নহারোল অমসুং শান্ন-খোৎনবগী মন্ত্রালয়
কম্মনৱেল্থ গেমস ২০২২গী ৪নি চনবা নুমিৎতা ভারতনা সিলভর অমা অমসুং ব্রোঞ্জ মেদল অনি লৌবা ঙমখ্রে
থাগৎখিবা:
02 AUG 2022 12:02PM by PIB Imphal
মরু ওইবা হাইলাইৎশিং:
- ৪নি শুবা নুমিৎতা শুশিলা দেবি লিমাবম, বিজয় কুমার য়াদব অমসুং হরজিন্দর কোরনা মেদল লৌবা ঙমখ্রে
- রাস্ত্রপতি, শ্রীমতি দ্রৌপদী মুর্মু অমসুং প্রধান মন্ত্রী শ্রী নরেন্দ্র মোদীনা মেদল লৌরকখ্রবশিংদা মখোয়গী শীংথানীংঙাই ওইবা পর্ফোরমেন্সকীদমক থাগৎপা ফোঙদোকখ্রে
- এন.এস.এন.আই.এস. পতিয়ালানা সি.দবল্যু.জি.দসু চেম্পিয়নশিংগী হৌরকফম ওইরি উপা ঙমখ্রে: শ্রী অনুরাগ সিংহ থাকুর
ভারতনা বর্মিংহমদা পাঙথোক্লিবা কম্মনৱেল্থ গেমস ২০২২গী ৪নি চনবা নুমিৎতা নুপীগী কেজি ৪৮গী কাংলুপতা জুদোকা শুশিলা দেবি লিকমাবম্না সিলভর মেদল লৌখি, জুদো স্তার বিজয় কুমার য়াদবনা নুপাগী কেজি ৬০গী কাংলুপতা ব্রোঞ্জ লৌবা ঙমখি অমসুং ৱেতলিফতর হরজিন্দর কোরনা নুপীগী কেজি ৭১গী ইভেন্ততা ব্রোঞ্জ মেদল অমা লৌবা ঙমখি। ভারতকী মেদল তেল্লী অসি গোল্দ ৩, সিলভর ৩ অমসুং ব্রোঞ্জ মেদল ৩ লৌবা ঙমখিবগা লোয়ননা ৯ শুখ্রে। রাস্ত্রপতি শ্রীমতি দ্রৌপদী মুর্মু, প্রধান মন্ত্রী শ্রী নরেন্দ্র মোদী, কেন্দ্রগী স্পোর্তস মন্ত্রী শ্রী অনুরাগ থাকুর অমসুং লৈবাক অসিগী কাচিন কোয়াদা লৈরিবা ভারত মচাশিংনা শান্নরোয়শিং অসিবু মখোয়গী পর্ফোরমেন্সশিংগীদমক থাগৎপা ফোঙদোক্নরক্লি।
ত্বিত অমদা রাস্ত্রপতি শ্রীমতি দ্রৌপদী মুর্মুনা হায়খি, “অদোমগী শীংথানীংঙাই ওইরবা পর্ফোরমেন্স অসিনা মশিং লাকঙমদ্রবা অদোমবু পামজবা মীওই কয়া লৈহনবা ঙমখি অমসুং নুপীমচা করোর কয়াদা ইথিল পীখি। ভারতনা নহাক্কীদমক চাউথোকচবা পোকই।”
রাস্ত্রপতিনা ত্বিত তৌখি, “কম্মনৱেল্থ গেমসকী ৱেতলিফতিংদা ব্রোঞ্চ মেদল লৌরকপগীদমক হরজিন্দর কোরবু থাগৎপা ফোঙদোকচরি। পোদিয়ম অসি য়ৌনবা হোৎনবদা মহাক্কী পুন্সিদা মহাক্না অৱাবা কয়া মায়োক্নখি। নহাক্কী ৱারী অসি মীপুম খুদিংমক্তা ইথিল পীগদবা ৱারী অমনি। তুংদা হেন্না মাইপাকপা ঙম্বা ওইরসনু হায়না ঐহাক্না য়াইফ-মঙ্গোল পীজরি।”
অতোপ্পা ত্বিত অমদা রাস্ত্রপতিনা ত্বিত তৌখি, “বিজয় কুমার য়াদবনা মহাক্কী অহানবা কম্মনৱেল্থ গেমসতা ফজরবা পর্ফোরমেন্স অমা উৎখি। নুপাগী কেজি ৬০গী জুদোদা ব্রোঞ্জ মেদল লৌরকপদা থাগৎপা ফোঙদোকচরি। মমাংগী রাউন্দশিংদা অদোম্না ঙম্না চৎখিবা অদুনা মেদল অসি লৌবা ঙমহল্লিবা অদোমগী মতিক-ময়াই অদু তাক্লি। তুংদা হেন্না মাইপাকপা ওইয়ু।”
