ভারত ইমানা – য়াইফরে, ভারত ইমানা - য়াইফরে

গুজরাতকী মীয়াম্না পাম্নরবা মুখ্য মন্ত্রী শ্রী ভুপেন্দ্র ভাই পতেল, পার্লিয়ামেন্তদা ঐহাক্কী সিনিয়র ওইরিবা, গুজরাত ভারতীয় জনতা পার্তীগী প্রসিদেন্ত, শ্রী সি.আর. পাতিল, গুজরাত বিধান সভাগী দিপুতী স্পীকর, শ্রী জেথাভাই, গুজরাত সরকারগী মন্ত্রী, এম.পি. অমসুং এম.এল.এ. পুম্নমক, সাবর দাইরীগী থৌ পুরিবশিং অমসুং মসিগা মরী লৈনবা লৌমী ইচিল-ইনাওশিং অমসুং শা-শন লোইরিবা ইচিল-ইনাওশিং!

ঙসি সাবর দাইরী অসি পাকথোক-চাউথোকহনখ্রে। লুপা করোর কয়াগী অনৌবা প্রোজেক্তশিং মফম অসিদা শেমগৎলি। অনৌবা তেক্নোলোজী য়াওবা মিল্ক পাৱদর প্লান্ত অমসুং এ-সেপ্তিক পেকিং সেক্সনদা লাইন অমগা হাপচিনবা অসিনা সাবর দাইরীগী কেপাসী হেন্না হেনগৎহল্লগনি। ঙসি উরেপ-উয়ুং তমখিবা অনৌবা প্লান্ত অসিনা দাবর দাইরীগী কেপাসী হেনগৎহনবদসু মতেং ওইরগনি। ঐহাক্না কোওপরেতিব মুফমেন্ত অসিগা মরী লৈনবা সাবর দাইরী অমসুং লৌমী ইচিল-ইনাওশিং, দাইরী অসিগী চিয়রমেন, দাইরীগী দিরেক্তর পুম্নমক্তা ঐহাক্না থমোয় শেংনা নুংঙাইবা ফোঙদোকচরি অমসুং য়াইফ-মঙ্গোল পীজরি।

অমসুং অশেংবা দাইরীগী মতাংদা ভারুভাই নীংশিংদবা হায়বা অসি অৱাৎপা অমা লৈবগা পাংখক ওই। দিকেদ কয়াগী মমাংদা ভারুভাই পতেলনা লৌখৎখিবা খোঙথাংশিং অদুনা ঙসি মীওই করোর কয়াগী পুন্সিদা অওনবা পুরকপদা মতেং পাংলি। করিগুম্বা সাবরকান্থাদা লাকপদা অনৌবা মফম লাকপাগুম্না ফাওদে মরমদি ঐহাক্না সাবরকান্থাদা চৎতবা মফম অমত্তা লৈতে। সাবরকান্থাদা লাকপদা নখোবনা পুম্নমক নীংশিংগনি। ওল্লুবা মাইকৈদা লৌবুক-লৌবুক-লৌবুক ঙাক্তা ঙাই।  ঐহাক্না সাবরকান্থাদা লাকপা মতমদা ঐহাক্কী নাকোংদা খোঞ্জেল অসি নীন্দুনা লৈ। ঐহাক্কী মরুপ কয়ানা মফম অসিদা লাকখি, ঐহাক্না মফম অসিদা লাকপা মতমদা মীপুম খুদিংমকপু নীংশিংলকই। মরুপ খরনা ঐখোয়বু থাদোক্তুনা ঈশ্বরগী নাক্তা চৎখিবা অসিদা নুংঙাইরবা পোকই। ঐহাক্না ঐখোয়গী শ্রী রাম সাঙ্খলা, ঐখোয়গী জয়েন্দ্র সিংহভাই রাথোদ, ঐখোয়গী এস.এম. খান্ত, ঐখোয়গী ধিমন্ত পতেল, ঐহাক্কী ইয়াম্বা গজানন্দ প্রজাপতি, ঐখোয়গী বিনোদ খিলজিভাই নীংশিংই। অরিবা মরুপ কয়া লৈ, অমসুং ঙসিসু ঐহাক্কী মাংদা ঐহাক্না খঙবা মীওই কয়ানা চৎলি। ঐহাক্কী বালজীভাই, ঐহাক্কী প্রভীন সিংহ দিওরা, ঐহাক্কী মরুপ কয়া ওইরবসু, ঐহাক্না মোদাসাগী রাজাবালিবু নীংশিংলি। মীওই কয়াগী নীংশিং মমি, ইমুং মনুংগী মীওই কয়া, মখোয়গা লৈনবা অচেৎপা মরীশিং। ঐখোয়গী দিয়াভাই ভত্ত, ঐহাক্কী মুলজীভাই পার্মর, অসিগুম্বা অহল-লমনশিং অমসুং মরুপশিং অসি য়াম্না ইকাই খুম্ননীংঙাই ওইবা মীশকশিংনি। ঐখোয়গী নুংশিরবা ইচিল-ইনাওশিংগা লোয়ননা থবক তৌমিন্নরকখি, করিগুম্বা অদোম্না মফম অসিদা লাক্নীংবা তারবদি মসিদা লাকপীয়ু।

