ঙসি ইজুকেসন অমসুং স্কিল দিবলপমেন্তগী য়ুনিয়ন মিনিস্তর শ্রী ধরমেন্দ্র প্রধান্না সিদনিদা তোঙান-তোঙানবা স্কুলশিং, অৱাংবা থাক্কী অমসুং স্কিল্লিংগী মহৈলোয়শঙশিং য়েংখ্রে। ইজুকেসন, রিছার্স অমসুং স্কিল্লিংগী লমদা লৈবাক অনিগী মরীশিং হেন্না ফগৎহন্নবা নুমিৎ মরিনিগী খোঙচৎতা মিনিস্তর অসি হৌজিক অস্ত্রেলিদা লৈরি।

ইজুকেসন অমসুং আর্লি চাইল্দহুদ লার্নিংগী মিনিস্তর, সারা মিতচেল, এম.এল.সি, নিউ সাউথ ৱেলসকা লোয়ন্না শ্রী প্রধান্না নিউ সাউথ ৱেলস স্তেৎতা লৈবা হোমবুস ৱেস্ত পব্লিক স্কুল অমা য়েংখি অমসুং অপীকপা অঙাং খুদিংমক লাইরিক তমহন্নবগী লমদা স্কুল অদুদা পায়খৎলিবা খ্বাইদগী ফবা থবকশিং য়েংখি। কলচরগী থৌরমশিংগা লোয়ন্না তরাম্না ওকপগীদমক মহাক্না মখোয় থাগৎখি। থৌরম অদুদা শ্রী প্রধান্না হায়খি অঙাংশিংদা মমল হোংনা, ইরাই লাইনা অমসুং অঙাং খুদিংমক লাইরিক তম্বা ফংহনবা হায়বসি মখোয়গী তুংগী পুন্সিদা অফবা ওইনবা অমসুং লাইরিক তম্বগী অফবা ফল ফংনবা মরুওইবা অমনি। এন.এস.দব্লিউদা লৈরিবা অপীকপা অঙাংশিং তাকপী-তম্বীবা অমসুং দিজিতেল লার্নিংগী খ্বাইদগী ফবা থবকশিং অসি ভারত্তা পায়খৎপা য়াগনি অমসুং মসিনা অপীকপা অঙাংশিং য়েংশিনবা অমসুং থোংমান্ননা অমসুং ইরাই লাইনা লাইরিক তম্বীবা ঙমহনগনি অমসুং মরুওইনা স্কুলগী মতম লোইরবা মতুংদা অঙাংশিং য়েংশিনবগী থবকশিং পায়খৎপদা মতেং পাংগনি।

শ্রী প্রধান্না জাসন ক্লারেগা লোয়ন্না তেফে এন.এস.এফতা লৈবা ইন্সতিতুৎ ওফ এপ্লাইদ তেক্নোলোজি য়েংখি। মহাক্না হায়খি মসিগী ইন্সতিতুৎ অসি নহারোলশিংদা খুদোংচাবা কয়া পীনবা অনৌবা মতমগা চুনবা স্কিল কয়া পীনবা মমিং লৈরবা ত্রেনিং তৌফম অমনি অমসুং মসিনা মফম অসিগী ইনফ্রাস্ত্রকচর প্রোজেকশিং অমসুং শেন-থুম চাউখৎহনবদা মতেং পাংলি। চাউখৎলক্লিবা লোজিস্তিক্স, ইনফ্রাস্ত্রকচর অমসুং ত্রান্সপোর্ত সেক্তরদা মতেং পাংনবা মতুংগী মীরোলগী হৈথোই-শিংথোইরবা মীওই কয়া পুথোক্নবা হিরম কয়াদা ত্রেনিং পীনবা ভারতনা গাতি শক্তি য়ুনিভর্সিতি লিংখৎলে। ইন্দস্ত্রিদা য়ুম্ফম ওইবা থবকশিং, ৱাৎলিবা স্কিলশিং মেনখৎনবা, স্কিল হেনগৎহন্নবা, রি-স্কিল্লিং, অতোপ্পা অনৌবা দিজিতেলগী থবকশিং পায়খৎনবা গাতি শক্তি য়ুনিভর্সিতি অমসুং ইন্সতিতুৎ ওফ এপ্লাইদ তেক্নোলোজি পুন্না থবক তৌমিন্নবা য়াগনি।

তুংদা নুমিদাংৱাইরমদা, মহৈলোয়শঙশিং মতেং পীনদুনা ঐখোয়গী তুংলমচৎ অওনবা পুরকপা হায়বা হিরম অসিদা য়ুনিভর্সিতিস ওফ অস্ত্রেলিয়ানা শীন্দুনা সিদনিদা লৈবা য়ু.এন.এস.দব্লিউদা পাংথোকপা থৌরম অমদা শ্রী প্রধান্না ভাইস চান্সেল্লরশিং অমসুং অস্ত্রেলিয়া সরকারগী ইজুকেসন দিপার্তমেন্তগী অৱাংবা থাক্কী মীহুৎশিংগা ৱারি শানখি।

*****