மனித வள மேம்பாட்டு அமைச்சகம்

ராமகிருஷ்ணா மிஷனின் மக்கள் விழிப்புணர்வு நிகழ்ச்சியை திரு தர்மேந்திர பிரதான் தொடங்கிவைத்தார்

Posted On: 15 SEP 2022 3:41PM by PIB Chennai

  ஒன்று முதல் ஐந்தாம் வகுப்பு மாணவர்களுக்கான  ராமகிருஷ்ணா மிஷனின் மக்கள் விழிப்புணர்வு நிகழ்ச்சியை மத்திய கல்வி, திறன்மேம்பாடு மற்றும் தொழில்முனைவுத் துறை அமைச்சர்  திரு தர்மேந்திர பிரதான் தொடங்கிவைத்தார். தில்லி ராமகிருஷ்ணா மிஷன் செயலாளர் சுவாமி சாந்தாத்மநாதா, சிபிஎஸ்இ தலைவர் திருமதி நிதி சிப்பர் மற்றும் உயரதிகாரிகள் நிகழ்ச்சியில் கலந்து கொண்டனர்.

 நிகழ்ச்சியில் உரையாற்றிய திரு பிரதான், தேசிய கல்விக்கொள்கை 2020 சுவாமி விவேகானந்தரின் தத்துவத்தால் ஆழமாக ஈர்க்கப்பட்டுள்ளது என்றார். சுவாமி விவேகானந்தர் முதல் ஸ்ரீ அரவிந்தர் மற்றும் மகாத்மா காந்தி வரை, நமது பெரியவர்கள் பலர் முற்போக்கான கல்வி முறையைக் கற்பனை செய்து, நாட்டை முன்னோக்கி கொண்டு செல்வதற்கு நமது நாகரிக விழுமியங்களில் வேரூன்றி உள்ளனர். சமூக மாற்றமே கல்வியின் முக்கிய குறிக்கோள்களில் ஒன்றாகும் என்று அவர் கூறினார். பொருள் செல்வத்தை விட மதிப்புகளும் ஞானமும் முக்கியம். எதிர்காலத்திற்கு தயாரான மற்றும் சமூக உணர்வுள்ள தலைமுறையைக் கட்டியெழுப்புவதற்கு மதிப்பு அடிப்படையிலான கல்வி முக்கியமானது, என்றார் அவர்.

 மேலும் ராமகிருஷ்ணா மிஷன் பயன்பாட்டுக் கல்வியை வழங்கும் பாரம்பரியத்தைக் கொண்டுள்ளது என்று அவர் கூறினார். தேசிய கல்விக்கொள்கை 2020-ஐ நாம் செயல்படுத்தும் நேரத்தில், I முதல் 8 வகுப்புகளுக்கான திட்டங்களை உருவாக்குவதுடன், 9 முதல் 12-ம் வகுப்பு வரையிலான கல்வித் திட்டங்களை உருவாக்குவதற்கும் முக்கியத்துவம் கொடுக்க வேண்டும். இந்த தனித்துவமான முயற்சி தேசிய கல்விக்கொள்கை 2020 இன் தத்துவத்துடன் இணைந்த குழந்தையின் முழுமையான ஆளுமை வளர்ச்சியை உறுதி செய்வதற்கான ஒரு படியாகும் என்று அவர் கூறினார்.

 நமது கல்வி முறை தேசிய முன்னுரிமைகளுக்கு ஏற்றதாக இருக்க வேண்டும் என்று வலியுறுத்திய திரு பிரதான், உலகளாவிய பொறுப்புகளை ஏற்கும் திறன் கொண்ட 21ம் நூற்றாண்டின் குடிமக்களை நாம் உருவாக்க வேண்டும் என்றார். ஆசிரியர்கள் தலைமையிலான முழுமையான கல்வி முறையை மையமாகக் கொண்ட தேசிய கல்விக்கொள்கை 2020 அந்த திசையில் ஒரு படியாகும் என்று கூறினார்.

 பாலர் பள்ளி முதல் பன்னிரண்டாம் வகுப்பு வரை அனைத்துப் பள்ளிகளிலும் மதிப்பு அடிப்படையிலான கல்வியை ஊக்குவிப்பதற்காக, வாழ்க்கையின் சவால்களுக்குத் தயாராக இருக்கும் திறமைக் குழுவை உருவாக்குவதற்கும், தேசிய முன்னேற்றம் மற்றும் உலக நலனுக்காக அர்ப்பணிப்புடன் செயல்படுவதற்கும் ஒரு ஆலோசனைக் கட்டமைப்பை ஏற்படுத்துமாறு அமைச்சர் சிபிஎஸ்இக்கு அழைப்பு விடுத்தார்.

**************



(Release ID: 1859574) Visitor Counter : 173