মরুপশিং,

দিকেদ অনিগী মমাংদা মফম অসিদা করম্বা ফীভম ওইরমখি হায়বা নখোয়নসু খঙই। ঐহাক্নসু মদু নীংথিনা খঙই। হৌজিক মতম অসিদা ঐখোয়না গুজরাতকী মফম কয়াদা কা হেন্না নোং চুবগী চৈথেং মায়োক্নরি। অদুবু গুজরাত্তা নোং চুবা হায়বা অসি য়াম্না নুংঙাইবা অমসুং অপেনবা পোক্নীংঙাই ওই, মসি মপালদা লৈবা মীওইশিংনা খঙলোই। মরমদি মফম অসিদা চহি ১০, চহি ৫ ইকং থোকখি, নোং তাবা ঙাইবদা অৱাবা ওইখি। অমসুং নোং কন্না চুবা মতমদা ৱাখল লৌশিং থোকই। অমসুং ইকংগী ফীভম থোকখিবা অসিগী মহৈ অসি করিনো, করিগুম্বা নোং চুরবা লৌবুক্তা মনা মশিং লৈহৌদে। শা-শন লোইবশিংনা শজিক ফানবদা অৱাবা ওই, অমসুং অঙাংশিং মফম অসিদা থমদ্রে, সহরদা লোইনমক থারে। ঐখোয়না খুঙ্গং অসিদা পুন্সি লেল্লকখি। ঐখোয়না মতম অদু উরকখি। অমসুং মতম অদুদা ঐহাক্না ৱাশকখি মদুদি মীয়ামগী মতেং লৌদুনা, মীয়ামগী খুৎশম্ননা চংশিনবদা লেংদ্রবা থাজবা থমদুনা ফীভম অসি অহোংবা পুরক্কে হায়না লেপখি অমসুং অসুম তৌদুনা ঈথৈ-লৌখোংগী ফীভম শেমদুনা গুজরাত্তা পাকথোক চাউথোকহনখি, লৌউ-শিংউগী লমদা, এনিমেল হসবেন্দরীগী লমদা ঐখোয়না চাউনা খুমাং চাউশিনখি অমসুং দাইরীনা মসিদা চাউনা পাঙ্গল হাপখি। দাইরীনা শেন্মীৎলোন্দা স্তেবিলিতী পুরকখি, দাইরীনা সেক্যুরিতী পুরকখি অমসুং দাইরীনা রিকবরীদা অনৌবা খুদোংচাবশিং পীখি। ঐহাক্না হৌজিক ইচে-ইচলশিংগা ফম্মিন্নবদা মখোয়দা মসিগী ইহৌ অসিগী মতাংদা হংখি। ঐহাক্না মখোয় করম তৌরি? মখোয়না শেন্দোং কয়াম ফংবগে? শেন্দোং অদুনা করি তৌবগে? হায়না হংখি। সর করিগুম্বা ঐখোয়না শেন্দোং ফংলবদি মদুনা ঐখোয়না সনা লৈশিল্লি। অহানবা ঐখোয়না তৌবা অসি সনা লেপশিনবা অসিনি হায়না পাউখুম পীরকখি।

