ইনফোর্মেসন অমসুং ব্রোদকাস্তিং মন্ত্রালয়
মেনস্ত্রীম মীদিয়াগী খ্বাইদগী চাউবা শিংনবসি মেনস্ত্রীম মীদিয়া চেন্নেল মশামক্নি: শ্রী অনুরাগ থাকুর
“ৱাখল মান্নদবা কাঙলুপ অনি খায়দোক্তুনা পাংথোকপা দিবেৎনা চেনেল অমদা মীয়াম্না থাজবা থম্বা, শেমজিন শাজিনবগী মতৌ লৈতনা মীয়ামদা ই-পাউ য়ৌহন্নবা মথৌ পাংথোক্লিবা পাউমীশিংবু লৈখা তাহল্লি”
কেন্দ্র মন্ত্রী, শ্রী অনুরাগ থাকুরনা এ.আই.বি.দি.গী ৪৭শুবা এনুএল গেদরিং হৌদোকখ্রে
প্রসার ভারতীগী সি.ই.ও., শ্রী মায়াঙ্ক অগর্ৱালদা ইং ২০২২গী লাইফতাইম এচীবমেন্ত এৱার্দ পীখ্রে
Posted On:
20 SEP 2022 9:47AM by PIB Imphal
ইনফোর্মেসন অমসুং ব্রোদকাস্তিংগী কেন্দ্র মন্ত্রী, শ্রী অনুরাগ থাকুরনা ঙসি ইনফোর্মেসন অমসুং ব্রোদকাস্তিং (আই. অমসুং বি.)গী কেন্দ্রগী রাজ্য মন্ত্রী, দাঃ এল. মুরুগন; আই. অমসুং বি.গী সেক্রেতরী, শ্রী অপুর্বা চন্দ্র অমসুং এ.আই.বি.দি.গী দাইরেক্তর, কুমারী ফিলোমেনা জ্ঞানপ্রগসম য়াওবা থৌরম অমদা এসিয়া পেসিফিক ইন্সতিত্যুত ফোর ব্রোদকাস্তিং দিভেলপমেন্ত (এ.আই.বি.দি.)গী ৪৭শুবা এনুএল গেদরিং অমসুং ২০শুবা মীফম হৌদোকখ্রে।
শ্রী থাকুরনা থৌরম অসিদা ৱা ঙাঙবদা মেনস্ত্রীম মীদিয়াগী খ্বাইদগী চাউবা শিংনবসি ন্যু এজ দিজিতেল প্লেতফোর্মদগী লাক্কদবা নত্তে, মসিদি মেনস্ত্রীম মীদিয়া চেন্নেল মশামক্তগী লাক্কনি হায়না ফোংদোকখি। মীয়ামদা ই-পাউ পীবগী তসেংবা থৌওংদি অচুম্বা ৱারোল তাকপা, অচুম্বা করিনো মীয়ামদা লান্থোকপা অমসুং নাকল খুদিংমক্না প্লেতফোর্ম অসিগী খুত্থাংদা মশাগী ওইবা ৱাখল্লোন ফোংদোকহনবনি হায়না মহাক্না মখা তাখি।
অরানবা পাউদম শন্দোকপা ৱাখল করিমত্তা মান্নদবা মীথুংলেনবু লাকপীনবা পাউজেল পীবা অমসুং মতিক থোকপমখৈ উরাও-থরাওবগী থৌওংনা চেনেল অমগী ইকায় খুম্নবা মাঙহল্লি হায়না মন্ত্রীনা হায়খি। “অদোম্না অদোমগী মীথুংলেনগী মতাংদা লৌবা ৱারেপ, মখোয়গী ৱাঙাং-শঙাং অমসুং উৎলিবা মতৌশিংনা অদোমগী চেনেলগী মীয়াম্না থাজবগী মতৌবু মীয়াম মাঙদা তাক্লিবনি। মখোয়না শো য়েংনবা মশাগী মিনিত অমা কাইথোকপা য়াই, অদুবু থাজবা য়াবা অমসুং নুং-পাউ ফাওনা উবা পাউ পীবা হায়না লৈরিবা অদোমগী এঙ্কর, চেনেল নত্ত্রগা ব্রান্দবু মখোয়না কৈদৌনুংদা অমুক হন্না থাজবা থম্লরোই”, হায়না মহাক্না মখা তাখি।
