প্রধানমন্ত্রীগী লোইশঙ
প্রধান মন্ত্রীনা ওজাশিংগী নুমিৎতা ওজাশিংদা পীবা নেস্নেল এৱার্দশিং ফংলকখ্রবশিংগা ৱারী শাখ্রে
“সর্বপল্লী রাধাকৃষ্ণননা এজুকেসনগী লমদা তৌরম্বা থবকশিংনা ঐখোয় পুম্নমক্তা ইথিল পীরি”
“ওজা অমা ওইরম্বা হৌজিক-হৌজিক্না ভারতকী রাস্ত্রপতি ওইরিবা অসিনা ইকাই খুম্নবা উৎপা অসিনা য়াম্না হেন্না মরু ওই”
“ওজা অমগী মথৌদাং অসি মীওই অমদা মঙাল পীবনি অমসুং মঙলান শাগৎহল্লিবা অদুসু মখোয়ননি, অমসুং মখোয়না মঙলানশিংবু ফিরেপতা ওন্থোক্নবা তাকপী-তম্বী”
“সরকারগী দোক্যুমেন্ত অসি মহৈরোয়শিংগী পুন্সিগী য়ুম্ফম ওইহন্নবা মওংদা নেস্নেল এজুকেস্নেল পোলিসী অসি চৎনহনবা মথৌ তাই”
“লৈবাক পুম্বদা ২০৪৭কী মঙলান শাগৎতবা মহৈরোয় অমত্তা লৈহল্লোইদবনি”
“দান্দী য়াত্রা অমসুং ভারত থাদোকউ ইহৌগী মরক্তা জাতি অসিদা ফাওখিবা থৌনা লিংজেল অদু অমুক হন্না ফাওহনবা মথৌ তাই”
Posted On:
05 SEP 2022 6:18PM by PIB Imphal
ওজাশিংগী নুমিৎনা লাকপদা প্রধান মন্ত্রী, শ্রী নরেন্দ্র মোদীনা নই দিল্লীদা ওজাশিংদা পীবা নেস্নেল এৱার্দশিং ফংখ্রবশিংগা ৱারী শাখ্রে।
থৌরম অদুদা ৱা ঙাংলদুনা প্রধান মন্ত্রী সর্বপল্লী রাধাকৃষ্ণনদা ইকাই খুম্নবা উৎখি। মহাক্না ওজাশিংদা হায়খি মদুদি ওজা অমা ওইরম্বা অমসুং ওরিশাগী মফম শিনবা থুংবদা মহৈ-মশিং তাকপীরম্বা, হৌজিক্না ভারতকী রাস্ত্রপতি ওইরিবা অসিনা ইকাই খুম্নবা উৎপগা লোয়ননা ওকখিবা অদু য়াম্না হেন্না মরু ওই। “ঙসি লৈবাক অসিনা আজাদী কা অমৃত মহোৎসবকী অচৌবা মঙলানশিং থুংহনবা হৌরক্লিবা তানফম অসিদা সর্বপল্লী রাধাকৃষ্ণননা এজুকেসনগী লমদা তৌরম্বা থবকশিংনা ঐখোয় পুম্নমকপু ইথিল পীরি। থৌরম অসিদা ঐহাক্না নেস্নেল এৱার্দ ফংখিবা ওজা পুম্নমকপু নুংঙাইবা ফোঙদোকচরি” হায়না প্রধান মন্ত্রীনা মখা তাখি।
প্রধান মন্ত্রীনা ওজাশিংগী লৌশিং অমসুং কত্থোকপগী মতৌ অদুগী মতাংদা ফোঙদোক্লদুনা মহাক্না হায়খি মখোয়গী খ্বাইদগী অথোইবা গুন অসি মহৈরোয়শিংগী য়াইফনবা মখোয়গা লোয়ননা চোকথবা লৈতনা থবক তৌবা ঙমহল্লিবা মখোয়গী অফবা ৱাখল্লোন অদুনি। “ওজা অমগী মথৌদাং অসি মীওই অমদা মঙাল পীবনি অমসুং মঙলান শাগৎহল্লিবা অদুসু মখোয়ননি, অমসুং মখোয়না মঙলানশিংবু ফিরেপতা ওন্থোক্নবা তাকপী-তম্বী” হায়না মহাক্না মখা তাখি। প্রধান মন্ত্রীনা হায়, ২০৪৭তা ওইগদবা ভারতকী ফীভম অমসুং লাইবক অসি ঙসিগী মহৈরোয়শিংগী মখা পোনগনি অমসুং মখোয়গী তুংলমচৎ অসি ঙসিগী ওজাশিংনা শেম্বীগনি মরম অসিনা “নখোয়না মহৈরোয়শিংনা মখোয়গী পুন্সিশিং শেম্বদা মতেং পাংলি অমসুং লৈবাক অসি শেমগৎপদা শাহৌ পীরি” হায়না মহাক্না হায়খি। প্রধান মন্ত্রীনা হায়খি ওজা অমনা মহৈরোয় অমগী মঙলানশিং অদুগা লোয়ননা চৎনমিন্নবা মতমদা মহাক্না মখোয়দগী ইকাই খুম্নবা অমসুং মীনুংশি ফংবদা মাইপাকপা ঙম্মি।
