অয়ুস মিনিস্ত্রিগী মখাদা লৈবা ওল ইন্দিয়া ইন্সতিতুৎ ওফ অয়ুর্বেদানা ঙসি অয়ুর্বেদা নুমিৎ ২০২২ থৌরম হৌদোকখ্রে। চহি অসিগী অয়ুর্বেদা নুমিৎকীদমক অয়ুস মিনিস্ত্রিগী পান্দম থবক ওইনা পাংথোক্নবা নোদেল এজেন্সি ওইনা ওল ইন্দিয়া ইন্সতিতুৎ ওফ অয়ুর্বেদা খল্লে। থৌরম অসিগী পান্দমদি ‘ হর দিন হর ঘর অয়ুর্বেদা’ হায়বনি।

চয়োল ৬গী থৌরম(সেপ্তেম্বর ১২-ওক্তোবর ২৩)গী হৌদোকপা ওইনা পাংথোকখিবা অয়ুর্বেদা নুমিৎ থৌরমদা অয়ুসকী য়ুনিয়ন মিনিস্তর শ্রী সরবনন্দা সোনোৱাল, অয়ুসকী রাজ্য মন্ত্রী দোক্তর মুঞ্জাপারা মহেন্দ্রভাই কালুভাই, সেক্রেতরি ভাইধ্য রাজেস কোতেচা, স্পিসিএল সেক্রেতরি শ্রী পি.কে পাথক অমসুং এন.সি.এস.আই.এম চিয়রমেন ভাইদ্য জয়ান্ত দিওপুজারি ভর্চুএল ওইনা শরুক য়াখি।

ধনভানতারি জয়েন্তিনদা চহি খুদিংগী অয়ুস মিনিস্ত্রিনা অয়ুর্বেদা নুমিৎ পাংথোক্লি। চহি অসিগী ওইনা অয়ুস মিনিস্ত্রিনা ভারত সরকারগী তোঙান-তোঙানবা মিনিস্ত্রিশিং অমসুং দিপার্তমেন্তশিংগা লোয়ন্না পাংথোক্লি অমসুং মসিনা লৈবাক অসিগী মীওই খুদিংমক মহৌশাদগী লৈরক্লবা অনা-লায়য়েংগী কাংলোন অসিগী মরমদা খঙহনবা ঙমগনি।  

থৌরম অদুদা শ্রী সোনোৱালনা হায়খি চয়োল ৬কী থৌরম অসি প্রধান মন্ত্রী নরেন্দ্র মোদীগী পান্দম পাংথোকপা ঙম্নবা শিংথানিঙাই ওইরবা থবক অমনি। করিগুম্বা ঐখোয়না ভারতকী নাগরিক খুদিংমক উনবা ঙম্লবদি মসিগী থৌরম অসি মাইপাক্কনি অমসুং লাক্লিবা চয়োলশিংদা ঐখোয়গী লৈজবা থৌনাগা লোয়ন্না মীয়ামগা উনদুনা অয়ুর্বেদাগী পাউজেলশিং য়ৌহনগনি। ‘হর দিন হর ঘর অয়ুর্বেদা’গী পান্দম অসিনা য়ুমথোঙ খুদিংদা হকচাং ফনা লৈনবা অয়ুর্বেদাগী কান্নবগী মরমদা খঙহনগনি। মসিনা ঐখোয়গী লৈবাক অসি মশা-মউ ফবা অমসুং পাঙ্গল কনবদা মতেং পাংগনি।

দোক্তর  মহেন্দ্রভাইনা হায়খি অতোপ্পা লৈবাকশিংগা খুৎশম্নদুনা য়ুমথোঙ খুদিংদা অয়ুর্বেদা য়ৌহন্নবা ঐখোয়না পান্দম থম্লি অমসুং “মশা ফবা ভারত্তগী মশা ফবা মালেম অমা শেম্বা” হায়বা পান্দম অদু থবক ওইনা পাংথোক্কনি।

এ.আই.আই.এগী দিরেক্তর প্রোফেসার তনুজা নেসারিনা থৌরমগী অকুপ্পা মরোলশিং ফোঙদোকখি অমসুং মথংগী চয়োলশিংদা পাংথোক্কদবা মরুওইবা থৌরমশিংগী মতাংদা লাউথোকখি। জন সন্দেস, জন ভাগিদারি অমসুং জন অন্দোলন’ হায়না জে-৩গী পান্দমগা লোয়ন্না মসিগী থৌরম অসিদা ভারত সরকারগী তোঙান-তোঙানবা মিনিস্ত্রিশিং শরুক য়াগনি।

****