মরুপশিং,

গুজরাত অসি লৈবাক অসিগী ওইনা চহি কয়াগী মমাংদা শা-শনশিংগী হেল্থ কার্দশিং পীখিবা, পশু আরোগ্য মেলাশিং হৌখিবা রাজ্য অমনি। ঐখোয়না শাশিংদা কেতরেক্তশিং অমসুং য়াগী দেন্তেলগী লায়েকগী মরমদা ৱানরমখি। অমসুং এনিমেল হেল্থ ফিয়রদা শনশিংগী মপুং লেন্দুনা য়েংবা মতমদা প্লাস্তিক ৱেস্ত কে.জি. ১৫-১৫, ২০-২০ থংনখি, অউবশিংগী মীৎতগী পী তাখি। প্লাস্তিক অসি ঐখোয়গী শা-শনশিংদদি য়েক্নবগা পাংখক ওই। নাকল অমরোমদা শা-শনগী মরমদা ৱাজবা, শা-শনগী চীঞ্জাক ফংহনবা অসিগী ৱাজরম্বা অদু ঙসিদা ইচে-ইচলশিং অসি মমোন-মীনোক তম্বা ঙমজরে।

তশেংবদি মসি পব্লিসিতী খজিক হেনজিনখ্রে। মখোয়না হায়খি মদুদি করিগুম্বা শাশিং অসি নারবদি হৌজিক মতমদদি আয়ুর্বেদকী হীদাকশিংনা শাশিংবুসু লায়েংবা ঙমলে। হায়বদি ঐখোয়না য়ুমদা শীজিন্নরম্বা শাশিংগী ওইবা ত্রেদিস্নেল প্রিমিতিব ত্রেদিসনশিং অদু হিংগৎহল্লে হায়বনি। আয়ুর্বেদকী হীদাকশিংনা শাশিং লায়েংবা অসিগীদমক ঐহাক্না গুজরাতকী দাইরী সেক্তরগী মীয়ামদা থাগৎপা ফোঙদোকচরি, সাবর দাইরীনা মখোয়গী শা-শন লোইবদা মপুশিংদা মতেং পাংখি অমসুং আয়ুর্বেদকী হীদাকশিংনা শা-শনশিংবু লায়েংবীখি। ২০০১দা মীয়াম্না হায়নরমখি, নুমিদাংদা চাক চাবা উনবা মৈ পীবীয়ু। নুমিদাংগী মতমদা গুজরাত্তা মৈ ঙাল্লমদে। ঐখোয়না জ্যোতিগ্রাম য়োজনা হৌদোকখি। ঙসি চহি ২০-২২গী নুপামচা অমসুং নুপীমচাশিংনা মৈ মাম্বা অসি করিনো খঙলরোই। অমসুং গুজরাত্তা জ্যোতিগ্রাম য়োজনা পুরকখি। অমসুং জ্যোতিগ্রাম য়োজনা অসিনা গুজরাতকী য়ুমশিংদা মৈ ফংহনবা খক নত্তনা তি.ভি. য়েংবসু ফংহনখি। মৈ অসিনা ঐখোয়গী খুঙ্গংদা দাইরী য়ুনিৎকী মনাক্তা মিল্ক চিল্দ য়ুনিৎ হাংদোকপদা চাউনা কানবা ফংহনখি। মসিনা মরম ওইদুনা শঙ্গোমগী কল্লেক্সন হেনগৎলকখি, অমসুং শঙ্গোম মাংবা হন্থরকখি। কার লাকপা ফাওবদা শঙ্গোম অদু চিলিং সেন্তরদা থম্মি। অমসুং মসিনা মরম ওইদুনা শেল মাংবগী চাং হন্থরকখি। অমসুং মসি মৈনা মরম ওইহল্লকপনি। হৌখিবা দিকেদ অনি অসিদা গুজরাত্তা শেম-শাখিবা অসিগী ফলশিং ঙসি ফংবা ঙমলে। ঙসি গুজরাতকী দাইরী মার্কেৎ অসি লুপা করোর লাখ ১ য়ৌবা ঙমলে।