প্রধান মন্ত্রীনা মহৈরোয়শিংগী পুন্সিগী তোঙান-তোঙানবা লমশিংদা লৈরিবা য়েৎনবা অমসুং ওন্ন-তৈনবা ৱাখল্লোনশিং মাংহনবগী মরু ওইবা অদুসু থমখি। মহাক্না হায়খি, মহৈরোয় অমনা স্কুলদা, খুন্নাইদা অমসুং ময়ুমদা থেংনবা এক্সপরিয়েন্সশিংদা খেন্নবগী ৱাখল্লোন লৈহনদবা হায়বা অসি মরু ওই। মহাক্না মহৈরোয়শিংবু মখোঙ শোম্নবা মহৈরয়োয়শিংগী ইমুং-মনুংশিংগা লোয়ননা ওজা অমদি পার্তনরশিংনা ইন্তিগ্রেতেদ এপ্রোচ অমা পাইখৎপগী মথৌ তাই হায়খি। মহাক্না মহৈরোয়শিংদা অপাম্বা অমসুং পামদবা থমদনবা অমসুং মহৈরোয় খুদিংমক চপ মান্ননা লোয়ননবা পাউতাক পীখি।
নেস্নেল এজুকেসন পোলিসীগী মতাংদা থাগৎনরকখিবা অদু পল্লদুনা প্রধান মন্ত্রীনা হায়খি মসি অচুম্বা মাইকৈদা চংশিল্লিবা খোঙথাং অমনি। নেস্নেল এজুকেসন পোলিসী অমুক হন্না নৈনবা মথৌ তাই হায়রদুনা প্রধান মন্ত্রীনা মহাত্মা গান্ধীনা ভগবদ গীতা হঞ্জিন-হঞ্জিন পাখিবা অমসুং পাবা খুদিংগী অনৌবা ৱাহন্থোক অমা থেংনখিবা অদুগী ৱারী পাউদমখি। প্রধান মন্ত্রীনা সরকারগী দোক্যুমেন্ত অসি মহৈরোয়শিংগী পুন্সিগী য়ুম্ফম ওইহন্নবা মওংদা নেস্নেল এজুকেস্নেল পোলিসী অসি চৎনবা মথৌ তাই হায়খি। মহাক্না হায়, “ওজাশিংনা পোলিসী অসি শেম্বদা অচৌবা থৌদাং অমা লৌখি”। মহাক্না ওজাশিংনা নেস্নেল এজুকেস্নেল পোলিসী অসি থবক ওইনা ওন্থোকপদা ওজাশিংগী থৌদাং চাউই হায়না অকনবা ৱাফম থমখি।
প্রধান মন্ত্রীনা মহাক্না নীংতম নুমিৎতা লাউথোকখিবা ‘পঞ্চ প্রন’গী মতাংদা নীংশিংখি অমসুং পঞ্চ প্রনশিং অসি স্কুলশিংদা চাং নাইনা খন্নদুনা মহৈরোয়শিংদা মসিগী ৱাখল্লোন অসি ময়েক শেংনা খঙহন্নবা হায়খি। ফিরেপশিং অসি জাতি অসিনা খুমাং চাউশিন্নবা পাম্বৈ অমনি হায়না থাগৎনরি অমসুং ঐখোয়না অঙাংশিং অমসুং মহৈরোয়শিংদা মসিগী মতাংদা খঙহন্নবা লম্বী ঐখোয়না খঙদোক্নবা হোৎনবা মথৌ তাই হায়না মহাক্না ফোঙদোকখি। প্রধান মন্ত্রীনা হায়খি, “২০৪৭কী মঙলান শাগৎতবা লৈবাক পুম্বদা মহৈরোয় অমত্তা লৈহল্লোইদবনি”। মহাক্না হায় দান্দী য়াত্রা অমসুং ভারত থাদোকউগী ইহৌগী মরক্তা জাতি অসিদা ফাওখিবা থৌনা লিংজেল অদু অমুক হন্না ফাওহনবা মথৌ তাই।
