমা ওইরি, মালেম পুম্বদা লৈবা ইমা অম্বাগী মফম খুদিংগী মফমসিদা ঐহাক্না রেপ্লিকা শেম্লি, মসিনা হায়বদি ইমা অম্বাজীগী মনাক্তা লাকপদা তীর্থ মফম ৫১গী খোঙচৎ চৎপা য়ারে হায়বনি। ইমা অম্বা খুরুম্বা মীওই কয়া লাকই, মখোয়না য়াম্না থুনা অমুক হনখিবগী মতৌ ঐহাক্না উবা ফংই। মফমসিদা লাকপদা য়ামদ্রবদা নুমিৎ ২-৩ লৈনীংনবা মফমসিদা মীয়ামগী অপাম্বা মফম মশিং য়াম্না শাবা হায়বসি ঐহাক্কী অপাম্বনি। মসিনা মফমসিদা শেল তানবগী খুদোংচাবা পীবা হেনগৎকনি। য়েংবীয়ু, অনকপদা গব্বর লৈ, মসিবুসু ঐখোয়না শেমদোক্লিবা অসি অদোম্না উরম্লগনি। মীওই খরনা করিনো হায়না খল্লম্বসু য়াই। ঙসিগী গুজরাত সরকারনা গব্বর তীর্থগী মফম চাউখৎহন্নবা থৱাই য়াম্না য়াওরি। অজিতনাথ জৈন মন্দির, তরঙ্গা হিলগী দর্শন তৌবদা লায়রকপা মতমদা, পালিতালাগী মরু ওইবা হেনগৎখিবগুম্না তরঙ্গা হিলগীসু হেনগৎলক্কনি। মসি অদোম্না ইশিন্দুনা থম্বীয়ু। ত্রেন য়ৌরক্লবদি, তীর্থ য়াত্রা তৌবা মীওই মশিং হেন্না লাক্লগনি। হোতেল, গেস্ত হাউস, দুকান, ধাবাশিংগী শেন্থোক হেনগৎলগনি। অপীকপা দুকানশিংগী থবক লৈরক্কনি। নহাশিংদসু গাইদ ওইবদগী হৌরগা তেক্সী থৌবগী থবক কয়া লৈরক্কনি। মসিগা লোয়ননা, ধরোই দামদগী অম্বাজী ফাওবগী অপুনবা মফমসিবু ঐহাক্না চাউখৎহনগে খল্লি। অদোম্না স্তেচ্যু ওফ য়ুনিতীদা চত্তুনা উরিবা খুদিংমক ঐহাক্না মফমসিদসু ওইহন্নীংই। ধরোই দামদা ৱাতর স্পোর্তকী অচৌবা থবক পায়খৎপা য়াই, মদুসু হেন্না চাউখৎলগনি।

ইচিল ইনাওশিং,

নাকল অমদা লাইনীংবা অমসুং ইন্দস্ত্রী লৈরি, অদুগা অতোপ্পা নাকল অমদা, ঐখোয়গী ঙমখৈ লৈরি। মসিদা ঐখোয়গী জৱাশিংনা লৈবাক ঙাক্তুনা লৈরি। কেন্দ্র সরকারনা সুইগম তালুক্তা সীমা দর্শন প্রোজেক্ত অমা হন্দক্তা হৌদোকখ্রে। প্রোজেক্ত অসিনা ভারত মীয়াম্বু বোর্দর সেক্যুরিতী ফোর্সকী জৱানশিংগী পুন্সি মহিংগী মতাংদা খঙহনবা অমসুং লমকোয়বশিংদা মান্নবা এক্সপেরিএন্স থেংনহনবা পাম্লি। প্রোজেক্ত অসিনা রাসস্ত্রীয় এক্তা (লৈবাক অমত্তা ওইবা), পাঞ্চ প্রান (ৱাশক মঙা)গী মরক্তা অমা ওইবা, অমসুং লমদমসিগী তুরিজমদা কান্নবা শাফু পীবদসু পাঙ্গল হাপকনি। দীসা এয়র ফোর্স স্তেসন্দা পায়খৎলিবা রনৱে অমসুং অতোপ্পা থবক কয়ানা লমদম অসিগী এয়র ফোর্স দিফেন্সকী মপাঙ্গল হেনগৎহনগনি। স্ত্রেতজিক ওইবা মিৎয়েংদগী য়েংবা মতমদা, মসিগী এয়র্ফোর্স স্তেসন অসি লৈবাক্কী য়াম্না মরু ওই। অসুক য়াম্না চাউবা স্তেসন অমা মফমসিদা শারবনিনা, অকোয়বগী কারবারসু চাউখৎলক্কনি। মফমসিদা মনা-মশিং, শঙ্গোমদগী হৌদুনা নোংমগী তঙাই ফদবা পোৎলমশিং শোইদনা পুথোক্লক্কনি। মসিনা মরম ওইরগা মফমসিগী লৌমী, শা-শন, য়েন-ঙানু লোইরিবশিংদা কান্নবা য়াম্না পীগনি।