ঙসিগী থৌরমদা শরুক য়ারিবা ব্রোদকাস্তরশিংদা মখোয়না নেরেতিবশিংবু সাউন্দবাইত্না তাকহন্দনবা, মদুগী মহুত্তা মখোয় মশানা নৌনা শেমদোক্তুনা মীথুংলেন অমসুং চেনেলগীদমক্তা কাঙলোন শেম্নবা হোৎনবীয়ু হায়না মন্ত্রীনা হায়খি।
ঙসিগী থৌরমদা শরুক য়ারিবা মীয়ামদা মন্ত্রীনা অসুম্না ৱাহং হংখি, “নহা ওইরিবা ওদিএন্সশিংনা তি.ভি.গী পাউশিংদা লাওনরিবা ময়ামদুবু য়েংলিবদুবু অদোম্না অদুমক য়েংদুনা লৈগদৌরিবরা নত্ত্রগা ন্যুজ অমসুং দিবেত্তা খন্ন-নৈনরিবশিংগী থৌওংদা মীচঙ মীখায় নাইদবগী মতৌ পুরক্তুনা হীরম অসিদা মাঙজিল থানা লৈনবা হোৎনগদরা?”
শ্রী অনুরাগ থাকুরনা কোবিদ লাইচৎ মনুংদা মেম্বর লৈবাকশিংবু ওনলাইন্দা পাউ ফাওনহন্দুনা থমখিবা অমসুং মীদিয়ানা লাইচৎকী অৱাবা পোৎলুম্বু মতৌ করম্না হন্থহনগনি হায়না লেপ্তনা ৱাফম কয়া শন্দোকখিবগীদমক্তা এ.আই.বি.দি.না লৌখিবা লুচিংবগী মতৌবু থাগৎপা ফোংদোকখি। মেদিকেলগী হীরমদা খ্বাইদগী নৌবা চাউখৎপা পুরকখিবা, কোবিদ লান্মীশিংগী ইথিল পীনীংঙাই ওইরবা ৱারী, অদুগা খ্বাইদগী মরু ওইবা অমা ওইনা, লাইচত্তগী হেন্না য়াঙনা শন্দোকখিবা অরানবা পাউগা মাইয়োক্নদুনা তসেংবা ৱারোল মীয়ামদা তমখিবগী খুত্থাংদা মেম্বর লৈবাকশিংনা কান্নবা য়াম্না ফংনখি হায়না মহাক্না ফোংদোকখি। শ্রী থাকুরনা এ.আই.বি.দি.গী দাইরেক্তর, কুমারী ফিলোমেনা, এ.আই.বি.দি. জেনেরেল কনফরেন্সকী প্রসিদেন্ত, শ্রী মায়াঙ্ক অগর্ৱাল অমসুং মেম্বর লৈবাকশিংবু এসিয়া পেসিফিক মফমদা কোবিদ লাইচৎকী মাইয়োক্তা মীদিয়াগী মাইকৈদগী মপাঙ্গল লৈবা পাউখুম অমসুং মতেং কয়া পীখিবগীদমক্তা থাগৎপা ফোংদোকখি।
