নমস্কার!

ঐহাক্না লৈখিদ্রবা হরমোহন সিংহ য়াদবজীগী পুন্যতিথী লাকপসিদা মহাক্কী মফমদা ইকায় খুম্নজরি। ঐহাকপু থৌরম অসিদা শরুক য়াবীনবা থম্মোই শেংবা পাউজেল পীবিরকপগীদমক্তা ঐহাক্না সুখরামজীবুসু থাগৎচরি। ঐহাক্না কানপুরদা লাক্তুনা থৌরম অসিদা শরুক য়াবা হায়বসি ঐহাক্কী অপাম্বসু ওইরম্মিবনি। অদুগা ঙসি অসি ঐখোয়গী লৈবাক্কী গনতন্ত্রগী য়াম্না চাউবা নুমিৎনি। ঐখোয়গী অনৌবা রাস্ত্রপতিনা ঙসি ৱাশক লৌখ্রে। নীংতম্লবা তুংদা খ্বাইদগী অহানবা ওইনা, ত্রাইবেলগী খুন্নাইদগী লাকপী নুপী রাস্ত্রপতি অমনা লৈবাক অসিবু লুচিংলগনি। মসি ঐখোয়গী লোকতন্ত্রগী পাঙ্গল অমসুং ঐখোয়গী ইনক্লুসিব ওইবা ৱাখল্লোনগী অহিংবা খুদম্নি। তাঞ্জা অসিগা মরী লৈননা দিল্লেদসু তোঙান-তোঙানবা মরু অইবা থৌরম কয়াসু পাংথোক্লি। সংবিধানগী কাঙলোনগী মখা পোন্না ঐহাক্না দিল্লীদা লৈতবা য়াদে অমসুং তঙাই ফদবসু ওইবনা, ঐহাক্না ঙসিগী থৌরমসি ভিদিও কনফরেন্সিংগী খুত্থাংদা শরুক য়াদুনা অদোমগী মরক্তা তিল্লিবনি।

মরূপশিং,

হকচাংনা তুমখ্রবা ফাওবদা পুন্সিদি লোইবা নাইদে হায়না ঐখোয়গী মফমগী থাজনবা লৈরি। ভগবান শ্রী কৃষ্ণনা গীতাদসু “নৈন ছিন্দন্তি শাস্ত্রনিন নৈন দহতি পাৱক” হায়বীরম্মি। মসিনা হায়বদি, থৱাইদি শিবা নাইদবনি, অমরনি হায়বনি। মরম অদুনা, খুন্নাই অমসুং সেবাগীদমক্তা হিংবশিংদি, মখোয়না নোংগাখ্রবা ফাওবদা হিংদুনা লৈহৌই হায়বনি। নীংতম্বগী লান্দা মহাত্মা গান্ধী ওইরো, জয়প্রকাশ নরায়নজী ওইরো, মখোয়গুম্বা শক্নাইরবা অথোইবশিংগী ৱাখল্লোন্না ঐখোয়দা ঙসি ফাওবদা ইথিল পীবিরি। হরমোহন সিংহ য়াদবজীনা মহাক্কী শাংলবা রাজনিতীগী পুন্সিদা উত্তর প্রদেশ অমসুং কানপুরদগী  লোহিয়াজীগী ৱাখল্লোনবু মখা তানা চাউখৎহনখি। মহাক্না রাজ্য অমসুং লৈবাক্কী রাজনিতী অমসুং খুন্নাইগীদমক্তা পাংথোক্লম্বা থৌদাংশিংনা হৌরক্লিবা চারোন-শুরোনশিংবু লমজিং লমতাক্লি।