প্রধান মন্ত্রী, শ্রী নরেন্দ্র মোদীনা শুশিলা দেবি লিকমাবম, বিজয় কুমার য়াদব অমসুং হরজিন্দর কোরবু থাগৎপা ফোঙদোকখি। ত্বিত অমদা প্রধান মন্ত্রীনা হায়খি; “শুশিলা দেবি লিকমাবমগী থোইদোক-হেন্দোকপা পর্ফোরমেন্স অদুদা অপেনবা পোকই। মহাক্না সিলভর মেদল লৌরকপদা নুংঙাইবা ফোঙদোকচরি। মহাক্না শীংথানীংঙাই ওইবা স্কিল অমসুং অখাং কনবা অদু উৎখি। মহাক্কী তুংগী পুন্সিগীদমক য়াইফ-মঙ্গোল পীজরি।”
পি.এম.না ত্বিত তৌখি, “বিজয় কুমার য়াদবনা দি.দবল্যু.জি.দা জুদোদা ব্রোঞ্চ মেদল লৌরকপা ঙমখি অমসুং লৈবাকপু চাউথোকচবা পোকহনখি। মহাক্কী মাইপাকপা অসিনা ভারতকী স্পোর্তসকী তুংলমচৎতা ইথিল পীরগনি। তুংদা লাক্কদবা মতমশিংদসু মহাক্না মাইপাকপগী অনৌবা পনখৈশিং মখা তানা য়ৌবা ঙম্বা ওইরসনু।”
অতোপ্পা ত্বিত অমদা পি.এম.না হায়খি, “ঐখোয়গী ৱেতলিফতিং কন্তিঞ্জেন্তনা বর্মিংহম সি.দবল্যু.জি.দা থোইদোক-হেন্দোক্না শীংথানীংঙাই ওইবা মওংদা পর্ফোরম তৌখি। মসি মখা চত্থরকপা ওইনা হরজিন্দর কোরনা ব্রোঞ্চ মেদল অমা লৌবা ঙমখি। মহাক্কী অখন্নরবা মাইপাকপা অসিগীদমক ঐহাক্না মহাকপু থাগৎপা ফোঙদোকচরি। মহাক্কী তুংগী পুন্সিগীদমক ঐহাক্না য়াইফ-মঙ্গোল পীজরি।”
স্পোর্তস মন্ত্রী শ্রী অনুরাগ সিংহ থাকুরনা শুশিলা দেবি লিকমাবম, বিজয় কুমার য়াদব অমসুং হরজিন্দর কোরবু মেদলশিং লৌরকপদা থাগৎপা ফোঙদোকখি।
শ্রী থাকুরনা ত্বিত তৌখি, “সি.দবল্যু.জি.দা অদোমগী অহানবা মেদল ফংবদা হরজিন্দর কোরবু থাগৎপা ফোঙদোকচরি! অদোমগী খোঙচৎ অসি পঞ্জাবকী খুঙ্গং অমদগী হৌরক্তুনা মালেমগী থাক্কী পোদিয়মদা ব্রোঞ্চ মেদল অমা লৌবা ঙমদুনা নহারোল কয়াদা মখোয়গী মঙলানশিং থুংহন্নবা হোৎন্নীংবগী ইথিল পীরগনি!” অতোপ্পা ত্বিত অমদা শ্রী থাকুরনা মখা তাখি, “অদোম্না ত্রেনিং তৌখিবা এন.এস.এন.আই.এস. পতিয়ালা অসিনা সি.দবল্যু.জি.দসু চেম্পিয়নশিংগী হৌরকফম ওইরি উপা ঙমখিবা অসিদা ঐহাক্না নুংঙাইবা পোকই। অদোমগী খেলো ইন্দিয়া য়ুনিভর্সিতী গেমসতা ফংখিবা সিলভর অদু অদোম্না হেন্না চাউবা মাইপাকপশিংগী মাইকৈদা চংশিল্লিবা অহানবা খোঙথাং ওইরি। তুংদা হেন্না মাইপাকপা ওইয়ু হায়না ঐহাক্না য়াইফ-মঙ্গোল পীজরি!”
শ্রী থাকুরনা ত্বিত তৌখি,, “সি.দবল্যু.জি. ২০২২দা জুদোদা ঐখোয়না ফজবা পর্ফোরমেন্স উৎপা ঙমখিবদা ঐহাক্না নুংঙাইবা পোকই। শুশিলা দেবিনা সিলভর অমসুং বিজয় কুমার য়াদবনা সাইপ্রস পেত্রোস সি.দগী ১০-০ ফংদুনা সি.দবল্যু.জি.দা মহাক্কী অহানবা মেদল ওইনা ব্রোঞ্চ অমা লৌদুনা তেলী হেনগৎহনখ্রে। মখোয় অনিমকপু ঐহাক্না থাগৎপা ফোঙদোকচরি!!”
শুশিলা দেবি লিকমাবমগী মাইপাকখিবশিং য়েংনবা মসিদা নম্বীয়ু
বিজয় কুমার য়াদবকী মাইপাকখিবশিং য়েংনবগীদমক মসিদা নম্বীয়ু
হরজিন্দর কোরনা মাইপাকখিবশিং য়েংনবগীদমক মসিদা নম্বীয়ু
*******
(রিলিজ আই.দি.: 1847337)
ভিজিতর কাউন্তর : 141