মরুপশিং,

২০০৭তা ঐহাক্না মফম অসিদা লাকখিবা, ২০১১দা লাকখিবা অদুসু নীংশিংলি। মতম অদুদা ঐহাক্না প্রোসেসিং প্লান্ত লিংখৎনবগী প্রোগ্রাম অমা পাইখৎখি। অমসুং নুমিৎ অদুদা ঐহাক্না ঐখোয়গী দাইরীগী মরুপশিংগা ৱারী শাখি। ঐহাক্না হায়খি, য়েংঙু হৌজিক নখোয়না নুপীশিংনা শরুক য়াবা হেনগৎহল্লু। অমসুং ঙসিদি ঐহাক্না নুংঙাইবা পোক্লে মরমদি মমাংদা শঙ্গোমগী কম্মিতিশিংদা নুপী য়াম্না য়াওরমদবা অদু ঙসিদি সমিতি অসিগী একজিক্যুতিব ওইনা য়ামদ্রবদা নুপী অহুমদি লৈরে, মখোয়না সমিতি চল্লাইরি অমসুং মফম খরদদি নুপাদগী নুপীনা মশিং হেল্লি। গুজরাত্তা ঐহাক্না কাংলোন অমসু শেমখি অমসুং ঐহাক্না ঙসি ইচে-ইচল পুম্নমক্কা উন্নখি অমসুং মখোয়দা ঐহাক্না হংখি, মতম অদুদা ঐহাক্না কনাগুম্বা অমা হেক্তনা শঙ্গোম লৌবা লাকপা তারবদু শঙ্গোমগী পৈশাদি নুপাদা পীগনু নুপীশিংদা খক্তা পীগদবনি হায়না কাংলোন শেমখি। অমসুং করিগুম্বা নুপীশিংদা শেল অদু পীরবদি, মদু নীংথিনা শীজিন্নগনি, মদু ইমুংগী য়াইফনবা ওইগনি, মদু শা-শনগী য়াইফনবা ওইগনি। অমসুং ঙসি গুজরাত্তা নুপীশিংনা খক্তা শেল লৌরি অমসুং মসিনা মরম ওইদুনা নুপীশিংনা শক্তি লৈবা য়াম্না হেনগৎলে। গুজরাত্তা মতেং পাংনবগী ফজরবা চৎনবী অমসুং সংস্কার লৈজৈ, মতেং পাংনরবা খক্তদা চাউখৎমিন্নগনি। শঙ্গোমগী কো-ওপরেসন মুফমেন্ত অসিগী মাইপাকপা অসি ঙসি লৌউ-শিংউগা মরী লৈনবা মফমশিংদসু শন্দোরক্লি। ঙসি লৈবাক অসিদা ফার্মর্স প্রদ্যুসর ওর্গনাইজেসন লিশিং ১০ লৈরে, মসি শেমগৎপগী থবক খোঙজেল য়াংনা চংশিল্লি। এফ.পি.ও.শিং অসিগী খুত্থাংদা অপীকপা লৌমীশিংবু ফুদ প্রোসেসিংগা মরী লৈনবা, এক্সপোর্তকা মরী লৈনবা ভেল্যু অমসুং সপ্লাই চেনগা হকথেংননা মরী থম্বা ঙম্লগনি। মসিনা গুজরাতকী লৌমীশিংদা চাউনা কান্নবা ফংহল্লগনি।

ইচিল-ইনাওশিং,

হৌখিবা চহি নিপান অসিদা কেন্দ্র সরকারনা পাইখৎখিবা খোঙথাংশিংনা মরম ওইদুনা গুজরাত য়াওনা লৈবাক অসিগী তোঙান-তোঙানবা শরুকশিংগী লৌমীশিংগী শেন্থোক হেনগৎহনবা ঙমখি। হোর্তিকলচর, এনিমেল হসবেন্দরী, পিস্সিকলচরনা লৌমীশিংগী শেন্থোক হেনগৎহনবা ঙমখি অমসুং লম লৈজদবা লৌমীশিংদা, খ্বাইদগী লায়রবশিংদা চাউনা কান্নবা ফংহন্দুনা মখোয়গী শেন্থোক্তা চাউনা হেনগৎহনবা ঙমখি। মসিগা মান্ননা লম য়াম্না পীকপা লৌমীশিংগী শেন্থোক অসিসু হেনগৎহনখি। হায়বদি লৌমীশিংগীদমক অতোপ্পা শেন্থোক্কী পাম্বৈ শেম্বগী লালোং অসি মহৈ য়াল্লক্লে হায়বনি।