মরূপশিং,

চৌধরী হরমোহন সিংহ য়াদবজীনা মশাগী রাজনিতীগী পুন্সিবু গ্রাম পঞ্চায়ত্তগী হৌদোকখি। মহাক্না গ্রাম সভাদগী রাজ্য সভা ফাওবগী খোঙচৎ চৎখি। মহাক্না প্রধানসু ওইখি, লেজিসলেতিব কাউন্সিলগী মেম্বর অমসুং এম.পি.সু ওইখি। মতম অমদা, মেহরবান সিংহগী পুর্বানা য়ু.পি.গী রাজনিতীদা মাইকৈ তাকপীখি। রাজনিতীগী অসুক য়াম্না ৱাংলবা থাক য়ৌরবফাওবদা, হরমোহন সিংহনা খুন্নাইগীদমক্তা অহেনবা মিৎয়েং চঙদুনা লাকখি। মহাক্না খুন্নাইগী মতিক চাবা লুচিংবা শেম্নবা থবক তৌরমখি। মহাক্না নহারোলশিংবু তুংলমচত্তা পুবীখি, লোহিয়াজীগী ৱাখল্লোনবু হেন্না খুমাং চাউশিলহনখি। মহাক্কী য়োৎকুম্বা মওং-মতৌবু ঐখোয়না ইং ১৯৮৪দা উবা ফংখি। হরমোহন সিংহ য়াদবজীনা সিখশিং হাৎপগী মাইয়োক্তা রাজনিতীগা মরী লৈননা লেপ্পদা নত্তনা, সিখ ইচিল ইনাওশিংবু ঙাক শেন্নবগীদমক্তা মাংজিল থানা থোক্লক্তুনা লান্থেংনখি। মহাক্না মশাগী পুন্সিগী করিমত্তা খন্দনা সিখ ইমুং অমসুং মরাল লৈজদ্রবশিংগী পুন্সি কনখি। লৈবাক্না মহাক্কী থৌদাং মশক খঙদুনা, মহাক্কী মফমদা শৌর্য়া চক্রা পীখি। হরমোহন সিংহ য়াদবজীনা মহাক্কী খুন্নাইগী পুন্সিদা চেনখিবা ৱাখল্লোনগী খুদমগা চাংদম্নীংঙাই ওইবা করিমত্তা লৈতে। 

মরূপশিং,

হরমোহনজীনা অতলজীগুম্বা অথোইবা লুচিংবগী মতমদা পার্লিয়ামেন্ততা থবক তৌরমখি। অতলজীনা অসুম্না হায়বীরম্মি, “সরকার কয়া লাক্কনি, চৎখিগনি, পার্তী কয়া লাক্কনি, কায়খিগনি, অদুবু লৈবাক অসিদি লেংদনা অদুমক লৈহনগদবনি”। মসিনা ঐখোয়গী লোকতন্ত্রাগী থৱাইনি। “মীওই অমদগী পার্তীনা চাউই, পার্তীদগী লৈবাক্না চাউই”। মরমদি, রাজনিতী দলশিংনা গনতন্ত্রা লৈবদগী হিংলি, গনতন্ত্রনা লৈবাক লৈবদগী হিংলিবনি। হায়রিবা ৱাখল্লোন অমসুং লৈবাক্কীদমক্তা তেংবাংনবগী ৱাখল্লোনবু লৈবাক্কী রাজনিতী দল পুম্নমক্না, মরু ওইনা, কংগ্রেস নত্তবা দলশিংনা তুং ইল্লি, মসিগা মতুং ইনবা থবকশু পাংথোক্লম্মি। ঐহাক্না হৌজিক ফাওবা নীংশিংলি, ইং ১৯৭১গী পাকিস্তানগা লান শোক্নখিবা মতমদা, মরু ওইবা পার্তী খুদিংনা লেংগোন্নদুনা থবক তৌমিন্নখি। লৈবাক্না অহানবা এতোমিক তেস্ত পাংথোকখিবা মতমদসু পার্তী খুদিংনা সরকারগী মাইকৈদা লেপখিবনি। অদুবু, ইমর্জেন্সীগী মতমদা গনতন্ত্রবু নমথখিবা মতমদা, মরু ওইবা পার্তী খুদিং অমসুং ঐখোয়না অমত্তা ওইনা থোক্তুনা সংবিধান কন্নবা লান্থেংনখি। চৌধরী হরমোহন সিংহ য়াদবজীসু হায়রিবা লান অদুগী মরু ওইবা লান্মী অমনি। হায়বদি, লৈবাক্কী অপাম্বনা কনাগুম্বা অমগী ৱাখল্লোন্দগী হেন্না ৱাংনা থম্মি হায়বনি। মশাগী নত্ত্রগা দলগী অপাম্বনা লৈবাক অমসুং খুন্নাইগী অপাম্বদগী হেন্না মাঙ থানা থম্বগী চৎনবী অমা হৌজিক্কী মতমদা লৈরক্লি। করিগুম্বা মতম কয়াদদি, ওপোজিসন দলশিংনা সরকারগী থবক-থৌরমদা অয়েৎপা পীরি, মসিগী মরমদি, মখোয়না সরকার পায়রিঙৈদা হায়রিবা ৱারেপশিং লৌবা ঙমহৌদবননি। মান্নবা ৱারেপশিংবু থবক্তা ওন্থোক্লকপা মতমদা মখোয়না য়েৎলি। মসি লৈবাক মীয়াম্না পাম্নদ্রে। দলবু য়ানীংদবা, মীওই অমবু য়ানীংদবা, মসিবু লৈবাক্কী মাইকৈদা য়ানীংদবা ওইহন্দবা হায়বসি রাজনিতী দল খুদিংগী থৌদাংনি। মশাগী ৱাখল্লোনগী তোঙানবা মফম লৈ, লৈফমসু থোকই। অদোমগী রাজনিতীগী ওইবা অপাম্বা লৈরম্বা য়াই, লৈজসনু। অদুবু, লৈবাক্না খ্বাইদগী মাঙদা লৈবনি, খুন্নাইনা খ্বাইদগী মাঙদা লৈবনি। লৈবাক্না খ্বাইদগী হেনবনি।