ইচিল ইনাওশিং,

সরকারগী হোৎনজমন্না মরম ওইরগা, হৌখিবা দিকেদ অনিসিদা বনস্কন্থাগী শক্তমদা অচৌবা অহোংবা পুরকখ্রে। নর্মদাগী নীর, সুজলম সুফলম অমসুং দ্রিপ ইরিগেসন্না ফিভম অসিদা অহোংবা পুরকপদা অচৌবা থৌদাং য়াখি। বনস্কন্থাদা কম্ফোই, অঙ্গুর, অলু, খামেন অশিনবা মশিং য়াম্না নোংমদি শোইদনা পুথোক্লগনি হায়বসি কনানবু হান্না খল্লম্বগনি। লৌমী, নুপী অমসুং নহাশিংগী পুন্সিদা অহোংবা পুরক্কদবা প্রোজেক্ত কয়া ঙসি হৌদোক্লে। মসিগীদমক্তা পুম্নমকপু ঐহাক্না থাগৎচরি। অদোমগী মফমদা মসিগুম্বা মতৌগুম্না থৌজাল কয়া লেপ্তনা ফংগনি হায়বগী থাজবগা লোয়ননা পুম্নমকপু অমুক হন্না থাগৎচরি। অদুগা, মফমসিদা ঐহাক্না লাকপদা খরা থেংবগী অদোম্না ঙাকপীয়ু হায়জরি। ঐহাক্কী হেক থোক্লকপগা মফমসিদা য়াম্না থুনা য়ৌগনি খল্লুবনি। অদুবু লম্বীদা খুঙ্গংগী মীয়াম কয়াগা উন্নরক্লে, মখোয়গী খোঙ শোক্নিংবগী ইথিল লাকখিবনি। মদু তৌবদা লাকপদা থেংখ্রে। মরম অদুনা অদোম্না খরা হেন্না ঙাইবা তাখি, মসিগীদমক্তা ঐহাকপু ঙাকপীয়ু। অদুবু, বনস্কন্থাগী ইচিল ইনাওশিং, হৌজিক্তি অনকপদা খেদব্রহ্মসু লৈরে, সাবর্কন্থাগী মফমসু মাঙদা উরে। ঐখোয় খুদিংনা চাউখৎ-থৌরাংগী অনৌবা থাক্তা য়ৌবা তাবনি। মসিগীদমক্তা ঐখোয়গী নাক্তা চহি ২৫গী খুদোংচাবা লৈরি, ঙসিগী মালেম্না ভারতপু য়াম্না থাগৎনরি। খুদোংচাবা অসিবু ঐখোয়না মাঙহনগদরা? হোৎনফম থোকই নত্ত্রগা থোক্তে? চাউখৎ-থৌরাংগী থবকশিংদা অহেনবা মিৎয়েং চঙফম থোকই নত্ত্রগা থোক্তে? মীয়াম্না পুনবনা অমত্তা ওইনা তুংলমচত্তা চঙশিনফম থোকই নত্ত্রগা থোক্তে? মসি পাংথোক্লবা মতমদা, ঐখোয়না চাউখৎকদৌরিবনি মরূপশিং। মসিগীদমক্তা ঐখোয়না অমনা অমবু মতম পুম্বদা তেংবাংগদবনি। মসি ঐহাক্কী পাঙ্গলনি, মসি ঐহাক্কী লন্নি। অদুগা অদোমগী থৌজালনা ঐখোয়বু অনৌবা থৌওং কয়া পাংথোকপগী ইথিল পীরিবনি। মরম অদুনা, ইমাগী মফমসিদগী ঐহাক্না গুজরাত মীয়াম খুদিংদা থাগৎচরি। হন্না হন্না থাগৎচরি।

*****