খাদী এন্দ ভিলেজ ইন্দস্ত্রীজনা মসিগী ফজরবা খুদম অমা ওইরি। খাদী এন্দ ভিলেজ ইন্দস্ত্রীজকী তর্নওভর অসি অহানবা ওইনা লুপা করোর লাখ ১ হেনগৎখি। মসিনা মরম ওইদুনা হৌখিবা চহি ৮ অসিদা মফম অসিদা লৈবা খুঙ্গংদা অনৌবা থবক করোর ১.৫ হেন্না পীবা ঙমখি। হৌখিবা চহি ৮ অসিদা বীকিং, খোহী পুথোকপা অসি ২০১৪গী চহি ৭-৮ মমাংগা চাংদম্নবা মতমদা, অমসুং সাবর দাইরীনা ঐঙোন্দা তাকপীরকপগী মতুং ইন্না হৌজিক ঐখোয়না সাবরকান্থা শিনবা থুংবদা খোহী পুথোক্নবা লৌমীশিংবু শেম-শাবীরি। মখোয়দা বোক্সশিং পীরি। অমসুং অতেনবা মতমগী মনুংদা খোহী পুথোকপা অসি শরুক অনি হেনগৎলকখি। মসিগী অতোপ্পা কান্নবা অমসু লৈ, করিগুম্বা লৌবুকশিংদা খোই লৈরবদি মসিনা নখোয়গী মরুপ অমনা মথৌ তৌগনি। নখোয়দা লৌবুক্কী শিন্মী ওইনা মতেং পাংগনি। খোইশিংনা লৌউ-শিংউদা কমপ্লিমেন্তরী অমা ওইরি। মসি খক নত্তনা ঙসি ঐখোয়না পেত্রোলদা ইথানোল ব্লেন্দিং তৌরি, চাদা ১০ হেন্না ঐখোয়না পেত্রোলদা ইথানোল য়াল্লি। ইথানোল অসি চু পাম্বী, চু, চুজাক হায়বদি হৌজিক ফাওবদা থাও অসি তেজবাত্তদগীসু পুথোক্লে। হৌজিক্তি মফম অসিদা বুশ ওইলসু ফংলে। অমসুং বুশ অমসুং তেজবাত্তদগী থাও পুথোক্তুনা ঐখোয়গী রিসোর্স লৈহল্লি অমসুং অকোইবগী ফীভমসু ঙাকশেন্দুনা থম্লি। ২০১৪ ফাওবদা লৈবাক অসিদা ইথানোল লিতর করোর ৪০দগী তানা ব্লেন্দিং তৌরমখি।  ঙসিদি লিতর করোর ৪০ রোম য়ৌবা ঙম্লে। ঐখোয়গী সরকারনা হৌখিবা চহি ২ অসিদা অখন্নবা কেম্পন চত্থদুনা লৌমী করোর 3 হেনবদা কিসান ক্রেদিত কার্দশিংসু পীখি। অহানবা ওইনা লৌমীশিং অমসুং ঙামীশিংনা কিসান ক্রেদিত কার্দশিংগী কান্নবা ফংলি।

ইচিল-ইনাওশিং,

ঐখোয়না লৌউ উবদা চংবা শেল হন্থহন্নবা লেপ্পা লৈতনা হোৎনরি। য়ুরিয়াদা নীম কোতিং তৌবা, থোং লোল্লুরবা ফর্তিলাইজর প্লান্তশিং হাংদোকপা অমসুং নেনো ফর্তিলাইজরশিং প্রমোৎ তৌবগী খোংথাংশিং লৌখৎতুনা খাওদা হার হাপলগা পুরকপা অদু বোত্তলদা ওইনা হাল্লে। অমসুং মসিগী চপ মান্নবা কান্নবা ফংবা ঙম্লে। খুৎ য়াম্না চংদনা শেন্থোক হেন্না লাকহনবা ঙমলে। হৌজিক নেনো ফর্তিলাইজরগী থবক পাইখৎলি। হৌখিবা থা খরা অসিদা মালেম শিনবা থুংবদা য়ুরিয়াগী মমল শরুক কয়া হেনগৎলকখি, অদুবু মসিনা ঐখোয়গী লৈবাক্কী লৌমীশিংদা পোৎলুম পীদনবা ঐখোয়না হোৎনখি। হার অসি মাপলদগী পুশিল্লকপা তারমখি। খঙহৌদনা মমলশিং শরুক কয়া হেনগৎলকখি। অদুবু দিল্লীদা ফমলিবা সরকার অসিনা য়ুরিয়া মমল হেনগৎলবসু মসিগী পোৎলুম ঐখোয়গী লৌমীশিংদা পুহনখিদে। ভারত সরকারনা মসিগী পোৎলুম পুরি। য়ুরিয়াগী কে.জি. ৫০গী বেগ অমদা সরকারনা লুপা লিশিং অহুম মখাই পীরি। অদুগা সরকারনা মসি লৌমীশিংদা লুপা কয়াদা ফংহনবগে? লুপা ৩০০দা। লৈবাক শিনবা থুংবদা মসি লুপা ৩০০দা ফংহল্লি। মমাংদা সরকারনা দি.এ.পি.গী কে.জি. ৫০দা লুপা ৫০০ পুথোকখি। ঙসি মালেমগী ওইনা পোৎকী মমল হেনগৎলবসু সরকারনা লুপা ২৫০০ পুথোক্লবসু লৌমীশিংদা অৱাবা পীদনবা হোৎনরি।