ভারতনা য়ুনাইতেদ কিংদমবু নমথুনা মালেমগী ৫শুবা খ্বাইদগী চাউবা ইকনোমী ওইবা ঙম্বগী মাইপাকপা অসি পল্লদুনা প্রধান মন্ত্রীনা হায়খি ভারতপু চহি ২৫০ মীখা পোলহনখিবা লৈবাক অদুবু নমথুবা ঙম্বগী নুংঙাইবা অসিনা ৬শুবদা লৈরম্বদগী ৫শুবা মালেমগী খ্বাইদগী চাউবা ইকনোমী ওইরকপা ঙমহল্লিবা স্তেতিস্তিক্সতা হেনগৎলকপগী নুংঙাইবদগী হেল্লি। প্রধান মন্ত্রীনা ঙসিগী মালেম অসিদা ভারতনা অনৌবা পন্দুপশিং য়ৌবা ঙমহল্লিবা তিরঙ্গাগী থৌনা অদুগী মতাংদা ফোঙদোকখি। প্রধান মন্ত্রীনা “মসিগী থৌনা-লিংজেল অসি ঙসি তঙাই ফদে” হায়খি। প্রধান মন্ত্রীনা মীপুম খুদিংমক্তা নীংতম্বা ফংনবগীদমক ভারত মচা খুদিংমক্না ব্রিতিশকা লান শোক্নখিবা ১৯৩০দগী ১৯৪২গী মতমদা উখিবা লৈবাক্কীদমক হিংবা, অৱাবা খাংবা অমসুং থৱায় থাবগী চপ মান্নবা থৌনা লিংজেল অদু মীপুম খুদিংমক্তা নৌহৌনা পোকহন্নবা হায়খি। “ঐহাক্কী লৈবাক অসি ঐখোয়না কৈদৌনুংদা শোত্থনা লৈহল্লোই” হায়না প্রধান মন্ত্রীনা ফোঙদোকখি। “ঐখোয়না চহি লিশিং কয়া মীখা পোল্লম্বগী য়োৎলিং অদু থৎদৎখি অমসুং হৌজিক ঐখোয়না তুং হনবা তৌররোই। ঐখোয়না মাংদা খক্তা চংশিনগনি”, হায়না প্রধান মন্ত্রীনা নৌহৌননা ফোঙদোকখি। মহাক্কী ৱারোল পীবা অদু লোইশিল্লদুনা প্রধান মন্ত্রীনা লৈবাক অসিগী ওজাশিংদা ভারতকী মপাঙ্গল শরুক কয়া থোক্না হেনগৎহন্নবগীদমক ভারতকী তুংলমচৎতা মসিগী মান্নবা থৌনা লিংজেল অসি পোকহন্নবা হায়খি।
থৌরম অদুদা এজুকেসন মন্ত্রী, শ্রী ধর্মেন্দ্র প্রধান অমসুং এজুকেসনগী রাজ্য মন্ত্রী, শ্রীমতি অন্নপুর্না দেবীসু শরুক য়াখি।
বেকগ্রাউন্দ
ওজাশিংদা লৈবাক্কী থাক্কী মনা পীবগী পান্দমদি মখোয়গী ফিরেপ অমসুং হোৎনবা কনবনা স্কুল এজুকেসনগী ক্বালিতী হেনগৎহনবতা নত্তনা মহৈরোয়শিংগী পুন্সিগী মতিংসু হেনগৎহল্লিবা লৈবাকসিগী খ্বাইদগী ফবা ওজা খরগী তোপ তোপ্পা থৌদাংবু হরাও তয়াম্না ইকায়খুম্নবা উৎপনি।
ওজাশিংদা লৈবাক্কী থাক্কী মনা লান্থোকপনা ইলিমেন্তরী অমসুং সেকেন্দরী স্কুলশিংদা থবক তৌরিবা মতিং লৈবা ওজাশিংবু মীয়াম্না মশক খঙনবা মীওইশিং ওইহল্লি। মনা অসিগীদমক, লৈবাক শিনবা থুংবদগী ওজা ৪৫বু চেকশিনবা অমদি লৌথুপ লৌকোই লৈতবা ওনলাইনগী তাঙ্কক অহুমগী থৌওংগী খুত্থাঙদা খনগৎলে।
*****
(Release ID: 1856964)
Visitor Counter : 125
Read this release in:
Kannada
,
English
,
Urdu
,
Hindi
,
Marathi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam