য়োর এক্সিলেন্সী প্রধান মন্ত্রী শেখ হসীনা,

দেলিগেসন অনিমক্কী ইকাই খুম্নরবা মেম্বরশিং,

মেদিয়াগী ঐখোয়গী মরুপশিং,

খুরুমজরি!

অহানবদা ঐহাক্না প্রধান মন্ত্রী শেখ হসীনাজী অমসুং মহাক্কী দেলিগেসনবু তরাম্না ওকপচরি। মমাং চহিদা ঐখোয়না পুন্না বঙ্গলাদেশকী য়াংখৈ শুবা নীংতম্ব নুমিৎ, ঐখোয়গী দিপ্লোমেতিক ওইবা মরীশিংগী গোল্দন জুবিলী অমসুং বঙ্গবন্ধু শেখ মুজীপুর রহমানগী চহি চামা শুবগী কুমওন পাঙথোকমিন্নখি। মমাং চহিগী দিসেম্বর ০৬তা ঐখোয়না মালেম শিনবা থুংবদা অহানবা ‘মৈত্রী দিবস’ পুন্না পাঙথোকমিন্নখি। ঙসি প্রধান মন্ত্রী শেখ হসীনাজীগী খোঙচৎ অসি ঐখোয়গী নীংতম্বগী অমৃত মহোৎসব মনুংদা তারি। অমসুং মথংগী চহি ২৫গী অমৃত কাল অসিদা ভারত-বঙ্গলাদেশকী মরুপ ওইবগী মরী অসি অনৌবা পনখৈ তম্না পুখৎপা ঙমগনি হায়না ঐহাক্না থাজৈ।

মরুপশিং,

বঙ্গলাদেশনা প্রধান মন্ত্রী শেখ হসীনাজীগী লুচিং মখাদা শীংথানীংঙাই ওইনা খুমাং চাউশিনখি। হৌখিবা চহি খরা অসিদা ঐখোয়গী ম্যুচুএল কোওপরেসন অসি লম খুদিংমক্তা খোঙজেল য়াংনা হেনগৎলকখি। ঙসি বঙ্গলাদেশ অসি ভারতকী খ্বাইদগী চাউবা দিবেলপমেন্ত পার্তনর ওইরি অমসুং লমদম অসিগী খ্বাইদগী চাউবা ত্রেদ পার্তনর ওইরি।

ঐখোয়গী নাৎকী অমসুং পিপল-তু-পিপলগী মরীশিং অসি লেপ্পা লৈতনা ফগৎলক্লি। ঙসি প্রধান মন্ত্রী শেখ হসীনাজী অমসুং ঐহাক্না বাইলেতরেল, রিজনেল অমসুং ইন্তর্নেস্নেলগী সমস্যা পুম্নমক্কী মতাংদা কুপ্না খন্নখি।

ঐখোয় অনিমক্না কোবিদ লাইচৎতগী তমশিনখিবা পরাশিং অমসুং অনৌবা মালেমগী চাউখৎ-থৌরাংশিং অসিগী মতেংনা ঐখোয়গী ইকনোমীশিং মপাঙ্গল কনখৎহনবা মথৌ তাই হায়না থাজবা থম্মি।

ঐখোয়গী লৈবাক অনিগী মরক্তা লম্বী-থোং ফগৎহনবা অমসুং ঙমখৈদা ললোন-ইতিক তৌনবগী ইনফ্রাস্ত্রকচর শেমগৎপগা লোয়ননা ইকনোমী অনি অসিনা অমগা অমগা হেন্না কন্নেক্ত তৌবা, অমগা অমগা তেংবাং পীনবা ঙম্লগনি। ঐখোয়গী বাইলেতরেল ত্রেদ অসি খোঙজেল য়াংনা চাউখৎলক্লি। ঙসি ভারতনা বঙ্গলাদেশকী এক্সপোর্তশিংগী ওইনা এসিয়াগী খ্বাইদগী চাউবা মার্কেৎ ওইরি। মসিগী গ্রোথ অসি হেন্না শাহৌ পীনবা ঐখোয়না বাইলেতরেল কম্প্রিহেন্সিব ইকনোমিক পার্তনরশিপ এগ্রীমেন্তগী মতাংদা অথুবদা খন্নরগনি।

ঐখোয়না আই.তি., স্পেস অমসুং ন্যুক্লিয়র ইনর্জীগুম্বা সেক্তরশিংদা কোওপরেসন পীনবা হেনগৎহন্নবা ৱারেপসু লৌরি মসি ঐখোয়গী হৌরক্লিবা মীরোলশিংগী য়াইফনবনি। ঐখোয়না ক্লাইমেৎ চেঞ্জ অমসুং সুন্দরবনগুম্বা অমত্তা ওইবা হেরিতেজ ঙাকশেনবগী মতাংদা মখা তানা তেংবাং পীনখিগনি।

মরুপশিং,

চাউখৎলক্লিবা লৈবাকশিংদা ইনর্জীগী মমলশিং ৱাংখৎলকপা অসিনা হৌজিক-হৌজিক শীংনবা অমা পীরিল ঙসি মৈত্রী থর্মেল পাৱর প্লান্তগী অহানবা য়ুনিৎ শঙ্গাবা অসিনা বঙ্গলাদেশতা ইলেক্ত্রিসিতী হোংনা ফংহনবা হেনগৎলগনি।

পাৱর ত্রান্সমিসন লাইনশিং কন্নেক্ত তৌবগী মতাংদা লৈবাক অনিগী মরক্তা ৱারী শারি। রুপশা তুরেল মথক্তা রেলৱে ব্রিদজ শঙ্গাবা অসি কন্নেক্তিবিতী হেনগৎহন্নবা মাইকৈদা পাইখৎপা মরু ওইবা খোঙথাং অমনি। ভারতকী লাইন ওফ ক্রেদিৎকী মখাদা খুলনা অমসুং মোঙ্গলা হীথাংফমগী মরক্তা শারিবা অনৌবা রেলৱে লাইনগী ওইনা থোং অসি মরু ওইবা শরুক অমনি। ভারতনা বঙ্গলাদেশকী রেলৱে সিস্তেম চাউখৎহন্নবা অমসুং পাকথোক-চাউথোকহন্নবা মতেং পুম্বা মখা তানা পীখিগনি।

মরুপশিং,

ইন্দো-বঙ্গলাদেশ বোর্দর ফাওদুনা চেনবা তুরেল ৫৪ লৈ অমসুং মসি চহিচা কয়াদগী লৈবাক অনিগী মীয়ামগী হিংনবগী পাম্বৈগা মরী লৈন্দুনা লাকখি। তুরেলশিং, মখোয়গী ফুঙ্গা ৱারীশিং, খুনুং ঈশৈশিং অসিনা ঐখোয়গী মান্নবা কলচরেল হেরিতেজ অদুগী শাখি ওইখি। ঙসি, ঐখোয়না কুশিয়ারা তুরেলগী ঈশিং শিয়র তৌবগী মরু ওইবা য়ান্ন-ৱারোল অমা খুৎয়েক পীনখি। মসিনা ভারতকী খা থংবা অসাম অমসুং বঙ্গলাদেশকী সিলহত্তা কান্নবা পীগনি।

মন্ত্রী শেখ হসীনা অমসুং ঐহাক্না ফ্লদ মিতিগেসনগা মরী লৈননা তেংবাং পীনবা হেনগৎহন্নবগী মতাংদা ৱারী শাখি। ভারতনা রিএল-তাইম বেসিস্তা বঙ্গলাদেশকা লোয়ননা ঈচাওগা মরী লৈনবা দেতা শিয়র তৌদুনা লাকখি অমসুং ঐখোয়না দেতা শিয়রিংগী মতম অসিসু শাংদোকখি।

ঙসি ঐখোয়না তেরোরিজম অমসুং রেদিকেলিজমগী মায়োক্তা তেংবাং পীন্ননা অকনবা ৱাফম থমখি। ১৯৭১গী থৌনা লিংজেল অদু হিংদুনা থম্নবা ঐখোয়গী থাজনরিবা অসিদা অকাইবা পীনবা হোৎনরিবা অসিগুম্বা ফোর্সশিং পুন্না থেংনবা য়াম্না মরু ওই।

মরুপশিং

বঙ্গবন্ধুনা পামজরম্বা তংদু লৈতাবা, চাউখৎপা অমসুং খুমাং চাউশিনবা বঙ্গলাদেশ অমগী বিজন অদুবু মঙফাওনবা ঙমহন্নবা ভারতনা বঙ্গলাদেশকা খোঙথাং খুদিংদা পুন্না চৎমিন্নগনি। ঐখোয়গী ঙসিগী ৱারী শাবা অসিনা মসিগী মরু ওইবা ফিরেপ অসি নৌহৌনা নীংশিংনবা অচৌবা খুদোংচাবা অমসু পীবিরি।

অমুক হন্না ঐহাক্না প্রধান মন্ত্রী শেখ হসীনাজী অমসুং ভারত্তা লাকখিবা মহাক্কী দেলিগেসনবু তরাম্না ওকখি। অমসুং ভারত্তা নুংঙাইনা লৈনবা য়াইফ-পাউজেল পীজরি।

হন্না-হন্না থাগৎচরি!

খঙহঞ্জবা: মসি প্রধান মন্ত্রীনা পাউমীশিংদা থমখিবা ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***