মরুপশিং,

গুজরাতকী লৌমীশিংনা স্কিমশিং অসিগী কান্নবা ফংলি। চহি কয়া অসিদা অরবল্লীগী লৌমী লিশিং ৫০ হেনবগী লৌবুক্তা মাইক্রো ইরিগেসনগী খুদোংচাবা ফংহনবা ঙমখি। অমসুং থবক অসি পাঙথোকপা ঙম্বগীদমক ঐহাক্না অরবল্লী জিলাগী লৌমী ইচিল-ইনাওশিংবু থাগৎচনীংই। ঙসি অরবল্লীগী খুঙ্গং কয়াদা লৈরিবা লৌমীশিংনা ১০০% দ্রিপ ইরিগেসনগা লোয়ননা লৌ উবা ঙমলে। সুজলান-সুফলান য়োজনানা মরম ওইদুনা সাবরকান্থাগী তেহসিলশিংদা ঈশিং য়ৌহনবা ঙমলে। হাথমতী কেনেল শেমগৎ-শাগৎপগী প্রোজেক্ত লোইশিনখিবনা মফম পুম্বা অসি ফগৎহনবা ঙমখি। হর ঘর জল অভিয়ানগী মখাদা লুপা করোর কয়া চাদিং তৌদুনা সহরগী মথৌ তাবা ঈশিং ফংহন্নবা হোৎনখি।

মরুপশিং,

ঙসি, সাবরকান্থা অমসুং অকোইবদা লৈরিবা মফমশিং অসিদা মমাংদা অমুক্তা উখিদ্রিবা মওংদা লম্বী-থোংগী ইনফ্রাস্ত্রকচর শেমগৎখি। রেলৱে লাইনশিং পাকথোক-চাউথোকহনখি, রেলৱে ব্রিদজ শাখি, হায়ৱে পাকথোকহনখি, হায়ৱে শাংদোকহনখি, শামলাজী-মাদোসাগী কিমি ১৫০ শাংবা লেন মরিগী লম্বী অসিনা খা গুজরাতকা শেম্নহনখি। মসিনা সাবরকান্থাবু খা গুজরাত, সেন্ত্রেল গুজরাতকা ফাওনহল্লি। অমসুং মসিনা মরম ওইদুনা খেদব্রহ্মা, মেহরজ, মালপুর, ভিলোদা ওইরবসু অপুনবা ত্রাইবেল বেলত অসি খোঙজেল য়াংনা চাউখৎহল্লি। হিনমতনগরদগী খেদব্রহ্মা ব্রোদ গেজ লাইন অসি খোঙজেল য়াংনা শেমগৎলি। ইচিল-ইনাওশিংনা করিগুম্বা হিনমতনগরদগী মহেসানাদা চৎপা পাম্লবদি শরুক তরেৎ তরা থোক্না খনবা তারম্বা অদু নীংশিংলমগনি, হৌজিক্তিমসি পুং অহুম মখাইদা য়ৌরগনি। হিনমতনগর, মহেসানা, বিজাপুর অসি থুনা য়ৌরগনি। হিনমতনগরগী অম্বাজী অসি লেন মরি ওইহনখ্রে অমসুং মা অম্বা থৌনিবা চৎপদা অৱাং গুজরাত তম্না চৎপা তারম্বা অদু খা গুজরাত-সেন্ত্রেল গুজরাতকী মীয়াম্না লম্বী অসিদা চৎপা য়ারগনি। হায়বদি, মফম অসিগী অকোইবদা লৈরিবা মীওইশিংনা হিংনবগী লম্বীসু ফংলগনি। অমসুং হৌজিক শামলাজীদগী অহমদাবাদ ফাওবগী হায়ৱে লাইন ৬কী থবক কন্না চত্থরি। মসিদা লুপা করোর ১৩০০ চাদিং তৌখি। হিনমতনগরদা লৈরিবা মেদিকেল কোলেজ অসি কোরোনাগী মতমদা কয়াম কান্নখি হায়বা নখোয়না খঙলি।

