“লৈবাক্কী হেল্থ ইনফ্রাস্ত্রকচর মপাঙ্গল কনখৎহন্নবা অমসুং সি.জি.ঐচ.এস. সর্ভিসশিং লাইনা ফংহন্নবা অচৌবা মাইপাকপা অমদা সেন্ত্রেল গভর্নমেন্ত হেল্থ স্কিম (সি.জি.ঐচ.এস.) ৱেলনেস সেন্তরশিংগী মশিং শরুক অহুম হেনগৎহনবা ঙমখ্রে। ২০১৪দা ২৫ ওইরম্বদগী হৌজিক ৭৫ ওইদুনা সি.জি.ঐচ.এস.কী মখাদা কোনশিল্লিবা সহরশিং হেনগৎহনখি। মসি প্রধান মন্ত্রী শ্রী নরেন্দ্র মোদীজীগী মীয়ামদা হেল্থকিয়র সর্ভিসশিং এক্সেসিবল ওইহন্নবা থম্লিবা বিজনগী মখাদা পাইখৎপনি”। ৱাফম অসি এম.পি. (এল.এস.), দা. রাজদীপ অমসুং অসামগী সিলচরগী এম.এল.এ. শ্রী দিপায়ন চক্রবোর্তী য়াওনা ঙসি সিলচরদা পাঙথোকপা  সি.জি.ঐচ.এস. ৱেলনেস সেন্তর শঙ্গাবগী থৌরম অমদা হকশেল অমসুং য়াইফ-য়ুম্বালগী কেন্দ্র মন্ত্রী দা. মনসুখ মন্দাবিয়ানা ভর্চুএল ওইনা ফোঙদোকখিবনি।

হকশেল অমসুং য়াইফ-য়ুম্বালগী কেন্দ্র মন্ত্রী, দা. মন্দাবিয়ানা কেন্দ্র সরকারনা বেনিফিসরীশিংদা অরাইবা মওংদা এক্সেসিবল ওইবা ক্বালিতী লৈবা হেল্থকিয়র সর্ভিসশিং ফংহন্নবা হোৎনরি হায়না নৌহৌনা ফোঙদোকখি। মহাক্না হায়খি মদুদি সিলচরগী অনৌবা সি.জি.ঐচ.এস. সেন্তর অসিনা সিলচর খক্তা নত্তনা করিমগঞ্জ অমসুং হাইলাকান্দি অমসুং বরাক তম্পাক, য়ুমলোন্নরিবা জিলাশিং অসিদা লৈবা হৌজিক-হৌজিক থৌ পুরিবা অমসুং থবক্তগী পোত্থরবা কেন্দ্র সরকারগী কর্মচারীশিংদা হেল্থকিয়র সর্ভিসশিং ফংহল্লগনি। মহাক্না হায়খি মদুদি সিলচর অসি বরাক তম্পাক্কী খ্বাইদগী মরু ওইবা সহরশিংগী মনুংদা অমা ওইজরবসু বেনিফিসরীশিংনা আইজোল তানা কিমি ১৮০ হেন্না নত্ত্রগা শিল্লিং তানা কিমি ২০৮ চৎতুনা সি.জি.ঐচ.এস.গী খুদোংচাবা লৌরি। অনৌবা ৱেলনেস সেন্তর অসিনা বেনিফিসরী লিশিং কয়াগী মেদিকেলগী মথৌ তাবা থুংহল্লগনি অমসুং মখোয়না হৌজিক অরাপ্পা মফমদা চৎপগী মথৌ তাবা অদু হন্থহন্দুনা মখোয়গী অৱাবা কোকহল্লগনি। ৱেলনেস সেন্তর অসিনা হীদাক-লাংথক, ইনভেস্তিগেসনশিংগী রিফরেল লোয়ননা সরকার অমসুং এম্পেনেল তৌবা হোস্পিতালশিংদা ইন্দোর ত্রীৎমেন্ত তৌবা য়াওনা আউতপেসেন্ত সর্ভিসশিং পীরগনি। এম্পেনেল তৌবা হোস্পিতালশিংদা লায়েংনবগীদমক কেসলেস ফেসিলিতীশিংসু লৈহল্লগনি।