মরূপশিং,

সোসিএলিজম্না মান্নবা থাক্তা পুম্নমকপু য়েংবগী মপুং ওইবা ৱাখল্লোন্নি হায়না লোহিয়াজীনা থাজরম্মি। সোসিএলিজম কায়থরকপনা মান্নবা মিৎয়েং য়েংবগী চৎনবী মাঙলক্কনি হায়না মহাক্না চেকশিনৱা হায়বীরম্মি। ঐখোয়না থৌওং অনিমক ভারত্তা উখ্রে। ভারতকী তসেংবা ৱাখল্লোন্দা খুন্নাই হায়বসি য়েৎননীংঙাই ওইবা হীরম নত্তে, মসিদি অপুনবা শক্তমগী ফ্রেমৱর্ক অমা ওইনা উবনি। ঐখোয়গী ওইনদি, সরকারনা ঐখোয়গী সংস্কারনি, সংস্কৃতীনি, মহৌশাগী চৎনরোলনি। মরম অদুনা, লোহিয়াজীনা কলচরগী মপাঙ্গলগা মরী লৈনবা ৱাখল্লোনগী ৱাফম থম্লমখি। দাঃ লোহিয়ানা রমায়ন মেলা শীন্দুনা অমসুং গঙ্গাগীদমক্তা চেকশিন্দুনা লৈবাক্কী চৎনবীগী মপাঙ্গল হেন্না কনখৎহন্নবা হোৎনরমখি। মহাক্না গঙ্গাগুম্বা সংস্কৃতীগী ইরোন্নবা তুরেলবু ঙাক-শেনবগী মতাংদা দিকেদ কয়াগী মতাংদগী ৱাজরম্লবনি। ঙসিদি, নমামী গঙ্গে খোঙথাংগী খুত্থাংদা লৈবাক্কী অদুগুম্বা মঙলান মঙফাওনহল্লি। ঙসিদি, লৈবাক অসিনা মশাগী খুন্নাইগী কলচরগী ওইবা খুদমশিংবু হিংগৎহল্লি। খুন্নাইগী পাঙ্গল, ঐখোয়গী চৎনবীগী লৈনবা মরীশিংবু মপাঙ্গল হেন্না কনখৎহল্লি। মতৌ অসুম্না, অনৌবা ভারতনা মশাগী হক্তগী ৱাংমা লান্দুনা মশাগী থৌদাংগী ৱারীসু শাবা হৌরে। ইশাগী থৌদাংগী ৱাখল্লোন্না মপাঙ্গল লৈরকপা মতমদা, খুন্নাইনা মথন্নতা মপাঙ্গল লৈরক্কদবনি।

মরূপশিং,

সোসিএল জস্তিসকী ইথিলবু য়াজদুনা, মসিবু ইন্দুনা চৎপা হায়বসি খুন্নাইগী সেবা তৌবদা য়াম্না তঙাই ফদবনি। লৈবাক্না ঙসি নীংতম্বগী চহি ৭৫ মপুং ফারকপসিদা অমৃত মহোৎসব পাংথোক্লি, মসিবু নীংথিনা খঙদুনা, মসিগী মাইকৈদা চৎপা হায়বসি য়াম্না মরু ওইবনি। সোসিএল জস্তিস হায়বদি খুন্নাইগী কাঙলুপ খুদিংনা মান্নবা খুদোংচাবা ফংগদবনি হায়বনি, মীপুম খুদিংনা পুন্সিগী তঙাই ফদবা পোৎলমশিং ফংগদবনি। দলিত, শোত্থরবা, ত্রাইবেল, নুপী, নাম্মা-শোইবা, মখোয়না মাংজিল থারকপা মতমদা লৈবাক চাউখৎকনি। হরমোহনজীনা অসিগুম্বা অহোংবা পুরক্নবা এজুকেসন্না খ্বাইদগী মরু ওইবনি খনখিবনি। মহাক্না এজুকেসনগী মতাংদা পাংথোক্লম্বা থবক-থৌরম কয়ানা নহারোল কয়াগী তুংগী পুন্সি শেম্বীরি। মহাক্কী থবকশিংবু ঙসিদি সুখরামজী অমসুং ইতাও মোহিতনা মখা তানা পাংথোক্লি।

লৈবাক অসিনা “এজুকেসনগী খুত্থাংদা পাঙ্গল হাপ্পা” অমসুং “এজুকেসন হায়বসিনা পাঙ্গলনি” হায়বা মন্ত্রগা লোয়ননা তুংলমচত্তা চঙশিল্লি। মরম অদুনা, ঐখোয়গী ইচানুপীশিংগী ‘বেতি বচাও, বেতি পরহাও’ কেম্পেন্না মায় য়াম্না পাক্লিবনি। সরকারনা ত্রাইবেল মফমশিংদা লৈবা অঙাংশিংগীদমক্তা এক্লাব্যা স্কুল হৌদোক্লে। অনৌবা এজুকেসন পোলিসীগী মখাদা ইমালোলদা মহৈ তম্বগী কাঙলোনসু শেম্লে। ইংলিশ খঙদবনা মরম ওইরগা, লাইরবা ইমুংগী অঙাংশিংনা মহৈ-মশিংদা শোত্থনা লৈহৌহন্দনবা নীংথিনা শীন-লাঙলে। মীপুম খুদিংগী য়ুম লৈহনবা, মীপুম খুদিংদা মৈ ফংহনবা, জল জীবন মিসনগী মখাদা য়ুম্থোং খুদিংদা তোতি ঈশিং ফংহনবা, লৌমীশিংগী সম্মান নিধীগুম্বা স্কিম অমসুং হোৎনজমন কয়ানা লাইরবা, দলিত-ত্রাইবেল, শোত্থরবশিংগী মঙলানশিংদা মশা হাপ্পীবগা লোয়ননা লৈবাক্কী সোসিএল জস্তিস্কী য়ুম্ফমসু হেন্না কনখৎহল্লি। অমৃতকালগী মথংগী চহি ২৫সিদি সোসিএল জস্তিস্কী মসিগুম্বা ৱারেপশিংবু শোইদনা মপুং ফানা মঙফাওনহন্নবা হোৎনবগী মতম্নি। ঐখোয় খুদিংনা লৈবাক্কী অসিগুম্বা খোঙথাংশিং অসিদা থৱাই হকচাং য়াওনা শরুক য়াগনি হায়বা ঐহাক্না থাজৈ। ঐহাক্না লৈখিদ্রবা অমসুং নুংশিরবা হরমোহন সিংহ য়াদবজীগী মফমদা অমুক্কা হন্না ইকায় খুম্নবা উৎচরি। ঐহাক্না পুম্নমকপু থম্মোই শেংনা থাগৎচরি।

*****