মরুপশিং,

লম্বী-থোং অমসুং ইনফ্রাস্ত্রকচর ফগৎলবা মতমদা তুরিজমনা চাউনা কান্নবা ফংই, ঐখোয়গী নহারোলশিংনা থবক ফংই। অমসুং ঐখোয়গীদি সাবরকান্থা, বনাসকান্থা অসিদা থাজবা, ত্রাইবেলগী চৎনবী, মহৌশাগী ফবা অসিনা থল্লি। অমসুং শামলাজী মন্দির শেমগৎ-শাগৎপগী খুদোংচাবা ফংজবা অসিদা ঐহাক্না নুংঙাইবা পোকই। ঙসি মফম অসিদা লাকপা মীওইশিংনা শামলাজীগী করি ফীভম ওইবগে খঙবা ঙমগনি। অমসুং মফম অসিদা চাউখৎ-থৌরাংগী থবক পাইখৎপা অসিনা লমকোইবশিং লাকপগী মশিং হেনগৎলক্লি অমসুং হিংনবগী খুদোংচাবশিংসু হেনগৎলক্লি।

ইচিল-ইনাওশিং,

লৈবাক অসিগী নীংতম্বা ফংবগী চহি ৭৫ শুরকপা অমসুং আজাদী কা অমৃত মহোৎসব পাঙথোকপা মতম অসিদা ঐহাক্না সাবরকান্থাদা লাক্লি। চহি অসিমক্তদা, আজাদী কা অমৃত মহোৎসব অসিদা, ত্রাইবেল মীয়াম পাক্তক্ননা হাৎখিবগী থৌদোক, বাল চিতরীয়াসু চহি ১০০ মপুং ফারি। ত্রাইবেলগী অথৌবা, মোতিলাল তেজাৱতজীনা মহাক্কী লুচিং মখাদা ব্রিতিশকী মায়োক্তা ত্রাইবেলশিংনা লান হৌখি। মখোয়না ব্রিতিশশিংবু শীংনখি, মসি ঐখোয়গী সাবরকান্থানি হায়না। অমসুং ব্রিতিশনা ত্রাইবেলশিংবু হাৎপীখি। অদুবু লাইবক থীবদি নীংতম্বা ফংলবা মতুংদা থৌদোক অসি কাউথোকখি। মখোয়না কত্থোকখিবা অমসুং ত্রাইবেল ফুরুপনা কত্থোকখিবা অসি তুংগী মীরোলদা খঙহন্নবা হোৎনজবা অসি ঐহাক্কী ওইনা লাইবক ফবনি। অমসুং ঐখোয়না বাল চিতরীয়া মনুংদা অথৌবশিংগী নীংশিং খুবম শেমগৎপদা মাইপাকপা ঙমকি। ঙসি অমর ওইরবা থৱায়শিং অদুগী ইথিলগা লোয়ননা অনৌবা মীরোলশিংদা লৈবাক নীংবগী লম্বী অদি শাহীদ স্মৃতি বননা উৎলি। প্রধান মন্ত্রী ওইনা ঐহাক্না নীংতম্বা ফংবদা ত্রাইবেল খুন্নাইনা শরুক তমখিবা অদু জাতিগী থাক্তা শক খঙবা ঙমহন্নবা খুদোংচাবা ফংখিবা অসি ঐহাক্কী লাইবক ফবনি। ঐখোয়গী সরকারনা নবেম্বর ১৫, ভগৱান বিরসা মুন্দাজীগী মপোক কুমওনবু জনজাতীয় গৌরব দিৱস হায়না লাউথোকখি। ঐখোয়গী সরকারনা লৈবাক শিনবা থুংবদা লৈরিবা আদিৱাসীগী নীংতম লান্মীবু নীংশিংবা ওইনা অখন্নবা ম্যুজিয়মসু শারি।