ঙসিগী থৌরমগী থীম ‘লাইচৎ মতুংগী য়ুগতা ব্রোদকাস্তিংগী মপাঙ্গল লৈবা তুংগী মতম অমা শেমগৎপা’গী মতাংদা ফোংদোক্লদুনা, শ্রী থাকুরনা অসুম্না হায়খি, “ব্রোদকাস্ত মীদিয়ানা ই-পাউ পীবগী খ্বাইদগী মরু ওইবা পাম্বৈ ওইনা মতম পুম্বদা ওইদুনা লাক্লবসু, কোবিদ-১৯গী মতম্না মসিগী মওং-মতৌবু হেন্না স্ত্রেতজিক ওইহল্লে। কোবিদ লাইচৎনা অচুম্বা অমসুং মতম চানা পীবা ই-পাউনা পুন্সি কয়া মতৌ করম্না কনবা ঙমহনবগে হায়বা ঐখোয়দা তাকপীখ্রে। মসিগুম্বা মালেমগী লুরবা তাঞ্জা অসিদা মালেম্বু প্লেতফোর্ম অমদা পুরকখিবা অমসুং মালেম অসি ইমুং-মনুং অমনি হায়বা ইথিলবু হেন্না মপাঙ্গল লৈহনখিবসি মীদিয়াননি”। লাইচৎ মনুংদা ভারতকী মীদিয়ানা লৌখিবা থৌদাংবু মায় পাকপগী ৱারী অমনি হায়না লান্থোক্লদুনা, কোবিদ-১৯গা মরী লৈনবা এৱিয়র্নেস পীবগী ৱারোল, সরকারগী মরু ওইবা কাঙলোন অমসুং দাক্তরশিংগা ওনলাইন্দা লেম্না ৱারী-ৱাতাই শাবগী থৌওংশিংবু লৈবাক্কী কাচিন কোয়াদা লৈবা মীপুম খুদিংদা শোইদনা য়ৌহনবদা মীদিয়াগী অচৌবা থৌদাং লৈখি হায়না মহাক্না ফোংদোকখি।
মেম্বর লৈবাকশিংনা ক্বালিতী লৈবা কন্তেন্ত লান্নবগী হীরমদা তেংবাংনবগী থৌওং শেম্নবা শ্রী থাকুরনা হায়খি। মসিগুম্বা তেংবাংনদুনা পাংথোকপা থৌওংশিংগী খুত্থাংদা প্রোগ্রাম কয়া লান্নবনা মালেমগী চৎনবীশিংবু হেন্না নকশিন্নহনগনি। লৈবাকশিংগী মরক্তা মসিগুম্বা মীদিয়াগী মরী লৈনবনা মীয়াম মশেল মরক্তা অচেৎপা মরী লৈনহনবদা য়াম্না তেংবাংগনি হায়না মহাক্না মখা তাখি।
মন্ত্রীনা মহাক্কী ৱারোল লোইশিল্লকপা ওইনা, মীদিয়ানা মশাগী শক্তম খুদিংদা মীয়ামগী মিৎয়েং হোংহনবা ঙম্বগী মতিক লৈ অমসুং মীয়াম্বু মপাঙ্গল হাপ্পগী খ্বাইদগী কান্নবা খুৎলায় অমসু ওই হায়বা ৱাফমদা মীয়ামগী পুক্নিং চিংশিনখি। “ঐখোয়গী পাউমী অমসুং ব্রোদকাস্তর মরুপশিংনা মীদিয়াগী লম্বু হেন্না মতিক লৈবা অমসুং কান্নহনবা ওইহনবা ঙমহন্নবা অকোয়বগী ফিভম অমা শেম্বা হায়বসি য়াম্না মরু ওই”, হায়না মহাক্না ফোংদোকখি।
প্রসার ভারতীগী চীফ একজেক্যুতিব ওফিসর অমসুং এ.আই.বি.দি.গী প্রসিদেন্ত, শ্রী মায়াঙ্ক অগর্ৱালনা মহাক্কী ৱারোলদা এ.আই.বি.দি.না লোকদাউনগী মনুংদা ফাওবা মখোয়গী ত্রেনিং অমসুং কেপাসিতী বিলদিং তৌবগী থবক-থৌরমশিং লেপ্তনা পাংথোকখি হায়না ফোংদোকখি। মমাংগী চহিখক্তদা ত্রেনিং প্রোগ্রাম ৩৪ পাংথোকখি অমসুং মখোয়শিংনা চৎনবী অমসুং ক্লাইমেত চেঞ্জ, গ্রীন তেক্নোলোজী, সস্তেনেবল দিভেলপমেন্ত, হান্নদগী হেন্না খোঙজেল য়াঙনা পাউ পীবা, অঙাংশিংগীদমক্তা প্রোগ্রাম শীন-লাঙবনচিংবা হৌজিক মতমগী খ্বাইদগী মরু ওইরক্লিবা হীরমশিংদা অহেনবা মিৎয়েং চঙখি।
