ঙসি নিউ দিল্লিদা য়ুথ এফেয়ার্স অমসুং স্পোর্তসকী য়ুনিয়ন মিনিস্তর শ্রী অনুরাগ থাকুরনা শান্নরোয়শিংদা পীবা শেনগী মনাশিং, নেসনেল ৱেলফিয়ার অমসুং পেন্সনগী নৌনা শেমদোক্লবা স্কিমশিং, স্পোর্তস দিপার্তমেন্তগী স্কিমশিংগী ৱেব পোর্তেল (dbtyas-sports.gov.in) অমসুং নেসনেল স্পোর্তস দিবলপমেন্ত ফন্দ ৱেবসাইদ(nsdf.yas.gov.in) হৌদোকখ্রে।

থৌরম অদুদা য়ুনিয়ন মিনিস্তরনা হায়খি মালেমগী শান্নবগী থৌরমশিংদা মেদল ফংলকপা শান্নরোয়শিং অমসুং মখোয়গী কোচশিংদা শেনগী মনা পীবা স্কিম, পন্দিৎ দিনদয়াল উপধ্যায় নেসনেল ৱেলফিয়ার ফোর স্পোর্তসপর্সন্স(পি দি উ এন দব্লিউ এফ এস) অমসুং স্পোর্তস দিপার্তমেন্তনা হৈথোই-শিংথোইবা শান্নরোয়শিংদা পেন্সন পীবগী স্কিমদা য়ুথ এফেয়ার্স অমসুং স্পোর্তস মিনিস্ত্রিনা মরুওইবা কয়া শেমদোক্লে। হায়রিবা স্কিমশিং অসি হেন্না খুৎলোইনবা, লাইনা শীজিন্নবা য়ানবা অমসুং অরোন-অথুপ লৈতনবা পান্দমদা থবকশিং অসি পায়খৎপনি।

য়ুনিয়ন মিনিস্তরনা মখা তানা হায়খি মসিগী অফবা থবকশিং অসি দিজিতেল ইন্দিয়াগী মখাদা নাগরিকশিংদা শক্তি পীনবা অমসুং সরকার অমসুং নাগরিকশিং অনিগী মরক্তা লৈরিবা অহোবশিং মেনখৎনবা, খুদোংচাদবশিং অমসুং পাম্বৈশিং পুথোক্নবা অমসুং প্রধান মন্ত্রীগী অপীকপা সরকার অমসুং অচৌবা লৈঙাক্কী পান্দম ফংনবা অতোপ্পা খোঙথাং অমনি। হায়রিবা শেমদোক্লবা স্কিমশিং অসিনা অকক্নবা মতমগী মনুংদা শান্নরোয়শিংদা কান্নবা পীনবা হেন্না অরোন-অথুপ লৈতনা থবক তৌগনি অমসুং মরম চানা থবক পাংথোক্কনি।

শ্রী থাকুরনা হায়খি হৌজিক লনাই ওইনা শান্নরোয় অমনা হায়রিবা স্কিম অহুম অসিদা শরুক য়াবা য়ারগনি। হান্নদি স্পোর্তস ফেদেরেসনশিং/সাইগী খুৎথাংদা শরুক য়াহল্লম্বনি। করিগুম্বা মতমদা শান্নরোয় অমনা থাগৎলকপা প্রোপোজেল অদু অয়াবা পীবদা চহি ১-২ হেন্না চংবা য়াওখি। মতম চানা এপ্লিকেসন পীশিন্নবা অমসুং মখা তারকপদা শেনগী মনাগী অয়াবা পীনবা, শান্নরোয় অমনা অকক্নবা থৌরম অমগী অরোইবা নুমিত্তগী পারগা থা ৬গী মনুংদা শেনগী মনাগীদমক ওনলাইন্দা এপ্লিকেসন পীশিনবা য়ারগনি।