মরুপশিং,

নীংতম্বা ফংবগী মরু ওইবা তাংখক অসিদা অতোপ্পা অচৌবা মাইপাকপা অমা থোক্লরে। অহানবা ওইনা ত্রাইবেল খুন্নাইদগী হৌরকপা মমোম অমনা ভারতকী খ্বাইদগী ৱাংবা কন্সতিত্যুস্নেল পোস্ত য়ৌবা ঙমখি। লৈবাক অসিনা শ্রীমতি দ্রৌপদী মুর্মুবু মাগী রাস্ত্রপতি ওইহনখি। মসি ভারত মচা করোর ১৩০ হেনবগী ওইনা য়াম্না চাউথোকচনীংঙাই ওইবা মীকুপ অমনি। নীংতম্বা ফংনবগীদমক থৱায় থাখিবা ঐখোয়গী ইপা-ইপুশিংনা মঙজরম্বা ইনক্লুসিব দেমোক্রেসী অসি ঙসিদি মঙফাওনবা ঙমলে।

মরুপশিং,

ঙসি ঐহাক্না সাবরকান্থাগী শেংলবা লমদম অসিদগী গুজরাতকী মীয়ামদা, ঐহাক্না ইরৈবাকচাশিংদা ৱাফম অমা হায়জনীংই অমসুং ঐখোয়গী মুখ্য মন্ত্রীনা হৌজিক হায়বীখ্রে নীংতম্বা ফংবগী চহি ৭৫ শুরকপা অসিদা হর ঘর তিরঙ্গা কেম্পেন হৌদোক্লি। কেম্পেন অসিদা ওগস্ত ১৩দগী লৈবাক অসিদা লৈরিবা য়ুমথোং খুদিংমক্না মচু অহুমগী ফিরাল চীংখৎপীয়ু। সাবরকান্থা, অরবল্লীদা লোয়ননা গুজরাত শিনবা থুংবদা অমসুং লৈবাক পুম্বদা তিরঙ্গা চীংখৎপীয়ু। এক ভারত শেস্ত্র ভারতকী অমৃতকী ৱারেপ লৌরসি। লৈবাক্কী নীংতম্বা ফংনবা থৱায় থাখিবশিং, থৱায়শিং অদুনা অদোমগী য়ুমদগী তিরঙ্গা চীংখৎপা উবদা নখোয়গী ইমুংবু মখোয়গী থৱায়না থৌজাল পীনবীগনি। ঙসি সাবরকান্থানা ইকাই খুম্নবা উৎখিবা অমসুং বিরাত জনসাগর, ঐহাক্কী ইমা, ইচে-ইচলশিংনা মশিং য়াম্না থোরকপা, নখোয়গী থৌজালশিং অসিনি ঐহাক্কী পাঙ্গল ওইরে, ঐহাকপু থৌনা পীরি, মসিনা ইথিল পীরি। নখোয়গী থৌজালশিংগা লোয়ননা চাউখৎপগী লম্বীদা মাংদা চংশিন্দুনা মীয়ামগী য়াইফবা পুরকপা ওইরসনু। থৌজাল অসি ভারতকী খুঙ্গং খুদিংমক্তা ঐহাক্না য়ৌশিনবা ঙম্নবা খ্বাইদগী চাউবা পাঙ্গলনি। ঐহাক্না সাবর দাইরীগী অপুনবা তীমবু লেপ্পা লৈতনা চাউখৎহনবা অসিগীদমক তৌবীমল খঙবা উৎচরি অমসুং থাগৎচরি। নখোয় পুম্নমক্না খুৎ থাংগৎতুনা ঐহাক্কা লোয়ননা হৌনা লাউবীয়ু,

ভারত ইমানা -য়াইফরে

ভারত ইমানা -য়াইফরে

ভারত ইমানা -য়াইফরে

থাগৎচরি !

খঙহঞ্জবা: পি.এম.গী ৱারোল অসি চাউরাকপা ৱাহন্থোক্নি। তশেংবা ৱারোলদি গুজরাতি অমসুং হিন্দীদা পীখিবনি।

*****