শ্রী অগর্ৱালনা ব্রোদকাস্তিং তৌবদা ইন্তর্নেত শিজিন্নবা হেনগৎলকপগা লোয়ননা, সাইবর সেক্যুরিতী জর্নেলিজমদা পাউমীশিংবু ত্রেনিং পীবা হায়বসি য়াম্না তঙাই ফদবা ওইরক্লে হায়না পাউদমখি। হায়রিবা অসিবু ত্রেনিংগী শরুক ওইনা থবক্তা পাংথোকপসি এ.আই.বি.দি.না খ্বাইদগী অহানবনি হায়না মহাক্না হায়খি।
কুমারী ফিলোমেনা জ্ঞানপ্রগসম্না কন্তেন্তনা মীদিয়াগী তুংগী মতম লেপ্লগনি অমসুং কন্তেন্তপু মতৌ করম্না অমগা অমগা লান্নগদগে অমসুং মসিদগী শেল করম্না তানগদগে হায়বসিনা ব্রোদকাস্তিংগী তুংগী মতম অমুক লেপকনি হায়না ফোংদোকখি। মহাক্না দেলিগেত অমসুং তোঙানবা লুপশিংগী মীহুৎশিংবু ঙসিগী থৌরমসিদা শরুক য়াবগীদমক্তা থাগৎপা ফোংদোকখি।
ঙসিগী থৌরম অসিদা, কেন্দ্র মন্ত্রী, শ্রী অনুরাগ থাকুরনা ইং ২০২১ অমসুং ২০২২গী মনা পীবগী থৌওংসু লুচিংখি। ইং ২০২১গী এপ্রিসিএসন এৱার্দপু রেদিও তেলিভিজন ব্রুনৈদা খুৎশিন্নখি। ইং ২০২২গী এপ্রিসিএসন এৱার্দনা রিপব্লিক ওফ ফিজিগী ইকোনোমী, সিবিল সর্ভিস, কম্ম্যুনিকেসন, হাউজিং অমসুং কম্ম্যুনিতী দিভেলপমেন্ত মন্ত্রালয় অমসু ফিজি ব্রোদকাস্তিং কোর্পোরেসন্না পুন্না ফংমিন্নখি।
ইং ২০২১গী লাইফতাইম এচীবমেন্ত এৱার্দনা কেম্বোদিয়াগী ইনফোর্মেসন অমসুং ব্রোদকাস্তিং মন্ত্রী, শ্রী খিয়ু খানহারিথকী মফমদা খুৎশিন্নখি। ইং ২০২২গী লাইফতাইম এচীবমেন্ত এৱার্দনা এ.আই.বি.দি. প্রসিদেন্ত, সি.ই.ও. অমসুং পি.বি., শ্রী মায়াঙ্ক অগর্ৱালদা পীখি।
ভারত্তা লৈবা তোঙানবা ফোরেন মিসনশিংগী মকোক থোংবশিং, এ.আই.বি.দি. মেম্বর লৈবাকশিংগী দেলিগেত, প্রসার ভারতীগী ওফিসর অমসুং ভারত সরকারগী ইনফোর্মেসন অমসুং ব্রোদকাস্তিং মন্ত্রালয়গী তোঙানবা মশা কয়াসু ঙসিগী থৌরমসিদা শরুক য়াখি।
এ.আই.বি.দি.গী মতাংদা ৱাফম খরা
