ইজুকেসন অমসুং স্কিল দিবলপমেন্ত অমসুং ওন্ত্রেপ্রেনিউয়রশিপকী য়ুনিয়ন মিনিস্তর শ্রী ধরমেন্দ্র প্রধান্না ক্লাস ১দগী ক্লাস ৫ ফাওবগী রামকৃষ্ণ মিসনগী ‘এৱেকনিং’ থৌরম হৌদোকখ্রে। থৌরম অদুদা রামকৃষ্ণ মিসন নিউ দিল্লিগী সেক্রেতরি শ্বামি সান্তাতমানাদা, সি.বি.এস.ইগী চিয়রপর্সন শ্রীমতি নিধি চিব্বর, কে.ভি.এস অমসুং এন.ভি.এস অমসুং মিনিস্ত্রিগী অতোপ্পা ওফিসিএলশিং শরুক য়াখি। 

থৌরম অদুদা শ্রী প্রধান্না হায়খি শ্বামি বিভেকানন্দাগী ৱাঙুলোন্না এন.ই.পি ২০২০দা অকনবা ইথিল পীখি। শ্বামি বিভেকানন্দদগী হৌরগা শ্রী ঔরোবিন্দো অমসুং মহাত্মা গান্ধী ফাওবগী ঐখোয়গী অচৌবা লুচিংবশিংনা লৈবাক অসি চাউখৎনবা খুমাংচাউশিনবা অমসুং ঐখোয়গী সভেত্যগী গুনশিংদা য়ুম্ফম ওইবা ইজুকেসন সিস্তেম অমগী মঙলান মঙলমখি। লাইরিক তম্বগী পান্দমশিংগী মনুংদা খুন্নাইগী অওনবা পুরকপা অসি মরুওইবা পান্দম অমনি। লন-থুমদগী অফবা গুন অমসুং লৌশিংনা হেন্না  মরুওই। তুংগীদমক থৌরাং তৌরবা অমসুং খুন্নাইগী ৱাখল খনবা ঙম্বা মীরোল পুথোক্নবগীদমক ভেলু-বেজ ইজুকেসন অসি য়াম্না মরুওই।

মহাক্না মখাতানা হায়খি রামকৃষ্ণ মিসন অসি এপ্লাইদ ইজুকেসন তাকপী-তম্বীগী অচৌবা গুন অমা লৈরি। ঐখোয়না এন.ই.পি ২০২০ চৎহনবা মতমদা, ক্লাস ১দগী ক্লাস ৮ ফাওবদা ভেলু-বেজ ইজুকেসনগী থৌরমশিং হাপচিনবগী মথক্তা ক্লাস ৯দগী ক্লাস ১২ ফাওবা হাপচিনগনি। মসিগী শিংথানিঙাই ওইরবা খোঙথাং অসিনা এন.ই.পি ২০২০গী ৱাঙুলোনগা ইরোইন্না অঙাং অমা ফহনবদা অচৌবা থৌদাং লৌগনি।

শ্রী প্রধান্না হায়খি ঐখোয়গী লাইরিক তাকপী-তম্বীবগী থবকশিং অসি লৈবাক অসিনা দরকার ওইরিবা অদুনা চানগদবনি। মালেমগী ওইবা থৌদাংশিং লৌবা ঙম্নবা ঐখোয়না ২১শুবা চহিচাগী নাগরিকশিং শেমগদবনি। এন.ই.পি ২০২০ অসি ওজা অমনা মাংজিল থাবা অফবা ইজুকেসন সিস্তেমদা মীৎয়েং থমদুনা মহৈরোয়শিংগীদমক থাংবা খোঙথাং অমনি।

মিনিস্তরনা হায়খি পুন্সিগী অৱাবাশিং মায়োক্নবা ঙম্নবা থৌরাং তৌনবা লৌশিংগী পুক্কৈ অমা শেম্নবা অমসুং লৈবাক্কী অমসুং মালেমগী চাউখৎপদা শরুক য়াবা ঙম্নবা বালবাতিকাদগী হৌরগা ক্লাস ১২ ফাওবা স্কুল খুদিংমক্তা ভেলু-বেজ ইজুকেসন তম্বীনবা পুক্নিং থৌগৎনবা ফ্রেমৱার্ক অমা শেম্নবা সি.বি.এস.ইদা খঙহনখ্রে।

*****