নুংশিজরবা ইরৈচাশিং

খুরুমজরি!

১. চহি মঙাগী মমাংদা, মীয়াম পুম্নমক্না ঐহাক্কী ইফমদা অচৌবা থাজবা অমা থম্বীখি, অমসুং ঐহাকপু ময়ামগী মীহুৎশিংগী থোঙদা ভারতকী রাস্ত্রপতি ওইনা খনবীখি। ঐহাক্কী মতম্না লোইরকপদা ঐহাক্কী ওফিস থাদোকপগী তাংকক অসিদা, ঐহাক্না ময়াম পুম্নমক্কী মফমদা ৱাখল্লোন মঙা তরাতং থমজনিংই।

২. নুংশিজরবা ইরৈচাশিং পুম্নমক্কী মফমদা অমসুং মীখলদা মায় পাক্লবা মীহুৎশিংগী মফমদা ইকাইখুম্নবা উৎচবগা লোইননা ঐহাক্কী ৱারোল অসি হৌজগে। ঐহাক্না লৈবাক শীনবা থুংনা কোইনা চৎতুনা লৈবাক মীয়ামগা উনজদুনা ৱারী ৱাতাই কয়া অমা শান্নজরকপনা ঐহাকপু শক্তি পীবী অমসুং ইথিল কয়া অমা পীবীখি। অপীকপা খুঙ্গংশিংদগী লৌমী অমসুং শিন্মীশিং, নহা ওইরিবা ৱাখল্লোন কয়াবু শেমগৎপীরিবা ওজাশিং, ঐখোয়গী লনবু ইনাক খুলহল্লিবা আর্তিস্তকশিং, ঐখোয়গী লৈবাক্কী ওইবা মায়কৈ কয়া অমা থিজিল্লিবা স্কোলারশিং, লৈবাক্কী লন কয়া অমা শেম্লিবা লল্লোন ইতীক তৌরিবা মীয়াম, মীয়ামগী সেবা তৌবীরিবা দোক্তর অমসুং নর্সশিং, লৈবাক শেমগৎপদা থৌদাং লৌরিবা সাইন্তিস্ত অমসুং এঞ্জিনীয়রশিং, লৈবাক অসিগী অচুম অরান ৱাতেম্বদা মতেং পাংলিবা এদভোকেৎ অমসুং জজশিং, লৈঙাক্লোনবু কাংলোন চুম্না চৎহল্লিবা সিভিল সর্ভেন্তশিং, চাউখৎপগা লোইননা খুন্নাই অসিগী মাইওন কয়াগা শম্নহল্লিবা ঐখোয়গী সোসিএল ৱার্করশিং, ভারতকী খুন্নাইদা ইস্বরগী লম্বী তাকপীরিবা প্রিচর অমসুং মাস্তরশিং – ঐহাক্কী ইথৌদাংশিং পাঙথোকপদা ময়াম পুম্নমক্না লেপ্পা লৈতনা মতেং পাংবীরক্লি। তেনশিন্না হায়রবদা, ঐহাক্না মতীক চানা মতেং কয়া অমা অমসুং খুন্নাই অসিগী কাংলুপ কয়াগী মরফমদগী থৌজাল কয়া অমা ফংজখি।

৩. ঐখোয়গী থৌনা ফরবা আর্ম ফোর্সেস, পেরা-মিলিতরী ফোর্সশিং অমসুং পুলিসশিংগা উন্নবগী তাঞ্জা অমা ফংজখিবদু ঐহাক্না মতম চুপ্পদা নিংশিংদুনতা লৈহৌরগনি। মখোয়দা লৈরিবা মমা লৈবাক নীংবগী ইথিল অসি অঙকপা অমনি, মদু য়াম্না তমজনিংঙাই ওই। ঐহাক্না পাক শন্না চৎপা মতমদা, ভারত মচা মপান্দা লৈবশিংগা ৱারী শান্নবা মতমদা, মখোয়না মমা লৈবাকপু কয়াগী মতীক নুংশিজবা অমসুং খঞ্জবা উবদা ঐহাক্কী থমোইদা অদুক্কী মতীক নুংশিখি। সিভিল এৱার্দশিং খুৎশিন্নবা মতমদা, ঐহাক্না থবক কয়াদা খ্বাইদগী অখন্নবা ৱাখল্লোন চেনবা মীওই খরগা উন্নবগী তাঞ্জা অমসু ফংজখি। কৎথোকপা অমসুং খাঙবা কনবগা লোইননা, মখোয়না অতোপ্পা ভারত মচাশিংগীদমক হেন্না ফরবা হয়েং অমা শেম্নবা হোৎনবদা অচিনবা ওইজরি।