এসিয়া পেসিফিক ইন্সতিত্যুত ফোর ব্রোদকাস্তিং দিভেলপমেন্ত (এ.আই.বি.দি.) অসি উনেস্কোগী মিৎয়েং মখাদা ইং ১৯৭৭তা লিংখৎখিবনি। মসিদি ইলেক্ত্রোনিক মীদিয়া চাউখৎহনবগী লমদা শরুক য়ারিবা য়ুনাইতেদ নেসন্স ইকোনোমিক এন্দ সোসিএল কম্মিসন ফোর এসিয়া অমসুং দি পেসিফিক (য়ু.এন.-ই.এস.সি.এ.পি.)গী লৈবাকশিংগী তোপ-তোপ্পা রিজনেল ইন্তর-গবর্নমেন্তেল ওর্গনাইজেসন অমনি। মলেসিয়া সরকারনা মসিগী য়ুম্বু ওই অমসুং মসিগী সেক্রেতরিএৎনা ক্বালা লুম্পুরদা লৈ।
এ.আই.বি.দি.দা হৌজিক-হৌজিক মপুং ওইবা মেম্বর ২৬ (লৈবাক) লৈ, লুপ ৪৩না মসিগী মীহুৎ ওই, অমসুং এফিলিএত মেম্বর ৫০ (লুপ) লৈদুনা অপুনবা মেম্বর্শিপ ৯৩না লৈবাক অমসুং রিজন ৪৬কী মহুৎ শিল্লি, অমসুং এসিয়া, পেসিফিক, য়ুরোপ, অফ্রিকা, অরাব স্তেত অমসুং নোর্থ অমেরিকাদা পার্ত্নর ৫০ হেন্না লৈ।
এ.আই.বি.দি. জেনেরেল কনফরেন্স (জি.সি.) অমসুং মখোয়গী মরী লৈনবা মীফম অসিনা ইন্সতিত্যুত অসিগী চহিগী ওইবা ওফিসিএল গেদরিং অমনি। জেনেরেল কনফরেন্স অসি পাউজেল পীবখক্কী খুত্থাংদা মেম্বর লৈবাক, এফিলিএত, পার্ত্নর, ওবজর্বর অমসুং মকোক থোংবা ব্রোদকাস্তরশিংনা শরুক য়াবা য়াই। মেম্বর লৈবাক, এফিলিএত অমসুং পার্ত্নরশিংনা এ.আই.বি.দি.না মমাংগী চহিদা পাংথোকখিবা থবক থৌরম অমসুং প্রোজেক্ত মশিং য়েংশিনবা অমসুং তুংগী প্রোজেক্তশিং য়েংশিনবগী খুদোংচাবা ফংগনি। মীফম অসিদা খন্ন-নৈনখিবশিংগী মনুংদা মেম্বর লৈবাকশিংগী চাউখৎপা পুরকপদা তঙাই ফদবা হীরমশিংসু য়াওখি।
ইনফোর্মেসন অমসুং ব্রোদকাস্তিং মন্ত্রালয়না এ.আই.বি.দি.গী ফুল মেম্বর্শিপ পায়। ভারতকী পব্লিক সর্ভিস ব্রোদকাস্তর অমা ওইদুনা প্রসার ভারতীনা এ.আই.বি.দি.গী তোঙানবা সর্ভিস কয়া শিজিন্নৈ।
ভারতনা ইং ১৯৭৮, ১৯৮৫, ২০০৩দা গবর্নিং কাউন্সিল মীতিং (জি.সি.)গী য়ুম্বু ওইখ্রে অমসুং ৪৭শুবা এনুএল গেদরিং অমসুং ২০শুবা এ.আই.বি.দি. জেনেরেল কনফরেন্স অমসুং এসোসিএতেদ মীতিং ২০২২বু নই দিল্লীদা সেপ্তেম্বর ১৯-২১, ২০২২দা অমুক্কা হন্না য়ুম্বু ওইবগী খুদোংচাবসু ফংখি।
*****
(Release ID: 1860978)
Visitor Counter : 108