য়ুনিয়ন মিনিস্তরনা মখা তানা হায়খি মতম চংবা হন্থহন্নবা হায়রিবা স্কিম অহুম অসিগী ভেরিফিকেসনগী থবকশিং লাইথোকহল্লে। মতম চানা কোচশিং মখোয়গী শেনগী মনা ফংবা ঙম্নবা স্কিম অসিদা অহোংবা কয়া লৈরে। পেন্সনগী খুদোংচাবশিং দিয়াফ্লাইয়ম্পিককী শান্নরোয়শিংসু ফংলগনি। হায়রিবা স্কিম অহুম অসি পায়খৎনবা স্পোর্তস দিপার্তমেন্তনা শান্নরোয়শিংনা এপ্লাই তৌবা য়ানবা ৱেব পোর্তেল(dbtyas-sports.gov.in) হাংদোক্লে।

শ্রী থাকুরনা হায়খি শান্নরোয়শিংগী রেজিস্তার মোবাইল নম্বরদা ও.তি.পি থাদুনা শান্নরোয়শিংনা মখোয়গী এপ্লিকেসনশিং খোঙ্গুল লিনবগী খুদোংচাবা মসিগী ওনলাইন পোর্তেল অসিদা লৈরে। এপ্লিকেসনশিং হকথেংন্নবা মিনিস্ত্রিদা পীশিনবা মথৌ তাদ্রে। ভারত সরকারগী দি.বি.তি মিসনগী পান্দমশিং ফংবা ঙম্নবা শান্নরোয়শিংদা একাউন্তশিংদা হকথেংন্না ফন্দশিং হাপচিনবা য়ানবা পোর্তেল অসিগা দি.বি.তি-এম.আই.এসকা অমতা ওইরে।

য়ুনিয়ন মিনিস্তরনা মখা তানা হায়খি অকক্নবা মতমগী মনুংদা এপ্লিকেসনশিংগী থবক লোইশিনবদা পোর্তেল অসিনা দিপার্তমেন্তগী মতেং পাংবা খক নত্তনা শান্নরোয়শিংগী তোঙান-তোঙানবা দেতাশিং অমসুং রিপোর্তশিং পুথোকপদশু শীজিন্নরগনি। শান্নরোয়শিংগী দরকার ওইবশিংগা চুশিন্নবা ঙম্নবা মতম মতমগী মতুংইন্না ওনলাইন পোর্তেল অসি ফগৎহনগনি।

মহাক্না মখা তানা হায়খি ‘নেসনেল স্পোর্তস দিবলপমেন্ত ফন্দ’(এন এস দি এফ)গীদমক দিপার্তমেন্তনা ৱেবসাইদ(nsdf.yas.gov.in) হাংদোক্লে। ফন্দ অসি কেন্দ্র অমসুং রাজ্য সরকারশিংগী সি.এস.আরগী মতেংশিং, পি.এস.য়ুশিং, লনাই কম্পেনিশিং অমসুং লনাই মীওইশিংনা শান্নবা চাউখৎনবা পাংলকপা মতেংদগী শেম্বনি। লনাই মীওইশিং, ইন্সতিতুৎশিং অমসুং কোর্পোরেতশিংনা শান্নরোয়শিংগীদমক, শান্নফমশিংগী অমসুং শান্ন-খোৎনবগী থৌরমশিংদা হকথেংন্না মতেং পাংবা য়াগনি। এন.এস.দি.এফকী ফন্দ অসি তার্গেত ওলেম্পিক পোদিয়ম(তোপ) স্কিমদা, শক্নাইরবা শান্নরোয়শিং অমসুং শান্নবগী লুপশিংনা মচাক-মথুমশিং শেমগৎপদা শীজিন্নরে। মসিগী ৱেবসাইদ অসিনা লৈবাক অসিদা শান্নবা চাউখৎনবগীদমক এন.এস.দি.এফ চাউনা মাইপাকহনবদা মতেং পাংলগনি।

*****