৪. হায়রিবশিং অসিনা লৈবাক অমা হায়বসি মদুদা লৈরিবা মীয়াম্না শেম্মি হায়বসি অমুক্কা হেন্না চেৎশিলহল্লে; অমসুং অদোম-অদোম্না ভারতপু হেন্না-হেন্না ফগৎনবা হোৎনবীরিবা অসিনা তাক্লে মদুদি লৈবাক অসিগী তুংলমচৎ অসি হেন্না অফবা মফমদা লৈরি।

৫. হায়রিবা এক্সপেরিএন্সশিং অসিনা অচৌবা পুৱারীগী থৌদোকশিংনা মীওই অমমমগী পুন্সি করম্না শেম্বগে হায়বা তাক্লিবা ঐহাক্কী অঙাং ওইরিঙৈ মতমবু নিংশিংহল্লে।

৬. ঐহাক্না অপীকপা খুঙ্গং অমদা চাউরকপা মতমদা, লৈবাক অসিনা নীংখা তম্বা হৌরকপদা ঙাইরমখি। মতম অদুদা লৈবাক অসিবু নৌনা শেমগৎনবা অনৌবা পাঙ্গলগী ইথৎ অমা লাকখি; অনৌবা মঙলান কয়া অমা লৈরখি। লৈবাক অসিবু শেমগৎনবা হোৎনবা মতমদা ঐহাক্না মতৌ করম্না হেন্না মপুং ফাবা মওংদা শরুক য়াবা ঙমগদগে হায়না ঐহাক্কীসু মঙলান অমা মঙজখি। লৈবাক্না লৈরঙ তাদুনা শাবা য়ুম অমদা লৈবা নহা ওইরিবা নুপা মচা অমনা রিপব্লিক অসিগী খ্বাইদগী ৱাংবা কন্সিত্যুসনেল ওফিস অমগী ৱাখলদি লাম্বা ফংলুদে। অদুবু ভারতকী গনতন্ত্র অসি কদাই ফাওবা শক্তি লৈবগে হায়বদু মীয়াম পুম্নমক্না অপুনবা পন্থুং অমা পুরক্নবা হোৎনবদা শরুক য়াহন্নবগী লম্বী অমা পীবীরিবা অসিনা তাক্লে। করিগুম্বা পরোংখ খুঙ্গংদগী রাম নাথ কোভিন্দ অদুনা ময়ামগী মফম ৱারোল খরা থম্বা ঙম্বা তারবদি, মসি ঐখোয়গী মশক থোক্লবা গনতন্ত্রগী ওইবা ইন্সতিত্যুসন অসিননি হায়গনি।

৭. ঐহাক্কী খুঙ্গংগী মতাংদা পল্লুরবনিনা, ঐহাক্কী পুন্সিগী খ্বাইদগী কাউঙমদবা থৌদোকশিংগী মরক্তা অমা ওইরিবা ঐহাক্কী তার্মগী মনুংদা য়ুমদা চৎখিবা অমসুং কানপুরদা লৈবা ঐহাক্কী ওজাগী মখোঙ শোক্না মখোয়গী থৌজাল নিজখিবা অসি পঞ্জনিংই। চহি অসিদা, প্রধান মন্ত্রীনা ঐহাক্কী খুঙ্গং পরোংখতা লাক্তুনা ইকাইখুম্নবা উৎপীরম্মি। অসিগুম্বা ঐখোয়গী হৌরকফমগা শম্নবা অসিনা ভারতকী মশক অদু তাক্লিবনি। হৌজিক্কানগী হৌরক্লিবা নহাশিংদা অসিগুম্বা মখোয় মখোয়গী খুঙ্গং অমসুং লমদম, মখোয়গী মহৈশঙ অমসুং ওজাশিংগা শম্নদুনা লৈবগী চৎনবী অসি লেপহন্দনা মখা চৎথনা থম্নবা ঐহাক্না হায়জনিংই।

নুংশিজরবা ইরৈচাশিং পুম্নমক,

৮. লৈবাক অসিনা 'অজাদি কা অমৃৎ মহোৎসব' পাঙথোক্লি। মথং থাদদি, ঐখোয়না নীংখা তমখিবগী ৭৫শুবা কুম্মোন ঐখোয়না পাঙথোক্লগনি। ঐখোয়না নীংখা তমখিবগী নুমিৎ চাম্মা মপুং ফাগদবা চহি ২৫ ৱাৎলিঙৈগী 'অমৃৎ কাল'দা চঙলগনি। হায়রিবা কুম্মোন অসি নীংতমখিবগী খোঙচৎতা, মালেম পুম্বগী মফমদা খ্বাইদগী ফবা অমসুং তৌবা ঙম্বশিং পুথোক্নবা শাংলবা খোঙচৎ অমনি।

৯. হৌজিক্কী মতমদা, ঐখোয়গী মশেক মঙাল চাউরবা খোঙচৎ অসি লোইলম সাশন লৈরিঙৈ মনুংদগী লৈবাক্কী নুংশিবা ফাওবা অমসুং নীং তম্বগী ঈহৌ হৌখিবা অসিদগী হৌরি। তরামাপল শুবা চহি চাদা লৈবাক শীনবা থুংনা ঈহৌ কয়া অমা হৌখি। অনৌবা নুমিৎকী মশেক মঙালগী মরু হুনবীরম্বা অথৌবা কয়া অমগী মমিং কয়া অমা ঐখোয়না মতম শাংনা কাউথোক্লুরে। মখোয়শিংদুগী মনুংদগী খরনা হোৎনজরম্বা কয়া অমা চহি খরা অসিদা খক্তং শিংথানরি। চহি চা অসিনা লোইরকপদা তোঙান-তোঙানবা শিংনবা কয়া লাক্তুনা অনৌবা ৱাখল লৌশিং কয়া অমা পোকহল্লে।

১০. গান্ধীজিনা ১৯১৫দা ইমা লৈবাক অসিদা হল্লকপা মতমদা, লৈবাক নীংবগী ৱাখল্লোন অসি খোঙজেল য়াঙখৎলকখি। ঐহাক্না মতম চুপ্পদা থাজৈ মদুদি অতোপ্পা লৈবাক অমত্তনা ভারতকুম্না কুনশুবা চহি চা হৌরকপগী অতেনবা মতম অসিদা অখন্নবা ৱাখল্লোন চেনবা লুচিংবা য়াম্বা লাইবক ফবা লৈবাক অমা ওইরকখিদে। অনৌবা মতমগী 'রিশি' অমগুম গুরুদেব রবিন্দ্রনাথ তেগোরনা ঐখোয়গী নাৎকী লম্বেল তাক্নবা হোৎনবীরম্মি, অদুগা বাবাসাহেব ভিমরাও অম্বেদকরনা খ্বাইদগী চাউখৎলবা লৈবাক অমদা মান্নবা খুন্নাই অমা পুরক্নবগীদমক হনবা লৈতনা অচুম্বা পুথোকপীরম্মি। তিলক অমসুং গোখলেদগী ভগৎ সিংহ অমসুং নেতাজি ফাওবা, জৱাহর্লাল নেহরু, সর্দার পতেল অমসুং শ্যামা প্রসাদ মুখর্জীদগীনা সরোজিনি নাইদু অমসুং কমালাদেবী চত্তোপাধ্যয় ফাওবা – মীওইবগী পুৱারীদা অসিগুম্বা অথৌবা ৱাখল চেনবশিং অসিনা অমত্তা ওইনা মান্নবা পান্দম অমগীদমক হোৎনখিবা অতৈ মফম অমা লৈতে।

১১. মমিং কয়া অমা ঐহাক্কী ৱাখলদা লাক্লি, অদুবু ঐহাক্না থম্নিংবা ৱাখল্লোন্দি নীংখা তম্বা ভারত অমগীদমক তোঙান-তোঙানবা লুচিংবশিং অমসুং মখোয়গী তোঙান-তোঙানবা ৱাখল্লোন কয়ানা নীংখা তম্বগী ঈহৌদা চাউনা কত্থোকপীরম্মি। গান্ধীজিসু খ্বাইদগী ফজবা ফল ফংখিবা অনৌবা ৱাখল্লোন পুথোকপা অমসুং পুন্সি কয়া অমগী অহোংবা মায়কৈ পুবীরকখিবা মীশক অমনি।

১২. ঐখোয়বু ঙসি লমজিংবীদুনা চৎলিবা গনতন্ত্রগী লম্বেলগী মপুং ফাবা মেপ অসি কন্সতিত্যুএন্ত এসেমব্লীনা দ্রাফ তৌবীরম্বনি। মসিদা লৈবাক শীনবা থুংবদগী অফাওবা ৱাখল কয়া অমা য়াওরি মসিগী মরক্তা হন্সবেন মেহতা, দুর্গাবাই দেশ্মুখ, রাজকুমারি অমৃত কৌর অমসুং সুচেতা কৃপালানিগুম্বী শক্নাইরবী নুপী ১৫ য়াওরি। মখোয় অমমমদগী থোক্লকপা মমল নাইদ্রবা ৱাখল্লোন কয়া য়াওরবা মখোয়না শেম্বীরম্বা সংবিধান অসিনা ঐখোয়বু লমজিং মৈরা ওইরি। মসিদা য়াওরিবা ভেল্যুশিং অসিনা নীংশিংবা থোক্ত্রবা মতমদগী লৈরক্লবা ভারতকী ইথোসশিংগী শরুক অমা ওইরি।

১৩. সংবিধান লৌখৎত্রিঙৈ মমাংদা কন্সতিত্যুএন্ত এসেমব্লীদা দা. অম্বেদকরদা মহাক্কী  অরোইবা ৱারোল পীবা মতমদা গনতন্ত্রগী মখল অনিগী মরক্তা লৈরিবা খেন্নবদু পুথোকপীরম্মি। ঐখোয়না ইচম চম্না রাজনিতীগী ওইবা গনতন্ত্রদা খক্তমক পেন্থোকপা য়াদে হায়না হায়বীখি। ঐহাক্না কোৎ তৌজরি, "ঐখোয়না রাজনিতীগী গনতন্ত্রবু খুন্নাইগী গনতন্ত্র ওইহন্নবসু হোৎনগদবনি। খুন্নাইগী গনতন্ত্রনা য়ুম্ফম ওইনা লৈত্রবদি রাজনিতীগী গনতন্ত্র অসি কুইনা চৎলোই। খুন্নাইগী গনতন্ত্র হায়বসিদি করিনো? মসিনা নীংতম্বা, মান্নবা অমসুং ইকাইখুম্নববু পুন্সিগী নিয়ম অমা ওইনা উহনবা ঙম্বা লম্বী অমনি। নীংতম্বা, মান্নবা অমসুং ইকাইখুম্নবগী নিয়ম অসি ত্রিনিতী অমদা তোখাইবা শরুক অমা ওইনা লৌবা য়াদে। মখোয় অসি অমদগী অমা হেক লৌথোকপা মতমদা গনতন্ত্রগী মশক অসি মায়থিবা পীবগীদমক্তনি মখোয় অসিনা অপুনবা ত্রিনিতী অমা শেম্মি হায়রিবসি।"

নুংশিজরবা ইরৈচাশিং,

১৪. হায়রিবা অৱাংবা ৱাখলগী ত্রিনিতী অসি অৱাংবা থাক, ফজবা অমসুং মাংদা পুখৎপা হায়বদুনি। মখোয় অসি মশক লৈতবা পোৎশক অমগুম্না চম্না লৌফদে। অনৌবা মতম খক্তদা নত্তনা অরিবা মতমদা ফাওবা ঐখোয়গী পুৱারীনা ঐখোয়দা মখোয় অসি তশেংনা লৈবা অমনি হায়বসি তাকপীরি; মখোয় অসি উবা ফংখ্রে অমসুং য়ুগ কয়া কয়াদা ঐখোয়না উবা ফংখ্রে। ঐখোয়গী ইপা ইপুশিং অমসুং অনৌবা লৈবাক অমা লিংখৎপীরম্বা মীওইশিংনা জস্তিস, লিবর্তী, ইক্বেলিতী অমসুং ফ্রেতর্নিতীগী ৱাহন্থোক অসি থবক কন্না নোম্বা অমসুং সেবা তৌবগী ৱাখল্লোন অসিগা মান্ননা খুদম পীবীরম্মি। ঐখোয়না তৌগদবা হায়ববু মখোয়গী খোঙ্গুল লীবা অমসুং লেপ্পা লৈতনা চৎপা হায়বসিনি।

১৫. অসিগুম্বা অৱাংবা থাক্কী ৱাখল্লোনশিং অসিনা ঙসিদি লৈবাক্কী মীওই অমগীদমক করি তৌরবগে? মসিগী মরু ওইবা পান্দমদি মখোয়না হিংবগী নুংঙাইবা অদুবু খঙহনবদা মতেং পাংনবনি হায়না ঐহাক্না থাজৈ। মদুগীদমক্তা অহানবদা মখোয়গী তঙাই ফদবশিং অদু ফংহনগদবনি। রিসোর্সশিংগী অৱাৎপা নংখিবা মতম অদুদগী হৌজিক ঐখোয় তশেংনমক য়াম্না শাংনা লাকখ্রে। হেন্না ফবা য়ুম কৈ, অমসুং ইমুং খুদিংমক্তা মৈ অমসুং থক্ননবা ইশিং ফংহন্ননবগী পান্দমগা লোয়ননা ঐখোয়না হোৎনরি। অহোংবা অসিবু ওইথোকহল্লিবা অসি মীচং মীখায় নাইদবা  অফবা লৈঙাক অমসুং চাউখৎপগী খোংজেল য়াঙখৎলক্লিবা অসিননি। 

১৬. তঙাই ফদবশিং ফংলবা মতুংদা মীপুম খুদিংমক্তা মখোয়গী তৌবা ঙম্বগী পাঙ্গল অদুবু খঙহনবীদুনা তৌফম থোকপশিং অদু মশাদা তৌহনবা মথৌ তাই। মতাং অসিদা এজুকেসন অসিনা মরুনি। নেস্নেল এজুকেসন পোলিসিনা নৌরিবা ভারত মচাশিংদা মখোয়গী হেরিতেজকা শম্নবদা অমসুং কুনমাথোই শুবা চহি চাদা মখোয়গী তৌবা ঙম্বশিং পুথোকচনবা কন্না হোৎনবীগনি হায়না ঐহাক্না থাজৈ। মখোয়না হয়েং য়াইফনবগীদমক হকশেল অসি তঙাই ফদে। পেন্দেমিক অসিনা মীয়ামগী হেথকেয়র ইনফ্রাস্ত্রকচরদা মখা তানা ফগৎহনবগী তঙাই ফদবা অদু খঙহল্লি। লৈঙাক্না থবক অসিদা অহানবা মীৎয়েং চঙবীবগীদমক্তা ঐহাক্না নুংঙাইবা ফাওই। এজুকেসন অমসুং হকশেলবু ফরবদি, ইকোনোমিক রিফোর্মশিংনা মীয়াম্বু খ্বাইদগী নুঙাইবা পুন্সি মরেল অমা ফংহল্লগনি। ২১ শুবা চহি চা অসিবু ভারতকী চহি চা অমা ওইহন্ননবগীদমক ঐখোয়গী লৈবাক অসি শেম শারে হায়না ঐহাক্না চেৎনা থাজৈ।

নুংশিরবা মীয়াম,

১৭. ঐহাক্কী চহি মঙাগী তার্ম অসিদা, ঐহাক্না খ্বাইদগী ঙমজবা থাক্তা ঐহাক্কী থৌদাংশিং পাঙথোকখি। দা. রাজেন্দ্র প্রসাদ, দা. এস. রাধাকৃষ্ণন অমসুং দা. এ.পি.জে. অব্দুল কলামগুম্লবা শক্নাইরবা মীওইশিংগী মতুংদা লাকপা মীওই অমনি হায়না ঐহাক্না ফাওজৈ। ঐহাক্না রাস্ত্রপতি ভৱন্দা চঙবা মতমদা ঐহাক্কী হেক মমাংদা লৈখিবা শ্রী প্রনব মুখর্জীনসু ঐহাক্কী থৌদাংশিংগী মরমদা মহাক্না খংজ-হৈজবশিং ঐহাক্কী ইফমদা তম্বীরম্মী। হৌজিক ফাওবা ঐহাক্না করিগুম্বা অমা চমম্নরকপা মতাং খুদিংদা ঐহাক্না গান্ধীজি  অমসুং মহাক্কী অফাওবা লাইৱা অদুবু নিংশিংজৈ। খ্বাইদগী লাইরবা মীওই অমগী শক্তম্বু নিংশিংদুনা ঐহাক্না থাংগদৌরিবা খোঙথাং অসিনা মঙোন্দা খরদা ওইরবসু কান্নগদ্রা হংজৌ হায়বা মহাক্কী পাউতাক। অমুক্কা হন্না হায়জরবদা, নুমিৎ খুদিংগী  য়ামদ্রবদা মিনিৎ খরদ ওইরবসু মীয়াম্না গান্ধীজিগী পুন্সি অমসুং পাউতাকশিংবু নিংশিংবীনবা ঐহাক্না মীয়ামদা হায়জরি ।

নুংশিজরবা ইরৈচাশিং,

১৮. মহৌশা ইমা অসি অকনবা অৱা মৈশা নংলে অমসুং অইং অশাগী ফীভম কায়বা অসিনা প্লানেৎ  অসিগী তুংগী পুন্সিদা খুদোংথিনিঙাই ওইহনলকপা য়াই। ঐখোয়না ঐখোয়গী অকোয়বা, ইশিং, নুংশিৎ অমসুং কংফালগী ফীভম্বু ঐখোয়গী ইচা ইশুশিংগীদমক খন্দুনা ঙাক শেনগদবনি। ঐখোয়গী নুংতিগী তৌবা থবক থৌরমশিংদা ঐখোয়গী অকোয়বদা লৈরিবা পাম্বীশিং, চীং, পাৎ অমসুং তুরেলশিং লোয়ননা অতোপ্পা অহিংবা জীবাশিংবু ঙাক শেন্ননবগীদমক চেকশিনগদবনি । করিগুম্বা ঐহাক্না  ঐহাক্কী ইরৈচাশিংদা পাউতাক অমা পীয়ু হায়বা তারবদি মসি ওইগনি।

১৯. ঐহাক্কী ৱারোলগী অরোইবা ওইনা, ঐহাক্না ঐহাক্কী ইরৈচাশিংগী মফমদা থম্মোই শেংনা ইকাই খুম্নবা ফোংদোকচরি। ভারত ইমাগী মফমদা খুরুমজরি! অমসুং মীপুম খুদিংমক্তা য়াইফবা ওইরসনু হায়বা পাউজেল পীজরি।

থাগৎচরি।

***************