দা. মন্দাবিয়ানা মখা তারদুনা হায়খি, “অনৌবা সি.জি.ঐচ.এস. ৱেলনেস সেন্তরশিংগা লোয়ননা সিলচর অসি সি.জি.ঐচ.এস.গী খুদোংচাবা লৈবা গুৱাহাতি অমসুং দিব্রুগরগী মথংদা অসামগী অহুমশুবা সহর ওইরগনি। ৱেলনেস সেন্তর অসি সি.জি.ঐচ.এস.কী সর্ভিসশিংগী কবরেজ অমসুং এক্সেসিবিলিতী ফংহনবা হেনগৎহন্নবা সরকারগী খোঙথাং ওইনা লৈবাক অসিদা লিংখৎখিবা অনৌবা সি.জি.ঐচ.এস. সেন্তর ১৬কী মনুংদা অমনি”। কেন্দ্রগী হকশেল মন্ত্রালয়না সি.জি.ঐচ.এস.না পীরিবা সর্ভিসশিং অসি মাগী বেনিফিসরীশিংদা পীবা হেনগৎহন্নবা লম কয়াদা থবক পাইখৎলি। মিসন মোদতা নুমিৎ খুদিংগী মোনিতর তৌদুনা গ্রীভান্স রিদ্রেসেল তৌরি, বিলগী রিইম্বর্সমেন্ত খোঙজেল য়াংনা তৌরি, লনাই হোস্পিতাল এম্পেনেল তৌবগী নেৎৱার্কশিং পাকথোক-চাউথোকহল্লি অমসুং অতোপ্পা খোঙথাংশিংনা থুনা রিইম্বর্স তৌবা য়াহল্লি অমসুং কেসশিং পন্দুনা লৈবদা হন্থহল্লি হায়না মহাক্না ফোঙদোকখি।

দা. মন্দাবিয়ানা হায়খি ভারত সরকারনা লৈবাক অসিদা হেল্থ ইনফ্রাস্ত্রকচর মপাঙ্গল কনখৎহন্নবা খোঙথাং কয়ামরুম লৌখি। রাজ্যশিংদা হেল্থ ইনফ্রাস্ত্রকচর মপাঙ্গল কনখৎহন্নবগীদমক পি.এম.-এ.ভি.ঐচ.আই.এম. (প্রাইম মিনিস্তর-আয়ুশ্মান ভারত হেল্থ ইনফ্রাস্ত্রকচর মিসন)গী মখাদা লুপা করোর ৬৪,০০০, ই.সি.আর.পি.-Iগী মখাদা লুপা করোর ১৫,০০০ অমসুং ই.সি.আর.পি.-IIগী মখাদা লুপা করোর ২৩,০০০ অয়াবা পীখি।

সেন্ত্রেল গভর্নমেন্ত হেল্থ স্কিম (সি.জি.ঐচ.এস.) অসি কেন্দ্র সরকারগী কর্মচারীশিং অমসুং পেন্সনরশিং অমসুং মখোয়গী ইমুংগী মীওইশিংদা কম্প্রিহেন্সিব হেল্থ কিয়র পীনবা পান্দমগা লোয়ননা ১৯৫৪দা হৌদোকখি। হৌজিক্কী ওইনা স্কিম অসিগী মখাদা সহর ৭৫দা বেনিফিসরী লাখ ৪১ হেন্না লৈ।

থৌরম অদুদা কেন্দ্রগী হেল্থ সেক্রেতরী শ্রী রাজেশ ভুশন, এম.ও.এফ.ঐচ.দবল্যু.গী এদিস্নেল সেক্রেতরী, শ্রী অলোক সক্সেনা, সি.জি.ঐচ.এস.কী দিরেক্তর দা. নিখিলেস চন্দ্র লোয়ননা কেন্দ্র সরকারগী ওফিসিএলশিং, সি.জি.ঐচ.এস.কী বেনিফিসরীশিংনা শরুক য়াখি।

****