সাইন্স অমসুং তেক্নোলোজিগী রাজ্য মন্ত্রী(মনিংতম্বা); আর্থ সাইন্সেসকী রাজ্য মন্ত্রী(মনিংতম্বা); পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা হায়খ্রে মদুদি মালেমগী মমাঙদা প্রধান মন্ত্রী নরেন্দ্র মোদীগী পান্দম ফোঙদোক্নবা য়ু.এস.এদা পাংথোক্লিবা গ্লোবেল ক্লিন ইনর্জি এক্সন ফোরম মীফম্না ভারতকী খুদোংচাবা অমা পীরে।

অৱাংবা থাক্কী অপুনবা মিনিস্তরশিংগী মীহুৎ কাংবু অমগী লুচিংবা অমা ওইনা নুমিৎ ৫গী খোঙচৎতা য়ু.এস.এ থাদোক্ত্রিঙৈদা দোক্তর জিতেন্দ্র সিংহনা মেদিয়াদা হায়খি, তোঙান-তোঙানবা লৈবাকশিংগী মিনিস্তর ৩০, সি.ই.ও চা কয়া, ললোন-ইতিক্কী লুচিংবশিং, সাইন্তিস্তশিং অমসুং অখঙ-অহৈশিং য়াওনা মরীলৈনবা খুদিংমক ফোরম অসিদা পুনগনি অমসুং মৈখু থাংদবা ইনর্জিগী মতাংদা প্রধান মন্ত্রী নরেন্দ্র মোদীগী মখাদা ভারতনা মাংজিল থানা লৌরিবা থৌদাং মীফম অসিনা শকখঙলে।

দোক্তর জিতেন্দ্র সিংহনা হায়খি য়ুনাইতেদ নেসন্স ফ্রেমৱার্ক কনভেন্সন ওন ক্লাইমেত চেঞ্জ(য়ু এন এফ সি সি সি)দা ভারতকী অনৌবা নেসনেল দিতরমাইন কন্ত্রিবিউসন(এন দি সি) পাউদম্নবগী অয়াবা হৌখিবা থাদা প্রধান মন্ত্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা অয়াবা পীখ্রে।

২০২১গী নবেম্বরদা য়ুনাইতেদ কিংদমগী গ্লাস্কোদা পাংথোকখিবা য়ুনাইতেদ নেসন্স ফ্রেমৱার্ক কনভেন্সন ওন ক্লাইমেত চেঞ্জ(য়ু এন এফ সি সি সি)গী ২৬শুবা কনফরেন্স ওফ পার্তিস(কোপ ২৬) মীফমদা ভারতকী মাইকৈদগী লৈবাক অসিনা ক্লাইমেতকী মতাংদা পায়খৎলিবা ফাইব নেক্তর ইলিমেন্তস(পঞ্চঅমৃত)গী মরমদা মালেমদা পাউদমখি।

দোক্তর জিতেন্দ্রনা হায়খি ভারতকী ৭৫শুবা নিংতম্বা নুমিৎ, অগস্ত ১৫, ২০২২দা প্রধান মন্ত্রী শ্রী নরেন্দ্র মোদীনা নেসনেল হায়দ্রোজেন মিসন হৌদোকখ্রে। লৈবাক অসিগী ক্লাইমেতকী পান্দমশিং ফংনবা অমসুং ভারত অসি গ্রিন হায়দ্রোজেনগী মফম অমা ওইনবা সরকারগী মতেং পাংনবা মিসন অসিনা পান্দম থম্লি অমসুং ২০৩০ ফাওবগী মনুংদা গ্রিন হায়দ্রোজেন তন মিল্লিয়ন ৫ পুথোক্নবা পান্দম থম্লিবা অসিদা অমসুং রিনিউএবল ইনর্জি পুথোকপা হেনগৎনবা থবকশিংদা মিসন অসিনা মতেং পাংগনি।

দোক্তর জিতেন্দ্র সিংহনা হায়খি ভারতনা নেত জিরো ফংনবা মাইকৈদা চঙশিনবদা মিনিস্ত্রি অমতনা থৌদাং লৌদবা মরম্না, মাইকৈ অসিদা  ইনভাইরোনমেন্ত, ফোরেস্ত অমসুং ক্লাইমেত মিনিস্ত্রি, নিউ অমসুং রিনিউএবল ইনর্জি মিনিস্ত্রি অমসুং হেভি ইন্দস্ত্রি মিনিস্ত্রি(ইলেক্ত্রিক্কী গারিশিং য়োকখৎনবা ফাস্তর এদোপসন এন্দ মেনুফেকচরিং ওফ হায়ব্রিদ এন্দ ইলেকত্রিক ভেহিকলস ইন ইন্দিয়া(ফেম ইন্দিয়া)স্কিম পায়খৎলিবা)না অচৌবা থৌদাং কয়া লৌবা উরে।

দোক্তর জিতেন্দ্র সিংহনা হায়খি হন্দক লৈবাক অসিদা অমসুং মপান লৈবাকশিংদা মৈখু থাংদবা ইনর্জিগী তেক্নোলোজি কয়াগী মতাংদা অনৌবা কয়া পুথোরক্লিবা অসিগী মরমদা গ্লোবেল ক্লিন ইনর্জি এক্সন ফোরমগী প্লেনারি অমসুং রাউন্দতেবলশিংদা য়াম্না নকশিন্না থবক তৌগনি হায়না মহাক্না থাজবা থম্লি।

*****